Samting Bilong Stretim i Kamap Pinis!

TINGIM wanpela taim na olgeta pikinini bai i gat lain i amamas long lukautim ol, na laikim ol tru, na olgeta bai i gat papamama i bihainim pasin sori na mekim ol samting bilong stiaim na lukautim gut pikinini bilong ol. Tingim wanpela taim na olgeta pikinini bai stap strong long skin na long tingting, na long dispela taim bai yu no inap painim ol pikinini i save slip long rot, o ol pikinini em ol hevi i mekim na ol i mas wok skin tasol; ol dispela kain hevi bai i no inap stap moa!

Yu laikim dispela samting? Yes, yu laikim. Tasol yu ting yu inap bilip olsem dispela samting bai kamap? Ol Witnes Bilong Jehova i bilip olsem, na i gat tupela as bilong dispela samting.

Ol Papamama Inap Stretim Sampela Hevi

Ating yu bai wanbel long dispela tok olsem ol manmeri i bikpela pinis ol inap stretim sampela hevi i painim ol pikinini, o sampela taim ol inap pasim rot bilong ol dispela hevi. Tasol ol i mas i gat laik long mekim. Tru tumas, rot i op long ol papamama yet long helpim wok bilong stretim ol dispela hevi.

Olsem: Ol manmeri i bikpela pinis na ol inap bihainim tok bilong Baibel olsem “meri i no ken lusim man bilong en . . . na man tu em i no ken [lusim] meri bilong en,” ol pikinini bilong ol i no save karim hevi bilong famili i bruk taim papamama i no stap moa wantaim o tupela i katim marit.​—⁠1 Korin 7:​10, 11.

Ol manmeri i bikpela pinis na i laik bihainim tok bilong Baibel na “wokabaut stret” na ol i no “hambak nabaut na spak,” ol pikinini bilong ol i no save karim hevi long pasin bilong stap wantaim ol papamama i dring spak o ol i save kisim drak.​—⁠Rom 13:13; Efesus 5:⁠18.

Ol manmeri i bikpela pinis na i laik bihainim tok bilong Baibel na “abrusim olgeta kain pasin pamuk,” ol inap helpim pikinini bilong ol long abrusim dispela hevi bilong stap olsem pikinini i no gat lain i tingim ol, o pikinini em papa o mama i lusim ol.​—⁠1 Tesalonaika 4:3; Matyu 19:⁠9.

Ol man i laik bihainim tok bilong Baibel olsem “[ol] i no ken mekim ol pikinini bilong [ol] i kros, nogut ol i pilim olsem ol i no inap mekim wanpela gutpela wok,” na ol i ‘laikim tru ol pikinini bilong ol,’ ol bai i no inap mekim nogut long ol pikinini na givim pen long ol o bagarapim bel bilong ol.​—⁠Kolosi 3:21; Taitus 2:⁠4.

Orait, sapos olgeta manmeri i bikpela pinis ol i laik bihainim tok bilong Baibel em Jisas i bin givim long yumi olsem, “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol,” yu ting bai i gat planti milion pikinini i no gat man i lukautim ol o mekim pasin sori long ol?​—⁠Matyu 7:⁠12.

Gutpela tru i gat planti ol manmeri i amamas long mekim olgeta samting yumi stori pinis long en. Tasol sori tumas, i no olgeta i laik mekim, na long dispela as na i gat hevi i stap. Na dispela lain i amamas long mekim ol dispela samting, ol tu i pilim olsem planti taim hevi bilong sin na ol narapela samting i wok long paulim hatwok bilong ol. Tru, ol manmeri inap helpim liklik ol wok bilong stretim hevi bilong ol pikinini, tasol ol i no inap tru long pinisim ol dispela hevi.

Gavman Bilong God Inap Stretim Hevi

Stori paslain long dispela i kamapim tok bilong man bilong raitim ol buk, em John Ruskin, em i bilip tru olsem “namba wan bikpela wok bilong wanpela gavman em bilong bosim gut wok bilong lukautim olgeta pikinini i stap long hap bilong en, na bai ol i stap long gutpela haus, bai ol i gat klos na kaikai, na bai ol i skul inap long taim ol i bikpela pinis.” Tasol olsem Ruskin i tok, “bilong kamapim ol dispela samting, Gavman i mas i gat namba bilong bosim ol man long planti samting, tasol long nau sapos yumi ting olsem wanpela gavman inap holim kain namba na strong olsem, dispela tingting i olsem wanpela driman nating tasol.”

Wanpela gavman em God tasol i kamapim bai i gat namba na strong olsem Ruskin i stori long en. Na i gat tok promis pinis olsem wanpela kain gavman bai kamap​—⁠em gavman Jisas i stori long en long Matyu 6:​9, 10. Taim dispela gavman bilong God yet i kirap bosim olgeta samting bilong graun, em bai bosim olgeta lain manmeri na bai ol i gat gutpela haus, klos, kaikai, na gutpela skul, na ol pikinini tu bai kisim ol dispela samting. (Aisaia 65:​17-25) Tasol dispela nambawan gutpela gavman bai mekim sampela gutpela samting moa.

Kingdom bilong God bai mekim na olgeta manmeri bai i kamap gutpela olgeta, na dispela bai inapim ol long lukautim pikinini long pasin i stret olgeta. (Jop 33:​24-26) Ol pikinini bai i go bikpela namel long ol lain manmeri i stap wanbel na stap olsem brata brata long olgeta hap, olsem dispela Tokaut Bilong Yunaitet Nesen Long Ol Lo Bilong Pikinini i kamapim. (Song 46:​8, 9) Na bai i no gat wok moa long makim wanpela Yia Bilong Pikinini o kamapim wanpela Kontrak Bilong Ol Lo Bilong Pikinini.

Krais Jisas, King bilong dispela gavman bilong heven, em bai i no hatwok liklik long mekim skin bilong ol papamama i kamap gutpela olgeta na oraitim ol pikinini em han lek samting i bagarap. Ol mirakel em i wokim taim em i stap long graun i makim olsem em inap tru long mekim ol dispela samting. (Luk 6:​17-19; Jon 5:​3-9; 9:1-7) Wok bilong kirapim bek ol pikinini i dai pinis na ol papamama i dai pinis, dispela tu bai i no givim hatwok long em!​—⁠Matyu 9:​18-25.

Em samting bilong amamas long save olsem taim bilong God long mekim ol samting bilong helpim olgeta pikinini bilong graun i klostu!

[Blok/Ol Piksa long pes 12]

Bilong Helpim Ol Yangpela

Ol Witnes Bilong Jehova i gat bikpela laik tru long helpim ol yangpela long abrusim ol hevi, na tu bilong helpim ol long save olsem wanem ol i ken karim ol hevi ol i no inap abrusim. Bilong mekim olsem, inap planti yia ol i wok long kamapim ol buk i bilong helpim ol yangpela​—⁠em ol pikinini i no skul yet na ol yangpela. Sampela buk olsem em Baibel Stori Buk Bilong Mi na Sampela Askim Bilong Ol Yangpela​—⁠Ol Gutpela Bekim na wanpela video (Young People Ask​—⁠How Can I Make Real Friends?). Yu inap kisim ol dispela samting long ol Witnes Bilong Jehova i stap long hap bilong yu, o yu inap salim pas i go long ol lain i kamapim dispela buk na video.

Ol Witnes Bilong Jehova i save toktok gut wantaim ol pikinini bilong ol long ol hevi bilong pikinini na long dispela rot ol i kamapim klia olsem ol i laikim tru ol pikinini bilong ol na ol i amamas long lukautim ol. Planti taim ol papamama bai mekim wok long ol buk samting mipela stori pinis long en bilong skulim ol pikinini kirap long taim ol i liklik na i go inap long taim ol i bikpela pinis. Ating yu bai gat laik long bihainim wankain pasin long ol pikinini bilong yu, a?