Pas Bilong Ol Man

Bagarapim Marit  Mi bin stadi long dispela samting long bipo, tasol ol buk samting i no bin kamapim gut tok bilong en olsem ol dispela stori: “Taim Poroman Marit i Bagarapim Marit.” (Me 8, 1999) Long namba wan taim mi bin harim tok bilong Baibel, mi save pinis em tok i tru. Nau Jehova i givim mi narapela as na mi ken bilip long tok bilong en.

G. B., long Itali

Blok “Asua Bilong Husat?” i mekim gut bel bilong mi. Man bilong mi em i no stap gut long mi, olsem na mi katim marit. Olsem Jop, sampela taim mi laik i dai. (Jop 17:​11-​13) Tasol helpim mi kisim long famili na long ol brata sista Kristen i bin strongim mi long karim dispela hevi.

M. O., long Ajentina

Mi no ritim tasol ol dispela stori​—⁠mi givim bel tru long mekim olsem! Mi bin katim marit, na ol dispela stori i kamapim olgeta askim na olgeta samting mi tingting planti long en, em pasin bilong katim marit i bin kamapim. Tenkyu long tingim mipela.

E. L., long Frans

Mi gat 7-pela krismas taim papa bilong mi i lusim famili bilong mipela. Dispela i bin bagarapim tru bel bilong mipela. Sampela yia bihain, papa i askim mipela long em i ken kam bek na stap wantaim mipela. Mi wantaim ol brata bilong mi, mipela i no laik tru long em i kam i stap wantaim mipela, tasol mama i orait long em i kam bek. Taim mi ritim pinis ol stori bilong yupela, mi save long as na mama i orait long dispela samting i hatwok long mekim.

A. A., long Brasil

Yu Save?  Mi laik raitim pas long yupela long stori “Yu Save?,” em i save kamap long Kirap! Mi save laikim dispela hap, long wanem, ol i gat samting bilong mekim kru i wok long oltaim, na taim man i gat 78 krismas, em i mas i gat samting bilong helpim em long wokim tingting oltaim. Taim yumi kaunim Baibel, yumi no save holim long tingting bilong yumi olgeta liklik liklik hap bilong stori olsem hap “Yu Save?” i mekim. Olsem na mi save lusim sampela hap taim bilong kaunim olgeta skripsa ol i raitim long dispela hap. Tenkyu long dispela hap bilong Kirap!

J. W., long Amerika

Ol Bubu  Tenkyu long gutpela pasin yupela i mekim bilong kamapim dispela stori “Ol Bubu​—⁠Amamas na Hatwok Bilong Ol.” (Epril 8, 1999) Mi wanpela bubu i no gat man na mi mekim bikpela long tupela tumbuna pikinini man bilong mi. Mama bilong ol i save mekim nabaut long ol drak na em i mekim yet. Olsem stori i kamapim, taim ol tumbuna pikinini i kros mi mas karim dispela hevi. Mi yet mi no inap pilim hevi em ol pikinini papa tupela mama wantaim i lusim ol i save pilim. Tasol long yia i go pinis namba 2 tumbuna pikinini bilong mi i tokim mi, “Tenkyu long lukautim mipela.” Dispela tok i mekim na mi pilim tru hatwok na bel hevi bilong mi long mekim dispela wok na aiwara bilong mi i save pundaun, dispela i no lus nating.

D. B., long Amerika

Papamama i no bin lukautim gut mipela na ol i mekim nogut long mipela, tasol gutpela bubu meri bilong mipela i laikim mipela na em i lukautim gut mipela olsem na mi wantaim ol bikpela brata bilong mi inap karim dispela hevi inap planti yia. Ol tok i tru bilong Baibel em i skulim mipela long en i strongim bel bilong mipela long wok i go yet. Long nau, tripela tumbuna pikinini bilong em na 7-pela pikinini bilong ol, ol i Kristen i dediket pinis.

B. L. B., long Brasil

Mi gat liklik pikinini i gat wanpela yia na 5-pela mun, na tok pait i bin kamap namel long mi na tambu mama bilong mi long wok bilong lukautim em. Mi bel nogut tru long em na dispela i mekim mi no amamas moa maski mi stap long ol miting Kristen. Tasol dispela stori i helpim mi long save em i no meri nogut na i no olsem em i traim long kisim pikinini bilong mi, nogat. Mi tenkyu long Jehova long dispela gutpela tok mi kisim long taim stret bilong helpim mi.

M. Z. C., long Meksiko