Brukim Sen na Lusim Kalabus

LONG planti hap bilong graun pasin bilong pret long masalai samting i bosim wokabaut bilong planti man. Planti man long hap bilong Wes i ting sapos ol i holim ain ol man i pasim long lek bilong hos, o ol i holim lek bilong rabit, dispela samting inap lukautim ol na bai masalai samting i no ken mekim nogut long ol. Planti Afrika i save pasim samting long nek bilong ol bilong lukautim ol bambai ol spirit nogut i no ken bagarapim ol. O ol i pasim string long han bilong nupela pikinini bilong lukautim em. Na sampela lain i bilip olsem sapos ol i pasim liklik hap bun bílong gorila long dispela string, dispela samting bai helpim skin bilong pikinini long kamap bíkpela na strongpela.

Ol manmeri i stap klostu long riva ol i save bilip long ol meri bilong wara I gat tel bilong pis. Long hap bilong Sentral Afrikan Ripablik ol i kolim ol dispela meri Mami Wata. Ol i tok ol dispela meri i gat longpela yelopela gras na ol i save pulim man o meri i kam klostu long wara na holim em na bai em i dring wara na i dai. Sampela i mekim wok long dispela samting bilong helpim ol. Ol i kapsaitim sampela kain marasin samting olsem ofa long wara bilong kirapim Mami Wata long holim birua bilong ol taim em i kam long wara.

Ol Afrika i save pret tru long ol glasman na ol marilaman. Ol glasman i save sakim nabaut ol liklik girigiri samting bilong painim save long samting bai kamap long bihain. Na ol marilaman i save wokim marila bilong kirapim man o meri long givim bel tru long poroman bilong em. Sapos klaut i holim samting i stap klostu long ol, ol i ting wanpela man ol i bin tok pait wantaim em em i baim posinman long bekim nogut long ol. Sampela i ting ol man bilong mekim posin ol inap mekim man i tanim i kamap meri o meri i tanim i kamap man, o mekim ol manmeri i tanim i kamap animal!

Ol manmeri i gat kain tingting olsem, olgeta samting i kamap nating tasol ol i ting i gat as bilong en. Olsem: Sapos wanpela snek o palai i brukim rot bilong yu, ol i tok kwiktaim yu mas i go long haus, nogut samting nogut i painim yu. Sapos wanpela pisin i kam insait long haus bilong yu, ol i tok, wanpela man long dispela haus bai i dai. Taim ol dok i singaut singaut narapela kain long nait, ol i tok wanpela man i laik i dai o nau tasol em i dai.

Ol manmeri bilong Afrika na bilong ol narapela hap bilong graun, em ol i bin skul, ating ol dispela bilip giaman i no stret long tingting bilong ol. Tasol olsem wanem long ol manmeri i bin skul na ol i pret yet long masalai na tewel bilong daiman na ol i no laik brukim ol tambu, olsem ol i pret long kolim nem bilong man i go painim pis o ol i pret long wokabaut aninit long lata o ol i no laik raun long de Fraide 13 o ol i save lukim niuspepa bambai ol i ken save ol sta i makim wanem samting bai kamap long ol? Ol dispela manmeri i kalabus yet, a? Pasin bilong pret long masalai na tambaran na tewel bilong daiman i kalabusim ol olsem sen.

Wanem dispela pasin bilong pret long masalai samting? Olsem wanem em irap kalabusim ol manmeri?

Ol i Pret long Ol Samting Ol i No Save long En

Sampela man i tok, dispela pasin i olsem ‘wanpela bilip o pasin i kamap long wanem ol man i no gat save, o ol i pret long samting ol i no save long en, o ol i bilip long majik o long samting i kamap na ol i no bin tingim.’ Taim ol man i gat save yet na ol i bilip long ol dispela samting, dispela pasin i kalabusim yet ol. Tasol taim ol i kisim save tru na ol i save dispela bilip o tingting bilong ol i no gat as bilong en, nau dispela pasin i no inap kalabusim ol moa. Gutpela save Baibel inap helpim man na bai em i no bihainim moa bilip giaman bilong ol tumbuna na pret nating long masalai samting. Tok bilong Baibel inap helpim em long lusim dispela samting i kalabusim em.

Wawa i kisim dispela save. Taim em i save ol man i dai pinis ol i dai tru na ol i no inap mekim wanpela samting moa, em i no pret moa. Na em i no mekim moa ol samting ol man i tok em i mas mekim, nogut spirit bilong man i dai pinis i bagarapim em. Em i lusim ol dispela pasin na em i no bagarap. Nau em i save, bipo em i pret nating.

Planti Afrika i kisim dispela save. Taim ol i kaunim Baibel na ol i save God i wokim olgeta animal i “kain kain” na narapela kain i no inap tanim i kamap narapela kain, ol i save i no gat sampela meri bilong wara i gat tewel bilong pis. Ol i save i no gat Mami Wata i stap (Jenesis 1:20-27, Baibel Pisin) Na i no gat wanpela man bilong kisim pis em i bin kisim wanpela Mami Wata em i hap pis na hap meri. Nogat tru. Na nau ol i save, ol posinman i no inap mekim man i tanim i kamap wanpela animal, olsem wanpela pukpuk samting. Ol man na ol animal i narapela narapela “kain.”

Na Baibel i tok ol animal ol “i no gat tingting.” (2 Pita 2:12, Nupela Testamen) Olsem na wanpela pisin o dok i no inap save wanpela man i laik i dai, a? Na snek o blakpela pusi (long hap bilong Yurop) em i brukim tasol rot bilong man, em i no inap mekim na bai bagarap i painim dispela man, a? Na ol glasman ol i no inap tokim yumi long ol samting bai kamap long bihain, long wanem Baibel i tok, God tasol em i save long ol samting bai kamap long bihain. (Aisaia 44:6-8) Yumi gat tingting na yumi save, ol dispela man i no inap tokim yumi long ol samting bai kamap long bihain. Na ol sta i stap longwe tru long yumi ol i no inap mekim wanpela samting bilong senisim sindaun bilong yumi olsem sampela man i ting ol inap mekim.

Tasol ating bai wanpela man i tok: ‘Bipo wanpela snek i brukim rot bilong mi na tupela de bihain sik i kisim namba wan pikinini man bilong mi!’ Tru, ating samting i kamap olsem. Tasol olsem wanem long ol manmeri em sik i painim pikinini bilong ol, tasol ol i no bin lukim wanpela snek pastaim? Na olsem wanem long ol manmeri i lukim snek samting, tasol i no gat wanpela samting nogut i kamap long ol liklik taim bihain? Baibel i stori long ol samting i save painim ol man na Baibel i tok: “Wanpela taim i save painim olgeta man, na sampela samting ol i no bin tingim, em tu i save painim ol.” (Eklisiastis 9:11) Yes sampela samting i save painim nating ol man. Ating man i stap long wanpela hap taim bikpela win na ren i kamap na em i kisim bagarap. Tasol sapos em i no bin i stap long dispela hap long dispela taim, bagarap i no ken painim em. Taim sik o bagarap i painim yumi, yumi no ken ting wanpela man i birua long yumi na dispela samting i painim yumi o wanpela spirit nogut i mekim nogut long yumi. Nogat. Sik i save painim yumi olgeta man na sampela samting yumi no bin tingim em i save kamap long yumi. Dispela samting i kamap nating tasol. Nau planti manmeri i kisim save long dispela samting na ol i no pret moa long masalai na ol spirit nogut. Ol i no kalabus moa.

Ol i Bilip long Majik

Tasol sampela taim narapela kain samting i kamap na ol men i save, dispela samting i no inap kamap nating—wanpela samting i get narapela kain strong em i kamapim. Sampela ol i kolim dispela samting olsem majik. Long hap bilong Wes ol manmeri i save, taim ol manmeri i bung bilong toktok wantaim ol spirit, ol narapela kain samting i save kamap. Wanpela yangpela man i stori long sampela samting i kamap taim em wantaim sampela poroman bilong em ol i mekim wok long wanpela Wijabot (Ouija board). Dispela samting em i olsem liklik hap plang i get rait long en “Yes” na “Nogat” na ol rait (A, B, C, D, … ) na namba (1, 2, 3, 4, … ), na wanpela samting olsem han i save wokabaut na makim dispela tok “Yes” o “Nogat” na ol rait na namba na bekim askim bilong ol man. Dispela yangpela man i tok, em wantaim ol poroman bilong em ol i sindaun klostu long dispela hap plang na ol i laik lukim ol samting i kamap, na wantu wanpela samting i tromoi em na em i lusim sia i go bamim strong banis.

Long Afrika tu ol manmeri i save stori long sampela narapela kain samting i kamap. Ol i tok ol i bin lukim wanpela meri bilong wara i hap meri na hap pis na em i get longpela yelopela gras. Ol i tok dispela meri i singautim ol i kam insait long wara. O ol i go lukim posinman na bihain sik i painim birua bilong ol na ol i ting, samting posinman i mekim i as bilong dispela. Orait, olsem wanem long ol dispela narapela kain samting i save kamap? Wanem as bilong en?

Sampela narapela kain samting i save kamap tru na Baibel i tokim yumi long as bilong dispela samting. Sapos yumi kisim save long ol tok bilong Baibel long dispela samting tu, dispela save inap helpim yumi na bai yumi lusim kalabus bilong pret long masalai samting. Baibel i tok i gat ol spirit nogut i stap na ol i laik giamanim yumi. Tasol ol i no spirit bilong man i dai pinis. Nogat. Na yumi inap sakim ol.

Orait, ol dispela spirit nogut ol i husat? Baibel i tok hetman bilong ol em Seten. Yumi no ken tok bilas na ting ol dispela spirit nogut ol i no i stap. Ol i stap tru. Jisas i save ol i stap. Tasol ol i kamap olsem wanem? Baibel i tok, pastaim ol i gutpela wokboi bilong Jehova long heven, ol i ensel, tasol ol i bikhet na ol i kamap birua bilong God.—Matyu 12:26-28; 2 Pita 2:4.

Baibel i tok tu Seten i “giemanim olgeta manmeri bilong graun.” (Revelesen 12:9, NT) Olsem na em i laik bai ol i no ken lusim kalabus bilong pret long masalai samting. Olsem wanem? Em inap mekim ol narapela kain samting i kemap bilong giamanim ol men? Tru tumas em inep mekim. Baibel i tok wanpela “man bilong sakim lo bai em i kamap ples klia long strong bilong Seten tasol. Na long pasin giaman bilong Seten bai em i mekim olgeta strongpela wok na kain kain mirakel, na olgete giaman bilong pasin nogut. Bai em i giamanim ol man i laik lus.”—2 Tesalonaika 2:9, 10, NT.

Olsem na sapos sampela narapela kain samting i kamap, Seten wantaim ol spirit nogut i mekim na dispela samting i kamap. Seten i get bikpela strong, winim bilong ol man. Tasol i no olsem i no gat wanpela samting bilong helpim yumi. Nogat. Strong bilong God i winim tru strong bilong Seten na God i tok, sapos yumi laik em bai helpim yumi.

Jems i raitim sampela tok bilong Baibel na em i tok: “Yupela i mas daunim bel na stap aninit long God. Yupela i mas sakim Seten, na bai em i lusim yupela na ranawe.” (Jems 4:7, NT) Wawa na planti narapela manmeri bilong Afrika ol i bin mekim olsem. Ol i bilip long Baibel, em tok bilong God, na ol i bihainim ol lo bilong God long pasin ol i mas mekim. Long dispela rot ol i lusim dispela kalabus bilong Seten, em pasin bilong pret long masalai samting. Ol i no pret moa long ol samting bipo ol i pret long en.

Olsem na ol i rausim samting ol i bin pasim long nek bilong ol, na ol i rausim liklik hap string samting ol i bin pasim long han bilong pikinini bilong lukautim ol. Ol i kukim ol dispela samting long paia. Ol i no pret na mekim sampela pasin bilong amamasim spirit bilong ol man i dai pinis; na ol i no pret moa long posin bilong ol posinman. Na ol i no mekim pasin nogut, olsem pasin pamuk o pasin pait samting.

Ol dispela manmeri i lusim dispela pret, tasol yu ting samting nogut i painim ol? Nogat tru! Gutpela samting i painim ol. Jisas i tok promis long ol disaipel bilong em, olsem: “Sapos yupela i holim tok bilong mi, orait bai yupela i disaipel tru bilong mi. Na yupela bai i save long tok tru. Na tok tru em bai i mekim yupela i kamap fri.” (Jon 8:31, 32, NT) Sin i no bosim moa ol dispela manmeri. God i lukautim ol bambai ol spirit nogut i no ken mekim nogut long ol. Gutpela save nau ol i kisim i kamapim ples klia ol samting bipo ol i pret long en na ol i save, ol i pret nating long en. Tok i tru i mekim ol i stap fri! Ol i lusim pinis kalabus!

Olgeta man i laik lusim dispela kalabus, ol inap lusim. Sapos yu laik kisim gutpela save olsem Wawa i kisim na bai yu no ken pret moa long masalai samting, Ol Witnes Bilong Jehova i laik helpim yu olsem ol i bin helpim Wawa.