Laip Stori
Jehova i Save Bringim Ol Man i Gat Pasin Daun Long Tok i Tru
STORI BILONG ASANO KOSHINO
Long 1949, fopela yia tasol bihain long taim Namba Tu Pait i pinis, wanpela longpela man i gat pasin pren, em i bilong narapela kantri, em i kam lukim famili em mi wok long haus bilong ol long Kobe Siti. Em i namba wan misineri bilong ol Witnes Bilong Jehova long kam long Japan. Raun bilong em i opim rot long mi ken save long tok i tru bilong Baibel. Tasol pastaim, mi laik tokim yupela long famili na i stap bilong mi.
MAMA i karim mi long 1926 long wanpela liklik ples long noten Okayama Provins. Mi namba faiv bilong etpela pikinini. Papa i save givim bel tru long god bilong lotu Sinto bilong ples. Olsem na mipela ol pikinini i save go long ol bung bilong ol bikpela de bilong lotu i save kamap long olgeta yia na famili i bung wantaim.
Taim mi wok long go bikpela, mi gat planti askim long as bilong i stap laip, tasol samting mi tingting planti long en, em indai. Long pasin bilong tumbuna, taim wanpela long famili i dai, em i mas i dai long haus tasol na ol pikinini i mas i stap klostu long bet bilong dispela man i laik i dai. Mi bel hevi tru taim bubu meri bilong mi i dai, na brata bilong mi i dai taim em i no kisim yet wanpela krismas. Bel bilong mi i bagarap stret taim mi tingting olsem bihain papamama bilong mi bai dai. Mi gat laik tru long save: ‘Yumi stap laip na bihain yumi dai na em tasol? I gat sampela samting moa inap mekim na bai laip bilong yumi i gat as tru bilong en o nogat?’
Long 1937, taim mi mekim gret siks long komiuniti skul, Saino-Japan Pait i kirap. Ol i kisim ol man na salim ol i go long ples bilong pait long Saina. Ol skul pikinini i tok gutbai long papa o brata bilong ol na i singaut “banzai!” (stap longpela taim) long empera. Ol manmeri i ting Japan bai win, em kantri wanpela god i bosim na i gat empera, wanpela god i gat laip.
I no longtaim, ol famili i kisim ol toksave i tokaut long ol man i dai long pait. Ol dispela famili i krai sori na i no gat samting bilong mekim gut bel bilong ol. Bel nogut i wok long kamap strong long bel bilong ol, na ol i amamas tru taim planti birua i kisim bagarap. Tasol long wankain taim, mi tingting olsem, ‘Ol birua bilong mipela i kisim wankain hevi olsem mipela i kisim taim wanpela ol i laikim i dai.’ Long taim mi gretiuet long komiuniti skul, pait i wok long go bikpela na i go moa insait long Saina.
Bungim Man Bilong Narapela Ples
Mipela i mekim wok fama, olsem na oltaim famili bilong mipela i stap rabis, tasol papa bilong mi i larim mi long skul sapos i no gat wok long em i mas tromoi mani. Olsem na long 1941, mi go long skul bilong ol meri long Okayama Siti, em i longwe inap olsem 100 kilomita. Dispela skul em i bilong skulim ol yangpela meri long kamap gutpela meri marit na gutpela mama, na skul i makim ol sumatin long i stap long siti wantaim ol famili i gat planti mani na lain long mekim wok bilong lukautim haus. Long moningtaim ol sumatin i lain long wok taim ol i mekim wok long ol dispela haus, na long apinun ol i go long skul.
Bihain long het-tisa i tok welkam long mipela, tisa bilong mi, em i pasim kimono, i kisim mi i go long wanpela bikpela haus. Tasol meri bilong haus i no orait long mi—mi no save long as na em i mekim olsem. Na tisa i tok: “Bai yumi go long haus bilong Misis Koda.” Orait em i kisim mi i go long wanpela haus ol i wokim long stail bilong ol lain long hap wes na em i paitim belo bilong dua. Liklik taim bihain, wanpela longpela meri i gat waitpela gras i kam ausait. Mi kirap nogut tru! Em i no bilong Japan, na mi no bin lukim wanpela man long hap bilong Wes long laip bilong mi. Tisa i tokim Misis Maud Koda long mi na kwiktaim em i lusim mi na go. Mi pret liklik, na mi pulim ol bek bilong mi na i go insait long haus. Bihain mi kisim save olsem Misis Maud Koda em i bilong Amerika na em i marit long wanpela man Japan husat i bin i go skul long Amerika. Misis Koda i save skulim ol sumatin long tok Inglis long ol skul bilong lainim wok bisnis.
Mi gat planti wok bilong mekim kirap long tumora moning. Man bilong Misis Koda i gat sik epilepsi, na mi mas helpim long lukautim em. Mi no save liklik long tok Inglis, olsem na mi tingting planti. Bel bilong mi i stap isi taim Misis Koda i toktok long mi long tok ples Japan. Long olgeta de, mi bin harim tupela i toktok long tok Inglis, na isi isi dispela tok ples i kamap olsem tok ples mi save long en. Long haus i gat pasin amamas na mi laikim.
Mi bin laikim pasin bilong Maud long givim bel long lukautim man bilong em i sik. Man bilong em i save laik long ritim Baibel. Bihain mi bin kisim save olsem tupela marit i bin kisim buk The Divine Plan of the Ages long tok ples Japan long wanpela sekenhen bukstua na ol i bin wok long kisim sabskripsen bilong Wastaua long tok Inglis inap sampela yia.
Wanpela de ol i givim mi wanpela Baibel olsem presen. Mi bin amamas, long wanem, dispela em namba wan taim mi gat Baibel bilong mi yet. Mi ritim long taim mi go i kam long skul tasol mi kisim liklik save tasol long en. Mi bin kamap bikpela long lotu Sinto bilong Japan, olsem na mi no gat save long Jisas Krais. Mi no save olsem dispela em i kirap bilong ol samting bai kamap na i stiaim mi long laikim tok i tru bilong Baibel, na em bai bekim ol askim bilong mi long as bilong i stap laip na indai.
Tripela Samting i Mekim Mi i Bel Hevi
Tupela yia bilong lain long wok i pinis, na mi mas tok gutbai long famili. Taim mi pinisim skul, mi joinim wanpela lain meri i volantia long helpim wok bilong ami na mi insait long wok bilong wokim ol unifom bilong nevi. Ol balus B-29 bilong Amerika i kirap tromoi bom, na long Ogas 6, 1945, ol i tromoi wanpela bom atom long Hiroshima. Sampela de bihain, mi kisim wanpela telegram, na mi kisim save olsem Mama i sik nogut tru. Mi kalap long tren bilong go long haus. Taim mi kam daun long tren, wanpela wanblut i bungim mi na i tokim mi olsem Mama i dai pinis. Em i bin dai long Ogas 11. Samting mi bin pret long en inap planti yia i kamap tru! Em bai i no moa toktok long mi o smail long mi.
Long Ogas 15, Japan i lus long pait. Olsem na insait long 10-pela de tasol, 3-pela hevi i bin painim mi: namba wan bom atom i pairap, Mama i dai, na Japan i lus long pait. Tasol em i gutpela liklik long save olsem ol manmeri bai no ken i dai moa long dispela pait. Mi bel hevi na mi lusim wok na mi go bek long ples.
Kisim Tok i Tru
Wanpela de, mi kirap nogut long kisim wanpela pas i kam long Maud Koda long Okayama. Em i askim mi long go helpim em long mekim ol wok bilong haus, long wanem, em i mas opim wanpela skul long tok Inglis. Mi tingting olsem bai mi go o nogat, tasol bihain mi go. Sampela yia bihain, mi go bek long Kobe na stap wantaim famili Koda.
Long taim bilong san long 1949, wanpela longpela man i gat pasin pren i kam lukim famili Koda. Nem bilong em Donald Haslett, na em i bin lusim Tokyo na i kam long Kobe bilong painim wanpela haus bilong ol misineri long Kobe. Em i namba wan misineri bilong ol Witnes Bilong Jehova long kam long Japan. Em i painim wanpela haus, na long Novemba 1949, sampela misineri i kam long Kobe. Wanpela de, faipela misineri i kam lukim famili Koda. Tupela bilong ol, Lloyd Barry na Percy Iszlaub, i toktok long ol lain i stap long haus long tok Inglis inap 10-pela 10-pela minit. Ol misineri i save olsem Maud em i wanpela sista Kristen na taim ol i bung wantaim dispela i bin strongim em. Stat long dispela taim bel bilong mi i kirap long lainim tok Inglis.
Ol misineri i helpim mi na isi isi mi inap save gut long ol bikpela tok i tru bilong Baibel. Mi kisim ol bekim long ol askim mi bin i gat taim mi pikinini. Tru tumas, Baibel i tok promis olsem ol man inap i stap oltaim long Paradais long graun na “olgeta manmeri i stap long matmat” bai kirap bek. (Jon 5:28, 29; KTH 21:1, 4) Mi amamas long Jehova i opim rot na long ofa bilong Pikinini bilong em, Krais Jisas, dispela samting bai kamap.
Ol Gutpela Wok Tiokratik
Long Disemba 30, 1949 i go Janueri 1, 1950, namba wan kibung tiokratik i kamap long Japan, na ol i mekim long haus misineri long Kobe. Mi bin go wantaim Maud. Dispela bikpela haus misineri pastaim em i bilong wanpela Natsi, na long dispela haus mipela inap lukim solwara na naispela ailan Awaji. Mi no gat planti save long Baibel, olsem na mi kisim liklik save tasol long ol tok ol i mekim. Tasol mi pilim tru pasin bilong ol misineri long toktok gut wantaim ol manmeri bilong Japan. Inap 101 manmeri i bung bilong harim pablik-tok long dispela kibung.
Bihain long en, mi tingting long insait long wok bilong autim tok. Mi mas strongim bel bilong i go long haus bilong ol man na autim tok, long wanem, mi wanpela meri bilong sem kirap long taim mi liklik pikinini. Wanpela moning, Brata Lloyd Barry i kam long haus bilong mipela long kisim mi i go autim tok. Em i stat autim tok long haus klostu long haus bilong Sista Koda. Mi wok long hait baksait long em na harim ol tok em i autim. Taim mi go autim tok namba tu taim, mi wok wantaim tupela narapela misineri. Wanpela lapun meri bilong Japan i tokim mipela long i go insait long haus bilong em, na em i putim yau long tok mipela i autim na bihain em i givim mipela wan wan glas susu bilong dring. Em i orait long stadi long Baibel na bihain em i kamap wanpela Kristen i baptais pinis. Taim mi lukim em i wok long kamap strong, dispela i strongim mi.
Long Epril 1951, Brata Nathan H. Knorr, long hetkota long Brooklyn, i kam lukim Japan namba wan taim. Inap olsem 700 manmeri i kam harim pablik-tok em i mekim long wanpela bikpela haus bung (Kyoritsu Auditorium) long Kanda, Tokyo. Long dispela spesel miting, olgeta i kam bung i amamas long kisim Wastaua long tok ples Japan. Long mun antap, Brata Knorr i go long Kobe na long wanpela spesel miting long dispela hap, mi kisim baptais bilong makim mi dediket pinis long Jehova.
Inap olsem wanpela yia bihain, ol i kirapim mi long mekim wok autim tok fultaim, olsem wok painia. Long dispela taim, i no gat planti painia long Japan, na mi tingting long olsem wanem mi inap lukautim mi yet. Na mi tingim tu ol samting bilong mi long marit. Tasol bihain mi luksave olsem wok bilong Jehova i mas i stap namba wan long laip bilong mi, olsem na mi mekim wok painia long 1952. Gutpela tru, mi inap wok mani haptaim aninit long Sista Koda taim mi mekim painia.
Long dispela taim, brata bilong mi, em mi bin ting em i dai long pait, i kam bek long ples wantaim famili bilong em long Taiwan. Famili bilong mi i no amamas long lotu Kristen, tasol dispela laik bilong mekim wok painia i mekim na mi kirap salim ol magasin na buklet i go long ol. Bihain, wok bilong brata bilong mi i mekim na em wantaim famili bilong em i go long Kobe. Na mi askim tambu bilong mi olsem: “Yu bin ritim ol magasin?” Mi kirap nogut taim em i tok, “Ol i gutpela magasin.” Em i kirap stadi long Baibel wantaim wanpela misineri, na liklik susa bilong mi i save stap wantaim ol, i stap wantaim em taim em i stadi. Bihain tupela i kamap Kristen i baptais pinis.
Pilim Tru Pasin Bilong i Stap Brata Brata
I no longtaim, mi kirap nogut long kisim wanpela pas i singautim mi long go long namba 22 klas bilong Wastaua Baibel Skul Bilong Gileat. Mi na Brata Tsutomu Fukase i namba wan lain bilong Japan long i go long dispela skul. Long 1953 paslain long skul i kirap, mipela i go long New World Society Kibung long Yankee Stediam long New York. Mi pilim tru pasin bilong lain bilong Jehova long olgeta hap long i stap brata brata.
Long namba faiv de bilong kibung, ol lain i stap long Japan na i kam long dispela kibung, planti bilong ol em ol misineri, ol bai pasim kimono. Mi bin salim kimono bilong mi long sip tasol sip i no kamap long taim stret, olsem na mi pasim wanpela kimono i bilong Sista Knorr. Long taim bilong kibung, ren i stat long pundaun, na mi tingting planti long ren bai wasim kimono. Long dispela taim stret, wanpela i sindaun long baksait i isi tasol karamapim mi long wanpela ren-kot. Wanpela sista i sanap klostu long mi i askim mi: “Yu save em i husat?” Bihain mi bin kisim save olsem em Brata Frederick W. Franz, wanpela memba bilong Gavening Bodi. Man! Mi pilim tru gutpela pasin bilong oganaisesen bilong Jehova!
I gat 120 sumatin bilong namba 22 klas bilong Skul Gileat, na ol i kam long 37 kantri. Maski i hatwok long toktok gut wantaim, long wanem, tok ples i narapela, mipela i laikim pasin bilong i stap brata brata. Long taim bilong sno long Februeri 1954, mi gretiuet, na kisim asainmen bilong go long Japan. Wanklas bilong mi, Inger Brandt, em i wanpela sista bilong Swiden, em i stap poroman bilong mi long Nogoya Siti. Long dispela hap, mipela i bung wantaim ol misineri i bin lusim Korea, long wanem, i gat pait. Mi bin mekim wok misineri inap sampela yia, na ol dispela yia i gutpela samting tru long mi.
Amamas Long Mekim Wok Wantaim Olsem Marit
Long Septemba 1957, ol i singautim mi long wok long Betel long Tokyo. Brens-ofis bilong Japan em wanpela haus ol i bin wokim long diwai na i gat tupela plua long en. I gat 4-pela brata sista i wok long brens na wanpela bilong ol em Brata Barry, em i stap olsem wasman bilong brens. Ol narapela em ol i misineri. Ol i makim mi long tanim tok, na painim popaia bilong ol tok mipela i tanim, na tu, wok bilong klinim haus, wasim klos, kukim kaikai, na planti moa.
Wok long Japan i wok long go bikpela, na ol i singautim sampela moa brata i kam long Betel. Wanpela bilong ol em i kamap wasman bilong kongrigesen mi save go long en. Long 1966, mi na dispela brata, Junji Koshino, i marit. Taim mitupela i marit pinis, ol i makim Junji long mekim wok sekit. Mi amamas long mi inap kisim save long planti brata na sista taim mipela i raun long ol narapela narapela kongrigesen. Ol i makim mi long mekim sampela wok bilong tanim tok, na mi mekim dispela long haus mipela i stap long en inap wanpela wik. Antap long ol samting mipela i karim olsem sutkes na ol narapela bek, mipela i mas karim ol hevipela dikseneri.
Mipela i amamas long mekim wok sekit inap 4-pela yia, na lukim oganaisesen i wok yet long i go bikpela. Ol i putim brens-ofis long Numazu, na 10-pela yia bihain, long Ebina, we brens-ofis i stap nau. Mi na Junji i bin amamas long wok long Betel, na nau mitupela i wok wantaim 600 brata sista bilong famili Betel. Long Me 2002, ol pren long Betel i mekim bung bilong amamas bilong makim namba 50 yia bilong mi long i stap long fultaim sevis.
Amamas Long Lukim Namba i Go Bikpela
Taim mi bin stat mekim wok bilong Jehova long 1950, i gat liklik lain pablisa long Japan. Long nau i gat winim 210,000 pablisa bilong autim tok bilong Kingdom. Tru tumas, planti tausen man i kain olsem sipsip, ol i kam long Jehova, olsem mi bin mekim.
Fopela brata na sista misineri em ol i bin kam lukim mipela long haus bilong Sista Koda long 1949, na Sista Maud Koda, olgeta i bin stap gut long Jehova inap ol i dai. Na i wankain tu long brata bilong mi, em i bin kamap wanpela kongrigesen sevent, na tambu bilong mi, em i bin amamas long mekim wok painia inap olsem 15 yia. Wanem samting bai painim papamama bilong mi long bihain, em mi bin pret long indai bilong ol taim mi liklik? Ol tok promis bilong Baibel long kirap bek i helpim mi long wet long dispela taim na i strongim bel bilong mi.—Aposel 24:15.
Taim mi tingim bek, mi ting olsem, taim mi bin bungim Maud long 1941, dispela i bin kamapim senis long laip bilong mi. Sapos mi no bin bungim em na mi no bin orait long wok gen wantaim em bihain long pait, ating bai mi stap long fam bilong mipela long ples na mi no inap bungim ol misineri bilong dispela taim. Mi amamas tru long Jehova i bringim mi i kam long tok i tru long rot bilong Maud na ol misineri bilong bipo!
[Piksa long pes 25]
Wantaim Maud Koda na man bilong em. Mi sanap long han kais long fran
[Piksa long pes 27]
Wantaim ol misineri bilong Japan long Yankee Stediam long 1953. Mi sanap arere tru long han kais
[Ol Piksa long pes 28]
Long Betel wantaim man bilong mi, Junji