Stori Bilong Wanpela Meri
Mi Kisim Sampela Helpim Bilong Lusim Pasin Bilong Sem
EM STORI BILONG RUTH L. ULRICH
Mi stap long dua bilong haus bilong wanpela pasto na mi kirap na krai long ai bilong em. Dispela pasto i sutim planti tok giaman long Charles T. Russell, em namba wan presiden bilong Sosaiti Was Taua. Mi laik stori long olsem wanem mi mekim dispela wok bilong go long ol haus bilong autim tok long ol man mi no save long ol, maski mi yangpela meri tasol.
FAMILI bilong mi i givim bel long lotu, na taim mama i karim mi long 1910 ol i stap long wanpela fam long Nebraska, U.S.A. Long olgeta moning na apinun taim mipela i kaikai pinis mipela famili i save ritim tok bilong Baibel wantaim. Papa i save bosim ol wok bilong lukautim Sande-skul long misin Metodis long liklik taun Winsait, i stap longwe long fam bilong mipela inap 6-pela kilomita. Mipela gat wanpela karis em hos i save pulim, na laplap i karamapim windo bilong karis, olsem na maski i gat ren samting, mipela inap go lotu long Sande.
Taim mi gat 8-pela krismas, liklik brata bilong mi i kisim sik polio, na mama i karim em i go long wanpela haus sik long Aiowa. Maski mama i bin givim bel long lukautim em, em i dai taim ol i stap yet long dispela haus sik. Taim mama i stap long Aiowa, em i bungim wanpela Sumatin Bilong Baibel—em nem bilong ol Witnes Bilong Jehova long bipo. Planti taim tupela i bung na toktok, na tu, mama i go wantaim dispela meri long sampela miting bilong ol Sumatin Bilong Baibel.
Taim Mama i kam bek long haus em i karim sampela buk i kam, em Studies in the Scriptures, Sosaiti Was Taua i bin wokim. I no longtaim na em i kisim strongpela tingting olsem ol Sumatin Bilong Baibel i skulim ol man long tok i tru, na ol dispela tok olsem ol man i gat wanpela tewel i no save dai, na ol man nogut i save kisim pen i stap oltaim oltaim, ol i giaman tasol.—Stat 2:7; Saveman 9:5, 10; Esekiel 18:4.
Papa i kros tru na em i no amamas taim mama i go long ol miting bilong ol Sumatin Bilong Baibel. Papa i save kisim mi na bikbrata bilong mi, Clarence, i go yet long lotu. Tasol taim em i no stap long haus, Mama i save stadi wantaim mipela long Baibel. Olsem na rot i op na mipela ol pikinini inap skelim ol bilip bilong ol Sumatin Bilong Baibel wantaim ol bilip bilong lotu bilong mipela.
Mi na Clarence i save go long Sande-skul taim mipela go long lotu. Clarence i givim sampela askim long tisa, na tisa i no inap bekim. Taim mipela kamap long haus, mipela i stori long mama long dispela samting, na dispela i kirapim mipela long toktok longpela taim tru long ol samting mipela bin askim tisa long en. Bihain, mi lusim lotu na mi kirap na go wantaim mama long ol miting bilong ol Sumatin Bilong Baibel, na i no longtaim na Clarence tu i mekim olsem.
Pasin Bilong Sem Tumas
Long Septemba 1922, mi na mama i go long kibung bilong ol Sumatin Bilong Baibel long Sida Poin, Ohaio. Mi ken tingim yet dispela traipela laplap i gat bikpela rait long en ol i bin putim taim Joseph F. Rutherford—em presiden bilong Sosaiti Was Taua long dispela taim—i kirapim ol 18,000 manmeri i stap long kibung long bihainim ol tok i stap long laplap: “Autim tok long King na Kingdom bilong em.” Ol dispela tok i kirapim tru bel bilong mi, na mi pilim olsem mi mas hariap na tokim ol narapela long dispela gutnius bilong Kingdom bilong God.—Matyu 6:9, 10; 24:14.
Long ol kibung i kamap long 1922 i go inap long 1928, ol Sumatin Bilong Baibel i wanbel long kamapim sampela bikpela tokaut long ol man, na ol i prinim ol dispela tokaut long ol liklik nius na bihain ol i tilim planti milion long ol manmeri long olgeta hap bilong graun. Mi wanpela longpela bun meri na mi save go hariap hariap long ol narapela narapela haus bilong tilim ol dispela nius. Mi laikim tru dispela kain wok. Tasol pasin bilong go long ol haus na kamapim sampela toktok bilong mi yet na tokim ol man long Kingdom bilong God, dispela i narapela kain samting olgeta.
Mi save sem tumas, na dispela pasin bilong sem i mekim na olgeta yia taim Mama i singautim bikpela lain famili bilong mipela i kam long haus, mi save tingting planti stret. Taim ol i kam mi save go long rum slip bilong mi na stap. Wanpela taim Mama i laik kisim piksa bilong famili olgeta, na em i tokim mi long kam bung wantaim ol. Mi no gat laik liklik long mekim olsem, olsem na mi singaut bikpela taim Mama i kam pulim mi i go bung wantaim ol.
Tasol taim i kamap na mi tingting strong olsem mi mas kirap na autim tok, olsem na mi kisim sampela nius bilong Baibel na pulimapim long paus. Mi wok long tokim skin bilong mi olsem: “Mi no inap mekim,” tasol taim mi mekim dispela tok pinis, wantu mi save tok: “Mi mas mekim.” Bihain mi kirap na mi go autim tok. Bihain mi amamas tru olsem mi bin strongim bel na go autim tok. Tru, mi no amamas tumas long go long ol haus, tasol mi kisim bikpela amamas long save olsem mi insait pinis long dispela wok. Taim mi nupela long dispela wok mi bin bungim dispela pasto mi bin stori long en long kirap bilong stori, na mi krai taim mi lusim haus bilong em. Jehova i helpim mi na isi isi mi inap long toktok wantaim ol manmeri long haus, na amamas bilong mi i go bikpela moa. Bihain, long 1925, mi kisim baptais long wara bilong makim olsem mi dediket pinis long Jehova.
Bilong Kirap na Mekim Wok Painia
Taim mi gat 18 krismas mi mekim wok long mani bilong wanpela anti i bin dai na mi baim wanpela ka na kirap mekim wok painia, olsem autim tok long olgeta de. Tupela yia bihain, long 1930, mi na poroman painia i tok orait long wok painia long wanpela hap Sosaiti i bin makim. Long dispela taim Clarence i kirap pinis long mekim wok painia. I no longtaim na ol i singautim em long go long Betel, em hetkota bilong ol Witnes Bilong Jehova i stap long Bruklin, Nu Yok.
Long dispela taim, marit bilong papamama i bruk, olsem na mitupela Mama i tokim sampela lain long wokim wanpela haus ka bilong mipela na mipela i kirap na wok painia wantaim. Long dispela taim bikpela hevi bilong mani i kamap long Yunaitet Stets. Dispela i mekim na mipela i hatwok long mekim yet wok painia, tasol mipela tingting strong long holimpas dispela wok. Mipela lusim ol nius bilong Baibel long ol man na ol i givim ol samting long mipela olsem kakaruk, kiau, kaikai bilong gaden, na ol olpela bateri na tin ol i no gat wok moa long en. Mipela salim ol olpela bateri na tin bilong kisim mani bilong baim bensin na ol narapela samting. Na tu, mi lain long lukautim ka, olsem senisim wel bilong en, na bai mi no gat wok long baim wanpela man long mekim. Mipela luksave olsem Jehova i truim tok promis bilong em na opim rot bilong mipela long winim ol hevi.—Matyu 6:33.
Mi Go Long Mekim Wok Misineri
Long 1946, ol i singautim mi long insait long namba 7 klas bilong Wastaua Baibel Skul Bilong Gileat, em bai kamap long Saut Lansing, Nu Yok. Long dispela taim mi na Mama i bin painia wantaim inap 15 yia pinis, tasol Mama i no laik pasim rot bilong mi long kisim skul bilong kamap misineri. Olsem na em i strongim mi long kisim dispela wok na go long Skul Gileat. Taim mi pinisim dispela skul, Martha Hess bilong Pioria, Ilinoi, i kamap poroman bilong mi long wok misineri. Ol i makim mipela wantaim tupela narapela long go long Klivlan, Ohaio, inap wanpela yia na wetim ol i makim wanpela hap bilong mekim wok long en long narapela kantri.
Em nau, long 1947 ol i makim mi na Martha long go long Hawaii. Gavman bilong Hawaii i save orait long ol man bilong narapela kantri i kam i stap, olsem na Mama i kam na kisim wanpela haus klostu long mipela long Honolulu. Strong bilong Mama i wok long pinis, olsem na mi mekim wok misineri wantaim wok bilong helpim em. Mi inap lukautim em i go inap long taim em i dai long Hawaii long 1956, taim em i gat 77 krismas. Taim mipela i bin kamap long Hawaii i gat 130 Witnes i stap, tasol i kam inap long taim Mama i dai namba bilong ol Witnes i winim wan tausen, olsem na Hawaii i no gat wok moa long ol misineri.
Orait nau mitupela Martha i kisim wanpela pas long Sosaiti Was Taua i singautim mipela long go long Japan. Long dispela taim mi gat 48 krismas na Martha i gat 44 krismas, olsem na namba wan samting mitupela tingting planti long en i olsem, bai mipela inap lain long tok ples Japan o nogat. Tasol mipela i larim dispela samting i stap long han bilong Jehova na mipela i tok orait long go long dispela hap.
Taim kibung intenesenel bilong 1958 long Yanki Stediam na Polo Grauns long Nu Yok i pinis, mipela kalap long wanpela sip na go long Tokyo. Wanpela bikpela win i wok long sakim sip taim mipela kamap long bris bilong Yokohama. Taim mipela lusim sip, Don na Mabel Haslett na Lloyd na Melba Barry wantaim sampela narapela misineri i wet i stap bilong bungim mipela. Long dispela taim i gat 1,124 Witnes i stap long Japan.
Wantu mipela kirap na lain long tok ples Japan na autim tok long ol haus. Mipela mekim wok long ol leta bilong ABC long tok Inglis na raitim ol tok mipela bai ritim long ol man long haus long tok ples Japan. Taim mipela ritim dispela tok pinis, man bilong haus bai tok olsem, “Yoroshii desu,” o “Kekko desu,” insait bilong dispela tok i olsem, “I orait,” o “Em gutpela.” Tasol mipela i no klia gut olsem man i laik kisim save moa long tok bilong mipela o nogat, long wanem, em bai mekim wankain tok sapos em i no laik harim tok. Nek bilong man o lukluk long pes bilong em i save kamapim tingting bilong em. Isi isi mipela lain long pasin bilong man long kamapim tingting bilong em.
Ol Samting i Mekim Gut Bel Bilong Mi
Taim mi gat hevi yet long kamapim gut ol tok long tok ples Japan, mi autim tok long ol flet bilong kampani Mitsubisi na mi bungim wanpela meri i gat 20 krismas. Em i mekim gutpela wok long kisim save long Baibel na long 1966 em i kisim baptais. Wanpela yia bihain em i kirap mekim wok painia na i no longtaim na ol i makim em long kamap painia salim. Em i mekim yet dispela wok. Kirap long taim em i yangpela yet, pasin bilong dispela meri long mekim wok long strong na taim bilong em long mekim wok painia i save strongim mi.
Ol manmeri i stap long wanpela kantri ol man i no save bihainim lotu Kristen ol i gat hatwok moa yet long givim bel long tok i tru bilong Baibel. Tasol planti tausen manmeri ol i winim dispela hevi, olsem sampela mi bin stadi wantaim ol. Ol i bin rausim ol samting i gat bikpela pe long en olsem ol alta bilong Buda na alta bilong ol Sinto, em ol samting i stap long planti haus long Japan. Ol i mas i gat strongpela bel long mekim olsem, long wanem, ol wantok inap kisim tingting kranki olsem ol i daunim ol tumbuna i dai pinis taim ol i rausim ol dispela samting. Pasin bilong ol long rausim ol dispela samting i wankain olsem bilong ol Kristen bilong bipo, ol tu i bin tromoi ol samting bilong lotu giaman ol i holim.—Aposel 19:18-20.
Mi tingim wanpela meri marit i stadi long Baibel, em i tingting long lusim Tokyo wantaim famili bilong em na go sindaun long narapela hap. Em i laik kisim wanpela nupela haus i no gat ol samting bilong ol lotu haiden i stap long en. Olsem na em i tokim man bilong em long dispela samting na man i amamas long bihainim tingting bilong em. Taim meri i kamapim dispela stori long mi, em i tingim wanpela naispela samting olsem bikpela botol ston bilong bilasim haus em i bin baim bipo na em i pulimapim pinis long wanpela bokis, long wanem, ol i tok olsem dispela gutpela botol ston bai kamapim amamas long haus. Em i gat tingting olsem dispela samting i bilong lotu giaman, olsem na em i kisim wanpela hama na em i brukbrukim dispela botol ston na tromoi.
Mi lukim pasin bilong dispela meri wantaim sampela narapela long tromoi ol samting bilong lotu giaman i gat bikpela pe long en na ol i strongim bel na kirap mekim ol nupela samting bilong lotuim Jehova, na dispela i givim bikpela amamas long mi. Mi save tok tenkyu long Jehova long ol dispela 40 yia samting mi inap mekim wok misineri long Japan.
Samting i Olsem “Mirakel”
Taim mi tingting long wok painia mi bin mekim insait long 70 yia, mi save pilim tru sampela samting i bin kamap long nau na i olsem mirakel. Mi tingim taim mi yangpela yet na mi meri bilong sem, na mi no bin tingting liklik olsem bihain mi bai mekim wok bilong toktok wantaim ol man long wanpela Kingdom em planti ol i no laik save long en. Na tu, i no mi tasol i winim dispela hevi long pasin bilong sem na mekim dispela wok—mi lukim sampela handet, o ating sampela tausen manmeri i mekim wankain samting. Na ol i mekim gutpela wok i karim planti kaikai, olsem: I gat klostu wan tausen Witnes i stap long Japan taim mi bin kam long 1958, na long nau namba bilong ol Witnes i go bikpela inap long 222,000!
Taim mitupela Martha i kam nupela long Japan, ol i makim mipela long stap long brens-ofis long Tokyo. Long 1963 ol i wokim wanpela nupela brens-ofis long dispela hap, i gat 6-pela plua long en, na i kam inap long nau mipela stap long dispela haus. Long Novemba bilong 1963, mipela 163 brata sista i bin stap na harim tok em wasman bilong brens, Lloyd Barry, i mekim long dediketim dispela nupela haus brens. Long dispela taim namba bilong ol Witnes long Japan i olsem 3,000.
Mi kisim bikpela amamas long lukim wok bilong autim tok bilong Kingdom i go bikpela hariap—long 1972 namba bilong ol pablisa i olsem 14,000, long dispela taim ol i wokim pinis nupela brens i bikpela moa long Numasu. Tasol long 1982 namba bilong ol man i autim tok bilong Kingdom long Japan i winim 68,000, olsem na ol i wokim wanpela haus brens i bikpela moa yet long Ebina, em i stap longwe long Tokyo inap 80 kilomita.
Ol i stretim gen dispela olpela brens-ofis i stap long taun stret bilong Tokyo. Bihain em i kamap olsem haus misineri bilong ol 20 samting misineri ol i bin mekim wok long Japan inap long 40 o 50 yia samting—mi na poroman bilong mi bilong bipo yet, em Martha Hess, i insait long dispela lain. Wanpela dokta na meri bilong em, em wanpela nes, ol tu i sindaun long dispela haus. Ol i save lukautim mipela, na long pasin sori ol i save helpim mipela taim mipela i gat sik samting. I no longtaim i go pinis na ol i bin makim narapela nes long wok wantaim tupela marit, na sampela sista Kristen i save kam long san bilong helpim ol nes. Olgeta taim i gat tupela narapela narapela i save kam long Betel long Ebina bilong kukim ol kaikai bilong mipela na klinim haus. Tru tumas, Jehova i bin mekim gut long mipela.—Song 34:8, 10.
Wanpela bikpela samting bilong wok misineri bilong mi i bin kamap long Novemba 1999, olsem 36 yia bihain long ol i bin dediketim dispela olpela brens mipela ol misineri bilong longtaim i save stap long en. Long Novemba 13, 1999, mi na planti narapela Witnes bilong longtaim em ol i kam long 37 ol narapela kantri, mipela stap wantaim 4,486 brata sista long bung bilong dediketim nupela hap bilong brens bilong Sosaiti Was Taua long Japan long Ebina em ol i bin wokim i go bikpela moa. Long nau, i gat olsem 650 i stap long dispela brens.
Inap long 80 yia Jehova i wok long strongim mi, kirap long dispela taim mi gat hevi long pasin bilong sem na mi kirap na go long ol haus bilong kamapim ol tok bilong Baibel, na i kam inap long nau. Em i helpim mi long daunim dispela pasin bilong mi long sem. Mi bilip tru olsem Jehova inap mekim wok long wanem wanem man i bilip long em, maski ol i gat pasin bilong sem olsem mi. Mi bin kisim bikpela amamas long i stap bilong mi long go long ol man mi no save long ol na toktok wantaim ol long God bilong yumi, Jehova!
[Piksa long pes 21]
Mi wantaim Mama na Clarence, taim em i stap long Betel na kam lukim mipela
[Piksa long pes 23]
Ol wanklas long Skul Gileat, klostu long Saut Lansing, Nu Yok, ol i sindaun ausait na stadi
[Piksa long pes 23]
Han kais: Mi wantaim Martha Hess na mama long Hawaii
[Piksa long pes 24]
Han sut: Ol lain long haus misineri bilong mipela long Tokyo
[Piksa long pes 24]
Daunbilo: Mi wantaim poroman bilong mi bilong bipo yet, em Martha Hess
[Piksa long pes 25]
Ol i dediketim nupela hap bilong brens-ofis long Ebina long Novemba i go pinis