Ol Sumatin Bilong Gileat i Amamas Long Autim Gutnius Long Ol Man
“EM WANPELA gutpela samting tru i winim olgeta samting i bin painim mipela long bipo.” Anders na Amalia Groth i tok olsem long skul misineri ol i bin kisim. Tupela i kamapim tingting bilong ol 48 sumatin bilong namba 97 klas bilong Wastaua Baibel Skul Bilong Gileat. Na ol i tok moa: “Skul Gileat i kirapim na redim mipela long mekim wok, olsem na mipela i amamas tru long go na mekim wok misineri.”
Yumi ken pilim amamas bilong ol sumatin taim ol i mekim sampela tok long program long bung bilong makim ol i winim skul. Long Septemba 4, 1994, inap 6,420 i kam long dispela bung.
David Abel na meri bilong em, Kelli, ol i tok: “Bilong kirapim program Theodore Jaracz bilong Lain Bilong Bosim Ol Witnes i mekim wanpela tok, ‘Jehova i Skulim Yumi.’ Mipela i no inap lusim tingting long dispela tok. Em i tok: ‘Taim yumi tingim bikpela namba bilong Jehova, yumi save yumi samting nating tasol,’ na em i kamapim tok i stap long Jop sapta 38 na 39 bilong strongim dispela tok. Brata Jaracz i tok, long rot bilong Skul Gileat mipela i kisim sampela save moa long Baibel, tasol mipela i no save long bekim bilong olgeta askim, olsem na mipela mas stadi yet long Baibel.”
Orait, nau Christian na Angele Coffy i tok: “Mipela i amamas long tok Max Larson i mekim. Nem bilong en: ‘Gutpela As Bilong Bilip i Helpim Yumi Olsem Wanem?’ Mipela i laikim tok piksa em i mekim olsem mipela i mas i stap olsem wanpela haus as bilong en i go insait tru long graun, na taim guria i kamap mipela inap sanap strong. Sapos mipela i stadi gut, bai mipela inap go klostu moa long Jehova, na stretpela save mipela i kisim bai i olsem as bilong bilip bilong mipela, na taim hevi i kamap bai mipela inap sanap strong.”
Gary na Lynn Elfers i tok: “Inap longtaim bai mipela i tingim tok Milton Henschel i mekim, em presiden bilong skul. Nem bilong en: ‘Kaikai i Redi Pinis.’ Tok bilong Jon 4:35-38 i kamapim gutpela samting mipela inap mekim. Mipela bai go long wanpela ples em ol narapela wokman i kirapim pinis wok long en. Dispela bai kirapim mipela long wok strong long helpim ol man long dispela hap.” Jan na Sirpa Vaahtola i wanbel long dispela, na ol i tok: “Brata Henschel i kirapim mipela long tingim wok i stap yet taim em i stori long ripot bilong ol kantri bilong Boltik. Long Estonia lain pablisa i go bikpela inap 51 pesen, na long Latvia inap 106 pesen, na long Lituenia inap 51 pesen. Em samting tru bilong amamas long en! Ol brata long ol dispela kantri i bin askim Papa bilong gaden long salim sampela wokman moa. Mipela i amamas tru long harim dispela tok, long wanem, mipela bai go long Estonia!”
Kevin na Evelyn Cortina i tingim tok bilong Joel Adams, “Bilip Long Jehova.” Ol i tok: “Em i kirapim mipela long bilip long Jehova long olgeta taim. Mipela i no inap bilip long Jehova sampela taim tasol, na sampela taim mipela i bihainim tingting na save bilong mipela yet, nogat. Planti hevi bai painim mipela long kantri mipela bai go long en, olsem hevi long sik, na kaikai, na tok ples, na pasin bilong ol man, na sampela samting moa. Bilong winim ol dispela hevi mipela mas bilip strong long Jehova.”
Bihain Gerrit Lösch bilong Lain Bilong Bosim Ol Witnes em i mekim tok long “Tingim Pasin Marimari Bilong Jehova.” Alen na Ann Marie Gokavi i tok: “Em i tok, sapos mipela i mekim pasin marimari long ol wanwok misineri bilong mipela na long ol man mipela i autim tok long ol, dispela i makim olsem mipela i strongpela Kristen. Taim mipela mekim wok long narapela kantri i olsem mipela i mekim ofa, tasol sapos mipela i no mekim pasin marimari long narapela, ofa bilong mipela i olsem samting nating.” (Matyu 9:13) Peter na Fleur Hupston i tok moa: “Brata Lösch i tok, yumi mas mekim pasin marimari long ol brata sista bilong yumi tu. Yumi ken mekim tok piksa olsem: Sapos yumi laik glasim ol brata sista long kompas bilong lukluk longwe, yumi mas holim kranki dispela kompas na bai yumi no inap lukim gut ol liklik pasin kranki bilong ol.”
Mickey na Sherry Minsky i tok: “Jack Redford, em wanpela tisa bilong Skul Gileat, i mekim tok, ‘Yu Larim Narapela Man i Stretim Yu?’ Em i tok, pasin antap bai mekim na yumi no amamas long narapela man i stretim yumi. Na sapos yumi bel hevi long tok bilong man i laik stretim yumi, bai dispela tok i no inap helpim yumi. Bihain em i kamapim sampela tok bilong helpim yumi long bihainim tok bilong man i laik stretim yumi; em i kisim dispela tok long Krai 3:27-31.” Charles na Joan Held i tok moa: “Planti taim yumi no tingim pasin kranki bilong yumi yet, olsem na yumi mas tingim tok bilong stretim yumi, em i bilong helpim yumi. Jehova i stretim yumi, long wanem, em i laikim tru yumi.”
Kenneth na Lisbeth Ardkäll i tok: “Narapela tisa, em Ulysses Glass, em i mekim tok long ‘Wok Long Kisim Pasin Olsem Man i Gat Tingting Bilong Kisim Laip.’ Em i askim mipela: ‘Bai yu mekim wanem long ol samting yu bin lain long en?’ Nau em i kamapim wanpela tok piksa bilong Sindaun 30:24-26 long mumut, na olsem wanem Jehova i bin givim olgeta samting long en bilong i stap laip. Mipela i no olsem ol animal God i putim hap save long kru bilong ol na dispela i bosim ol samting ol i mekim; mipela i mas wok strong long kisim gutpela tingting. Jehova i givim olgeta samting long yumi bambai yumi ken kisim. Sapos yumi pas gut wantaim Jehova na yumi laikim tru ol brata, bai yumi inap mekim bikpela wok.”
Nambawan Bikpela Tok
Jay na Gwen Abraczinskas i tok: “Brata Karl F. Klein bilong Lain Bilong Bosim Ol Witnes i mekim wanpela gutpela tok long Song 19—em ‘Nambawan Gutpela Ston i Dia Tumas.’ Em i kamapim klia olsem Devit i pilim tru ol samting Jehova i mekim na em i laikim tru Tok Bilong God.” Keith na Donna Hornback i tok: “Brata Klein i brukim dispela Song long 3-pela hap. Namba wan hap (Song 19 ves 1-6) i kamapim olsem Devit i pilim tru ol samting Jehova i mekim. Namba 2 hap (Song 19 ves 7-10) i kamapim olsem Devit i laikim tru lo bilong God, na namba 3 hap (Song 19 ves 11-14) i kirapim yumi long tingim olsem yumi mas i gat laik long pas gut wantaim Jehova, wankain olsem Devit i mekim.”
David na Raylene Long i tok: “Mipela i amamas long tok olsem pasin bilong pret long Jehova em i bikpela samting bilong helpim mipela long abrusim pasin nogut, na em bai helpim mipela long mekim ol samting i stret long ai bilong Jehova.” Frank na Vibeke Madsen i wanbel long dispela tok. Ol i tok: “Tok Brata Klein i mekim long ol lo na tok bilong Jehova i helpim gut mipela—em i strongim ol tok mipela i bin lain long en long Skul Gileat. Olsem na mipela i tingting strong moa long bihainim tok bilong Baibel long olgeta taim bihain, na mipela i mas tingim Baibel i olsem wanpela bokis i gat planti gutpela gutpela ston i dia tumas.”
Bihain long dispela tok ol sumatin i kisim pepa o setifiket bilong skul, na ol i tokaut long ol kantri ol bai go long en. Long belo ol i malolo bilong kisim sampela kaikai na koldring, na bihain ol i kirapim program bilong apinun. Ol i mekim sotpela Stadi Wastaua na ol sumatin i bekim ol askim.
Bob na Shannon Lakatos i tingim bek wanpela program bilong ol sumatin, “Ol i Skul Long Autim Tok Bilong Kingdom Long Olgeta Hap.” Tupela i tok, “Long namba wan hap bilong program ol sumatin i kamapim ol samting i painim ol taim ol i autim tok insait long 5-pela mun ol i bin skul, na olsem wanem ol i bin mekim gut wok long ol askim taim ol i autim tok. Bihain ol i toktok wantaim sampela brata na ol i stori long sampela gutpela rot bilong winim hevi, na ol inap mekim wanem samting taim sindaun bilong ol i senis long taim ol i misineri. Na ol i soim sampela piksa slait long kantri India, na Kosta Rika, na Malawi na mipela i ken save long sampela samting bilong oganaisesen bilong Jehova long olgeta hap bilong graun.”
Jesse na Michelle Duncan i tok: “Pilai i bin kamap bihain, Bihainim Laik Bilong God, No Ken Bihainim Pasin Bilong Dispela Graun, em i stori long sampela wanfamili i no stap long tok i tru na ol i save bihainim tingting bilong ol yet, na ol inap bagarapim bilip bilong yumi.” Wenzel na Kelly Koula i tok moa: “Pilai i kamapim olsem ol Kristen i mas tingim ol lo na tok bilong God i bilong helpim ol.”
Laspela singsing na beten i pinisim dispela gutpela program. Ol sumatin bai go long 18 kantri, na tok bilong Tommi na Jael Kauko i kamapim gut tingting bilong ol dispela lain i winim skul. Ol i tok: “Mipela i redi long go long ples wok long ol narapela narapela kantri na bihainim ol tok mipela i bin lain long en. Mipela i kisim planti samting—nau mipela i mas givim planti samting long ol narapela.”
[Piksa long pes 26]
Namba 97 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Hong, J.; Hong, D.; Groth, A.; Cortina, E.; Lakatos, S.; Hornback, D.; Acevedo, L.; Coffy, A. (2) Elfers, L.; Gokavi, A.; Ardkäll, L.; Abraczinskas, G.; Knott, K.; Lizer, T.; Abel, K.; Abel, D. (3) Duncan, M.; Gokavi, A.; Held, J.; Hupston, F.; Lakatos, B.; Long, R.; Minsky, S.; Acevedo, E. (4) Ardkäll, K.; Kauko, J.; Vaahtola, S.; Cortina, K.; Carson, N.; Minsky, M.; Lizer, G.; Koula, K. (5) Duncan, J.; Abraczinskas, J.; Vaahtola, J.; Madsen, F.; Madsen, V.; Long, D.; Carson, C.; Elfers, G. (6) Kauko, T.; Hupston, P.; Held, C.; Groth, A.; Hornback, K.; Koula, W.; Knott, D.; Coffy, C.