Ripot Long Wok Bilong Kingdom
‘Tok Bilong God i Wok Strong’
LONG ailan Jameka long hap bilong Karibian, planti manmeri i gat save long Baibel. Baibel King James Version, i stap long klostu olgeta haus, na sampela manmeri i bin kisim save olsem “tok bilong God i gat laip, na em i wok strong i stap.” (Hibru 4:12) Dispela strong inap senisim laip bilong ol man olsem dispela stori i kamapim.
Wanpela man nem bilong em Cleveland, em i pinis long wok na nau tasol em i kamap long haus taim wanpela Witnes Bilong Jehova i go lukim em. Bihain long ol i toktok long sampela tok bilong Baibel, Witnes i givim em wanpela buk Save i Bringim Man Long Laip Oltaim bilong helpim man long stadi long Baibel. Cleveland i no save olsem Tok Bilong God bai wok strong long laip bilong em.
Cleveland i save beten 3-pela taim long wanpela de, em i wok long askim God long helpim em long painim stretpela rot bilong lotuim Em. Cleveland i save olsem papamama bilong em i no lotu long stretpela rot, tasol taim em i wok long skelim ol narapela lotu, em i no amamas. Maski em i bin harim stori long ol Witnes Bilong Jehova, em i gat tupela tingting olsem ol i gat tok i tru o nogat. Maski em i gat tupela tingting, Cleveland i orait long stadi long Baibel wantaim dispela Witnes i kam long haus bilong em. Bilong wanem? Long wanem, em i laik kamapim olsem lotu bilong ol Witnes i no stret!
I no longtaim na Cleveland i kisim save olsem, God i no amamas long pasin bilong em long slip wantaim tupela meri. (1 Korin 6:9, 10) Bihain long em i stadi inap tupela taim tasol, em i strongim bel na em i lusim dispela tupela meri. Em i kirap tu long go long ol miting Kristen long Haus Kingdom. Tasol dispela i kamapim narapela traim long em.
Cleveland i bin insait tru long pilai soka long tim bilong komiuniti bilong em, na dispela samting i wok long pasim em long go long ol miting. Em bai mekim wanem? Maski ol wantim, kosa, na ol pren i strong long pulim em, Cleveland i pasim tok long bel long lusim dispela soka tim. Yes, Tok Bilong God i bin kirap long wok strong, na i wok long stiaim em bilong helpim em!
Dispela strong i stap long Tok Bilong God i kamap ples klia gen taim Cleveland i kirap toktok wantaim ol narapela long save em i kisim long Baibel. (Aposel 1:8) Long dispela rot, tupela wantim bilong em bilong bipo i kirap long go long miting bilong ol Witnes Bilong Jehova. Taim Cleveland i winim mak bilong kamap pablisa bilong autim gutnius, em i kisim bikpela amamas long autim tok na yusim Tok Bilong God long helpim ol narapela.
Strong bilong Tok Bilong God i wok yet long stiaim Cleveland, na bihain em i kisim baptais long wara bilong makim olsem em i dediket pinis long Jehova, na em i mekim gutpela wok olsem autim tok fultaim na em i wanpela kongrigesen sevent.
Long Jameka na ol narapela hap bilong graun, planti tausen manmeri i bin kisim save olsem, tru tumas, Tok Bilong God “i gat laip, na em i wok strong i stap.”
[Mep/Piksa long pes 8]
(Bilong save ol dispela rait i stap we long pes, lukim buk o magasin)
JAMAICA
[Kredit Lain]
Map and globe: Mountain High Maps® Copyright © 1997 Digital Wisdom, Inc.