Pas Bilong Ol Man

Ol Inap Kisim Bagarap?  Mi kaunim wanpela naispela stori nem bilong en “Ol Meri i Bin Mekim Bikpela Wok.” (Julai 8, 1999) Mi bin kirap nogut long lukim ol meri i wok long konstraksen ol i no putim samting bilong lukautim ai bilong ol.

R. L., long Amerika

Mipela i laik tokim ol man i kaunim dispela nius olsem, taim ol dispela meri i wok long konstraksen ol i bin putim aiglas bilong lukautim ai bilong ol. Ol i tokim ol dispela meri long rausim aiglas na bai man i ken kisim ol dispela piksa, olsem na ol i rausim aiglas bambai ol man i ken lukim gut pes bilong ol i amamas.​—⁠Edita.

Pasin i No Stret  Mi laik tok tenkyu long yupela long dispela stori “Ol Yangpela i Laik Save . . . Olsem Wanem Mi Inap Karim Hevi Bilong Pasin i No Stret?” (Oktoba 8, 1999) Maski mi yangpela, mi bin kisim planti hevi long pasin i no stret na long pait, olsem na bel bilong mi i bagarap nogut tru. Dispela samting i mekim na i hatwok long mi mekim wok bilong mi olsem painia, olsem mi bin mekim insait long 8-pela yia i go pinis. Dispela tok, “mekim ol samting yu inap mekim bilong karim dispela hevi,” em i strongim tru mi. Dispela tok i kamapim klia yupela i laikim tru ol narapela, na mi tok tenkyu tru long yupela long dispela.

A. G., long Itali

Toktok Wantaim Ol Narapela  Dispela stori “Ol Yangpela i Laik Save . . . Bai Mi Mekim Wanem Bilong Toktok Wantaim Ol Narapela?” (Disemba 8, 1999) i kirapim tru bel bilong mi. Mi gat 16 krismas na mi save hatwok long toktok wantaim ol narapela, na mi hatwok moa yet long mekim long ol miting Kristen. Tenkyu long yupela i tingim ol yangpela olsem mi em ol i gat dispela hevi. Bai mi traim long bihainim ol gutpela tok yupela i kamapim long dispela stori.

I. A., long Frans

Ol Pisin i Save Singsing  Tenkyu long stori “Ol i Singsing Gut Wantaim.” (Disemba 8, 1999) Mi inap tingim naispela musik ol dispela pisin i mekim taim ol i stap antap long han bilong diwai! Long olgeta de mi tok tenkyu long Jehova long em i bin wokim ol animal i save amamasim yumi.

Y. S., long Japan

Bilip Bilong Ol Tumbuna  Mi wanpela man i gat save long planti tok ples, na mi laik tokim yupela long wanpela popaia yupela i bin raitim long Kirap! bilong Novemba 8, 1999. Long ol stori “Bilip Bilong Ol Tumbuna​—⁠I Nogutim Yumi Olsem Wanem?” yupela i tok olsem taim wanpela man i kus na em i kolim dispela tok Jeman gesundheit dispela i wankain olsem em i tok “God bles.” Tasol long tok Inglis ol bai tanim dispela tok olsem health (olsem no ken sik).

C. C., long Amerika

Mipela i no bin tingting long tanim insait tru bilong dispela tok “gesundheit” long tok Inglis, nogat. Mipela i raitim dispela tok wantaim tupela tok i kam long narapela tok ples na ol man i save mekim “wankain” wok long en olsem dispela tok Inglis “God bles.”​—⁠Edita.

Pasin Bilong Sem  Tenkyu tru long stori “Ol Yangpela i laik Save . . . Bilong Wanem Mi No Save Toktok Wantaim Ol Narapela?” (Novemba 8, 1999) Dispela em kaikai i kam long taim stret. Pasin bilong sem em wanpela hevi mi bin karim long olgeta yia mi stap laip. Mi gat 17 krismas na mi pilim i hatwok tru long go toktok long ol nupela manmeri na bung wantaim ol nupela long ol miting Kristen. Long dispela as, planti taim mi no bin bung wantaim ol brata na sista na amamas wantaim ol taim rot i op long mekim olsem. Stori bilong yupela i helpim mi long save pasin bilong sem em wanpela pasin bilong planti man na em wanpela samting mi ken winim.

B. H., long Amerika