Baibel i Tok Wanem?
Husat i Stap Olsem Wokman Bilong God?
LONG nait paslain long Jisas i dai olsem ofa, ol gutpela pren bilong em i insait long wanpela bikpela tok pait. Olsem Luk 22:24 i tok, ol “i stat long pait long toktok long husat em i namba wan bilong ol.” I no namba wan taim ol aposel bilong Jisas i bin tok pait long dispela samting. Long tupela narapela taim bipo Jisas i bin stretim tingting bilong ol.
Sori tru, long dispela nait paslain long em i dai, Jisas i mas kirapim ol gen long tingim wanem pasin wanpela wokman Kristen i mas bihainim! Em i tok: “Man i stap namba wan namel long yupela, em i mas i stap olsem man i kamap bihain tru. Na hetman bilong yupela em i mas i stap olsem wokman bilong helpim yupela.”—Luk 22:26.
Ol aposel i no gat stretpela tingting long pasin bilong holim bikpela wok na pasin bilong kisim biknem, na yumi no ken kirap nogut long dispela. Taim ol i no save yet long Jisas, ol Farisi na ol saveman bilong lo i stap olsem piksa bilong ol long pasin bilong i stap hetman bilong lotu. Ol dispela wokman giaman i no save helpim ol manmeri long ol samting bilong spirit, nogat. Ol i strong long ol manmeri i mas bihainim sampela pasin bilong ol tumbuna na ol lo i save “pasim dua bilong kingdom bilong heven long pes bilong ol manmeri.” Ol i tingting tumas long kisim biknem na namba, na ol i save tingim ol yet tasol. Ol samting ol i mekim, em ol i mekim “bai ol man i ken lukim.”—Matyu 23:4, 5, 13.
Pasin Bilong Narapela Kain Wokman
Tasol Jisas i givim nupela kain tingting long ol disaipel bilong em long wok bilong God. Em i skulim ol olsem: “Ol man i no ken kolim yupela ‘Tisa.’ Nogat. Wanpela tasol em i tisa bilong yupela, na yupela olgeta i stap brata brata. Na long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven. . . . [Tasol] bikman bilong yupela em i mas i stap wokman bilong yupela.” (Matyu 23:8-11) Jisas i no laik bai ol disaipel bilong em i bihainim pasin bilong ol hetman bilong lotu. Sapos ol i laik stap olsem wokman tru bilong God, ol i mas bihainim pasin bilong Jisas. Orait Jisas i makim wanem kain pasin ol i mas bihainim?
Planti taim Baibel i save kolim wanpela tok Grik di·aʹko·nos, i makim “wokman.” Wanpela buk (The Encyclopedia of Religion) i stori olsem dispela tok “i no makim namba man i holim, tasol em i makim pasin wanpela wokman i mekim long man em i gat wok long lukautim: Pasin Krais i mekim . . . i as tru bilong tingting bilong lotu Kristen long dispela tok olsem wokman bilong God.”
Long mekim wok i stret wantaim dispela tok “wokman,” Jisas i lusim strong bilong em yet bilong helpim ol narapela. Long pasin isi em i tokim ol disaipel olsem: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:28) Jisas i lusim bikpela hap taim na strong bilong em, na em i mekim wok long save bilong em long helpim ol narapela long samting bilong spirit na samting bilong skin. Bilong wanem em i mekim olsem? Long wanem, em i sori long bikpela lain manmeri i kam long em, ol hetman bilong lotu i no bin lukautim ol gut long ol samting bilong spirit. Em i laik helpim ol. Pasin sori i kirapim em long mekim ol dispela wok, na em i laik bai ol disaipel bilong em i bihainim wankain pasin bilong tingim ol narapela.—Matyu 9:36.
Pasin Jisas i mekim taim em i stap long graun i stap olsem piksa bilong olgeta wokman bilong God i kamap bihain long em. Jisas i tok: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Matyu 9:37, 38) Em nau, ol wokman bilong Krais bai insait long wanpela bikpela wok tru i winim ol narapela wok ol man long graun i save mekim—long rot bilong skulim ol man long ol gutpela tok long kingdom, ol bai helpim ol man long kisim bel isi long ol samting bilong spirit.—Matyu 28:19, 20.
Dispela pasin bilong lusim ol samting bilong em yet bilong helpim ol narapela i makim olsem tingting bilong Krais long stap wokman bilong God i narapela kain tru. Em i skulim ol lain bilong em long stap olsem ol man bilong wok, na man bilong kisim pis, olsem kisim ol man, na man bilong lukautim sipsip. Em i no skulim ol long stap olsem man i gat wanpela kain strong ol narapela i no inap save long en, o man i gat bikpela save na em i mas putim ol bilas i makim olsem em i gat namba, nogat.—Matyu 4:19; 23:5; Jon 21:15-17.
Baibel i Tok Wanem
Sori tru, insait long sampela handet yia samting ol man i paulim dispela gutpela tingting olsem wokman em i mas lusim ol samting bilong em yet na stap olsem man bilong autim tok na skulim ol narapela. Isi isi wok Kristen Jisas i bin kirapim i kamap olsem wok bilong wanpela lain man i holim namba. Na ol man i mekim dispela wok i save kisim biknem na namba na bikpela mani kago samting. Dispela pasin i brukim lain. Sampela i kamap olsem hetman bilong sios bilong givim sakramen long lain bilong ol na givim tok long ol man i popaia. Insait long planti handet yia ol man i no bihainim moa pasin Kristen olsem Jisas i bin makim. Pastaim olgeta Kristen i stap olsem wokman bilong God, tasol bihain wok bilong autim tok na skulim ol man i kamap olsem wok bilong wan wan man tasol i winim bikpela skul na kisim setifiket.
Tasol Baibel i kamapim klia husat i wokman Kristen tru bilong God long ol wok em i mekim bilong helpim ol narapela man, na i no long bilas, o ol bilaspasin bilong lotu em i mekim, o mani em i kisim, o namba gavman i givim long em, nogat. Aposel Pol i tokaut long pasin ol wokman Kristen i mas bihainim. Em i tok: “Yupela no ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet.”—Filipai 2:3.
Ol tok Pol i autim long ol man, em yet i save bihainim. Em i wok strong long bihainim pasin bilong Krais na em i no tingting liklik long “helpim [em] yet. [Em i] wok long helpim ol arapela manmeri, bai God i ken kisim bek ol.” Pol i pilim tru olsem em i gat wok long “autim gutnius nating [olsem no gat pe] long ol manmeri” na em i no laik mekim wok long namba em i holim “bilong kisim biknem.”—1 Korin 9:16-18; 10:33; 1 Tesalonaika 2:6.
Tru tumas, pasin bilong Pol i makim pasin bilong wokman tru bilong Krais! Ol lain i bihainim pasin bilong Pol na lusim ol samting bilong ol yet olsem Jisas Krais i bin mekim, na ol i givim strong bilong ol yet long helpim ol man long kisim bel isi long rot bilong gutnius, ol dispela lain i stap wokman tru bilong God.—1 Pita 2:21.