Lap—Em i Gutpela Long Helpim Skin Bilong Yu!
WANPELA MAN LONG JAPAN I RAITIM DISPELA STORI BILONG KIRAP!
PASIN bilong givim bel na mekim dispela samting inap helpim man long stap bel isi. Em inap pinisim pasin bilong bel nogut long narapela. Dispela pasin i save helpim ol man long lusim pasin bilong tingting nogut long ol narapela na i no bilip long ol. Na em i givim bel isi na amamas long planti man. Taim man i mekim dispela pasin, i olsem em i tok, “No ken tingting planti. Mi pilim tru hevi bilong yu.” Na em i givim askim long yumi olsem, “Olsem wanem? Yumi inap kamap pren?” Dispela samting i gat bikpela strong na yumi inap mekim wok long en, em i wanem samting? Dispela samting em i pasin bilong lap na pes i lait. Dispela inap i stap olsem pasin bilong YU YET.
Pes i save lait olsem wanem? Planti buk dikseneri i tok pes bilong man i lait taim em i ‘wokim tupela sait bilong maus i go antap na dispela i makim olsem man i amamas, o em i orait long yu.’ Dispela i makim wok bilong lap na mekim pes i lait, olsem maski man i no toktok, lukluk long pes bilong em i kamapim tingting i stap long bel. Tru, long rot bilong lap man inap kamapim bel bilong em olsem em i laik daunim yu o em i ting yu olsem pipia nating tasol, tasol nau yumi no stori long dispela kain lap.
Olsem wanem? Pasin bilong lap inap helpim yumi tru tru? Ating yu inap tingim wanpela taim bipo pasin bilong narapela long lap i bin helpim yu long kisim bel isi, a? O ating yu inap tingim taim wanpela man i bin stap pes drai tasol na dispela i mekim na yu bin tingting planti, a? Tru tumas, pasin bilong lap na pes i lait em i bikpela samting—em i gutpela long man i mekim dispela pasin na long man i lukim. Wanpela man Baibel i stori long en, em Jop, em i bin tok olsem long ol birua bilong em: “Taim mi tok gude long ol man nating, ol i save kirap nogut long lukim wanpela bikman i toktok long ol. Na mi bin luk amamas na toktok na lap wantaim ol, na long dispela pasin mi bin strongim bel bilong ol.” (Jop 29:24) Ating pasin bilong Jop long “luk amamas” i makim olsem pes bilong em i lait taim em i toktok wantaim ol dispela man.
Long taim bilong yumi tu, pasin bilong lap i save kamapim gutpela samting. Taim hevi o kros i laik go bikpela, pasin bilong lap inap daunim. Taim yumi yet i pilim olsem yumi no stap bel isi o bel bilong yumi i bagarap long wanpela samting, pasin bilong lap inap daunim dispela hevi bilong yumi. Yumi ken tingim Tomoko, planti taim em i lukim olsem ol narapela i wok long lukluk long em, na taim Tomoko i lukluk long ol, wantu ol i save lukluk i go long narapela samting. Em i ting ol i gat tok long sampela pasin bilong em. Tomoko i bel hevi, na em i pilim olsem em i stap wanpis. Bihain wanpela pren i tokim em long lap na pes i mas lait taim em i lukluk long ol narapela. Insait long tupela wik Tomoko i mekim olsem, na em i kirap nogut taim ol narapela i mekim wankain samting long em! Tingting nogut bilong Tomoko i pinis. Em i tok: “Nau mi amamas long i stap bilong mi.” Tru tumas, pasin bilong lap na pes i lait i helpim yumi long i stap bel isi taim yumi stap wantaim ol narapela na i helpim yumi long mekim pasin pren.
Em i Mekim Gutpela Samting Long Yu na Ol Narapela
Pasin bilong lap na pes i lait inap helpim tingting na bel bilong man. Em bai helpim man long stap amamas. Na em inap helpim bodi bilong man long i stap gut. I gat wanpela tok olsem, “Pasin bilong lap i olsem gutpela marasin.” Olsem ol dokta i tok, tingting bilong man inap mekim ol samting long bodi bilong em. Planti dokta i tokaut pinis olsem pasin bilong karim hevi longpela taim, na pasin bilong stap bel nogut, dispela inap nogutim skin bilong man. Tasol pasin bilong lap na pes i lait em i ken mekim bel bilong yumi i gutpela na yumi stap bel isi, na pasin bilong lap inap strongim skin bilong yumi long sakim sik.
Pasin bilong lap na pes i lait i save helpim ol narapela. Tingim: Sapos i gat wanpela man i laik givim sampela tok long yu bilong stretim yu, yu laik bai pes bilong em i olsem wanem? Pes i drai o pasin bilong lukluk strong inap makim olsem man i no laikim yu o em i belhat na kros. Tasol sapos em i lap na pes i lait, bai yu stap bel isi na bai yu amamas long harim na bihainim tok bilong em, a? Tru tumas, taim ol liklik hevi i kamap, pasin bilong lap inap daunim pasin bilong bel nogut long ol narapela.
Gutpela Tingting i Save Helpim Pasin Bilong Lap
Tru planti bilong yumi i no olsem ol lain yumi save lukim long televisen samting—sapos ol i gat wok long mekim, ol i ken lap na pes i lait wantu tasol. Yumi no laik mekim olsem, nogat. Yumi laik bai bel i kirapim yumi long lap na pes i lait. Wanpela man i tok: “I bikpela samting long stap bel isi na bel yet i kirapim yu long lap na pes i lait; sapos yu no mekim olsem, ol narapela inap ting olsem yu lap nating tasol.” Olsem wanem bel bilong yumi inap kirapim yumi long lap na pes i lait? Baibel i ken helpim yumi long dispela samting. Matyu 12:34, 35 i stori long pasin bilong kamapim ol tok, olsem: “Man em i save autim kain tingting i pulap long bel bilong en. Gutpela man i gat planti gutpela tingting i stap long bel bilong en. Olsem na em i save mekim gutpela pasin. Man nogut em i gat planti tingting nogut i stap long bel bilong en. Olsem na em i save mekim pasin nogut.”
Maski yumi no mekim wanpela toktok, pasin bilong lap na pes i lait em i wanpela rot long kamapim bel bilong yumi. Olsem dispela skripsa long Baibel i kamapim, yumi save “autim kain kain tingting i pulap long bel,” na “man i gat planti gutpela tingting” i save “mekim gutpela pasin.” Olsem na tingting i stap long bel i as bilong pasin bilong givim bel tru long lap na pes i lait. Tru tumas, ol tingting i stap long bel bilong yumi bai kamap ples klia long lukluk bilong pes bilong yumi, na i no long ol tok na pasin tasol bilong yumi. Olsem na yumi mas wok long tingting long ol gutpela samting. Tingting bilong yumi long pasin bilong narapela man i save bosim lukluk long pes bilong yumi. Olsem na yumi ken wok long tingim ol gutpela pasin bilong ol wan wan long famili, na ol lain i save sindaun long hap bilong yumi, na ol gutpela pren bilong yumi. Sapos yumi mekim olsem, em bai i no hatwok long lap na pes i lait taim yumi lukim ol. Ol bai save yumi no giaman na mekim dispela pasin, long wanem, pes bilong yumi bai kamapim long ples klia gutpela tingting i stap long bel bilong yumi. Pes bilong yumi bai lait na ol narapela bai save yumi givim bel tru long mekim.
Tasol yumi mas save olsem, wanem ples man i go bikpela long en o pasin em i lainim taim em i liklik yet, dispela inap mekim na em i pilim olsem i hatwok long lap o pes i lait. Ol kain man olsem, maski ol i save laikim ol lain i stap klostu long ol, ol i no gat pasin bilong lap na pes i lait taim ol i lukim ol. Olsem, ol man long Japan i lainim pasin bilong bipo yet na stap olsem man i no save kamapim bel bilong en long ol narapela, na man i no save toktok. Olsem na i no pasin bilong planti man long Japan long lap na pes i lait taim ol i bungim wanpela man ol i no save gut long en. Na ating sampela man long ol narapela lain i gat wankain pasin. O ol i gat pasin bilong sem na ol i pilim olsem i hatwok long lap na pes i lait taim ol i bungim ol man. Olsem na yumi no ken tingting planti long pasin bilong wanpela man sapos em i no save lap na pes i lait. Pasin bilong ol manmeri i narapela narapela kain, na ol i save bihainim kain kain rot bilong kamapim tingting bilong ol long ol narapela.
Tasol sapos yu pilim olsem yu gat hatwok long lap na pes i lait taim yu bungim ol narapela manmeri, yu ken wok strong long kisim dispela pasin, a? Baibel i tok: “Yumi no ken les long mekim gutpela pasin . . . Yumi inap mekim gutpela pasin long ol arapela.” (Galesia 6:9, 10) Pasin bilong lap na pes i lait em i wanpela rot bilong mekim gutpela pasin long ol narapela—na em i samting yu inap mekim! Olsem na yu no ken wetim ol man i kam long yu—yu yet yu mas go long ol na tok gude na mekim sampela tok bilong strongim bel bilong ol, na taim yu mekim olsem, yu mas lap na pes i lait. Ol bai amamas tru long dispela pasin yu mekim. Na tu, taim yu wok long mekim dispela pasin, bihain bai yu pilim olsem i no hatwok tumas long mekim.
[Blok long pes 12]
Yu Mas Was Gut
Sori tru, i no olsem olgeta man i lap na pes i lait ol i gat gutpela tingting. Man i laik mekim sampela pasin bilong trik, na man i laik bai yu baim samting bilong em, na sampela i laik paulim mani bilong yu, ol tu inap lap na pes i lait. Ol i save, taim ol i mekim olsem bai yu no kisim tingting hariap olsem ol i man bilong giaman. Na ol manmeri i no save bihainim stretpela pasin o ol i gat sampela tingting nogut, ol tu inap mekim pasin olsem lap na pes i lait bilong grisim yu. Tasol taim ol i lap, ol i lap nating tasol; ol i mekim bilong giamanim yu tasol. (Saveman 7:6) Tru, yumi no laik ting olsem olgeta man i gat tingting nogut taim ol i lap na pes i lait, tasol yumi save yumi stap long “taim bilong las de,” na planti hevi nogut tru i save kamap, na olsem Jisas i tok, yumi mas ‘bihainim pasin bilong ol snek, na tingim gut pastaim ol samting yumi laik mekim.’—2 Timoti 3:1; Matyu 10:16.
[Piksa long pes 13]
Taim yu bungim ol man, yu mas lap na pes i lait, na no ken wetim ol i mekim pastaim