Mipela i Stap Aninit Long Han Bilong Jehova
Em stori bilong Simon Kraker
“PAPA, mi mas mekim wanem wok long bihain?”
“Simon, yu mas tingting gut, long wanem mi no ken tokim yu wanem rot yu mas bihainim. Yu yet yu mas tingim.”
“Tru, papa, tasol yu gat save pinis, winim mi!”
“Ating olsem, Simon. Tasol i gat planti rot i op long yu, na ating bai yu lukim olgeta i gutpela. Tasol wanem rot inap helpim yu long i stap amamas tru?”
“Orait, Papa. Mi bin tingting long musik, danis, spot, wok dokta, wok pris. Mi laikim olgeta dispela samting.”
Olsem wanem long yu? Yu laikim wanem wok? Yu laik bihainim wanem rot? Taim mi yangpela, olsem long yia 1920 samting, wanpela samting i kamap long famili bilong mi na dispela samting i senisim tingting bilong mi long wanem wok mi laik mekim. Mi laik stori long dispela samting i bin kamap.
Papamama bilong mi, em Maria na Josep, tupela i bilong Austria, tasol tupela i bung long Amerika na tupela i marit. Taim papa i no i go yet long Amerika, em i bin raun planti long olgeta hap bilong Yurop. Em i man bilong winim trampet na dispela i olsem wok mani bilong em. Olsem na taim em i kamapim ol pikinini em i laik tru bai mipela olgeta 8-pela pikinini bilong em i kisim gutpela skul, na em i laik bai mipela i skul long musik tu. Famili bilong mipela i gat olsem liklik ben bilong ol yet na mi save wokim musik long vaiolin.
Papamama i bilong lotu Katolik na tupela i laik bai mipela ol pikinini i skul gut long lotu. Mi tingim wanpela Baibel Katolik i stap long haus bilong mipela. Em i bikpela Baibel i gat kruse gol long karamap bilong en, na insait i gat ol olpela rait Jeman. Mi save kaunim na mi pilim olsem ol tok bilong Baibel i tok bilong God.
Long 1920 samting, narapela lotu ol i save kam givim sampela nius bilong Baibel long mipela taim mipela lusim haus lotu bilong mipela long Klivlan, Ohaio. Mipela olgeta i save kisim na taim mipela kamap long haus mipela save kaunim na skelim tok bilong ol dispela nius wantaim tok bilong Baibel. Ol Sumatin Bilong Baibel (em nem bilong ol Witnes Bilong Jehova long dispela taim bipo) ol i tilim ol dispela liklik nius long ol man. Wanpela nius i stori long ol samting i painim man i dai pinis, na mama bilong mi i laikim tru ol tok bilong dispela nius, long wanem tupela pikinini bilong em i bin i dai taim ol i liklik yet. Em i kaunim dispela nius na em i kisim save olsem, tupela i no i stap long wanpela ples spirit ol i kolim limbo, na tupela i no karim pen long klinpaia o long bikpaia. Tupela i slip tasol long matmat na wetim God i kirapim bek ol. (Eklisiastis 9:5, 10; Jon 11:24, 25) Dispela tok i mekim gut bel bilong mama na bel bilong mipela olgeta!
Mi Mas Bihainim Wanem Rot?
Sampela Sumatin Bilong Baibel (Bibelforscher) ol i save long tok Jeman ol i kam long haus bilong mipela na lainim mipela. Dispela samting i helpim mipela long kisim gut ol tok i tru bilong Baibel. Mipela i kisim save long ol tok bilong Baibel na isi isi mipela lusim lotu Katolik. Tasol nau mi mas tingim wanem rot mi laik bihainim. Taim mama i karim mi ol i kolim nem bilong mi Simon (Saimon ); na taim mi baptais ol i kolim nem bilong mi Pita; na taim mi kisim sakramen bilong strong (Konpirmasio) ol i kolim nem bilong mi Josep. Mi bin kamap wanpela altarboi na mi lainim ol beten long tok Latin na ol tok bilong Misa, na mi bin mekim kain kain wok bilong lotu. Papamama i laik bai mi kamap wanpela pris, na mi yet mi laik mekim bikpela wok bilong lotu.
Tasol nau tingting bilong mi i senis; mi no tingting moa long wokim musik na amamasim ol manmeri, mi no tingting moa long kisim biknem long spot, o long mekim wok dokta. Nogat. Mi laik helpim ol narapela man long samting bilong spirit. Tasol mi no laik moa long kamap wanpela pris Katolik.
Papamama i kirap givim bel long ‘gutpela tok bilong Kingdom bilong God’ ol Sumatin Bilong Baibel i autim, na mi tu mi givim bel long en. (Matyu 24:14) Long yia 1924 papamama i kirap long i go long ol haus na autim dispela gutpela tok, na mi save go wantaim ol. Tupela yia bihain, taim mi gat 12-pela krismas, papa i save mi yet mi inap autim tok. Olsem na em i givim wanpela liklik Baibel long mi bilong mekim wok long en taim mi autim tok. Mi pinis long haiskul long yia 1929, tasol paslain long dispela taim mi tingting pinis long givim skin bilong mi bilong mekim wok bilong God, olsem dediket long Em.
Sampela Bikpela Samting i Kamap Insait long Oganaisesen Bilong God
Winim 60 yia bipo, famili bilong mi i kirap mekim wok bilong autim tok bilong Kingdom, na mi inap tingim planti bikpela samting i bin kamap insait long oganaisesen bilong God kirap long dispela taim bipo na i kam inap long nau. Olsem: Long yia 1925 Wastaua (tok Inglis) i stori long “Wanpela Lain i Kamap,” na mi amamas long kisim save olsem Jehova i wok long bungim ol manmeri bilong olgeta kain lain na skin bilong kamap lain bilong em. Mi pilim tru ol tok bilong Baibel dispela Wastaua i kamapim! Bilong wanem? Long wanem long hap mi stap long en ol man i no laik tru long ol Juda na ol blakskin. Ol man bilong dispela graun ol i save bel nogut long ol man bilong narapela skin o tingting politik, na ol samting bilong bisnis na ami na bilong dispela graun i save brukim ol i kamap narapela narapela lain. Tasol i no gat dispela pasin insait long lain bilong God. (Aposel 10:34, 35) Mi amamas long kisim save long insait bilong tok profet bilong Aisaia sapta 66 na long lukim truim bilong en i kamap long taim bilong mi!
Na wanpela bikpela samting i kamap insait long famili bilong mipela long kibung bilong Detroit, Misigan, long yia 1928. Em namba wan kibung papamama i go long en. Taim ol i kam bek ol i amamas tru na ol i laik wok strong moa long wok bilong Jehova. Mipela ol pikinini i pilim tru dispela samting.−Rom 12:11.
Na long yia 1931 oganaisesen bilong God i tokim mipela long wanpela gutpela samting tru, em olsem: Nupela nem bilong mipela−ol Witnes Bilong Jehova. Mipela i gat gutpela wok tru−long ai bilong God na ol man mipela i ken holim nem bilong Em.−Aisaia 43:10-12.
Na mi no ken lusim tingting long yia 1935. Long dispela yia mipela i kisim save long ol “arapela sipsip” na ‘bikpela lain manmeri’ ol i husat. (Jon 10:16; Revelesen 7:9) Dispela samting i kirapim planti man−mi tu−long kisim baptais. Taim mi nupela long lain bilong Jehova ol i no tokaut strong long mipela mas kisim baptais. Tasol mi dediket pinis long God Jehova na nau mi save i stret mi mas kisim baptais.
Long yia 1938 oganaisesen i stretim gut ol samting. Pastaim i gat wanpela haus bung tasol bilong ol Witnes long Klivlan (Engineerˈs Auditorium). Ol kongrigesen tok Jeman, tok Polan, tok Inglis, na bilong ol narapela tok ples tu, olgeta ol i mekim miting bilong ol long dispela haus. Tasol bihain long yia 1938 oganaisesen i stretim rot bambai i gat ol kongrigesen long narapela narapela hap bilong dispela biktaun. Ol i makim papa na sampela brata bilong mi long mekim wok insait long kongrigesen. Na ol i makim mi bilong lukautim ol magasin.
Narapela bikpela samting i kamap long yia 1939 em i helpim mi long bilip tru long Jehova na oganaisesen bilong em long graun. Bikpela pait i laik kirap na ol i putim wanpela tok long Wastaua (tok Inglis) bilong helpim ol brata long save yumi no ken insait long ol pait bilong dispela graun. Dispela tok i helpim mi long save, ol manmeri bilong God ol i mas i stap wanbel wantaim olgeta man, maski i gat pasin birua na pait i laik kamap. Dispela samting i redim mi na mi inap sanap strong long ol traim i painim mi long bihain.
Na long yia 1939 mi go long biktaun Nu Yok long namba wan taim. Taim mi stap long Nu Yok mi harim namba tu presiden bilong Sosaiti Was Taua, em J. F. Rutherford, i mekim wanpela pablik-tok long Madison Skwea Gaden. Inap 500 samting birua ol i bilong ol misin ol i kam long dispela bung na ol i singaut bikmaus na i laik bagarapim dispela miting. Tasol ol i no inap. Brata Rutherford i sanap strong na mekim tok i go, na ol man i harim ol i wok long paitim han, long wanem ol i amamas long ol tok ol i harim.
Mi tingim tu bikpela kibung bilong 1942 i bin kamap long as ples bilong mi, Klivlan. Ol i singautim planti man i kam harim pablik-tok long dispela kibung, em i stori long ol wok ol man i mekim bilong kamapim pasin sekan na gutaim long graun, ol dispela wok i mas lus nating.
Traim Bilip
Long dispela taim sampela samting i kamap i traim bilip bilong mi. Mi kisim wok olsem manesa long hap bilong spea-pats long bikpela kampani bilong ol ka, em Jeneral Motas. Ol i orait long mi wok haptaim tasol na dispela i givim bikpela hap taim long mi bilong mekim nambawan wok bilong mi, em wok bilong God. Tasol bikpela pait i kirap pinis na nau Amerika i laik insait long en. Bai mi mekim wanem? Bai mi insait long dispela pait, o bai mi tokim gavman olsem wok mani bilong mi inap helpim ol long pait, olsem na mi no ken kamap soldia? Mi no insait long pait na mi no painim rot bilong abrusim wok ami. Lo bilong gavman i orait long ol man i mekim wok bilong God, olsem ol pris pasto samting, ol i no ken insait long ami. Olsem na mi tokim gavman, mi wanpela wokman bilong God, olsem na lo i orait long mi tu mi no ken insait long ami. Tasol Lain bilong skelim dispela samting, ol i no orait long dispela samting.
Ol i tok: ‘Yu ken insait long ami na mekim wok olsem pris o pasto bilong ami.’ Mi tokim ol, mi no inap mekim olsem, long wanem bel bilong mi i gat tok long dispela samting; mi dediket pinis long God na mi mas mekim wok bilong em.
Ol i tok: ‘Yu ken mekim dispela wok insait long ami tu na helpim ol man.’
Mi tok: ‘Mi inap helpim ol narapela man long gutpela tok olsem i stap long Baibel tasol.’
Ol i putim mi long bikpela kot. Long Federal Kot mi tokim ol, papa bilong mi i bin ranawe lusim Austria i kam long Amerika, long wanem bel bilong em i gat tok long holim gan na insait long ami na mekim pait.
Jas i tok: ‘Tasol yu no ken insait long pait. Yu ken mekim wok pasto tasol.’
Mi tokim em: ‘Bikpela , mi no inap mekim olsem. Sapos bel bilong mi i gat tok long holim gan na mekim pait, olsem wanem mi inap kirapim narapela man long mekim pait?’
Mi Kalabus
I gat ol pepa i makim olsem mi wanpela wokman bilong God, tasol long pinis bilong yia 1943 kot i tok mi mas kalabus. Kalabus taim bilong mi i olsem 5-pela yia long haus kalabus long Luisbek, long Pensilvenia. I gat 50 samting Witnes ol i kalabus long dispela haus kalabus. Na bihain dispela lain i go bikpela na i gat 200 Witnes long dispela kalabus.
Dispela haus kalabus i gat bikpela graun, inap olsem 400 hekte. Insait long banis bilong en i gat ol haus bilong kalabusim ol man nogut tru long en, na i gat ol haus bilong fam em ol kalabusman i gat gutpela nem ol i slip long en, na i gat haus bilong ol wasman bilong haus kalabus na ol narapela man i wok long haus kalabus. Ol i save putim ol Witnes long ol haus long fam. Ol i givim wok long mi olsem draiva, na mi save draivim ol kalabusman i go i kam long ples wok bilong ol.
Taim mi kalabus nupela, ol i tambuim mipela long mekim miting bilong lotu na long kisim buk na nius bilong mipela. Tasol mipela i save kisim ol Wastaua. Mipela i kisim long wanem rot? Sampela man i kam lukim sampela man long haus kalabus, ol i brukim liklik hap bus i stap klostu long haus bilong ol wasman bilong haus kalabus na ol haus bilong ol kalabusman, ol i putim sampela Wastaua insait long bek pepa na lusim klostu long rot. Bihain mi yet o narapela brata i kam kisim dispela na mipela i givim ol Wastaua long ol narapela brata long dispela haus kalabus. Na narapela rot bilong kisim ol Wastaua em olsem: I gat wanpela wasman bilong haus kalabus em i gutpela man. Em i save tromoi ol olpela niuspepa ausait long haus na taim mipela i kam kisim bilong rausim na klinim ples, mipela lukim sampela nius bilong mipela i stap insait long ol dispela olpela niuspepa. Bihain bos bilong haus kalabus i orait long mipela i kisim ol buk na nius bilong Baibel, na mekim ol miting.
Wanpela taim mi lusim ol man bilong wok long gaden bilong bos bilong haus kalabus, na nau wanpela samting i kamap na i mekim mi pret tru. Mi bin haitim wanpela buk bilong Sosaiti (The Truth Shall Make You Free) insait long klos bilong mi. Taim ol kalabusman i wok long klinim gaden, mi sindaun insait long trak na mi kamautim dispela buk na mi laik kaunim. Tasol mi kirap nogut tru, long wanem wantu liklik pikinini meri bilong bos bilong haus kalabus i kam na em i tok: ‘Hei! Yu kaunim wanem buk?’
Mi pret, long wanem dispela buk mi mas kaunim insait long rum bilong mi long haus kalabus tasol. Olsem na mi tokim em, em wanpela buk i kamapim as bilong ol tok bilong Baibel. Nau em i laik save moa long dispela buk. Olsem na mi opim na soim wanpela piksa bilong buk long em. Dispela piksa i makim wanpela man i lusim sen i kalabusim lek bilong em. Mi tokim em: “Planti man ol i kalabus olsem. Ol i kalabus long ol tok na tingting bilong ol lotu giaman, na Jisas i laik bai ol i stap fri, long wanem em i tok: ‘Tok tru em bai i mekim yupela i kamap fri.’ ”−Jon 8:32.
Long de bihain mama bilong dispela pikinini i tokim mi: “Simon, pikinini meri bilong mi i tokim mi long ol gutpela tok yu bin stori long en long asde long Baibel na long dispela buk yu bin soim long em. Em i laikim tru ol dispela tok.” Gutpela tru, dispela samting i kamap na i mekim mi pret, em i no mekim nogut long mi.
Mi stap inap tupela yia hap tasol long kalabus. Taim mi lusim kalabus long yia 1946, kwiktaim mi kirap mekim gen wok painia.
Wok long Betel
Bikpela kibung i kamap long Klivlan long yia 1946 na narapela bikpela samting i kamap long mi. Long dispela kibung mi putim pepa bilong i go wok long Betel, long namba wan ofis bilong Sosaiti Wastaua long Bruklin, Nu Yok.
Tupela brata i olsem mausman bilong Sosaiti, em Brata Milton Henschel na Robert Morgan, tupela i stori liklik long wok bilong Betel na bihain ol i toktok wantaim ol brata sista i laik i go wok long Betel. Mi pret liklik, tasol mi go toktok wantaim tupela. Tupela i mekim gutpela pasin isi long mi.
Wanpela i tok: “Bilong wanem yu laik wok long Betel?”
Mi tok: “Mi mekim bikpela wok bilong Jehova, long wanem mi mekim wok painia, tasol mi ting sapos mi go wok long Betel bai mi inap mekim bikpela wok moa.”
Em i tok: “Sapos yu kam long Betel, tru tumas bai yu mekim bikpela wok moa.”
Na em i tok stret! Mi kirap mekim wok long Betel long Februeri 18, 1947 na mi amamas tru long ol gutpela wok mi inap mekim na ol gutpela blesing mi bin kisim. Long olgeta de mi tenkyu long Jehova, long wanem em i stiaim mi i kam long dispela gutpela wok.−2 Tesalonaika 3:5.
Ol Wok Mipela i Lukim Spirit Bilong God i Mekim
Mi tingim wok bilong Kingdom na inap 45 yia mi stap singel, tasol taim mi winim pinis 45 krismas nau mi painim pinis gutpela meri bilong mi hia long Bruklin, em Grace Suiter. (Provep 31:10) Em i bin lusim hap Bilong Midwes long yia 1939 na i kam long Betel, tasol em wantaim famili bilong em ol i bin harim tok i tru long Kalifonia. Mitupela i marit long 1959 na mipela i pilim pinis ol gutpela samting i save painim ol man i stap aninit long han bilong Jehova na ol i laikim tumas em na i stap gut long wok bilong em.
Mitupela Grace i wankain liklik. Mama i karim mipela long yia 1914 na famili bilong mitupela wantaim i bin wok long painim tok i tru. Mitupela wantaim i bin kirap long i go long ol haus na autim tok wantaim papamama taim mipela i gat 12-pela krismas tasol. Mitupela i wok wantaim long Betel na mipela i amamas tru long lukim bikpela wok oganaisesen bilong God i mekim bambai tok Bilong Kingdom i ken i go “inap long olgeta hap graun”!−Aposel 1:8.
Mipela i bin putim mipela yet i stap aninit long han bilong Jehova, na yu ting mipela i hevi long dispela samting mipela i bin mekim? Grace i tok: “Nogat! Tru, mipela i no kisim planti samting bilong skin long wok mipela i mekim hia long Betel, tasol mipela i kisim planti blesing bilong spirit. Tru, mipela i no gat sampela pikinini bilong skin, tasol mipela i gat planti pikinini bilong spirit.”
Mi tu mi no hevi! Dispela rot mipela i bihainim em gutpela rot. Long olgeta de mipela i mekim wok bilong Jehova na litimapim nem bilong em. I stap bilong mipela i gat as bilong en, olsem na mipela i stap belgut na amamas, long wanem mipela i stap “aninit long strongpela han bilong God.”−1 Pita 5:6.
[Piksa long pes 27]
Papamama bilong mi, Josep na Maria
[Piksa long pes 29]
Simon wantaim meri bilong em, Grace