Pas Bilong Ol Man

God i Stap Tru  Ol tok bilong stori “God i Stap Tru o Nogat?” i bin helpim mi tru. (Februeri 8, 1999) Stori i helpim mi long save long dispela God mi bin harim planti tok long en tasol mi no bin painim em. Tenkyu tru long yupela i soim rot bilong tok i tru long ol man olsem mi.

C. P., long Brasil

Klos  Mi gat 11-pela krismas, na mi sot long sampela tok bilong kamapim tok tenkyu bilong mi long ol gutpela tok long dispela stori, “Klos Yumi Pasim​—⁠Em i Bikpela Samting?” (Februeri 8, 1999) Sampela taim i go pinis mi laik pasim klos wankain olsem ol wanskul bilong mi. Tasol dispela stori i helpim mi long save olsem klos bilong mi i mas i stret​—⁠mi no ken pasim klos i narapela kain olgeta.

A. S., long Estonia

Sampela taim mi bel hevi taim ol narapela i tok klos bilong mi em i olsem ol klos bilong bipo o ol i no gat stail. Stori bilong yupela i strongim mi tru, long wanem, em i kamapim klia olsem pasin bilong bihainim ol lo bilong Baibel em i gutpela samting.

R. L., long Brasil

Inap planti yia mi gat tupela kain tingting long ol Witnes Bilong Jehova, mi sori long ol tasol mi laik lap long ol tu. Bihain wanpela pren i givim mi wanpela Kirap! bilong Februeri 8, 1999. Mi amamas tru long kaunim dispela nius na i senisim tingting bilong mi long ol Witnes. Wanpela samting mi pilim tru em dispela stori long klos, em i kamapim stret pasin bilong mi yet long taim mi baim ol klos. Bihain bai mi no ken lukluk tasol long ol klos i gat nem na baim. Na bai mi askim pren bilong mi long givim sampela nius moa long mi bilong kaunim!

U. B., long Jemani

Tok Baksait  Tenkyu tru long stori “Ol Yangpela i Laik Save . . . Bilong Wanem Pasin Bilong Tok Baksait i Nogut?” (Mas 8, 1999) Sampela taim i go pinis, taim wanpela i bin mekim tok win olsem kongrigesen bai rausim mi, mi yet i pilim tru bel hevi em pasin bilong tok baksait i save kamapim. Dispela tok giaman i bagarapim tru bel bilong mi! Man i mekim dispela tok baksait i tok sori, tasol mi no bilip moa long em.

R. M., long Swiselan

Pasin bilong tok baksait i bikpela tru long skul bilong mi, olsem na dispela stori i strongim mi tru. Mi sem long tok olsem, mi save mekim tok baksait i nogutim tru nem bilong narapela. Na taim ol pren i bin tok baksait long ol narapela, mi putim yau na mekim sampela toktok tu. Olsem na taim mi kaunim dispela stori, mi kirap nogut na mi pilim olsem olgeta tok bilong stori i wok long stretim mi long ol samting mi bin mekim. Mi sem pipia tru long olgeta tok baksait mi bin mekim. Mi save pasin bilong tok baksait bai stap yet long skul bilong mi, tasol mi tingting strong long mi no ken insait liklik long en.

M. W., long Japan

Kalabus Long Saibiria  Mi pilim tru gutpela stori bilong Lembit Toom, “Inap 50 Yia Aninit Long Hatpela Gavman,” (Mas 8, 1999) na mi no inap wet long kamapim tok tenkyu bilong mi. Em i mas i gat strongpela bilip tru long God Jehova bilong em i ken abrusim ol dispela taim nogut tru. Dispela nupela pasin bilong i stap fri long lotu em ol brata bilong yumi long Rasia i kisim long nau i stret tru long ol i kisim.

J. D., long Amerika

Diwai i Save Singsing  Tenkyu tru long yupela i save kamapim ol stori long ol samting bilong graun. Wanpela stori mi laikim tru, em stori “Wanpela Diwai i Save Singsing.” (Mas 8, 1999) Mi no bin save liklik long dispela diwai nil bilong wisil. Bihain long mi kaunim stori long pairap olsem musik em ol nil na ol hul i save kamapim taim win i meknaisim diwai, mi tingim Song 96:​12, 13: “Olgeta diwai bilong bikbus bai mekim song bilong amamas [long Jehova].” Long samting em i mekim, dispela narapela kain diwai i litimapim nem bilong Jehova.

M. D., long Itali