Wanpela Singsing Em Inap Tingim Yet
“LONG skul mi bin mekim wanpela singsing i gat dispela tok: ‘Bikpela Jehova i stap king na em i gat biknem tru.’ Planti taim mi tingting, ‘Dispela Jehova em i husat?’ ”
Em tok bilong wanpela Witnes Bilong Jehova, Gwen Gooch, na stori bilong em i bin kamap long Wastaua, na dispela stori i kirapim tingting bilong wanpela meri i save ritim ol nius Wastaua.a Vera i kam long Siatel, Wosington, Amerika, em i tok: “Wankain samting i bin painim mi long haiskul.”
Bihain long Vera i harim wanpela singsing, wankain olsem Gwen, em i gat bikpela laik long save Jehova em i husat. Long 1949, Vera i kisim bekim long askim bilong em taim brata bilong em i stori long em long Jehova, em nem bilong God i stap long Baibel.
Vera i bin stap olsem wanpela Witnes Bilong Jehova inap 50 yia. Tasol em i no bin lusim tingting long dispela singsing ol i bin mekim long haiskul. Em i tok: “Inap planti yia mi bin traim long painimaut husat i wokim dispela singsing.” Wanpela stua i salim ol samting bilong musik i helpim em, na em i painim dispela singsing. Franz Schubert i bin raitim dispela singsing long yia 1825. Na tru tumas, ol tok bilong dispela singsing i litimapim nem bilong Jehova. Sampela tok bilong dispela singsing i olsem:
“Jehova em i Bikpela! Heven na Graun i tokaut long bikpela strong bilong em. . . . Yu harim dispela long bikpela win, na long pairap bilong wara . . . Yu harim long krai bilong bikbus, na lukim long gaden kon em win i sakim nabaut, na long ol naispela naispela plaua i gat gutpela smel, na long blupela skai bilong Heven em ol sta i pulap long en . . . Ol klaut bilong Em i pairap strong, na klaut i bruk nabaut, na pretim ol man. Tasol bikpela samting moa em bel bilong yu i tokaut yet long strong bilong Jehova, . . . em God bilong olgeta taim. Lukluk i go antap long Em, na wet long Em i marimari na i helpim yu. . . . Jehova em i Bikpela!”
Vera i tok moa: “Sampela taim mi bin mekim wok long tok bilong dispela singsing bilong soim ol man olsem, long yia 1850 samting sampela man i save long nem bilong God na ol i bin litimapim nem bilong em tu.” Tru tumas, long bipo yet i kam inap nau, i gat ol bilipman na bilipmeri em bel bilong ol i kirapim ol long mekim singsing bilong litimapim nem bilong Jehova. Dispela pasin bai i stap inap oltaim oltaim, long wanem, long olgeta taim i gat as bilong litimapim nem bilong Man bilong wokim heven na graun.
[Futnot]
a Lukim Wastaua bilong Mas 1, 1998.
[Piksa long pes 27]
Vera