Yu Larim Ol Bilip Nating i Bosim Sindaun Bilong Yu?

OL MAN long olgeta hap bilong graun i save bihainim ol bilip nating. Sampela i tingim ol dispela bilip olsem samting bilong ples o samting bilong ol tumbuna na ol i tingim gut tru, tasol sampela i tingim ol dispela bilip olsem liklik samting tasol. Long hap bilong Wes, bilip bilong ol tumbuna i no bikpela samting tumas, tasol long sampela hap​​—⁠olsem long Afrika​​—⁠bilip bilong ol tumbuna inap mekim bikpela samting long i stap bilong ol man.

Bilip bilong ol tumbuna i as bilong planti pasin bilong ples ol man long Afrika i save bihainim. Planti piksa wokabaut na redio-program na buk ol i wokim long Afrika, ol i save stori long bilip bilong ol tumbuna, majik, pasin bilong lotuim ol tumbuna, ol samting bilong lukautim man, olsem paspas samting, na kain samting olsem. Orait i gat wanem as na ol man i larim bilip bilong ol tumbuna i bosim ol? Ol dispela bilip i kam we?

Wanem Samting i Mekim na Ol Man i Bihainim Bilip Bilong Ol Tumbuna?

As bilong planti bilip bilong ol tumbuna i olsem: Ol man i pret long tewel bilong ol daiman na ol narapela kain spirit. Taim wanpela samting i kamap, ol man i ting em samting ol spirit i mekim bilong tokaut olsem gutpela samting o samting nogut bai kamap.

Bilip bilong ol tumbuna em samting tu bilong marasin na pasin bilong oraitim sikman. Long ol kantri i no gat planti mani, marasin bilong ol dokta bilong nau em i gat bikpela pe na planti man i no inap baim, na tu, planti taim i no gat marasin bilong kisim. Olsem na bilong oraitim sik bilong ol o bilong pasim sik, planti man i bihainim pasin bilong ol tumbuna, na kain kain pasin marila samting, na bilip bilong ol tumbuna. Na bel bilong ol i save stap isi taim ol i toktok wantaim wanpela glasman i save long tok ples na long pasin bilong ples bilong ol, winim pasin bilong toktok wantaim dokta long haus sik. Dispela i mekim na bilip bilong ol tumbuna i stap strong.

Ol man i bihainim bilip bilong ol tumbuna ol i bilip olsem ol sik na bagarap i no save kamap nating. Ol i ting ol spirit i as bilong ol dispela samting. Ating glasman bai tok olsem sik o bagarap i bin painim man, long wanem, tumbuna i dai pinis em i bel hevi long wanpela samting o long wanpela man, o long rot bilong narapela glasman wanpela i bin putim tok long bagarapim dispela man long pasin sanguma samting.

Bilip bilong ol tumbuna i no wankain long olgeta hap, na ol stori tumbuna o samting i kamap long wanpela hap, dispela inap mekim na wanpela bilip i kamap strong o nogat. Tasol olgeta lain i save bilip olsem i gat wanpela man, o wanpela samting, long ples spirit em ol man i mas mekim kol bel bilong em.

Samting Nating o Samting Bilong Nogutim Yu?

Long planti famili, taim mama i karim tupela pikinini wantaim, dispela em i wanpela gutpela samting na em i samting i no save kamap planti taim. Tasol long ol man i bihainim bilip bilong ol tumbuna, dispela em i wanpela mak. Long sampela hap bilong Wes Afrika, planti man i ting tupela pikinini em mama i karim wantaim, ol i olsem god em mama i bin karim, na ol i lotuim ol. Sapos wanpela pikinini i dai, o tupela wantaim, ol i wokim liklik imis bilong tupela, na famili i mas givim kaikai long ol dispela imis olsem ofa. Tasol long sampela hap, ol man i tingim pasin bilong karim tupela pikinini wantaim i olsem wanpela samting nogut, na sampela papamama i save kilim i dai wanpela bilong ol. Bilong wanem? Ol i bilip olsem sapos tupela wantaim i stap laip, bihain ol bai kirap na kilim i dai papamama bilong ol.

Ol dispela samting i soim olsem, maski sampela bilip i no save kamapim samting nogut, sampela bilip ol i nogut tru na inap bagarapim man. Samting i no gat rong long en em inap kamap samting bilong bagarapim man sapos man i tok dispela samting em i makim samting nogut.

Em nau, bilip bilong ol tumbuna i olsem wanpela kain lotu. Sampela bilip bilong ol tumbuna inap nogutim man, olsem na i stret long yumi kamapim dispela askim: Ol dispela bilip na pasin ol i helpim husat tru?

As Bilong Bilip Bilong Ol Tumbuna

Maski ol samting i kamapim long ples klia olsem Satan na ol spirit nogut i stap, sampela man long nau i tok ol i no stap. Tasol tingim: Long taim bilong pait, sapos man i no laik luksave olsem wanpela birua nogut i stap, dispela bai kamapim bagarap. Na i wankain tu long pait i stap namel long yumi na ol strongpela spirit. Aposel Pol i tok: “Yumi pait long olgeta spirit nogut.”​​—⁠Efesus 6:​12.

Ol spirit nogut i stap, maski yumi no inap lukim ol. Baibel i tok, wanpela spirit em ol man i no inap lukim, em i mekim wok long wanpela snek bilong toktok wantaim namba wan meri, em Iv, na dispela i kirapim meri long bikhet long God. (Stat 3:​1-5) Baibel i tok dispela spirit em “dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun.” (KTH 12:⁠9) Dispela man, Satan, em i pulim sampela ensel moa long bikhet long God. (Jut 6) Ol dispela ensel nogut ol i kamap birua bilong God.

Jisas i bin rausim ol spirit nogut long ol manmeri, na ol disaipel bilong em tu i mekim olsem. (Mak 1:​34; Aposel 16:18) Ol dispela spirit i no ol tumbuna i dai pinis, long wanem, man i dai pinis em “i no inap save long wanpela samting.” (Saveman 9:⁠5) Ol dispela spirit em ol ensel Satan i bin giamanim ol na ol i bikhet long God. Sapos yumi toktok wantaim ol o larim ol i bosim yumi, dispela i no liklik samting nating tasol, nogat, long wanem, olsem lida bilong ol, Satan, ol i gat laik long bagarapim yumi. (1 Pita 5:​8) Ol i laik mekim na bai yumi no tingim moa dispela wanpela rot tasol bilong stretim tru hevi bilong ol man​​—⁠em Kingdom bilong God.

Baibel i kamapim wanpela pasin em Satan na ol spirit nogut ol i mekim wok long en: “Satan yet i save senisim pasin bilong en na kamap olsem ensel bilong lait.” (2 Korin 11:14) Satan i laik giamanim yumi long bilip olsem em inap helpim yumi long kisim gutpela sindaun. Olsem na sampela samting i kamap na i helpim yumi inap liklik hap taim, ating i luk olsem ol i kam long ol spirit nogut. Tasol ol spirit nogut i no inap stretim tru ol hevi. (2 Pita 2:​4) Ol i no inap givim laip oltaim long wanpela man, na liklik taim God bai bagarapim ol na ol bai pinis olgeta. (Rom 16:20) Man bilong wokim yumi, em tasol i as bilong laip oltaim na amamas tru na em inap lukautim gut yumi na bai ol spirit nogut i no ken bagarapim yumi.​​—⁠Jems 4:⁠7.

God i no orait liklik long pasin bilong kisim helpim long wok bilong ol spirit nogut. (Lo 18:​10-​12; 2 King 21:⁠6) Dispela pasin i olsem pasin bilong prenim ol birua bilong God! Pasin bilong skelim ol sta bilong save long samting bai painim yu bihain, go lukim glasman, o insait long sampela bilip nating bilong ol tumbuna, dispela inap givim rot long ol spirit nogut long bosim tingting bilong yu taim yu laik skelim samting yu mas mekim. Dispela i olsem yu insait long pasin bikhet ol spirit nogut i save mekim long God.

I Gat Rot Long Lukautim Yu Yet?

Ade,a wanpela man long Niger, em i stadi long Baibel wantaim wanpela Witnes Bilong Jehova i wok fultaim long autim tok. Ade i stori long as na em i bin putim tanget samting long stua bilong em bilong lukautim em. Ade i tok: “I gat planti birua.” Witnes i stadi wantaim Ade i soim em olsem, Jehova tasol inap tru long lukautim em. Em i ritim Song 34:​7, i tok: “Ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.” Ade i tok: “Sapos tru tru Jehova inap long lukautim mi, orait bai mi rausim dispela samting.” Nau, olsem 20 yia bihain, em i mekim wok elda na em i wok fultaim long autim tok. I no gat wanpela bilong ol birua bilong em i bin mekim nogut long em.

Baibel i tok olsem taim nogut i save painim olgeta manmeri, maski yumi bihainim ol bilip nating o nogat. (Saveman 9:​11) Tasol Jehova i no save traim yumi long ol samting nogut, nogat. (Jems 1:​13) Dai na pasin kranki em samting sin bilong Adam i bin kamapim. (Rom 5:​12) Long dispela as, yumi olgeta i save sik long sampela taim, na yumi mekim ol pasin kranki na dispela inap kamapim bagarap. Olsem na i no stret long yumi tok olgeta sik na hevi i kam long ol spirit nogut. Kain bilip olsem inap pulim yumi long mekim sampela samting bilong mekim kol bel bilong ol spirit nogut.b Taim yumi gat sik, yumi mas go lukim dokta; nogut yumi kisim tok long Satan, em i “man bilong tok giaman, na em i papa tru bilong pasin bilong tok giaman.” (Jon 8:​44) Ol samting i kamap i soim olsem, ol man i stap long ol kantri we planti man i bihainim bilip bilong ol tumbuna, ol i no stap longpela taim o kisim gutpela sindaun, winim ol man i stap long ol narapela kantri, nogat. Tru tumas, ol bilip nating i no save helpim skin bilong man long i stap gutpela moa.

God em i gat bikpela strong, winim bilong ol spirit nogut, na em i tingim tru yumi. “Bikpela i save lukautim ol stretpela manmeri, na em i save putim yau long ol beten bilong ol.” (1 Pita 3:​12) Beten askim em long lukautim yumi na long givim gutpela tingting na save long yumi. (Sindaun 15:29; 18:10) Wok strong long save gut long Tok bilong em, em Baibel. Stretpela save long Baibel inap lukautim gut yumi. Em bai helpim yumi long luksave long as na ol samting nogut i kamap, na yumi mas mekim wanem na bai God i Gat Olgeta Strong i ken amamas long yumi.

Save Bilong God i Helpim Yumi

Stretpela save long Jehova na long ol samting em i laik mekim, dispela tasol em i rot bilong lukautim yu tru. Samting i bin painim Jean, em wanpela man bilong Benin, i kamapim klia dispela samting. Famili bilong Jean i strong long bihainim bilip bilong ol tumbuna. Wanpela bilip i olsem: Sapos meri i karim pikinini man, em i mas stap long wanpela liklik haus inap 9-pela de. Sapos em i karim pikinini meri, em i mas stap long dispela liklik haus inap 7-pela de.

Long 1975, meri bilong Jean i karim wanpela naispela pikinini man, em ol i kolim Marc. Jean na meri bilong em ol i gat save long Baibel, olsem na ol i no laik insait long ol samting bilong ol spirit nogut. Tasol yu ting ol bai pret na larim ol narapela i subim ol long bihainim dispela bilip na mama i mas stap long dispela liklik haus? Nogat​​—⁠ol i sakim dispela bilip.​​—⁠Rom 6:​16; 2 Korin 6:​14, 15.

Yu ting bagarap i painim famili bilong Jean? Planti yia i lus pinis, na nau Marc i mekim wok olsem kongrigesen sevent long wanpela kongrigesen bilong ol Witnes Bilong Jehova. Famili olgeta i amamas long ol i no bin larim dispela bilip i stiaim wokabaut bilong ol na nogutim ol long ol samting bilong spirit.​​—⁠1 Korin 10:​21, 22.

Ol trupela Kristen i mas wok strong na bai ol bilip nating i no ken kam insait long i stap bilong ol na ol i mas kisim lait bilong spirit em Man bilong wokim ol, Jehova, na Pikinini bilong em, Jisas Krais, i laik givim long ol. Long dispela rot bel bilong ol bai stap isi, long wanem, ol i save ol i mekim ol samting i stret long ai bilong God.​​—⁠Jon 8:​32.

[Ol Futnot]

[Blok/Piksa long pes 5]

Sampela Bilip Nating

• Sanapim sopstik insait long plet rais, em i makim dai bai kamap

• Man i lukim tarangau bilong nait long taim bilong san, samting nogut bai painim em

• Lait bilong kandel i dai long taim bilong wanpela bung, em i makim ol spirit nogut i stap klostu

• Ambrela i pundaun long plua i makim olsem wanpela man bai kilim man i dai insait long haus

• Putim hat long bet, em i makim samting nogut bai kamap

• Krai bilong ol belo i save rausim ol spirit nogut

• Sapos man i winim ol kandel long betde-kek na mekim i dai olgeta wantaim, samting man i laik bai kamap, em bai kamap

• Sapos brum i sanap klostu long bet, ol spirit nogut insait long brum bai wailisim bet

• Samting nogut bai painim yu sapos blakpela pusi i brukim rot bilong yu

• Fok i pundaun em i makim olsem wanpela man bai kam lukim yu

• Sapos wanpela piksa bilong ol elefan i lukluk i go long dua, gutpela samting bai kamap

• Sapos su ain bilong hos i stap antap long dua, gutpela samting bai kamap

• Rop ivy i kamap long banis bilong haus, em i save lukautim yu

• Man i wokabaut aninit long lata, samting nogut bai painim em

• Man i brukim glas, samting nogut bai painim em inap 7-pela yia

• Kapsaitim paura lombo, em i makim olsem yu bai tok pait wantaim gutpela pren bilong yu

• Sapos sol i kapsait na yu no tromoi liklik hap antap long sol bilong yu long han kais, samting nogut bai kamap

• Tanim su na lusim i stap, bai samting nogut i kamap

• Taim man i dai, ol i mas opim ol windo bambai tewel bilong em i ken lusim haus

[Blok long pes 6]

Lusim Strong Bilong Ol Bilip Nating

Ol Witnes Bilong Jehova i autim tok long wanpela hap long Saut Afrika. Ol i go long wanpela haus na taim dua i op, ol Witnes i lukim wanpela meri i bin pasim klos bilong Sangoma (glasmeri). Ol i laik lusim haus, tasol meri i strong long ol i kamapim ol tok ol i bin kam long autim. Witnes i ritim Lo 18:​10-​12 bilong soim em God i tok wanem long wok marila samting. Glasmeri i kisim tok bilong ol na i orait long ol i stadi wantaim em long Baibel. Em i tok sapos em i kisim save olsem Jehova i no orait long wok Sangoma, em bai lusim dispela wok.

Taim em i stadi pinis long sapta 10 bilong buk Yu Inap i Stap Oltaim Long Paradais Long Graun na mekim wok long Baibel wantaim, em i kisim olgeta samting bilong mekim wok marila samting na kukim long paia, na em i kirap long go long ol miting long Haus Kingdom. Na tu em i rejistaim marit bilong em, maski inap 17 yia pinis em i no bin stap wantaim man bilong em. Nau, tupela wantaim i Witnes Bilong Jehova i dediket na baptais pinis.

[Piksa long pes 6]

“Sangoma” i tromoi ol bun na bai em inap save long as bilong ol hevi bilong man i kam lukim em

[Ol Piksa long pes 7]

Stretpela save bilong God i save lukautim tru man na i helpim em long stap amamas