Ol Gutpela Samting Bai Kamap
PASIN bilong belgut long ol narapela lain, stap bel isi wantaim ol, na stap olsem brata brata—olgeta man bai tok ol dispela pasin ol i gutpela samting tru, a? Man i kirapim gen ol Olimpik-Gems, em Bikman Pierre de Coubertin, em i ting ol Olimpik-Gems bai kirapim ol man long givim biknem long ol man i pilai spot, maski ol i bilong wanem lain, o lotu, o man o meri, na dispela bai pinisim kros pait namel long ol kantri. Em i ting, “dispela graun inap kamap gutpela long rot bilong ol gutpela man na meri tasol.” Tasol olsem wanem? Ol spot inap kamapim bel isi long olgeta hap? Taim yumi skelim ol samting i bin kamap long bipo, yumi mas tok nogat.
Tru, ol spot i gutpela samting, tasol skul yumi kisim long Baibel em i ki bilong kamapim gutaim tru. Tru tumas, ol lo bilong Baibel inap kamapim “ol gutpela man na meri,” olsem Coubertin i bin tok. Orait nau yumi ken tingim sampela skripsa i kamapim bel isi namel long ol man i save bihainim tok bilong ol, maski ol i bilong wanem wanem lain.
“Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”—Jon 13:35.
“Yupela yet i no ken tingting long kros na pait. Oltaim yupela i mas painim rot bilong i stap wanbel wantaim olgeta man.”—Rom 12:18.
“Wanem taim yumi inap mekim gutpela pasin long ol arapela, yumi mas mekim.”—Galesia 6:10.
“Yupela i no ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet na yupela i mas ting pasin bilong ol arapela i winim pasin bilong yupela.”—Filipai 2:3.
“Yu save, sapos yumi laik mekim bodi bilong yumi i kamap strong, na yumi save trening oltaim, dispela bai i helpim yumi liklik. Tasol sapos yumi trening long mekim pasin bilong God i kamap strong long yumi, dispela bai i helpim yumi moa yet. Em inap long helpim yumi long dispela laip nau yumi stap long en, na long laip yumi bai kisim bihain tu.”—1 Timoti 4:8.
Olsem wanem? Ol tok i stap long ol dispela skripsa ol inap helpim tru ol man? Tingim samting i bin kamap long Munik, Jemani. Long 1974, tupela yia bihain long Olimpik-Gems i kamap long dispela taun na pasin bilong birua long narapela lain na kilim man i dai i bagarapim ol dispela pilai, ol Witnes Bilong Jehova i mekim kibung intenesenel long Olimpik Stediam. Ol lain bilong ol narapela narapela kantri i kam long kibung, na ol Grik na Turki tu, em dispela tupela kantri i bin pait wantaim. Long wankain taim, ami bilong Grik na Turki ol i bin pait long husat bai bosim ailan Saiprus. Olsem wanem? Dispela bai bagarapim pasin wanbel bilong ol Kristen i kam long dispela kibung? Nogat! Ol brata i pilim tru gutpela pasin bilong ol Grik na ol Turki taim narapela i holimpas narapela na kolim ol olsem brata na sista!
Ol Witnes Bilong Jehova i gat nem long olgeta hap long ol i save stap wanbel wantaim, maski ol i bilong narapela narapela lain, skin, o ples. Ol i no save tok olsem pasin wanbel na pasin bilong ol long wok gut wantaim i gutpela olgeta. Olsem ol narapela man, ol i mas wok strong bilong bihainim tok bilong aposel Pol: ‘Yupela i mas rausim olgeta pasin bilong olpela bel, na yupela i kamap nupela man.’ (Kolosi 3:9, 10) Tasol ol i bilip strong olsem pasin bilong bihainim ol lo bilong Baibel bai helpim ol man long “kamap wanbel wantaim ol arapela manmeri.”—1 Pita 3:11.
Sori tru, maski ol man i laik kamapim ol gutpela samting long rot bilong ol Olimpik-Gems, tasol ol pilai i bin kirapim planti man long bihainim ol pasin nogut tru. Tasol Tok Bilong God i kirapim ol man long bihainim ol nambawan gutpela pasin, olsem pasin bilong belgut long ol narapela lain na stap bel isi wantaim ol.
[Ol Piksa long pes 8]
Olimpik-Gems i kamapim pasin bilong resis
[Kredit Lain]
Aus dem Fundus der MÜNCHNER OLYMPIAPARK GMBH, München
[Ol Piksa long pes 9]
Baibel i kamapim pasin wanbel