Baibel i Tok Wanem?
I Stret Yumi Lotu Long Jisas?
KIRAP long planti handet yia i go pinis na i kam inap long nau, planti manmeri i insait long ol lotu i gat nem Kristen ol i save tingim Jisas i olsem God i Gat Olgeta Strong na ol i lotu long em. Tasol Jisas yet i kirapim ol man long lotuim God Jehova tasol. Tingim, taim Satan i laik subim Jisas long lotuim em, Jisas i bin tok olsem: “Yu mas aninit long God, Bikpela bilong yu. Na yu mas lotu long em wanpela tasol.” (Matyu 4:10) Bihain Jisas i bin skulim ol disaipel bilong em olsem: “Long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven.”—Matyu 23:9.
Jisas i bin tokim wanpela meri bilong Samaria olsem ol man i mas lotuim God long spirit na long pasin i tru. Tru tumas, “Papa i laikim tumas bai ol kain man olsem i mas lotu long em.” (Jon 4:23, 24) Yumi laik lotu na givim biknem long God wanpela tasol. Sapos yumi lotu long narapela man o narapela samting i olsem yumi lotu long wanpela god giaman. Ol Skripsa Hibru na Ol Skripsa Grik long Baibel i tambuim dispela samting.—Kisim Bek 20:4, 5; Galesia 5:19, 20.
Sampela i save tok, ‘Tasol olsem wanem? Sampela tok bilong Baibel yet i makim olsem yumi mas lotuim Jisas tu wantaim? Pol i bin tokim ol lain long Hibru 1:6 olsem: “Olgeta ensel bilong God i mas lotu long em [Jisas].” ’ (King James Version) Olsem wanem yumi inap kisim stretpela tingting long dispela skripsa wantaim tok Baibel i mekim long pasin bilong lotuim ol god giaman?
Long Baibel Lotu i Makim Wanem Samting?
Pastaim yumi mas save long tingting bilong Pol taim em i kolim dispela tok, lotu. Em i bin mekim wok long wanpela tok Grik olsem pro·sky·neʹo. Wanpela buk dikseneri (Unger’s Bible Dictionary) i tok, insait bilong dispela tok i makim pasin bilong ‘kis long han bilong narapela olsem yu laik stap daun long em o litimapim em.’ Narapela dikseneri (An Expository Dictionary of New Testament Words, by W. E. Vine) i tok olsem, dispela tok i “makim pasin bilong daun long wanpela man o long God bilong litimapim em.” Long taim bilong ol man i bin raitim Baibel, planti taim dispela tok pro·sky·neʹo i makim pasin bilong brukim skru long man i gat bikpela namba.
Tingim tok piksa bilong Jisas long wanpela wokboi i no inap bekim bikpela dinau bilong em long bos. Long dispela tok piksa ol i mekim wok long wanpela hap bilong dispela tok Grik, olsem na long wanpela Baibel (King James Version) ol i bin tanim dispela tok olsem, “dispela wokboi i brukim skru na lotuim [hap tok i kam long dispela tok pro·sky·neʹo] [king], na tok olsem, Bikpela, yu mas isi long mi, bihain bai mi bekim olgeta dinau bilong mi.” (Matyu 18:26) Olsem wanem? Yu ting dispela man i lotuim king olsem wanpela god? Nogat tru! Em i bihainim pasin daun na tingim namba bilong king, long wanem, king i stap olsem bos bilong em.
Long taim bilong ol man i bin raitim Baibel, planti man i stap long hap bilong Is ol i save brukim skru samting long bikman. Taim Jekop i wokabaut i go bungim brata bilong em Iso, em i brukim skru long em 7-pela taim. (Stat 33:3) Taim ol brata bilong Josep i lukim em ol i brukim skru na putim pes bilong ol i go daun long graun bilong makim olsem ol i daun tru long em na tingim namba em i holim, long wanem, Josep i gat bikpela namba long haus bilong king bilong Isip. (Stat 42:6) Ol dispela tok i helpim yumi long save long samting i bin kamap taim ol lain i save lukluk long ol sta i painim yangpela pikinini Jisas, ol i save “em king bilong ol Juda.” Wanpela Baibel (King James Version) i tok olsem, “ol i brukim skru na lotu (pro·sky·neʹo) long em.”—Matyu 2:2, 11.
Olsem na dispela tok pro·sky·neʹo em sampela Baibel i save tanim olsem “lotu” i no makim pasin yumi mas mekim bilong lotuim God Jehova tasol, nogat. Em inap makim pasin bilong tingim narapela o daun long em. Bilong kamapim tok ol man i no inap paul long en, sampela Baibel i save tanim dispela tok pro·sky·neʹo long Hibru 1:6 olsem “givim biknem long em” (New Jerusalem Bible), o “litimapim em” (The Complete Bible in Modern English), o “putim pes i go daun” (Twentieth Century New Testament), o “brukim skru long em” (New World Translation).
I Stret Yumi Brukim Skru Long Jisas
Olsem wanem? I stret yumi brukim skru long Jisas? Yumi ken tok, i stret tru yumi mekim olsem! Long pas em i raitim long ol Hibru, aposel Pol i bin tok Jisas em i ‘dispela Pikinini bilong kisim olgeta samting’ na em i “sindaun long han sut bilong Namba Wan King i stap antap.” (Hibru 1:2-4) Olsem na long “nem [bilong] Jisas, bai olgeta ensel na olgeta man na ol arapela samting i stap long heven na long graun na aninit long graun ol i ken brukim skru long ai bilong Jisas na i stap aninit long em. Na olgeta bilong ol i ken tokaut olsem, ‘Jisas Krais em i Bikpela.’ Na long dispela pasin ol bai i givim biknem long God Papa.”—Filipai 2:10, 11.
I no longtaim na Krais bai mekim wok long namba em i holim na bikpela strong em i kisim wantaim dispela namba bilong senisim ol samting bilong dispela graun na kamapim wanpela ples paradais. God i makim Jisas long mekim wok long ofa bilong em bilong baim bek yumi na pinisim olgeta hevi na pen bilong dispela graun bilong helpim ol lain i daun long wok king bilong em. Olsem na i stret yumi litimapim nem bilong em, na daun long em, na brukim skru long em, a?—Song 2:12; Aisaia 9:6; Luk 23:43; KTH 21:3, 4.
“Em i No Inap Larim Yupela i Lotu Long Wanpela Giaman God”
Tasol tok bilong Baibel i kamapim klia olsem taim yumi lotu—olsem givim bel olgeta na lotuim narapela bilong givim biknem long em—dispela em samting bilong givim long God tasol. Moses i tok God “i no inap larim yupela i lotu long wanpela giaman god.” Tok bilong Baibel i kirapim yumi long “lotu long God, em i bin wokim heven na graun na solwara na olgeta hul wara.”—Lo 4:24; KTH 14:7.
Jisas i holim bikpela wok long lotu i tru, olsem na i stret yumi daun long em na givim biknem long em. (2 Korin 1:20, 21; 1 Timoti 2:5) Yumi inap go klostu long God Jehova long rot bilong Jisas tasol. (Jon 14:6) Olsem na ol Kristen tru i mas lotu long God i Gat Olgeta Strong, em God Jehova.