Helpim Ol Yangpela na Ol i No Ken Kisim “Pasin Bilong Kilim Man i Dai”

Wanem samting i mekim na ol yangpela long nau ol i gat laik long save long ol samting bilong indai? Wanpela bikman bilong gavman bilong provins Ilinoi, Amerika, em i tok: “Ol yangpela i sot long ol samting bilong spirit, olsem na ol i insait long ol samting bilong indai na pasin bilong pait na bagarapim man.”

WANPELA man i save ritim nius Time, em i tok: “Ol papamama i lesman, na ol video na musik samting i stori long pasin pait, na i no gat man i skulim ol yangpela long stretpela pasin na long ol samting bilong spirit, ol dispela samting i mekim na ol yangpela long nau ol i save insait long ol samting bilong indai.”

Pasin bilong i stap wanpis em i narapela bikpela hevi bilong ol yangpela. Sampela i stap insait long wanpela famili em papa na mama wantaim ol i mekim wok mani na ol i no save stap long haus; na sampela narapela yangpela i gat papa o mama tasol. Wanpela lain i tok, ol yangpela long Amerika ol i save stap wanpis inap 3.5 aua long olgeta de, na ol aua ol i save lusim bilong i stap wantaim papamama long olgeta wik i go daun inap 11-pela aua long ol aua ol yangpela i bin lusim wantaim ol papamama long 1965 samting. Na sampela yangpela i no gat papamama bilong strongim bel bilong ol.

Ol Samting Papamama Inap Mekim

Ol yangpela i “sot long ol samting bilong spirit,” olsem na wok bilong papamama i bikpela samting olsem wanem? Ol papamama i gat gutpela tingting ol i save olsem ol pikinini bilong ol i mas kisim sampela gutpela amamas, na tu, oltaim ol i mas helpim olgeta wan wan pikinini. Pasin sori i kirapim ol papamama long toktok wantaim ol pikinini long musik, ol program bilong televisen, ol video, ol buk, ol video-gem, na long ol piksa wokabaut em ol yangpela i save laikim. Ating ol yangpela i no tokaut long dispela, tasol planti ol i laik papamama bilong ol i mas stiaim ol na kamapim klia olsem ol i laikim tru ol. Ol i mas kisim ol stretpela bekim long ol askim bilong ol, long wanem, ol i no save wanem samting bai painim ol. Ol man i bikpela pinis ol i mas save olsem ol pikinini i stap long wanpela taim i gat kain kain hevi long en, winim taim ol yet i bin stap yangpela.

Ol papamama i laik lukautim pikinini bilong ol, ol bai toktok wantaim ol long olgeta taim, na putim gut yau long tok bilong ol, na tokim ol long ol samting nogut bilong ol pasin bilong nau. Gutpela samting bai kamap taim papamama i putim ol strongpela lo long ol pikinini, na bihainim stretpela tingting na mekim wankain pasin long olgeta taim, na sori long ol.​—⁠Matyu 5:​37.

Ol papamama i Witnes Bilong Jehova ol i save wok strong long toktok wantaim ol pikinini bilong ol long olgeta taim, na ol i mekim wok long Baibel na long ol buk samting em Baibel i as bilong en na long ol video.a Long kain taim olsem ol i no laik stretim ol pikinini, nogat; ol i laik toktok wantaim ol long ol samting i strongim ol pikinini long ol samting bilong spirit. Taim famili i bung olsem, ol papamama i putim gut yau long ol hevi i save painim ol pikinini bambai ol i ken mekim ol samting bilong helpim olgeta wan wan pikinini.

Ol yangpela em papamama bilong ol i no stiaim ol long ol samting bilong spirit, ol i ken kisim strong long tok bilong Song 27:10: “Maski papa na mama i givim baksait long mi, Bikpela bai i lukautim mi.” Jehova, em i as bilong pasin marimari na sori, orait olsem wanem em i save helpim ol yangpela? Ol kongrigesen bilong ol Witnes Bilong Jehova i save helpim ol yangpela, na lain bilong kongrigesen i save mekim pasin sori long planti yangpela na bel bilong ol i stap isi. Dispela samting i bin painim wanpela yangpela man nem bilong em Josías, em i tok: “Oganaisesen bilong Jehova i mekim bikpela wok. Mi bin pilim olsem i stap bilong mi i no gat as bilong en. Mi no bin wet long wanpela gutpela samting bai kamap. Taim mi kisim save olsem mi no stap wanpis, dispela i senisim tru i stap bilong mi. Ol brata sista bilong kongrigesen ol i kamap famili bilong mi. Ol elda na ol famili insait long kongrigesen ol i olsem anka bilong helpim bel bilong man long i stap isi.”

Pasin bilong i go oltaim long ol miting bilong ol Witnes Bilong Jehova i bin helpim tingting bilong planti yangpela na ol man i bikpela pinis long kamap gutpela na long ol i ken kamap strong long ol samting bilong spirit. Wanpela savemeri, Patricia Fortuny, em i toktok long dispela gutpela samting long wanpela stori em i bin raitim. Nem bilong stori em olsem: Los Testigos de Jehová: una alternativa religiosa para enfrentar el fin del milenio. (Ol Witnes Bilong Jehova: Wanpela Lotu Bilong Helpim Yumi Long Karim Hevi Long Pinis Bilong Milenium). Em i tok: “Ol Witnes Bilong Jehova i tokaut klia tru wanem pasin i gutpela long bihainim long olgeta de.” Baibel em i as bilong dispela “pasin” na “ol lo.” Olsem na maski wankain hevi i save painim ol Witnes Bilong Jehova olsem i save painim ol narapela man, ol gutpela savetok bilong dispela buk bilong bipo i save strongim ol. Em nau, ol tok na lo i stap long Baibel i save lukautim ol Witnes.

Taim “Ol Manmeri Bai i No i Dai Moa”

Long ol Haus Kingdom bilong ol Witnes Bilong Jehova ol i stori planti taim long tok promis bilong God olsem klostu nau nupela taim bai kamap, na long dispela taim “stretpela pasin tasol bai i stap long en” na “i no gat wanpela man bai i mekim ol i pret.” (2 Pita 3:13; Maika 4:⁠4) Na tu, profet Aisaia i tok long dispela taim God “bai i pinisim dai tru na bai dai i no kamap moa long ol. God, Bikpela bai i pinisim krai bilong ol na mekim drai wara bilong ai bilong olgeta manmeri.” Sin bilong namba wan man, em Adam, i mekim na indai i painim ol manmeri, tasol God i tok promis olsem klostu nau “ol manmeri bai i no i dai moa.”​—⁠Aisaia 25:8; KTH 21:​3, 4; Rom 5:⁠12.

Sapos yu wanpela yangpela i wok long painim helpim, mipela i laik bai ol tok bilong Baibel i ken helpim yu long wetim gutpela samting long bihain na i stap bilong yu i gat as bilong en. Ol Witnes Bilong Jehova inap helpim yu, na yu inap long wetim gutpela taim tru bai kamap long bihain, long nupela taim God i tok promis long kamapim.

[Futnot]

[Piksa long pes 9]

Ol papamama i mas givim taim bilong ol long putim yau long tok bilong ol pikinini na pilim tru hevi bilong ol

[Ol Piksa long pes 10]

“Ol Witnes Bilong Jehova i tokaut klia tru wanem pasin i gutpela long bihainim long olgeta de”