Kriket na Sofbal—Tupela Pilai i Wankain?
Man bilong raitim stori long Kirap! i raitim dispela stori long Ostrelia
LONG yia 1897, taim Kwin Viktoria bilong Inglan i winim pinis 60 yia long wok kwin, Inglan i bosim wanpela bilong olgeta 4-pela 4-pela kantri i stap long graun. Tasol long nau nogat. Tasol planti tingting na pasin bilong dispela taim i stap yet long planti hap bilong graun, olsem dispela pilai bilong kriket.
Dispela pilai i stap long planti hap em lain Inglan i bin bosim bipo. Olsem long Esia, na Wes Indies, na Afrika—tasol i no long Amerika—pilai besbal i stap nambawan long Amerika (long Papua Niugini, ol i save kolim sofbal). Tasol sampela man i tok, wan handet lain tasol i save pilai kriket long dispela hap. Sapos yu no bin lukim dispela pilai, nau bai mipela i stori long en. Pilai i save kamap long wanpela hap graun em i raunpela, na ol man bilong pilai i save pasim waitpela klos, na sampela i gat wok long tromoi bal na sampela i pasim bal na bal i no ken paitim ol stik ol i kolim wiket. Tasol bihain bai yumi stori moa long dispela samting.
Kriket na Sofbal i Wankain?
Tupela pilai i no wankain tumas. Planti man i save laikim pilai sofbal ol i tok, ol man i lukim kriket ol i no save singaut liklik, na pilai i go isi isi tru. Sampela toktok ol i mekim taim ol i pilai i wankain. Tasol pasin bilong pilai na ol lo bilong tupela pilai i narapela narapela kain. Olsem na sapos yu kisim gut save long samting tupela tim i pilai i laik mekim, bai yu amamas long lukim dispela pilai.
Wankain olsem sofbal, kriket tu i gat tupela tim i save pilai. Wan wan tim i gat 11-pela man, na narapela em i sindaun ausait ol i kolim em namba 12 man. Long sofbal i gat 9-pela tasol. Ol i kolim man bilong paitim bal olsem “betsman,” na long sofbal em “beta.” Plang o bet bilong paitim bal long kriket na sofbal i narapela narapela kain tu. (Lukim piksa, pes 23.) Na man i tromoi bal long kriket em boula, tasol long sofbal em pitsa. Taim wanpela i paitim bal na ran i go na putim wanpela gol o poin, ol i kolim olsem ran, tasol pasin ol i bihainim bilong putim ol ran em i narapela kain. Ol i save mekim tok “inins” long tupela pilai wantaim. Ol dispela tok i wankain na yumi no kirap nogut. Wanpela buk (Encyclopedia International) i tok, klostu long yia 1900 samting ol i bungim kriket wantaim narapela pilai ol i kolim raunders na ol i kamapim dispela pilai sofbal.
Wan wan samting bilong kikbal na sofbal i wankain, tasol planti samting i narapela narapela kain. Pasin bilong ol man i pasim laplap, na ol i sanap olsem wanem, na mak na bikpela bilong ples pilai, na ol i pilai hariap o nogat, ol dispela samting i narapela. Tasol maski planti samting i narapela kain, ol man i save long pasin bilong pilai sofbal i no hatwok long lainim ol long pasin bilong pilai kriket na bai ol i amamas long dispela pilai.
Nau Yumi Stori Long Pilai Kriket
Braitpela bilong ples bilong pilai em i mas olsem 137 mita na longpela bilong en i olsem 152 mita. Long namel stret i gat ples bilong tromoi bal, em ol i kolim pits. Longpela bilong en i olsem 20 mita na braitpela bilong en i olsem 3 mita. Sampela taim pits em i gras tasol, o simen o ston samting em ol i karamapim long mat. Long tupela arere bilong pits i gat wiket, em 3-pela hap diwai ol i sanapim klostu klostu, em ol i longpela olsem 71 sentimita. Tupela liklik diwai ol i kolim beils ol i putim antap long 3-pela diwai.
Ol mak ol i pulim long waitpela pen, em ol i kolim krises, i stap olsem 1.2 mita lusim ples wiket i sanap long en. Betsman i save sanap namel long wiket na dispela mak na em i redi long paitim bal. Boula tu i no ken abrusim dispela mak taim em i laik tromoi bal; sapos em i abrusim mak, orait betsman bai winim wanpela ran.
Bilong makim wanem tim bai paitim bal pastaim, tupela kepten bilong tupela tim i mas tromoi wanpela mani silva, na kepten i win bai tokaut sapos em i laik bai tim bilong em i paitim bal pastaim o narapela tim i ken paitim bal pastaim.
Tupela betsman i go sanap insait long kris—narapela long arere bilong pits, na narapela long narapela arere. Tupela i pasim strongpela laplap bilong lukautim lek na skin na han bilong ol. Sampela taim ol i save putim hat. Tim i no bet, ol i sanap long ples bilong pilai raunim pits bilong pasim bal betsman i paitim. Sampela i sanap klostu na sampela i sanap longwe liklik long betsman. Man i sanap bihain long wiket, em wiketkipa, em i pasim ol laplap bilong lukautim em na bagarap i no inap painim em, em i gat wok long holim o pasim bal i lusim bet bilong betsman o i abrusim bet bilong betsman taim betsman i laik paitim o em i ken paitim wiket wantaim bal sapos betsman i stap ausait long kris.—Lukim bokis, pes 24.
Kepten bai makim tupela boula long tromoi bal pastaim na bihain em i makim narapela tupela long mekim. Wanpela boula bai tromoi bal long hapsait bilong pits inap 6-pela taim, na bihain narapela bai mekim olsem gen long narapela hapsait. Dispela 6-pela bal boula i tromoi ol i save kolim olsem wanpela “ova.” I gat sampela boula long wan wan tim, na ol i gat kain kain pasin long tromoi bal. Sampela i tromoi hariap na sampela i tromoi hariap liklik na sampela i tromoi na bal i tantanim hariap. Na em wok bilong kepten yet long makim boula bilong tromoi bal. Taim boula i tromoi bal em i no ken brukim han. Han bilong em i mas stap stret tasol.—Lukim pes 2.
Bal bilong pilai kriket em retpela na karamap bilong en em skin bilong bulmakau. Em i no bikpela wankain olsem bal bilong sofbal, tasol hevi bilong en i olsem 156 gram. Tret ol i samapim long bal i save helpim boula long tromoi bal i save tantanim hariap, na taim bal i paitim graun em i save go long ples boula i makim pinis. Bal i mas paitim graun pastaim na bihain betsman i paitim, na dispela i narapela kain liklik long sofbal. Wan wan taim tasol bai boula i tromoi bal i go stret long betsman na betsman inap paitim, paslain long bal i paitim graun. Olsem na i hatwok long paitim bal i tantanim hariap, na dispela i winim bal boula i tromoi tasol hariap tru. Taim boula i tromoi bal i tantanim hariap olsem, taim em i paitim graun em inap sut i go long han sut o han kais.
Bikpela Wok Bilong Betsman
I gat tupela samting betsman i mas wokim: em i mas pasim bal long paitim wiket, na was gut nogut narapela tim i paitim wiket samting taim em i stap ausait long kris na em i aut; na em i mas paitim kwik bal na winim kwik ol ran. (Lukim bokis, pes 24.) Tasol sapos betsman i tingting tasol long lukautim wiket na em i no paitim bal na winim ol ran samting, ol man bai les long pilai.
Betsman i save gut long pilai, ai bilong em i mas lukluk na redim han lek bilong em, na em i mas tingim kwik ol samting em i mas mekim hariap, na em i mas ran hariap namel long ol wiket bilong winim kwik ol ran. Sapos em i kirap ran long wanpela wiket i go long narapela na em i senis senis wantaim narapela betsman, em bai winim wanpela ran. Na sapos em i paitim bal i go long banis na ol i no holim, orait, em bai winim 4-pela ran. Tasol sapos em i paitim bal i go ausait long banis, em bai winim 6-pela ran.
Tim i bet ol bai sanap long kris i go inap 10-pela betsman bilong ol i aut. Taim narapela tim i kam long bet, ol i mas traim long winim ol ran em nambawan tim i winim pinis, sapos ol i laik win. Sampela taim ol i pilai inap wanpela de samting, na sapos wanpela tim i winim bikpela ran, orait ol i win. Tasol long ol bikpela pilai ol i save pilai inap 3-pela o 5-pela de. Long ol dispela pilai, sampela betsman inap winim 400 ran samting. Dispela i narapela kain tru long sofbal. Ol inap pilai 3-pela o 4-pela aua, tasol sapos wanpela tim i win, ating em i win long wanpela ran na narapela tim nogat.
I gat tupela referi, na ol i sanap long arere arere bilong pits. Wanpela i sanap long han kais o han sut liklik bilong wanpela betsman na narapela i sanap long baksait stret bilong wiket long ples boula bai tromoi bal. Sapos referi i mekim wanpela tok, orait olgeta i mas bihainim. Sapos yu kros long tok referi i mekim i gutpela sapos yu no pilai kriket.
Sapos Yu Lain, Bai Yu Laik Tru Long Pilai
Sapos yu lain long pilai, bihain bai yu laik tru long pilai. Tom i gat 9-pela yia tasol taim famili bilong em i lusim Yurop na kam sindaun long Ostrelia, na long dispela taim em i lain long dispela pilai. Bipo em i no save i gat wanpela pilai olsem. Tom i tok: “Taim mi lain long ol lo bilong dispela pilai, mi kirap long laikim tru dispela pilai. Mi lain olsem betsman i mas was gut olgeta taim long bal, na tingting i mas redim bodi na tingting i no ken wokabaut. Na em i no ken guria sapos ol i tromoi bal i kam hariap tru.”
Tru i gat planti samting yumi no stori long en long hia. Tasol mipela i laik bai narapela taim yupela i lukim wanpela pilai bilong kriket, bai yupela inap save ol i pilai olsem wanem na ating yupela bai amamas long lukim dispela pilai taim yupela i lukim betsman i paitim bal boula i tromoi i kam.
[Blok long pes 24]
Ol Rot Bilong Rausim Betsman
Boul. Sapos boula i paitim wiket wantaim bal na ol beil i pundaun.
Kot. Sapos betsman i paitim bal na ol i holim taim em i no pundaun yet long graun.
Stamp. Sapos betsman i stap ausait long kris na wiketkipa i paitim wiket na ol beil i pundaun.
Lek Bipo Wiket (lbw). Sapos betsman i pasim bal wantaim wanpela hap bodi bilong em, na referi i ting sapos em i no mekim olsem bai bal inap paitim wiket.
Ran Aut. Sapos betsman i wok long ran yet i go long wiket na wanpela bilong narapela tim i paitim wiket long bal.
Hit Wiket. Sapos betsman i paitim wiket wantaim bet o narapela hap bilong bodi taim em i laik paitim bal.
[Piksa long pes 23]
Ol bet bilong kriket long bipo i kam inap nau
Piksa bilong poret na sait bilong bet long nau
Wiket na ol beil
[Piksa long pes 24]
Betsman i laik paitim bal em boula i tromoi. Lukim referi (long han kais), na wiketkipa (long han sut), na namba 2 betsman i ran i kam daun long pits