Kaikai Ol Samting Bilong Gaden!
WANPELA MAN LONG BRASIL I RAITIM DISPELA STORI BILONG KIRAP!
“Ol i pait long maus bilong mi.” “Ol i no swit liklik.” “I no gat wanpela taim mi bin kaikai.”
EM I sampela as na planti ol i save les long kaikai kumu na ol narapela samting bilong gaden. Olsem wanem long yu? Yu save kaikai sampela kumu samting bilong gaden long olgeta de? Ol lain i raitim ol stori bilong Kirap! i givim askim long ol man bilong kisim save long as na sampela i save laikim ol kaikai bilong gaden na sampela i save les long en.
Ol lain i save laikim ol kaikai bilong gaden, ol i tok papamama i bin lainim ol olsem em i bikpela samting long kaikai kumu samting na prut. Tasol ol man i save les long ol dispela kaikai, ol i no bin lain long kisim taim ol i liklik. Ol i bin amamas long kisim ol kaikai nating i no gat gutpela gris long en. Tasol ol i wanbel long dispela tok olsem ol kaikai bilong gaden i bikpela samting bilong lukautim skin na bai i no sik tumas.
Yupela ol papamama, skulim ol pikinini long kaikai ol samting bilong gaden! Yupela ken mekim olsem wanem? Wanpela nius (Facts for Life) bilong UNICEF i tok i gutpela sapos wanpela taim long olgeta de taim ol i kisim susu pinis, ol bebi i gat 6-pela mun ol i mas kisim ol samting bilong gaden em mama i bin rausim skin bilong en, boilim, na memeim. I gutpela moa sapos pikinini i kisim kain kain kaikai bilong gaden. Dokta Vagner Lapate, em wanpela dokta bilong ol pikinini long Brasil, em i tok, i go inap long taim pikinini i kisim 2-pela krismas, susu em i bikpela kaikai bilong em, tasol pasin bilong givim kain kain nupela kaikai long pikinini “i lainim em long kisim swit bilong ol nupela kain kaikai.”
Long buk Medicina—Mitos y Verdades (Marasin—Ol Stori Nating na Ol Tok Tru), Carla Leonel i tok, taim ol pikinini i no winim yet 6-pela mun ol i ken kisim liklik hap wara bilong swit muli, na ol prut ol i bin memeim (olsem banana, apel, na popo), poris, na sup i gat kumu sayor samting long en. Tasol i gat ol narapela narapela tingting long dispela samting, olsem na i gutpela long askim dokta bilong ol pikinini pastaim.