Sampela Tok i Kam Long Olgeta Hap
Kampani Bilong Smok i Tok Smok i Kamapim Kensa
Philip Morris—em wanpela bikpela kampani bilong smok long Amerika—i bin tok pait inap planti yia long save sampela saveman i bin kisim. Tasol nau kampani i tokaut olsem pasin bilong smok i save kamapim kensa bilong wetlewa na sampela sik moa i kilim man i dai. Kampani i tokim ol nius olsem: “Save ol dokta na ol saveman i kisim i kamapim klia tru olsem pasin bilong smok i save kamapim kensa bilong wetlewa, sik bilong klok, bikpela sik bilong wetlewa, na sampela bikpela sik moa.” Nius The New York Times i tok, “bipo dispela kampani i tok olsem . . . smok em ‘inap mekim’ na man i kisim ol sik olsem kensa bilong wetlewa, tasol smok yet i no as bilong ol dispela sik.” Tasol maski kampani i tokaut olsem smok i save kamapim sampela bikpela sik, ol i tok moa: “Mipela i amamas tru long smok bilong mipela, na long ol toksave bilong smok em ol i bin kirapim ol man long baim smok bilong mipela inap planti yia.”
Wok Long Daunim Hevi
Olsem wanem? Yu pilim olsem bel bilong yu i no stap isi? Nius El Universal i kamapim tok wanpela lain (Mexican Institute of Social Security) i mekim bilong helpim ol man long daunim hevi. Olsem: Slip inap long skel bilong skin bilong yu—inap 6-pela i go inap 10-pela aua long olgeta de. Long moningtaim kisim gutpela kaikai i save strongim skin, na bikpela kaikai liklik long apinun, na liklik kaikai long nait. Na tu, ol saveman long planti hap ol i tok, no ken kisim planti kaikai i gat planti gris long en, na no ken putim planti sol long kaikai, na taim yu winim 40 krismas pinis yu no ken kaikai planti susu na suga. Painim taim bilong tingting long ol samting. Na pasin bilong wokabaut long bus o lukautim ol plaua samting inap helpim yu long daunim hevi.
No Gat Taim
Wanpela nius (Gießener Allgemeine) bilong Jemani i tok, long olgeta hap bilong Yurop, planti man moa ol i pilim olsem ol i mas mekim ol samting hariap tru. Dispela samting i save painim ol man maski ol i stap long ples wok, o mekim wok bilong haus, o painim amamas. Saveman Manfred Garhammer bilong Yunivesiti Bambeg, em i tok: “Ol aua ol manmeri i save tromoi long slip i go daun, na ol i save kaikai hariap, na pilim olsem ol i mas mekim wok bilong ol hariap tru, winim long 40 yia i go pinis.” Dispela saveman i kisim save olsem ol man bilong olgeta kantri bilong Yurop em i bin skelim, ol i wok hariap moa bilong mekim ol wok samting. Ol i wokim ol masin bilong helpim wok bilong haus na ol i sotim ol aua ol man i mas wok, tasol ol dispela samting i no bin kamapim “lain manmeri em ol inap malolo” o “givim bikpela hap taim long ol.” Nogat. Tasol nau hap taim ol man i save tromoi bilong kaikai i go daun inap 20 minit, na hap taim bilong slip i go daun inap 40 minit.
Ol Ostrelia i Kalabus Long Pilai Laki
Nius The Australian i tok: “Long nau pasin bilong pilai laki em i wanpela bikpela samting bilong bagarapim skin bilong ol man long Ostrelia. Em i wok long bagarapim inap 330 tausen manmeri i save pilai laki long olgeta taim.” Nius i tok, long olgeta 5-pela 5-pela masin bilong pilai laki long olgeta hap, winim wanpela i stap long Ostrelia. Long dispela hap, inap 82 pesen bilong ol manmeri i save pilai laki. Wanpela lain i skelim ol bisnis bilong pilai laki, na ol i kisim save olsem long Ostrelia inap 2.3 pesen bilong ol man na meri i bikpela pinis ol i kisim bikpela hevi long pilai laki. Inap 37 pesen bilong dispela lain ol i bin tingting long kilim i dai ol yet, na winim 11 pesen i bin traim long kilim i dai ol yet, na 90 pesen i tok pilai laki i mekim na ol i bel hevi tru. Dispela lain i tokim ol bisnis bilong pilai laki long senisim ol samting bilong wok bilong ol, na ol i tokim ol long putim long ples bilong pilai laki ol toksave i stori long ol samting nogut pilai laki i save kamapim.
Marasin Bilong Mekim Skin i Kamap Gutpela
Nius The Toronto Star i tok, wanpela samting bilong helpim skin bilong pes i slek pinis long kamap gutpela gen em olsem: Ol i givim sut i gat wanpela kain gip ol i kolim botolium. Dispela gip i mekim na sampela masol bilong pes i dai na insait long sampela de ol dispela masol i no strong moa, na ol liklik liklik baret bilong skin i lus. Dispela marasin i wok inap 4-pela mun na skin bilong pes bilong man i kamap olsem bilong yangpela man. Tasol dispela samting i gat hevi bilong en. Nius i tok, “ol liklik liklik baret bai lus long skin bilong man, tasol man i no inap apim gras i stap antap long ai bilong makim em i kirap nogut, na taim em i lap, ai bilong em i no lait, na em i no inap mekim pes i kros.” Nius i tok, man i mas redi long “mekim hap bilong pes i dai bambai skin i ken kamap gutpela olsem bilong yangpela man.”
“God i Laik Helpim Husat?”
Man bilong raitim ol stori bilong spot, em Sam Smith, em i tok: “Mi no laik daunim bilip bilong ol narapela, tasol ating dispela pasin bilong soim ol man olsem man i givim bel long lotu—em samting ol man bilong spot i save mekim—ol i mekim olsem planti taim tumas, a? Bilong wanem ol man bilong pilai ragbi ol i save beten bihain long ol i bin putim trai?” Smith i tok, ol dispela man bilong pilai ol i save beten bihain long pilai, tasol long rum senis ol i save “tok swea long ol niusman,” o ol i “traim long bagarapim ol narapela man bilong pilai” long taim ol i resis. Em i tok, pasin bilong tingting olsem God bai helpim wanpela tim na narapela nogat, “i daunim pasin bilong bilip long God.” Olsem na long pinis bilong stori bilong em, em i tok: “Maski long mekim ol pilai i kamap olsem samting bilong lotu.”
Sik Ol i Kisim Long Blut
Lain Associated Press i tok: “Inap 2.7 milion manmeri bilong Amerika ol i gat sik hepataitis C, olsem na em i wanpela sik ol man i save kisim long blut, winim olgeta narapela sik olsem long Yunaitet Stets.” Hepataitis C i save kalap long narapela man long rot bilong maritpasin o long blut i gat binatang jem bilong dispela sik. Ol man inap kisim dispela sik, em ol man i save kisim drak long sut na mekim wok long wankain sut, na ol man i save mekim maritpasin na ol i no mekim wok long kondom. Tasol dispela sik inap kalap tu long rot bilong ol man i save katim mak long skin bilong man, na ol man i save oraitim sik long rot bilong akupanksa, na ol i no bin klinim gut ol sut samting bilong ol. Ol man i bin kisim blut bilong narapela man ol tu inap kisim dispela sik. Long olgeta yia, inap 1,000 manmeri long Yunaitet Stets ol i kisim lewa bilong narapela man, long wanem, dispela sik i bin bagarapim lewa bilong ol yet.
Ol Pisin i Gat Save!
Wanpela nius (Terre Sauvage) bilong Frans i stori long ol animal samting, em i tok: “Ol pisin long Kalkata ol i kolim sparo, ol i no save kisim malaria.” Ol saveman i luksave olsem sik malaria i go bikpela, olsem na ol sparo i save flai i go longwe moa bilong painim lip bilong wanpela diwai i gat marasin kwinin long en, em dispela marasin i save oraitim malaria. Ol dispela pisin i save putim lip bilong dispela diwai insait long haus bilong ol, na tu, ol i save kaikai dispela lip. Nius i tok: “Ol sparo i pret long malaria, tasol ol i laik stap long biktaun, i luk olsem ol i bin painim gutpela rot bilong lukautim ol yet.”
Mani i Doti
Nius Guardian i tok, winim 99 pesen bilong pepa mani bilong beng bilong Landon i gat drak koken long en. Ol saveman i skelim inap 500 pepa mani bilong beng na ol i kisim save olsem drak koken i stap long 496 pepa mani. Drak i pas long mani taim ol man bilong kisim drak ol i holim mani. Na long rot bilong ol dispela pepa mani, drak i kalap long ol narapela pepa mani taim ol masin bilong beng i skelim pepa mani o ol i putim mani long wankain hap. Lain manmeri long Briten i gat 20 i go inap 24 krismas ol i save kisim planti koken moa, winim olgeta narapela drak. Wanpela lain (Youth Awareness Project) bilong Landon i tok, ol yangpela i save kisim koken, long wanem, ol i ting dispela i helpim ol long kisim nem na bikpela namba.
Ol Wok Man Inap Kisim Bagarap Long En
Wanem 10-pela wok inap bagarapim skin bilong man, winim olgeta narapela wok? Wanpela lain (U.S. Bureau of Labor Statistics) i tok, namba wan wok ol man i kisim bagarap long en, em wok bilong katim na rausim ol diwai—long olgeta 100 tausen 100 tausen wokman, 129 i dai. Namba tu lain em ol man bilong kisim pis na namba tri lain em ol man i wok long sip. Long olgeta 100 tausen 100 tausen man bilong kisim pis, 123 i dai, na long olgeta 100 tausen 100 tausen wokman bilong sip, 94 i dai. Ol narapela wok ol man inap kisim bagarap long en i olsem: Wok bilong ol pailot bilong balus, ol man i wokim bun bilong haus long ain, ol man i wok long main, ol man i wokim ol haus, ol draiva bilong teksi, ol draiva bilong trak, na ol man i wok long fam. Tasol nius Scientific American i tok, “namba bilong ol man i dai taim ol i mekim wok bilong ol—olsem 4.7 pesen bilong olgeta 100 tausen 100 tausen wokman—i go daun inap 10 pesen” insait long 5-pela yia i go pinis.