Stori Bilong Wanpela Meri
Mipela i Wok Gut Wantaim
STORI BILONG MELBA BARRY
Long Julai 2, 1999, mi na man bilong mi i stap long wanpela bikpela bung bilong ol Witnes Bilong Jehova. Mipela i bin marit inap long 57 yia, na insait long dispela hap taim mipela bin go long planti tausen kain bung olsem. Lloyd i wok long mekim laspela tok long kibung distrik long Fraide, long Hawaii. Wantu em i pundaun. Maski ol i wok strong tru long helpim em, em i dai.a
OL BRATA sista Kristen long Hawaii ol i gutpela samting tru. Ol i kam long mi na helpim mi long karim dispela bikpela hevi! Lloyd i bin helpim planti bilong ol, na planti narapela long olgeta hap bilong graun.
Insait long dispela tupela yia em man bilong mi em i dai pinis, mi bin tingting long ol gutpela yia mitupela i bin stap wantaim. Inap planti yia mipela i bin mekim wok misineri long narapela kantri, na tu, mipela i bin stap long hetkota bilong ol Witnes Bilong Jehova long Bruklin, Nu Yok. Mi bin tingting tu long i stap bilong mi long Sidni, Ostrelia, taim mi yangpela yet, na ol hevi mitupela Lloyd i bin karim bilong mipela i ken marit long taim bilong Namba Tu Pait. Tasol pastaim mi laik stori long olsem wanem mi kamap wanpela Witnes, na olsem wanem mi bungim Lloyd long 1939.
Mi Kamap Wanpela Witnes
James na Henrietta Jones ol i gutpela papamama bilong mi na ol i bin lukautim mi gut. Mi gat 14 krismas tasol taim mi lusim skul long 1932. Long dispela taim bikpela hevi bilong mani i stap long olgeta hap. Mi kirap mekim wok mani bilong helpim famili bilong mipela, i gat tupela pikinini meri moa i kamap bihain long mi. Insait long sampela yia, mi kamap bos bilong sampela yangpela meri na mi kisim gutpela pe long ples wok.
Long 1935, mama i kisim sampela buk bilong Baibel long wanpela Witnes Bilong Jehova, na i no longtaim na mama i bilip olsem em i painim pinis tok i tru. Mipela ol narapela bilong famili i ting mama i kamap longlong. Tasol long wanpela de mi lukim liklik buk Where Are the Dead? na dispela het-tok i kirapim tingting bilong mi. Olsem na long pasin hait mi ritim dispela liklik buk. Dispela i senisim tingting bilong mi! Mi kirap go wantaim mama long wanpela miting i kamap namel long wik em ol i kolim Gutpela Stadi. Nem bilong wanpela liklik buk em Model Study—bihain i gat 3-pela buk olsem—na liklik buk i gat ol askim na bekim na ol skripsa i strongim tok bilong ol bekim.
Long dispela taim long Epril 1938, Joseph F. Rutherford, em wanpela mausman bilong hetkota bilong ol Witnes Bilong Jehova, em i kam lukim ol Witnes long Sidni. Pablik-tok bilong em i namba wan pablik-tok mi go long en. Pastaim ol i laik bai dispela tok i kamap long wanpela bikpela haus (Sydney Town Hall), tasol ol birua i mekim na ol i no larim mipela i yusim dispela haus. Tasol dispela tok i kamap long wanpela ples spot (Sydney Sports Ground) i bikpela moa. Pasin birua bilong ol man i mekim na planti man i kisim save long dispela bung, olsem na inap 10,000 manmeri i kam bung. Mipela i kirap nogut long dispela bikpela namba, long wanem, long dispela taim i gat 1,300 Witnes tasol long Ostrelia.
Bihain liklik mi go autim tok long namba wan taim—na no gat wanpela i lainim mi long mekim dispela wok. Taim mipela i kamap long teritori, brata i go pas long wok em i tokim mi olsem: “Haus yu bai autim tok long en i stap long hap.” Mi pret nogut tru na taim meri bilong haus i opim dua, mi askim em olsem: “Inap yu tokim mi em wanem taim nau?” Meri i go insait, lukim klok, na kam bek na tokim mi long taim. Em tasol. Mi go bek long ka.
Tasol mi no lusim dispela wok, na i no longtaim na mi autim tok bilong Kingdom wantaim ol narapela long olgeta taim. (Matyu 24:14) Long Mas 1939, long rum waswas bilong Dorothy Hutchings i stap klostu long mipela, mi kisim baptais bilong makim olsem mi dediket pinis long Jehova. I no gat ol brata i stap, olsem na bihain liklik long baptais bilong mi, ol i makim mi long lukautim sampela wok bilong kongrigesen em ol man Kristen i save mekim.
Mipela i save mekim ol miting long haus bilong ol brata, tasol sampela taim mipela i rentim wanpela bikpela haus bilong mekim ol pablik-tok long en. Wanpela naispela brata bilong Betel—em brens-ofis bilong mipela—em i kam long liklik kongrigesen bilong mipela bilong mekim tok. Mi no bin save olsem i gat narapela as na em i kam—em i kam bilong kisim save long mi. Em nau, long dispela rot mi bungim Lloyd.
Mi Bungim Famili Bilong Lloyd
I no longtaim na mi gat laik long mekim wok bilong Jehova long olgeta de. Tasol taim mi putim aplikesen bilong mekim wok painia (autim tok long olgeta de), ol i askim mi long wok long Betel. Olsem na long Septemba 1939, long mun Namba Tu Pait i kirap, mi kamap wanpela bilong famili Betel long Stratfil, em wanpela hap bilong Sidni.
Long Disemba 1939, mi go long Nu Silan long wanpela kibung. Lloyd i bilong Nu Silan, olsem na em tu i go long dispela kibung. Mipela i kalap long sip, na long raun bilong mipela long sip i gat hap taim bilong narapela i ken kisim gut save long narapela. Lloyd i stretim rot bilong mi ken bungim papamama na ol susa bilong em long kibung long Welington, na bihain long haus bilong ol long Kraistses.
Ol i Tambuim Wok Bilong Mipela
Long Sarere Janueri 18, 1941, ol bikman bilong gavman i kam long brens-ofis long 6-pela blakpela ka bilong kisim ol samting. Mi wok long wanpela liklik haus i stap long get bilong Betel ol man i save kam insait long en, olsem na mi lukim ol pastaim. Inap 18 aua paslain long dispela, mipela i bin kisim save olsem ol i tambuim wok bilong mipela, olsem na mipela i bin rausim klostu olgeta buk na nius na ol fail long brens. Long wik bihain, ol i bin kalabusim 5-pela bilong famili Betel na Lloyd i wanpela bilong ol.
Mi save olsem nambawan bikpela samting ol brata i kalabus i mas kisim, em kaikai bilong spirit. Bilong strongim Lloyd mi raitim ol pas olsem meri i save raitim long lewa bilong em. Long kirap bilong pas mi raitim ol switpela tok, tasol bihain mi raitim ol stori bilong Wastaua na long pinis bilong pas mi sainim nem bilong mi olsem mi lewa bilong em. Bihain long 4-pela mun na hap, Lloyd i lusim kalabus.
Mipela i Marit na Mekim Yet Wok
Long 1940, mama bilong Lloyd i kam long Ostrelia, na Lloyd i tokim em olsem mitupela i tingting long marit. Mama i tokim em olsem em i no ken marit, long wanem, pinis bilong pasin bilong dispela graun i klostu tru. (Matyu 24:3-14) Lloyd i tokim sampela pren bilong em tu long dispela laik bilong em, tasol ol tu i tok olsem no ken marit. Long wanpela de long Februeri 1942, Lloyd i kisim mi i go long ofis bilong gavman na mipela i marit. Mipela i kisim 4-pela Witnes i go wantaim mipela, em ol i bin tok promis olsem ol bai no tokim wanpela man long dispela samting. Long dispela taim ol Witnes Bilong Jehova i no gat namba bilong wokim ol marit.
Taim mipela i marit ol i no larim mipela i stap long Betel, na ol i askim mipela long mekim wok painia salim. Mipela i amamas long go long hap ol i makim, em wanpela liklik taun nem bilong en Waga Waga. Tambu gavman i bin putim i stap yet long wok autim tok bilong mipela, na mipela i no kisim mani, olsem na mipela i mas putim tru ol hevi bilong mipela long han bilong Jehova.—Song 55:22.
Mipela i raun long wilwil long ol liklik ples na toktok inap longpela taim wantaim ol man i gat gutpela pasin. I no gat planti man i laik stadi long Baibel. Tasol wanpela papa bilong stua i amamas tru long wok mipela i mekim, olsem na em i givim mipela ol prut na kumu samting long olgeta wik. Taim mipela i bin stap inap 6-pela mun long Waga Waga, ol i singautim mipela i go bek long Betel.
Long Me 1942, famili Betel i lusim brens-ofis long Stratfil na ol i mekim wok bilong ol long haus bilong ol man. Ol i stap long wanpela haus inap 2-pela wik samting na bihain ol i go na stap long narapela haus, nogut polis i painim ol. Taim mitupela Lloyd i go bek long Betel long Ogas, mipela i bung wantaim famili Betel long wanpela haus olsem. Ol i makim mipela long wok long hap ol i prinim ol buk samting long pasin hait. Bihain, long Jun 1943, gavman i pinisim tambu bilong wok bilong mipela.
Redi Bilong Mekim Wok Misineri
Long Epril 1947, mipela i kisim namba wan aplikesen bilong go long Wastaua Baibel Skul Bilong Gileat long Saut Lansing, Nu Yok, Amerika. Taim mipela i no go yet long dispela skul, ol i makim mipela long raun lukim ol kongrigesen long Ostrelia bilong strongim ol long ol samting bilong spirit. Sampela mun bihain ol i singautim mipela long go long namba 11 klas bilong Skul Gileat. Mipela i gat 3-pela wik bilong stretim ol samting bilong mipela na putim ol samting bilong mipela long ol switkes samting. Mipela i lusim famili na ol pren bilong mipela long Disemba 1947, na go long Nu Yok wantaim narapela 15 brata sista bilong Ostrelia em ol i bin kisim toksave long kam long wankain klas.
Ol mun mipela i stap long Skul Gileat i pinis hariap, na ol i makim mipela long mekim wok misineri long Japan. Mipela i mas wet long kisim ol visa samting bilong go long Japan, olsem na ol i makim gen Lloyd long kamap wanpela wasman bilong raun bilong ol Witnes Bilong Jehova. Ol kongrigesen ol i makim mipela long lukim i kirap long biktaun Los Enjeles na i go daun long boda bilong Meksiko. Mipela i no gat ka, olsem na long olgeta wik ol Witnes i kisim mipela i go long narapela kongrigesen. Long nau dispela bikpela sekit mipela bin raun long en i kamap 3-pela sekit bilong tok Inglis na 3-pela distrik bilong tok Spen, em olgeta wan wan distrik i gat 10-pela sekit long en!
Wantu Oktoba 1949 i kamap, na mipela i go long Japan long wanpela sip bipo em i sip bilong ami. Wanpela hap bilong sip em bilong ol man, na narapela hap em bilong ol meri na pikinini. Inap wanpela de paslain long mipela i kamap long Yokohama, strongpela win tru i kamap. I luk olsem dispela win i bin rausim ol klaut, na taim san i kamap long de bihain long Oktoba 31, mipela inap lukim naispela maunten Fuji. Em i olsem wanpela gutpela samting bilong lukim taim mipela i kam long nupela ples bilong mipela long mekim wok!
Wok Wantaim Ol Japan
Taim mipela i kamap klostu long pasis, mipela i lukim planti handet manmeri i gat blakpela gras. Taim mipela i harim bikpela pairap mipela i ting, ‘Ol i lain bilong mekim nois!’ Olgeta i pasim su ol i wokim long diwai na ol dispela su i pairap long ol bris ol i wokim long diwai. Mipela i slip long Yokohama, na long de bihain mipela i kalap long tren i kisim mipela i go long Kobe, em hap mipela bai mekim wok misineri long en. Don Haslett, em wanklas bilong mipela long Skul Gileat, em i bin kam long Japan sampela mun paslain long mipela na em i bin rentim wanpela haus misineri. Em i naispela na bikpela haus ol i wokim long stail bilong ol man bilong Wes na i gat tupela plua long en, tasol i no gat wanpela samting i stap insait long en!
Bilong wokim matres bilong slip long en, mipela i katim longpela gras i stap arere long haus, na putim long plua. Wok misineri bilong mipela i kirap olsem. Ol samting mipela i holim i stap long ol switkes tasol. Bilong hatim haus na kukim kaikai, mipela i kisim ol liklik stov ol i kolim hibasi, em ol stov i wok long ston ol i kolim kol. Long wanpela nait, Lloyd i painim tupela misineri, Percy na Ilma Iszlaub, ol i hap i dai. Em opim ol windo bilong gutpela kolwin i ken kam insait na em i kirapim tupela. Wanpela taim mi tu i airaun na pundaun taim mi kukim kaikai long stov i wok long kol. I gat kain kain samting mipela i mas lain long en!
Wok bilong lainim tok ples bilong dispela hap em i namba wan bikpela samting, olsem na inap wanpela mun mipela i skul long tok Japan inap 11-pela aua long olgeta de. Bihain, mipela raitim wanpela o tupela sentens long pepa bilong helpim mipela long autim tok. Long namba wan de bilong mi long autim tok, mi bungim wanpela naispela meri, em Miyo Takagi, na em i mekim gutpela pasin long mi. Taim mi go lukim em gen, mipela i hatwok na yusim dikseneri bilong tok Japan i go long tok Inglis, tasol bihain mipela inap stadi gut wantaim long Baibel. Long 1999, mi go long bung bilong dediketim ol nupela haus bilong brens long Japan, na mi bungim gen Miyo na planti narapela gutpela brata sista mi bin stadi wantaim ol. Inap 50 yia i go pinis, tasol ol i givim bel yet long autim tok bilong Kingdom, na ol i mekim ol samting ol inap mekim bilong lotuim Jehova.
Long Kobe, long Epril 1, 1950, inap 180 manmeri i kam long Memorial bilong tingim indai bilong Krais. Long de bihain, mipela i kirap nogut long 35 manmeri i kam bilong autim tok wantaim mipela. Olgeta wan wan misineri i kisim 3-pela o 4-pela bilong ol dispela nupela i go wantaim em long autim tok. Ol man bilong haus i no toktok wantaim mi—mi meri bilong narapela kantri i no save gut long tok ples—tasol ol i toktok wantaim ol Japan i bin kam long Memorial na i raun wantaim mi. Ol i toktok i go i go, tasol mi no save liklik long ol i toktok long wanem samting. Mi amamas long tok olsem sampela bilong ol dispela nupela ol i kamap strong, na ol i mekim yet wok autim tok i kam inap long nau.
Planti Gutpela Wok
Mipela i mekim wok misineri long Kobe i go inap long 1952, na long dispela taim ol i makim mipela long go long Tokyo na ol i makim Lloyd long lukautim brens-ofis. Bihain, ol wok em i kisim i mekim na em i raun long olgeta hap bilong Japan na long ol narapela kantri. Bihain, taim em i raun long Tokyo, Nathan H. Knorr bilong hetkota, em i tokim mi olsem: “Yu save long wanem hap man bilong yu bai go raun long en olsem wasman son? Long Ostrelia na Nu Silan.” Em i tok moa: “Yu ken go tu, sapos yu baim tiket bilong yu yet.” Bel bilong mipela i kirap tru! Inap 9-pela yia i go pinis na mipela i bin lusim ples bilong mipela.
Kwiktaim mipela i kirap raitim ol pas. Mama bilong mi i helpim mi long baim tiket. Mitupela Lloyd i bin givim bel long wok misineri, olsem na mipela i no gat mani bilong go lukim famili bilong mipela. Nau rot i op na dispela i soim olsem Jehova i bin harim beten bilong mi. Mama i amamas tru long lukim mi. Em i tok: “Bai mi bungim mani bambai yu ken kam gen bihain long 3-pela yia.” Mipela i tingting long dispela taim mipela i lusim em, tasol sori tru, em i dai long mun Julai bihain long dispela. Mi tingting long wanpela gutpela samting tru bai kamap bihain long nupela taim—mi ken bungim em gen!
I go inap long 1960, mi mekim wok misineri tasol, na bihain mi kisim wanpela pas i tok olsem: “Kirap long dispela de mipela i makim yu long wasim na ainim ol klos bilong famili Betel olgeta.” Long dispela taim famili Betel i gat 12-pela manmeri tasol, olsem na mi inap mekim dispela wok na wok misineri bilong mi tu.
Long 1962 ol i rausim haus bilong mipela ol i bin wokim long stail bilong ol Japan, na long yia bihain ol i wokim nupela haus Betel i gat 6-pela plua. Ol i makim mi long helpim ol nupela yangpela brata i kam long Betel long klinim na stretim ol samting bilong rum slip bilong ol. Em pasin bilong ol Japan long ol i no lainim ol manki long mekim ol wok bilong haus. Ol papamama i strongim ol long kisim bikpela skul, na mama bilong ol i mekim olgeta samting bilong ol. Kwiktaim ol i kisim save olsem mi no mama bilong ol. Bihain, planti bilong ol i kamap strong na kisim ol bikpela wok insait long oganaisesen.
Long wanpela de san i hat nogut tru, na wanpela sumatin bilong Baibel i raun long brens, na em i lukim mi wasim ples waswas. Em i tok: “Plis tokim bos bilong yupela olsem mi amamas long baim wanpela haus-meri long kam na mekim dispela wok.” Mi tokim em olsem mi amamas long gutpela tingting bilong em, tasol mi amamas long mekim wanem wanem wok oganaisesen bilong Jehova i makim mi long mekim.
Long dispela taim, ol i singautim mitupela Lloyd long kam long namba 39 klas bilong Skul Gileat! Em i wanpela gutpela samting tru long skul gen long 1964, taim mi gat 46 krismas! Dispela kos i bilong helpim ol brata i wok long ol brens-ofis long ol i ken mekim gut wok bilong ol. Taim dispela kos bilong 10-pela mun i pinis, ol i makim mipela long go bek long Japan. Long dispela taim, winim 3,000 man bilong autim gutnius bilong Kingdom i stap long Japan.
Wok i go bikpela hariap, na long 1972 winim 14,000 Witnes i stap, na ol i wokim nupela brens-ofis i gat 5-pela plua long Numasu, long hap saut bilong Tokyo. Long brens-ofis mipela inap lukim gut maunten Fuji. Wanpela nupela traipela masin i prinim inap wan milion nius long tok Japan long olgeta mun. Tasol senis i laik kamap long i stap bilong mipela.
Long pinis bilong 1974, Lloyd i kisim wanpela pas long hetkota bilong ol Witnes Bilong Jehova long Bruklin, na ol i singautim em long wok long lain Gavening Bodi. Pastaim mi tingting olsem: ‘Orait, mipela i no inap stap wantaim moa. Lloyd i tingting long kisim laip long heven na mi tingting long stap long graun, olsem na taim bai kamap na narapela i mas lusim narapela. Ating i gutpela sapos Lloyd wanpela tasol i go long Bruklin.’ Tasol bihain liklik mi stretim tingting bilong mi na mi amamas long go wantaim Lloyd long Mas 1975.
Ol Gutpela Samting Mipela i Kisim Long Hetkota
Long Bruklin, tingting bilong Lloyd i stap long Japan, na oltaim em i stori long ol samting i bin painim mipela long dispela hap. Tasol nau rot i op long mipela i ken poromanim ol narapela brata sista. Insait long laspela 24 yia bilong laip bilong Lloyd, em i raun olsem wasman son inap planti taim, olsem na em i raun long olgeta hap bilong graun. Planti taim mi raun wantaim em.
Taim mipela i bin go lukim ol brata Kristen bilong mipela long ol narapela kantri, dispela i helpim mi long pilim hatwok bilong ol long mekim ol samting long olgeta de. Mi no inap lusim tingting long pes bilong Entellia, em wanpela pikinini meri i gat 10-pela krismas na mi bungim em long noten Afrika. Em i laikim tru nem bilong God na em i wokabaut inap wanpela aua na hap bilong go long ol miting Kristen. Maski famili bilong em i birua tru long em, Entellia i dediket long Jehova. Taim mipela i go long kongrigesen bilong em, ol i gat wanpela liklik lam tasol i hangamap antap long tebol bilong putim pepa bilong brata i mekim tok, narapela hap bilong haus ol i bung long en i tudak olgeta. Taim mipela i stap long dispela ples tudak, bel bilong mipela i kirap tru taim mipela i harim gutpela singsing bilong ol brata sista.
Wanpela bikpela samting bilong i stap bilong mipela i kamap long Disemba 1998, taim mitupela Lloyd i go long “Bihainim Rot God i Makim” Kibung Distrik long Kuba. Mipela i kirap nogut long pasin bilong ol brata sista long tok tenkyu na amamas long wanpela brata bilong Bruklin i kam lukim ol! Mi amamas tru long tingim ol gutpela brata sista mi bin bungim, em ol i save litimapim nem bilong Jehova.
Ples Bilong Mi i Stap Wantaim Lain Bilong God
As ples bilong mi em Ostrelia, tasol mi laikim tru ol manmeri bilong olgeta hap oganaisesen bilong Jehova i bin salim mi i go long en. Mi laikim tru ol manmeri bilong Japan, na nau mi bin stap long Amerika inap olsem 25 yia, na mi laikim tru ol manmeri bilong dispela hap. Taim man bilong mi i dai, mi no tingting long go bek long Ostrelia, nogat; mi tingting long stap long Betel long Bruklin, em hap Jehova i bin makim mi long i stap long en.
Nau krismas bilong mi i winim 80. Mi bin mekim wok bilong God long olgeta de inap 61 yia, na mi amamas yet long mekim wok bilong Jehova long hap em i laikim. Em i bin lukautim mi gut tru. Mi tingim tru ol 57 yia mi bin stap wantaim wanpela gutpela poroman i laikim tru Jehova. Mi bilip tru olsem Jehova bai wok yet long mekim gut long mipela, na mi save em bai no lusim tingting long wok bilong mipela na pasin bilong mipela long laikim tru nem bilong em.—Hibru 6:10.
[Futnot]
[Piksa long pes 25]
Mi wantaim mama long 1956
[Piksa long pes 26]
Mitupela Lloyd na sampela pablisa bilong Japan long 1951 samting
[Ol Piksa long pes 26]
Mi wantaim namba wan Baibel-stadi bilong mi long Japan, Miyo Takagi, long 1951 samting na long 1999
[Piksa long pes 28]
Mitupela Lloyd i autim tok long rot long Japan