Yu Ting Ol Narapela i Kisim Tingting Kranki Long Yu?

ANTONIO i tingting planti. Em i no save i gat wanem as na gutpela pren bilong em Leonardo i no toktok gut moa wantaim em.a Leonardo i no bekim moa tok gude bilong Antonio, na taim ol i stap wantaim i olsem wanpela banis i stap namel long tupela. Antonio i tingting planti olsem nogut em i bin mekim sampela tok o pasin em pren bilong em i bin kisim tingting kranki long en. Tasol em i bin mekim wanem samting?

Planti man i save kisim tingting kranki long narapela. Planti taim em ol liklik samting tasol na i no hatwok long stretim. Sampela taim tingting kranki bilong narapela i mekim na man i bel hevi, na em bai bel hevi moa yet taim narapela i gat tingting kranki long em inap longpela taim, maski man i wok strong long stretim dispela samting. Bilong wanem ol man i save kisim tingting kranki? Dispela i save mekim wanem long ol man i insait long dispela hevi? Yu ken mekim wanem sapos ol narapela i kisim tingting kranki long ol samting yu mekim? Tingting ol narapela i kisim long yu i bikpela samting o nogat?

Ol Man i Save Kisim Tingting Kranki

Ol narapela i no inap save long ol tingting i stap long bel bilong yumi, olsem na wanpela de bai kamap na wanpela man bai kisim tingting kranki long sampela tok o pasin bilong yumi. Planti samting inap mekim na man i kisim tingting kranki. Sampela taim yumi no kamapim gut o tokaut stret long tingting bilong yumi. Ating sampela pairap i mekim na narapela i hatwok long harim tok bilong yu o samting i pulim tingting bilong em na em i no kisim gut tok bilong yumi.

Sampela pasin bilong man tu inap mekim na ol narapela i kisim tingting kranki long em. Olsem: Ol narapela inap lukluk long wanpela man bilong pret na ting em i no save mekim pasin pren, o em i no save tingim ol narapela, o em i gat pasin antap. Ol samting i bin painim man long bipo inap mekim na bel i kirapim em long mekim sampela tok o pasin na em i no bihainim gutpela tingting. Pasin bilong ples bilong ol man na tok ples bilong ol i narapela narapela, na dispela inap mekim na yumi no kisim gut insait bilong tok bilong narapela. Na sampela taim ol man i no kolim stret ol samting i bin kamap o ol i tok baksait, na tu, yumi no ken kirap nogut long sampela taim tok o pasin man i mekim i no olsem pastaim em i bin tingting long mekim. Tasol ating ol dispela tok i no helpim tumas man em narapela i bin kisim tingting kranki long em.

Olsem: Anna i stori long wanpela pren bilong em na tok olsem planti i save laikim em, na em i mekim dispela tok taim dispela pren i no stap. Bihain wanpela i stori long dispela samting long ol narapela, tasol em i no kolim stret ol tok, na nau Anna i kirap nogut long pren bilong em i kros na long ai bilong planti man em i tokim Anna olsem Anna i bel nogut long em, long wanem, wanpela man i save mekim gut long em. Narapela i no bin kamapim stret ol tok Anna i bin mekim pastaim, na bihain olgeta tok Anna i mekim bilong helpim pren bilong em long save olsem em i no laik bagarapim nem bilong em i lus nating. Dispela samting i kamapim bikpela bel hevi, na longpela taim i lus pastaim na bihain Anna inap stretim hevi dispela tingting kranki i bin kamapim.

Bilong ol narapela i ken save yu wanem kain man, ol i mas save gut long tingting na laik bilong yu. Olsem na i stret long bel hevi taim ol narapela i kisim tingting kranki long sampela tok o pasin bilong yu. Ating bai yu kros na ting olsem i no gat as na narapela i kisim tingting kranki long yu. Yu inap ting olsem ol i no gat stretpela tingting long yu, o ol i skelim skelim pasin bilong yu, o tingting bilong ol i kranki olgeta, na dispela i ken bagarapim tru bel bilong yu. Na bai yu bel nogut moa yet, sapos tingting bilong ol dispela man i bikpela samting long yu.

Ating bai yu kros long pasin bilong ol narapela long skelim yu, tasol i stret long yu tingim gut tok bilong ol narapela. Em i no pasin Kristen long sakim tingting bilong narapela, na yumi no laik tru long tok o pasin yumi mekim i bagarapim bel bilong narapela. (Matyu 7:12; 1 Korin 8:12) Olsem na ating sampela taim yu mas wok strong long stretim tingting kranki narapela i bin kisim long yu. Tasol pasin bilong tingting strong olsem ol narapela i mas orait long yu inap kamapim ol narapela hevi. Em inap mekim na yu no amamas long yu yet o bai yu ting ol narapela i givim baksait long yu. Tingting bilong ol narapela i no makim yu wanem kain man tru.

Tasol ating yu inap luksave olsem tok ol narapela i mekim bilong skelim pasin bilong yu i gat as bilong en. Dispela tu inap bagarapim bel bilong yu, tasol sapos yu redi long tokaut long ol rong bilong yu, dispela inap kamapim gutpela samting na kirapim yu long senisim pasin bilong yu.

Ol Samting Nogut Tingting Kranki i Kamapim

Tingting kranki inap kamapim ol samting nogut. Olsem: Sapos yu harim wanpela man i toktok long strongpela nek long wanpela haus kaikai, yu inap ting em i man bilong toktok o em i laik pulim ai bilong ol man. Tasol nogut tingting bilong yu i no stret. Ating man em i toktok long em i yaupas liklik. O yu inap ting wanpela wokman bilong stua i no gat gutpela pasin, tasol nogut em i pilim sik liklik. Ol dispela kain tingting kranki i mekim na bai yu no gat gutpela tingting long narapela, tasol ating dispela i no kamapim bikpela hevi. Tasol sampela taim tingting kranki inap kamapim bikpela hevi tru. Tingim tupela samting i bin painim lain Israel long bipo.

Taim king bilong Amon i dai, em Nahas, Devit i salim ol mausman long mekim gut bel bilong pikinini bilong em, em Hanun. Hanun i bin kisim ples bilong papa na mekim wok king. Tasol em i ting ol mausman i kam lukstil long graun bilong Amon, na dispela i kirapim Hanun long semim ol mausman na kirapim pait wantaim ol Israel. Olsem na inap 47,000 manmeri i dai​—⁠dispela i kamap, long wanem, ol i kisim tingting kranki long gutpela samting ol narapela i laik mekim.​—⁠1 Stori 19:​1-19.

Paslain long dispela taim, narapela samting i kamap long lain Israel na ol man i bin kisim tingting kranki, tasol ol i stretim dispela long narapela kain pasin. Lain bilong Ruben na Gad na hap lain bilong Manase ol i wokim bikpela alta klostu long wara Jordan. Ol narapela bilong lain Israel i ting dispela pasin i makim olsem ol i no stap gut long Jehova, na ol i bikhet long em. Olsem na ol i bung bilong mekim pait. Paslain long ol i mekim wanpela bikpela samting, ol dispela lain Israel i kros ol i salim sampela mausman bilong kamapim olsem ol i no orait long dispela samting ol i ting i makim olsem ol i givim baksait long Jehova. Na gutpela tru ol i mekim olsem, long wanem, ol man i wokim alta ol i tok ol i no tingting long lusim trupela lotu. Nogat. Dispela alta i bilong makim pasin bilong ol long stap gut long Jehova. Dispela tingting kranki inap mekim na ol i kilim i dai planti man, tasol gutpela tingting i pasim ol long mekim olsem.​—⁠Josua 22:​10-34.

Stretim Ol Samting Long Pasin Sori

Pasin bilong skelim dispela tupela stori i ken skulim yumi. Em i savepasin long toktok gut na kamapim klia ol samting. Yumi no inap save hamas man long dispela laspela stori bilong yumi i bin abrusim bagarap, long wanem, tupela lain i toktok. Ating laip bilong man i no inap lus sapos yu no kisim gut tingting tru bilong em, tasol pasin pren inap bagarap. Olsem na sapos yu pilim olsem narapela i no bin mekim stretpela pasin long yu, yu ting yu save gut long ol samting i bin kamap, o yu kisim tingting kranki long en? Wanem tingting tru bilong narapela? Askim em. Yu ting em i bin kisim tingting kranki long yu? Toktok long dispela samting. No ken larim pasin antap i pasim yu long toktok.

Jisas i kamapim wanpela gutpela as bilong stretim tingting kranki. Em i tok: “Sapos yu bringim ofa bilong yu i kam long alta, na yu tingim brata bilong yu em i gat tok long yu, orait yu mas lusim ofa bilong yu i stap klostu long alta. Na yu go pastaim na stretim tok wantaim brata bilong yu. Stretim pinis, orait nau yu ken i go na givim ofa bilong yu long God.” (Matyu 5:​23, 24) Olsem na stretpela rot bilong bihainim i olsem: Go toktok wantaim man yu gat hevi wantaim, na no ken stori long ol narapela long dispela samting. Ol samting bai kamap nogut moa, sapos man yu bel nogut long em i kisim save long dispela samting long rot bilong narapela man. (Sindaun 17:⁠9) Yu mas i gat laik long mekim pasin sori na kamap wanbel gen. Long pasin isi toktok klia long dispela hevi, mekim ol tok i no sutim bel bilong man. Stori long ol samting dispela hevi i mekim long bel bilong yu. Putim gut yau long tingting bilong narapela. No ken hariap na tok olsem tingting nogut i kirapim em long mekim ol samting. Redi long bilip olsem narapela i no gat tingting nogut. Tingim, pasin bilong laikim tru narapela i mekim na man i “bilip” long narapela.​—⁠1 Korin 13:⁠7.

Tru, taim yupela i stretim pinis tingting kranki i bin kamap, ating bel bai bagarap yet o sampela samting nogut em tingting kranki i bin kamapim bai stap yet. Yu ken mekim wanem? Em i bikpela samting long tok sori sapos i stret long yu mas mekim olsem, na mekim ol narapela samting yu inap mekim bilong stretim hevi. Long kain taim olsem, man i bel hevi i mas bihainim dispela tok bilong Baibel: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela. Yupela i mas givim bel bilong yupela long ol arapela manmeri. Dispela pasin i winim tru olgeta arapela pasin, na em i save mekim ol arapela gutpela pasin i kamap strong na i wok bung wantaim.”​—⁠Kolosi 3:​13, 14; 1 Pita 4:⁠8.

Yumi stap olsem ol sinman yet, olsem na ol tingting kranki na bel hevi i kamap long dispela rot bai stap yet. Olgeta man inap popaia o mekim tok long pasin i save bagarapim bel bilong narapela. Baibel i tok: “Planti taim yumi save tingting long mekim wanpela samting, na yumi save popaia. . . . Na sapos i gat wanpela man i stap, em i no save mekim sampela tok i no stret, orait em i gutpela man tru, na em bai inap long bosim gut olgeta hap bilong bodi bilong en.” (Jems 3:⁠2) God Jehova i save long dispela samting, olsem na em i givim dispela gutpela tok: “Yu no ken belhat kwik long narapela man, long wanem, belhat em i pasin bilong ol man i no gat gutpela tingting. Yu no ken harim olgeta toktok bilong ol manmeri. Sapos yu putim yau gut long tok bilong ol, ating bai yu harim wokboi bilong yu i tok nogut long yu. Long wanem, yu save olsem, planti taim yu yet yu bin tok nogut long narapela man.”​—⁠Saveman 7:​9, 21, 22.

“Bikpela i Save Skelim Pasin Bilong Yumi”

Olsem wanem sapos i luk olsem yu no inap stretim tingting kranki narapela i bin kisim long yu? Yu no ken bel hevi. Wok yet long kisim na kamapim ol pasin Kristen. Beten askim Jehova long helpim yu long stretim ol pasin em yu gat wok long stretim. Tingting bilong ol narapela i no makim yu wanem kain man tru. Jehova tasol inap “skelim” bel bilong yu na save yu wanem kain man tru. (Sindaun 21:⁠2) Ol man i bin ting Jisas em i man nating na sampela ol i nolaik tru long em, tasol dispela i no senisim tingting bilong Jehova long pasin bilong Jisas. (Aisaia 53:⁠3) Maski sampela ol inap kisim tingting kranki long yu, yu inap ‘autim olgeta hevi na tingting bilong yu’ long Jehova, na bilip olsem em bai pilim hevi bilong yu, long wanem, ‘em i no save skelim ol man olsem ol i save skelim. Nogat. Ol man i save lukluk long bodi, tasol God i save lukim tingting na laik bilong man na em i skelim ol.’ (Song 62:8; 1 Samuel 16:⁠7) Sapos yu strong long mekim gutpela pasin, ol man i bin kisim tingting kranki long yu, ating bihain bai ol i luksave long popaia bilong ol na senisim tingting.​—⁠Galesia 6:9; 2 Timoti 2:⁠15.

Yu tingim yet Antonio em mipela i bin stori long en long kirap bilong dispela stori? Em i strongim bel na bihainim tok bilong Baibel, na em i toktok wantaim pren bilong em Leonardo na askim em long em i bin mekim wanem samting bilong bagarapim bel bilong em. Wanem samting i kamap? Leonardo i kirap nogut tru. Em i tok, Antonio i no bin mekim wanpela samting bilong bagarapim bel bilong em, na Leonardo i no bin tingting long mekim narapela kain pasin long em. Sapos em i no bin mekim gutpela pasin pren long Antonio, ating as bilong dispela i olsem tingting bilong em i bin stap tasol long ol narapela samting. Leonardo i tok sori long em i bin bagarapim bel bilong pren bilong em, na em i tok tenkyu long Antonio i bin tokim em long dispela samting. Em i tok moa olsem bihain em bai was gut, nogut pasin bilong em i mekim na ol narapela tu bai kisim wankain tingting olsem Antonio. Hevi bilong tupela i pinis wantu tasol, na tupela i pas gut wantaim olsem bipo.

Tru, yumi no amamas taim narapela i kisim tingting kranki long yumi. Tasol sapos yu mekim olgeta samting bilong stretim tingting kranki, na bihainim ol tok bilong Baibel long pasin bilong laikim tru narapela na lusim tingting long rong, orait wankain ol gutpela samting inap painim yu tu.

[Futnot]

[Ol Piksa long pes 23]

Pasin bilong stretim hevi long pasin sori na lusim tingting long rong bai kamapim amamas