Pas Bilong Ol Man
Bilip Bilong Ol Tumbuna Mi no wanpela Witnes Bilong Jehova, tasol mi bin kaunim ol nius bilong yupela inap 2-pela yia. Mi laik tok tenkyu long yupela long ol stori “Yu Ting God i Makim Pinis Ol Samting i Mas Painim Yu?” (Ogas 8, 1999) na “Bilip Bilong Ol Tumbuna—I Nogutim Yumi Olsem Wanem?” (Novemba 8, 1999) Bipo mi bin bilip olsem God i makim pinis ol samting bai painim yumi na mi bihainim ol bilip bilong ol tumbuna, long wanem, mi kamap insait long famili i gat dispela kain bilip. Tasol nau mi ting yupela i mekim tok tru long ol samting bilong lotu Kristen tru.
N. D., long Frans
Mi no amamas long dispela stori long ol bilip bilong ol tumbuna. Mi wanpela strongpela Katolik, na wanpela bilong ol dispela stori i tok long sampela pasindia i save “mekim mak bilong kruse” bilong bihainim bilip bilong ol tumbuna. Ol Katolik i save mekim dispela pasin olsem hap bilong beten bilong ol long God bambai em i ken lukautim ol long wokabaut bilong ol. Dispela em i wanpela bikpela samting long bilip bilong mipela na mipela i no ting em i wanpela bilip bilong ol tumbuna.
S. W., long Amerika
Mipela i mas tokaut stret olsem planti man i mekim mak bilong kruse ol i no tingting tumas long ol samting bilong lotu. Taim ol i askim wanpela man bilong Ostrelia i save pilai soka long i gat wanem as na em i save mekim mak bilong kruse long taim bilong pilai, em i tokaut: “Mi ting em i olsem wanpela bilip tasol bilong ol tumbuna.” Yumi no kirap nogut long dispela, long wanem, kirap long taim dispela pasin i nupela yet bilip bilong ol tumbuna i as bilong en. Wanpela buk (“The Catholic Encyclopedia”) i tok: “Kirap long bipo yet ol i bin kisim dispela pasin bilong makim kruse insait long ol wok bilong rausim ol spirit bilong tudak.”—Edita.
Taim Bilong Yumi Mi raitim pas long ol tok bilong stori “Taim Bilong Yumi—Ol Yia Bilong Bikpela Senis.” (Disemba 8, 1999) Mi kirap nogut long yupela i kamapim klia tru ol stori bilong ol samting nogut bilong taim bilong yumi. Na tu, mi kisim save olsem pasin bilong pait i wok long bagarapim ol man isi isi. Mi tok amamas long yupela long gutpela wok yupela i save mekim.
W. G., long Pueto Riko
Bata Nau tasol mi kaunim pinis dispela stori “Pikinini Bilong Diwai Bata—Ol Inap Wokim Kain Kain Samting Long En!” (Janueri 8, 2000) Mi save olsem planti man bai laikim tru dispela stori. Mi kirap kaikai pikinini bilong diwai bata taim mi gat 9-pela mun. Taim mi gat 3-pela krismas, mi kirap lain long mekim kaikai ol i kolim guakamole. Nau mi gat 10-pela krismas. Na mi tingting long ol man ol i no inap kaikai anian, em wanpela samting bilong putim long dispela kaikai yupela i stori long en long nius. Long guakamole mi save wokim, mi mekim wok long bata, wara bilong muli, sol, na sos i gat lombo long en, na galik ol i memeim.
N. E., long Amerika
Tenkyu long gutpela tok bilong yu!—Edita.
Wok Marila Mi gat 13 krismas, na mi bungim wanpela yangpela meri long skul i save bilip long wok marila samting. Wanpela taim em i askim mi, mi ting olsem wanem long dispela samting. Mi tokim em, mi wanpela Witnes Bilong Jehova na mi no bilip long ol wok marila samting. Em i bel hevi na kirap long dispela taim em i save kamapim gen dispela tok planti taim. Mi beten long Jehova bilong em i ken helpim mi, na dispela samting i kamap long rot bilong stori “Baibel i Tok Wanem? Husat i As Bilong Wok Marila Samting?” (Novemba 8, 1999) Mi givim dispela nius long em, na taim em i kaunim pinis em i no gat tok moa long mi long dispela samting.
K. E., long Amerika
Tenkyu tru long stori “Husat i As Bilong Wok Marila Samting?” Planti man i save ting ol marilameri ol i lapun na pes bilong ol i luk nogut tru. Tasol long nau lain Wika i wok long pulim planti yangpela man na meri. Pikinini meri bilong mi i laik kisim save long dispela lain. Tasol em i bin kisim sabskripsen bilong Kirap! bilong em yet, na namba wan nius em kisim i gat dispela stori long en! Em i kam long taim stret.
B. H., long Amerika
Pikinini Tagua Kirap long 1954 i kam inap long nau, mi bin kaunim olgeta wan wan nius bilong yupela, na olgeta taim mi save kirap nogut long ol stori i save kamapim ol kain kain wok yumi inap mekim long ol samting Jehova i bin wokim. Wanpela stori olsem em “Pikinini Tagua—Em Inap Helpim Ol Elefan?” (Novemba 8, 1999) Tenkyu long helpim mipela long pilim moa yet bikpela save na gutpela tingting bilong God bilong yumi.
D. H., long Amerika