I Stap Bilong Mi i Gat As Bilong En
STORI BILONG MELVA A. WIELAND
Long Mas 1940, sampela mun bihain long mi kisim baptais, susa bilong mi, Phyllis, i kam askim mi olsem: “Yu no laik mekim wok painia?” Mi bekim tok olsem: “Wok painia? Man! Mi mas autim tok klostu olgeta de, a?”
MI TINGTING, ‘Olsem wanem mi inap mekim wok painia—mi no gat bikpela save long Baibel na mi no gat planti mani long beng?’ Tasol askim bilong Phyllis i kirapim tingting bilong mi, na planti taim mi beten long dispela samting.
Bihain mi tingting, ‘Olsem wanem mi no bilipim God taim em i tok promis long lukautim mipela sapos mipela i tingim Kingdom bilong em pastaim?’ (Matyu 6:33) Olsem na long Jun 1940, mi tokim bos bilong mi long ples wok bai mi lusim wok bilong samapim klos. Orait nau mi raitim pas long brens-ofis bilong Sosaiti Was Taua long Ostrelia na tokim ol, mi laik mekim wok painia.
Wok Bilong Holim Oltaim
Tupela wik bihain, mi kisim pas i tokim mi long go long wanpela kibung em bai kamap long hap graun em hetkota bilong ol Witnes Bilong Jehova i stap long en, long Stratfil, Sidni. Ol i tok, bihain long kibung ol bai toksave long ples mi ken go mekim wok painia long en. Kibung i pinis, na nau moningtaim mi go long ofis bilong kisim dispela wok.
Long ofis ol i tok: “Nau tasol mipela i gat planti wok tru long hap bilong wasim ol laplap. Yu ting yu inap stap na helpim mipela inap tupela wik?” Em Ogas 1940—na mi wok yet long hap bilong wasim ol laplap! Long dispela taim i gat 35 tasol i wok long brens-ofis; nau i gat 276.
Winim 50 yia pinis mi bin wok long hap bilong wasim ol laplap, olsem na ating yu laik save, olsem wanem mi ting “i stap bilong mi i gat as bilong en.” Bai mi stori long dispela, tasol pastaim mi laik stori long ol samting mi bin mekim taim mi stap yangpela.
Mi Save Pilai Spot
Mama i karim mi long Melbon, long Janueri 1, 1914. Mi namba wan bilong faipela pikinini. Papamama i mekim gutpela pasin sori long mipela, na ol i gat ol gutpela lo, na ol i save stretim mipela taim mipela i mekim rong. Papamama i no save go long lotu, tasol ol i strong long mipela ol pikinini i mas i go long ol klas bilong Sande-skul bilong Sios Bilong Inglan.
Taim mi lusim skul long 1928 na kisim wok bilong samapim klos, mi gat tingting long pilai spot long taim mi gat malolo—mi ting dispela bai helpim mi long lusim pasin bilong sem. Mi go insait long wanpela klap bilong pilai tenis na olgeta taim long yia mi pilai tenis. Long taim bilong kol mi bin pilai basketbal na beisbal, na long taim bilong san mi bin pilai kriket long tim bilong ol meri. Mi laikim tru kriket, na mi wok strong bambai mi inap tromoi kwik bal na inapim mak bilong mi ken pilai kriket wantaim ol tim bilong ol narapela narapela provins.
Samting i Narapela Kain Long Spot
Taim mi yangpela yet, mi bin tingting planti long dispela tok olsem gutpela God bilong pasin sori i gat wanpela ples ol i kolim hel, na long dispela ples, ol man i bin mekim pasin nogut ol bai kisim pen oltaim. Mi pilim olsem dispela tok i no stret. Olsem na mi amamas tru taim mi kisim save long “hel” em i wanem samting tru. Dispela samting i bin kamap olsem:
Susa bilong mi Phyllis, em liklik long mi inap 5-pela yia, em tu i amamas long pilai spot, na mitupela i bilong wanpela tim bilong pilai kriket. Long 1936 wanpela wanpilai i soim Phyllis long wanpela yangpela man, nem bilong em Jim, em i gat nem olsem man bilong lotu. I no longtaim na Jim i kirap tokim Phyllis long ol tok bilong Baibel. Dispela i kirapim tingting bilong em. Em i save tokim mi, “Dispela tok i stret na i gat as bilong en.”
Mitupela Phyllis i slip long wanpela rum, na em i wok long kirapim tingting bilong mi long ol tok bilong Kingdom em i bin kisim long Jim. Phyllis i tok: “Dispela Kingdom bai mekim olgeta samting ol gavman bilong man i lus tru long mekim.” Tasol mi tok resis wantaim em, na mi tok, dispela lotu bai paulim tingting bilong mipela olsem ol narapela lotu; no gat wanpela man i ken save gut long wanem ol samting bai kamap. Tasol Phyllis i strong yet na i larim ol buk na nius i stap nabaut long rum; em i laik bai mi ken kaunim.
Mi laik save bilong wanem Phyllis i givim bel long dispela nupela lotu, olsem na wanpela de mi lukim wanpela liklik buk, nem bilong en, Hereafter (Bihain). Taim mi lukim dispela tok “hel,” dispela i kirapim tingting bilong mi. Mi kirap nogut long kisim save olsem, tok “hel” long Baibel i makim ples bilong ol man i dai pinis, o matmat, na gutpela man wantaim man nogut ol i go long en. Mi kisim save tu olsem, hel em i no ples bilong kisim pen, na man i dai pinis em i no inap save long wanpela samting na em i no inap pilim pen.—Saveman 9:5, 10; Song 146:3, 4.
Mi ting dispela tok i stret, na i stret tu wantaim dispela tok liklik buk i kamapim olsem gutpela God i gat strong i bin tok promis long wokim mirakel na kirapim bek ol man i dai pinis. (Jon 5:28, 29) Nau mi tu mi laik save moa long ol dispela samting Jim i bin tokim Phyllis long en. Mi painim pinis Baibel King James, em papa i bin givim long mi taim mi liklik, na mi lukim ol skripsa em buk i kolim. Orait nau mi save, ol tok mi bin kaunim long hel na man i dai pinis i stap olsem wanem, em i tru.
Na tu, mi kirap nogut taim mi kisim save olsem God i gat wanpela nem bilong em yet, em Jehova. (Song 83:18, NW) Mi kisim save tu olsem, olgeta samting God i bin mekim o larim i kamap i gat as na em i bin mekim olsem. Olsem na mi laik save, ‘I stap bilong mi i gat wanem as bilong en?’ Na mi kirap long ting olsem: Pasin bilong tingim tumas spot, em inap helpim mi tru o olsem wanem?
Samting Mi Tingting Pinis Long Mekim
Jim tupela Phyllis i no save liklik olsem tingting bilong mi long ol samting i bin senis, tasol taim wanpela pren i singautim famili bilong mipela i go long pati bilong em, orait, nau ol i save. Long dispela taim bipo, taim ol man i stap long kain pati olsem, olgeta i save kirap sanap, apim glas na dring, bilong litimapim nem bilong King bilong Inglan. Tasol mi no sanap—mi sindaun i stap wantaim Jim tupela Phyllis. Tupela i kirap nogut taim ol i lukim mi i sindaun yet! I no olsem mipela i laik rabisim king, nogat; tasol mipela ol Kristen, olsem na mipela i no laik insait long ol samting bilong dispela graun, olsem dispela samting bilong litimapim kantri.—Jon 17:16.
Tasol papamama na ol narapela long famili ol i kirap nogut. Ol i tok mipela i no stap gut long kantri—mipela i longlong! Bihain, taim mitupela Phyllis i go long wanpela bung bilong praisim ol meri i pilai kriket, wankain samting i bin kamap bilong litimapim kantri. Olsem na mitupela i lusim tim. Pastaim mi ting bai mi hatwok long lusim tim, tasol nogat; long wanem, mi save pinis mi mas givim bel long Krais Jisas na stap gut long em, em King bilong Kingdom bilong God long heven.
Orait nau Phyllis i tokim mi, bilong helpim bilip bilong mi long kamap strong, mi mas go oltaim long ol miting bilong ol Witnes Bilong Jehova na kisim sampela save moa bilong Baibel. Long dispela taim i gat wanpela kongrigesen tasol long Melbon, olsem na mi kirap long go long ol miting long dispela hap long olgeta Sande long apinun. I no longtaim na mi bilip pinis olsem dispela em i oganaisesen tru bilong God long graun.
Bihain liklik ol i singautim mi long wok wantaim kongrigesen long mekim wok autim tok long ol haus. Pastaim mi pret liklik, tasol wanpela Sande long moningtaim, mi go wantaim ol bilong luksave tasol. Mi amamas taim ol i makim mi long poromanim wanpela strongpela Witnes; em i no pret liklik taim em i toktok wantaim man long namba wan haus, na man hia em i amamas long harim. Mi tingting, ‘Dispela wok i no hatwok tumas, tasol pastaim mi mas traim planti taim na bai mi inap mekim gut olsem dispela Witnes.’ Mipela i lusim haus pinis, na nau Witnes i tokim mi, “Orait, nau yu wanpela inap go long ol haus.”
Man! Mi kirap nogut tru! Mi askim em, “Mi wanpela? Ating yu tok pilai, a? Bai mi tok wanem sapos man i givim askim long mi na mi no save long bekim bilong en?” Tasol poroman i strong long mi wanpela i mas i go. Skin bilong mi i guria guria na mi wanpela i go—poroman i wok long autim tok long hapsait bilong rot. Tasol maski mi pret, mi autim tok i go inap moningtaim olgeta.
Kirap long dispela taim na i go, mi save go autim tok long olgeta Sande long moningtaim. Taim man i givim askim long mi, em mi no save long bekim bilong en, mi save tok: “Bai mi wok long painim bekim bilong dispela tok na bai mi kam bek lukim yu.” Em gutpela samting tru Jehova i bin wok long strongim bel bilong mi long mekim dispela nupela wok i gat as bilong en. Mi dediket long God Jehova, na long Oktoba 1939, mi kisim baptais long wanpela ples waswas long Melbon. Bihain liklik, Phyllis, em i marit pinis long Jim, em i askim mi, olsem wanem na mi no mekim wok painia.
Mi Mekim Wok Long Brens
Long Janueri 1941, bihain liklik long mi kirap mekim wok long brens-ofis, em mipela i save kolim Betel, gavman i tambuim wok bilong ol Witnes Bilong Jehova long Ostrelia. Bihain ol ami i kisim haus Betel long Stratfil, na mi go stap long fam bilong Sosaiti long Ingilben, em longwe long biktaun Sidni inap 48 kilomita. Long Jun 1943, ol kot i tok Was Taua Sosaiti i no bin mekim rong na ol i pinisim dispela tambu. Long pinis bilong dispela yia, 25 bilong mipela i go bek long haus Betel long Stratfil. Mi wok gen long hap bilong wasim ol laplap, na mi mekim sampela narapela wok tu.
Tenpela yia i lus pinis, na long 1956 mi maritim wanpela wanwok, nem bilong em Ted Wieland. Ted em i man bilong pasin isi, na mitupela i amamas tru taim ol i orait long mitupela i ken stap yet long Betel. Mitupela i pilim tru olsem i stap bilong mipela i gat as bilong en, na mipela i amamas olsem em gutpela samting tru mipela inap mekim wok long brens-ofis. Na mitupela i amamas long wok wantaim long helpim ol man long kamap disaipel bilong Krais. Olsem famili Weekes: yu ken kaunim stori bilong ol long Kirap! bilong Julai 8, 1994.
Lain bilong autim tok bilong Kingdom i go bikpela, tasol insait long 30 yia, kirap long taim mi kam nupela long Betel, lain i kam wok long Betel i bin go bikpela inap 10-pela o 12-pela tasol. Tasol long 1970-1979, taim mipela i kirap prinim nius Wastaua na Kirap!, bikpela senis i kamap. Long Janueri 1972, ol i kirap wokim nupela faktori bilong prinim ol nius samting. Bihain liklik, mipela i kisim wanpela masin (40 ton) long Japan bilong prinim ol buk, na taim 1973 i kamap pinis, mipela i save prinim klostu 700,000 nius long olgeta wan wan mun. Orait, nau lain bilong Betel i wok long go bikpela tru.
Tasol long 1975-1976, sampela hevi i painim mi. Long 1975, gutpela man bilong mi, Ted, em i gat 80 krismas, em i dai. Wanpela yia i no lus yet, na lapun papa bilong mi em tu i dai. Tasol Jehova, na ol tok bilong Baibel, na ol brata sista spirit bilong mi, ol i mekim gut bel bilong mi. Long Betel mi wok strong long mekim dispela wok i gat as bilong en, na dispela tu i bin helpim mi.
Tru hevi i bin painim mi, tasol mi no lusim wok bilong mi. Maski nau mi stap wanpis, mi kirap long kisim gen ol blesing na amamas. Long 1978 mi go long wanpela kibung long Landon, Inglan, na bihain mi go long nambawan ofis bilong Sosaiti Was Taua long Bruklin, Nu Yok. Long haus Betel hia mi lukim planti handet brata sista i stap amamas long mekim wok, na dispela samting i bin wok long strongim mi i kam inap long nau.
Long 1978 samting, ol i tok ol i laik skruim haus Betel long Ostrelia i go bikpela. Tasol bai ol i no mekim long Stratfil, long wanem, i no gat bikpela hap graun i stap. Ol i tok, ol bai wokim wanpela nupela haus, i bikpela moa, long graun bilong mipela long Ingilben, em hap mi bin wok long en taim gavman i tambuim wok bilong mipela long 1941.
Mi Mekim Yet Wok i Gat As Bilong En
Long Janueri 1982, mipela i amamas long go stap long dispela nupela haus! Tru pastaim mipela i bel hevi liklik, long wanem, mipela i save gut long dispela hap em mipela i lusim, tasol i no longtaim na mipela i amamas long dispela nupela haus bilong mipela i gat 73 gutpela rum slip long en. Bipo long olpela haus, taim mipela i lukluk i go ausait, mipela i save lukim ol banis brik na ol rot i gat ol planti haus long en, tasol nau mipela inap lukim ol grinpela gras na diwai, na ol bulmakau, na taim san i laik go daun na i kam antap, mipela inap lukim ol gutpela kala bilong en.
Long Mas 19, 1983, ol i dediketim dispela nupela haus long Jehova. Lloyd Barry bilong Lain Bilong Bosim Ol Witnes Bilong Jehova i mekim tok bilong dediket. Mi amamas long lukim em gen wantaim meri bilong em, long wanem, mi bin wok wantaim tupela long Betel long Stratfil taim mipela i yangpela liklik.
Lain bilong autim tok bilong Kingdom i wok yet long go bikpela, olsem na ol i mas skruim haus brens hia long Ingilben i go bikpela. Long 1987, ol i wokim sampela ofis moa. Na long Novemba 25, 1989, ol i dediketim nupela haus slip i gat 5-pela plua, wantaim nupela haus faktori i gat 3-pela plua. Tru tumas, lain pablisa i bin kamap bikpela tru—taim mi nupela long wok autim tok, i gat 4,000 pablisa tasol long Ostrelia, tasol nau i gat 59,000!
Sosaiti i gat 3-pela ofis ol i kolim Regional Engineering—wanpela long Japan, wanpela long Jemani, na nau tasol ol i putim wanpela long brens-ofis long Ostrelia. Olsem na ol i mas skruim haus brens i go bikpela gen. Ol i wokim pinis wanpela ofis i gat 3-pela plua, na klostu ol i wokim pinis wanpela nupela haus slip i gat 5-pela plua na 80 rum slip—yes, lain bilong Betel i wok yet long go bikpela.
Nau i gat planti brata sista bilong lukautim wok bilong wasim ol laplap, tasol planti taim mi tingim bek dispela de long Ogas 1940, taim ol i singautim mi i go helpim ol inap tupela wik. Mi amamas tru olsem dispela tupela wik i winim nau 50 yia pinis, na tu, mi amamas God Jehova i bin soim gutpela rot long mi na bai i stap bilong mi i gat as bilong en.
[Piksa long pes 21]
Taim mi gat 25 krismas
[Piksa long pes 23]
De bilong marit bilong mitupela long 1956
[Ol Piksa long pes 24]
Long 1938 mitupela susa bilong mi i save pilai spot, tasol wok nau mi mekim i win tru