Grasopa i Singsing Bilong Painim Meri
WANPELA kain grasopa ol i kolim kriket, em i longpela inap 50 milimita na ating yumi no save tingting tumas long en. Tasol long olgeta hap bilong graun, singsing bilong dispela kriket i save pulim tingting bilong planti milion man. Dispela liklik binatang i save singsing olsem wanem, na bilong wanem em i save singsing?
I gat olsem 2,400 kain kain kriket na ol man kriket tasol i save singsing. Ol dispela man kriket i no save singsing long nek bilong ol, nogat; ol i save singsing long ol wing bilong ol. Wanpela buk i tok ol man kriket i save rapim wanpela hap bilong wing bilong ol long ol liklik samting olsem nil i stap long arere bilong narapela wing na dispela i kamapim singsing. Pasin bilong em long rapim wing bilong em hariap hariap bai makim wanem kain singsing em i mekim. Em nau, singsing bilong kriket i kamap.
Tasol man kriket i no singsing bilong amamasim ol man! Nogat tru! Em i singsing bilong kisim wanpela poroman. Buk Exploring the Secrets of Nature i tok: “Man kriket i save gut long pasin bilong salim tok, na taim em i laik kisim wanpela poroman, em i save mekim tripela narapela narapela singsing: wanpela i bilong toksave long ol narapela kriket olsem em i stap, narapela i bilong poromanim meri kriket, na narapela i bilong pasim ol narapela man kriket long i go klostu long meri kriket.” Sampela man kriket i save singsing yet i go inap long wanpela meri kriket i laikim ol. Taim meri kriket i harim singsing long rot bilong “ol yau” i stap long ol han bilong em, em bai kirap long painim dispela man kriket. Taim em i go kamap klostu long hap dispela singsing i kamap long en, man kriket bai kirap long mekim wanpela singsing i gat wanpela kain krai tasol, na dispela em i singsing bilong poromanim meri kriket. Dispela singsing i save pulim meri kriket long kam klostu long em.
Long hap bilong Is Esia, sampela man i save lukautim ol kriket long haus, long wanem, ol i amamas long harim singsing bilong en. Tasol sampela man i laik harim singsing bilong kriket long ples tru bilong en. Tasol maski kriket i stap long wanem hap, singsing bilong en i save amamasim ol man na i litimapim nem bilong Man bilong wokim em.