Baibel i Tok Wanem?
I Stret Sampela Taim Yumi Ken Mekim Tok Giaman?
“SAMPELA TAIM LIKLIK TOK GIAMAN I HELPIM MAN NA EM I NO GAT WOK LONG STORI PLANTI LONG AS BILONG SAMTING EM I BIN MEKIM.”
DISPELA tok i kamapim tingting bilong planti man long pasin bilong tok giaman. Ol i ting, tok giaman i no gat rong sapos em i no bagarapim narapela. Ol man i gat dispela kain tingting ol i tok, i gat wanpela lo tasol yumi mas bihainim, em lo bilong laikim tru ol narapela. Olsem wanpela meri bilong raitim buk, em Diane Komp, em i tok, ‘sapos gutpela tingting i kirapim yu long giaman, orait tok giaman bilong yu i no bikpela samting.’
Planti man long nau ol i gat dispela kain tingting. Ol man i kirap nogut long ol tok giaman bilong sampela bikman bilong wok politik na bilong gavman. Pasin bilong tok giaman i go bikpela, olsem na planti man i no strong moa long mekim tok tru. Long sampela bisnis samting, pasin giaman i kamap olsem pasin bilong ol man long taim ol i mekim wok. Wanpela meri i wok long stua, em i tok: “Mi save giamanim ol man na mi kisim pe long dispela. Sapos mi giaman, mi save winim ol resis bilong salim planti samting, na long olgeta yia ol i mekim bikpela tok amamas long wok bilong mi long salim planti samting. . . . I olsem tok giaman em i wanpela bikpela samting ol i lainim ol wokman bilong stua long mekim long olgeta hap.” Planti ol i ting i no gat rong sapos ol i mekim liklik tok giaman. Olsem wanem? Dispela em i tru? Sampela taim i stret long ol Kristen i mekim tok giaman?
Gutpela Lo Bilong Baibel
Baibel i tambuim olgeta kain tok giaman. Man bilong raitim Song em i tok: “[God i] save bagarapim olgeta man bilong giaman.” (Song 5:6; lukim Kamapim Tok Hait 22:15.) Long Sindaun 6:16-19, Baibel i kamapim wanpela lista i kolim 7-pela samting em Jehova i nolaik tru long en. “Pasin bilong mekim tok giaman” na “pasin bilong tok giaman long kot” i stap long dispela lista. Bilong wanem? Long wanem, Jehova i nolaik tru ol samting nogut tok giaman i save kamapim. Dispela em i wanpela as na Jisas i kolim Satan olsem em i man bilong giaman na man bilong kilim ol man i dai. Ol tok giaman bilong em i mekim na planti hevi na indai i painim ol man.—Stat 3:4, 5; Jon 8:44; Rom 5:12.
Samting i painim Ananaias na Safaira i kamapim klia tingting bilong Jehova long tok giaman. Tupela hia i giamanim ol aposel bambai ol i ken ting tupela i bin givim planti mani, tasol ol i givim liklik tasol. Ol i bin tingting pastaim na long laik bilong ol yet ol i mekim dispela tok giaman. Olsem na aposel Pita i tok: ‘Yu no ken ting yu giamanim ol man tasol. Nogat. Yu giamanim God yet.’ Long dispela as God i kilim tupela i dai.—Aposel 5:1-10.
Sampela yia bihain, aposel Pol i tokim ol Kristen olsem: “Yupela wan wan i no ken giamanim ol arapela Kristen.” (Kolosi 3:9) Dispela tok i bikpela samting tru insait long kongrigesen Kristen. Jisas i tok, pasin bilong laikim tru ol narapela em i mak bilong ol disaipel tru bilong em. (Jon 13:34, 35) Dispela kain pasin bilong laikim tru ol narapela inap i go bikpela namel long ol manmeri i no save giaman na narapela i save bilip long narapela. I hatwok long laikim tru wanpela man sapos yumi no inap bilip olsem em i save mekim tok tru long olgeta taim.
Olgeta kain tok giaman i nogut, tasol sampela i nogut tru. Olsem: Wanpela man i giaman, long wanem, em i sem o pret. Tasol narapela man i gat pasin bilong tok giaman, long wanem, em i laik bagarapim ol narapela. Tingting nogut i kirapim em long giaman, olsem na man i gat laik long giaman, em inap bagarapim ol narapela, na em bai raus long kongrigesen sapos em i no tanim bel. Pasin bilong bel nogut i no as bilong olgeta tok giaman, olsem na yu mas was gut nogut yu sutim tok nating long narapela, yu mas save long olgeta samting i bin kamap taim wanpela man i tok giaman. Yu mas tingim ol samting i bin painim dispela man na ol samting i kirapim em long mekim tok giaman.—Jems 2:13.
“Bihainim Pasin Bilong Ol Snek”
Bilong mekim tok tru i no olsem yumi mas stori long olgeta samting long man i askim yumi long mekim olsem. Long Matyu 7:6 Jisas i tok: “Yupela i no ken kisim samting ol i makim bilong God, na givim long ol dok. . . . Na yupela i no ken tromoi ol gutpela gutpela bis bilong yupela i go long ol pik. Nogut ol i krungutim tasol long lek bilong ol.” Olsem: I no stret long ol man i gat tingting nogut ol i kisim save long sampela samting. Ol Kristen i save ol lain bilong graun i save birua long ol. Olsem na Jisas i tokim ol disaipel bilong em long “bihainim pasin bilong ol snek” tasol ol i “no ken tingting long mekim wanpela pasin nogut.” (Matyu 10:16; Jon 15:19) Sampela taim Jisas i no kamapim olgeta samting, na em i tingim dispela moa yet taim pasin bilong kamapim olgeta samting inap bagarapim em yet o ol disaipel bilong em. Tasol long kain taim olsem tu, em i no bin mekim tok giaman, nogat. Em i pasim maus tasol na em i no mekim wanpela tok o em i stiaim ol man long toktok long narapela samting.—Matyu 15:1-6; 21:23-27; Jon 7:3-10.
Ol gutpela man na meri em Baibel i stori long ol, olsem Abraham, Aisak, Rahap, na Devit, ol tu ol i bin was gut na ol i no stori long olgeta samting taim ol i toktok wantaim ol man em ol inap mekim nogut long ol. (Stat 20:11-13; 26:9; Josua 2:1-6; 1 Samuel 21:10-14) Baibel i tok, ol dispela man na meri ol i gutpela wokboi bilong Jehova, na ol i gat pasin bilong harim tok. Olsem na ol i stap olsem gutpela piksa bilong yumi ken bihainim.—Rom 15:4; Hibru 11:8-10, 20, 31, 32-39.
Ating long sampela taim i luk olsem tok giaman inap helpim yu long abrusim wanpela hevi samting. Tasol taim ol Kristen bilong nau i gat ol bikpela hevi, i gutpela ol i bihainim pasin bilong Jisas na maus bilong bel em Baibel i skulim pinis.—Hibru 5:14.
Baibel i kirapim yumi long mekim tok tru tasol. Pasin bilong mekim tok giaman i no stret, na yumi mas bihainim tok bilong Baibel: “Yupela olgeta i mas mekim tok tru tasol long ol arapela.” (Efesus 4:25) Taim yumi mekim olsem, bel bilong yumi i no kotim yumi, na yumi kamapim pasin sori na bel isi insait long kongrigesen, na yumi wok long litimapim nem bilong “God bilong mekim pasin tru tasol.”—Song 31:5; Hibru 13:18.
[Piksa long pes 20]
Ananaias na Safaira i mekim tok giaman, olsem na ol i dai