Olsem Wanem? Sik AIDS i Go Bikpela Long Afrika?
Wanpela man long Afrika i raitim dispela stori bilong Kirap!
ATING yu tu i bin harim ol dispela tok na yu pret tru. Olsem: Planti milion long Afrika bai kisim sik AIDS. Marasin insait long bodi bilong ol bai i no gat strong moa long pasim ol sik nogut. Wankain samting i kamap long Yurop long yia 1300 samting, taim sik bubonik i kamap long dispela hap, na bihain planti man i bagarap na dai long dispela sik.
Bihain ol nius i malolo liklik long stori long sik AIDS, long wanem, stori bilong en i pulap long ol nius na ol man i les long kaunim ol dispela stori i tokaut long bikpela bagarap bai kamap long bihain. Olsem wanem? Bai samting nogut tru i kamap? Na i tru dispela sik AIDS i stap long olgeta hap bilong Afrika, o olsem wanem?
Wanpela saveman (Dr. Andre Spier) i tok: “I no gat wanpela man i save hamas man bai kisim sik AIDS. Ating bai planti man i dai na dispela inap bagarapim yumi olgeta.” Long 1988, long wanpela bikpela kibung bilong sik AIDS long biktaun Stokholm long Swiden, narapela saveman (Dr. Lars Kallings) i tok: ‘I no longtaim nau, ating tupela yia samting na bai yumi lukim planti man i dai.’
Sampela yia i lus pinis, kirap long taim dispela saveman i mekim dispela tok. Nau ol dispela tok i wok long kamap tru. Planti man i wok long dai. Tasol planti moa bai dai long bihain.
Ol Man i Dai Pinis na Ol Man i Wok Long Dai
Long planti hap bilong ples Sahara long Afrika, planti man i wok long dai na bikpela bagarap i wok long kamap. Wanpela nius (Nature) i tok olsem: ‘Long planti taun, namba wan samting i wok long kilim i dai ol bikpela man na ol pikinini, em sik AIDS.’ Long wanpela biktaun long Afrika, planti tumas i dai long sik AIDS na ol pris i hatwok long mekim tok bilong planim olgeta man i dai.
Long Oktoba 1991, ol praim-minista bilong ol kantri i insait long lain Komonwelt, ol i bung long Simbabwe na ol i kisim wanpela ripot i toksave long sik AIDS long hap bilong Afrika. Dispela ripot i tok, long sampela hap, olsem 50 i go 80 pesen bilong olgeta man i slip long ol haus sik, ol i gat sik AIDS. Long kantri Uganda, wanpela saveman (Dr. Stan Houston) i tok olsem, inap 15-pela yia pinis ol man i pait long gavman na planti tru i bin dai. Tasol namba bilong ol man em ol i dai long sik AIDS, em i winim tru namba bilong ol man i dai long dispela pait.
Inap sampela mun, ol dokta na ol saveman i skelim bodi bilong ol man i dai pinis na i slip long bokis ais long haus sik long taun Abidjan long Aivori Kos, na ol i painim wanem samting? Wanpela nius (Science) i stori olsem: Sik AIDS i “namba wan as bilong dai” i painim ol man i bikpela pinis long taun Abidjan. Tasol dispela nius i tok moa olsem, ‘ating namba tru bilong ol man i dai long sik AIDS i winim tru’ dispela namba em ol dokta na ol saveman i kolim.
Lain Wol Helt Oganaisesen (WHO) tu i tok olsem yumi save long liklik hap tasol bilong dispela hevi—bikpela hap tru bilong en i stap hait yet. Wanpela nius (New Scientist) i tok, lain WHO ‘i save olsem ol ripot bilong sik AIDS em planti kantri long Is na Sentral Afrika i salim i go long ol i stori tasol long liklik lain i dai long sik AIDS. Ol ripot i no kamapim tru namba bilong olgeta man em ol i bin dai long sik AIDS.’
Sik i Stap Hait
Sik AIDS inap i stap hait insait long bodi bilong man inap longpela taim na man i no save olsem em i gat dispela sik inap long taim em i laik bagarap. Inap 10-pela yia samting, dispela man inap karim binatang jem bilong sik AIDS insait long bodi bilong em. Bai skin bilong em i orait na em i ting em i no gat sik, tasol nogat. Em i no save em i gat dispela sik inap long taim sik i kamap ples klia! Ol dispela lain i ting ol i no gat sik AIDS, em dispela lain ol i wok long givim dispela sik long ol narapela man.
Dispela sik i wok long kamap bikpela moa long olgeta hap bilong Afrika. Wanpela nius (African Affairs) i tok: ‘I gat planti man tru i stap long hap bilong raunwara Viktoria na 10 i go inap 15 pesen bilong ol man i bikpela pinis ol inap kisim dispela sik. Tasol ol man na meri em ol i save slip wantaim planti poroman, inap olsem 67 pesen bilong ol bai kisim dispela sik.’ Na narapela nius (Nature) i tok olsem: ‘Kirap long 1984, isi isi dispela sik i wok long i go bikpela na nau inap olsem 20 i go 30 pesen bilong ol man long planti bikpela taun, ol i gat dispela sik.’ Tingim—wanpela insait long olgeta 3-pela 3-pela man i bikpela pinis long Afrika bai dai insait long 10-pela yia!
Pastaim ol gavman na ol bikman i no laik tokaut long ol man long sik AIDS, tasol nau ol i wok long mekim olsem. Wanpela presiden bilong wanpela kantri long Afrika i tok strong long ol man i mas painim rot bilong pasim sik AIDS, long wanem, pikinini man bilong em i dai long dispela sik. Na narapela bikman bilong gavman em i tok olsem i gat 500,000 man ol i gat binatang jem bilong sik AIDS long kantri bilong em. Planti i no save olsem ol i gat dispela sik na ol i wok long givim long ol narapela man taim ol i pamuk.
“Tokim Ol Long Ol Samting i Kamap Long Hia”
Planti man moa i wok long kisim binatang jem bilong sik AIDS, na bihain namba bilong ol man em ol bai sik olgeta na dai em bai go antap tru. Dispela samting bai givim bikpela pen na hevi long planti man. Dispela samting i painim wanpela man (Khamlua) em i gat 59 krismas. Kirap long 1987 i kam inap nau, em i bin planim 11-pela pikinini na tumbuna pikinini bilong em—olgeta i dai long sik AIDS. Em i krai na i tok: “Tokaut long olgeta man long hevi bilong mi. Tokim ol long ol samting i kamap long hia.”
Samting i painim dispela man inap kamap long olgeta hap bilong graun, long wanem, ol man i wok long bihainim wankain pasin long givim dispela sik long ol narapela man. Tasol ating bai yu tok, ‘Bilong wanem ol lain long Afrika i wok long kisim planti pen na hevi olsem?’
[Rait long pes 3]
Long 1993, long sampela kantri i no gat planti wok bisnis long en, ‘sik AIDS bai kamap nambawan sik bilong kilim planti manmeri.’—Nius The World Today, bilong Inglan