Baibel i Tok Wanem?
Pasin Bilong Bihainim Ol Bilip Nating i Stret Wantaim Tok Bilong Baibel?
WANPELA niusman i no laik raun long balus inap wanpela yia, long wanem, wanpela glasman i bin tokim em olsem em bai kisim bagarap long balus. Ol kain kain man, olsem ol man bilong politik, ol bisnisman, ol man bilong mekim piksa wokabaut, ol man bilong spot, ol sumatin bilong yunivesiti, ol i save insait long ol bilip nating bilong ol tumbuna. Long taim nogut, o taim ol i tingting planti, ol i ting dispela bai lukautim ol na bagarap i no inap painim ol, o i helpim ol long winim mak.
I gat planti kain bilip bilong ol tumbuna ol man i ting i gutpela o i helpim tingting bilong ol i stap isi. Savemeri Margaret Mead, em i bin tok: “Pasin bilong bihainim ol bilip nating bilong ol tumbuna i soim olsem yumi gat bikpela laik long ol samting yumi bin wet long en i kamap tru, o ol samting nogut i no ken painim yumi. Yumi save bihainim ol dispela bilip nating maski yumi no bilip tru long en, na nau yumi inap wetim gutpela samting i kamap na yumi no pilim olsem yumi kalabus long ol dispela bilip.” Tasol ol man i laik mekim ol samting God i laikim ol i mas askim ol yet olsem: ‘I stret ol Kristen i bihainim ol bilip nating bilong ol tumbuna?’
As Bilong Bilip Nating Bilong Ol Tumbuna
Ol manmeri i save pret long ol kain kain samting—pret long dai, ol samting ol i no save bai kamap, laip bihain long taim ol i dai, na planti samting moa. Satan, em man i bikhet na birua long God, em i strong long kalabusim ol man, na em i bin kamapim ol kain kain tok giaman bambai ol man i pret yet long ol dispela samting. (Jon 8:44; KTH 12:9) I no Satan tasol i wok strong long pulim ol man long lusim God, nogat. Baibel i kolim Satan olsem “hetman bilong ol spirit nogut.” (Matyu 12:24-27) Ol spirit nogut ol i husat? Long taim bilong Noa planti ensel i bihainim Satan long bikhet long God na ol i kamap spirit nogut. Kirap long dispela taim, ol i wok strong long stiaim tingting bilong ol man. Wanpela rot bilong pulim ol man, em ol bilip kranki bilong ol tumbuna.—Stat 6:1, 2; Luk 8:2, 30; Jut 6.
Wanpela tok giaman bilong Satan i as bilong ol bilip nating. Olsem: Taim man i dai i gat wanpela samting yumi no inap lukim, em i save lusim bodi na em inap i kam bek na mekim nogut long ol man i stap laip. Tasol Baibel i tok: “Ol man i dai pinis, ol i no inap save long wanpela samting.” Na em i tok moa, taim yumi dai pinis, yumi “no inap mekim wok o tingting o kisim gutpela tingting na save.”—Saveman 9:4, 5, 10.
God ‘i No Laikim Tru Dispela Kain Pasin Nogut’
Long laik bilong ol yet planti man i bilipim ol tok giaman bilong Satan. Tasol long bipo yet God i bin tokaut klia long lain bilong em, ol Israel, long dispela samting. Baibel i tok: “Yupela i no ken larim ol manmeri bilong yupela i mekim olkain pasin bilong glasman, na pasin tambaran na pasin sanguma na wokim posin na mekim marila. Na yupela i no ken toktok wantaim tewel bilong ol man i dai pinis. God, Bikpela bilong yumi, i no laikim tru ol manmeri i save mekim ol dispela kain pasin nogut.”—Lo 18:10-12.
Tasol sori tru, planti taim ol Israel i no bihainim dispela tok lukaut. Long taim bilong profet Aisaia, sampela i bilip olsem gaden bilong ol bai karim planti kaikai sapos ol i mekim ol samting bilong amamasim ol god giaman—em wanpela bilip giaman ol i bin kisim nogut long en. Jehova i no orait moa long ol o mekim gut long ol.—Aisaia 65:11, 12.
Taim lotu Kristen i kamap, Jehova i no senisim tingting bilong em long ol bilip nating bilong ol tumbuna. Ol Listra i bin bihainim ol bilip nating, na aposel Pol i tokim ol long “lusim ol dispela samting nating [ol] i save lotu long en, na [ol] i mas tanim i go long God i gat laip. Em God i bin wokim skai na graun na solwara, wantaim olgeta samting i stap long en.”—Aposel 14:15.
Lusim Kalabus Bilong Ol Bilip Nating
I gat planti bilip nating bilong ol tumbuna, na olgeta i gat wanpela samting i wankain—i no gat as bilong ol dispela bilip. Pasin bilong bihainim ol dispela bilip nating inap mekim na taim ol samting nogut i painim ol, ol i ting wanpela samting i bin kamapim dispela hevi, na ol i no laik ting ol samting ol yet i bin mekim i as bilong hevi.
Tasol gutpela tru, planti ol i lusim pinis ol bilip nating. Jisas i tok: “Yupela bai i save long tok tru, na tok tru bai i mekim yupela i kamap fri.” (Jon 8:32) Clementina, em meri Brasil i bin stap glasmeri inap 25 yia, em i tok: “Wok bilong tokim ol man long ol samting bai painim ol long bihain em rot bilong mi long kisim mani. Tasol tok i tru bilong Baibel i helpim mi long lusim ol bilip nating bilong ol tumbuna.” Pasin bilong stadi oltaim long Baibel na beten strong long God Jehova, em inap helpim yumi long kisim strongpela bel. Dispela inap mekim na yumi tingting na skelim gut ol samting, na nau yumi inap wokim ol disisen i helpim yumi long abrusim taim nogut na pasin bilong tingting planti.—Filipai 4:6, 7, 13.
Baibel i askim olsem: “Olsem wanem, lait i ken bung wantaim tudak? Ating Krais i save stap wanbel wantaim Satan, a?” Olsem na ol Kristen tru i mas i stap longwe long ol bilip nating bilong ol tumbuna.—2 Korin 6:14-16.
YU LAIK SAVE?
◼ Ol Israel long taim bilong Aisaia em ol i bihainim ol bilip nating, ol no bilip na wetim God, tasol ol i bilip na wetim husat i helpim ol?—Aisaia 65:11, 12.
◼ Ol Listra i bihainim ol bilip nating bilong ol tumbuna na aposel Pol i tokim ol long mekim wanem?—Aposel 14:15.
◼ I stret ol Kristen tru i bihainim ol bilip nating bilong ol tumbuna?—2 Korin 6:14-16.
[Ol Piksa long pes 23]
Pasin bilong bihainim ol bilip nating i save giamanim ol man na ol i ting samting nogut i no ken painim ol