Lusim Pasin Bilong Lotuim King na Painim Lotu i Tru

Em stori bilong Isamu Sugiura

Maski long 1945 i olsem mipela bai lus long Namba Tu Pait, mipela i bilip olsem kamikasi (“win bilong God”) bai kamap na winim ol birua. Kamikasi em wanpela bikpela win i bin kamap long 1274 na 1281, na long tupela taim em i bin bagarapim bikpela lain ami bilong ol Mongol i stap long ol sip klostu long nambis bilong Japan na nau ol i lusim dispela hap.

OLSEM na long Ogas 15, 1945, taim King Hirohito i toksave long kantri olsem Japan i givim ol yet long han bilong ol ami bilong Amerika, dispela i mekim na wan handet milion man i bin givim bel olgeta long em, nau ol i no gat wanpela samting ol inap bilip na wet long en. Long dispela taim mi skulmanki yet, na mi tu mi pilim olsem. Mi tingting: ‘Sapos king em i no God i gat laip, orait husat em God i gat laip? Mi mas bilip long husat?’

Tasol taim Japan i lus long Namba Tu Pait, dispela i bin opim rot long mi na planti tausen narapela man Japan long kisim save long God tru, em Jehova. Mi laik stori long ol senis mi mekim, tasol pastaim mi ken tokim yu long mi go bikpela long wanem lotu.

Tingting Bilong Mi Long Lotu Long Bipo

Mama i karim mi long taun Nagoya long Jun 16, 1932, na i gat 4-pela pikinini man long famili bilong mi na mi laspela pikinini. Papa i save wok long dispela taun olsem man bilong makim graun. Mama em i wanpela strongpela bilipmeri long lotu Tenrikyo, em hap lain bilong lotu Sinto, na namba wan brata bilong mi i bin kisim skul long kamap tisa bilong lotu Tenrikyo. Mitupela mama i save pas gut wantaim, na em i save kisim mi i go long ples bilong lotu.

Ol i lainim mi long daunim het bilong mi na beten. Dispela lotu Tenrikyo i lainim mipela long wanpela man bilong wokim olgeta samting, em Tenri O no Mikoto, na 10-pela liklik god. Ol lain i insait long dispela lotu i save mekim pasin bilong oraitim sik bilong man long rot bilong bilip, na ol i tok mipela i mas helpim ol narapela na autim bilip bilong mipela.

Mi manki yet na mi laik save long ol samting. Mi kirap nogut long mun na ol planti planti sta long skai, na mi save tingting long ples antap i bikpela olsem wanem. Mi amamas tru long lukim ol ekplan na kukamba mi bin planim long liklik hap graun long baksait bilong haus i wok long kamap. Taim mi lukim ol samting God i bin wokim, dispela i strongim bilip bilong mi long God.

Ol Yia Bilong Pait

Taim mi stap long komyuniti-skul long 1939 i go 1945, long dispela taim em taim bilong Namba Tu Pait. Wanpela bikpela pasin bilong lotu Sinto em pasin bilong lotuim king, na ol i strong long mipela i mas lain long dispela pasin long skul. Ol i lainim mipela long shushin, dispela i bilong lain long bihainim gutpela pasin, na mipela i mas litimapim kantri na laikim mani kago. Mipela i save mekim bung bilong apim plak, mekim singsing bilong kantri, stadi long ol lo bilong king, na adorim piksa bilong king.

Mipela i save go long alta bilong Sinto na askim God long helpim ol ami bilong king long win. Tupela brata bilong mi i stap long ami. Mi save amamas long harim olsem ol ami bilong Japan i winim sampela pait, long wanem, mi bin lain long dispela pasin bilong litimapim kantri na lain long ol samting bilong lotu.

Nagoya em ples ol i save wokim ol balus bilong Japan long en, olsem na Amerika i makim dispela ples na i salim planti balus bilong ol i kam tromoi bom long en. Long san, ol B-29 Superfortress, em ol balus bilong tromoi bom, ol i ran olsem 9,000 mita antap long taun na tromoi planti handet ton bom long dispela ples bilong wokim ol balus. Long nait ol i sutim strongpela lait i go antap na lukim ol dispela balus i ran daunbilo tru inap olsem 1,300 mita antap. Planti taim ol i tromoi ol bom i save kirapim paia, na dispela i kukim haus ol man i slip long en. Long laspela 9-pela mun bilong pait, inap 54 taim ol i bin kam na tromoi planti bom, na planti man i kisim hap bagarap na winim 7,700 i dai.

Na long dispela taim, ol sip bilong pait i kirap tromoi ol bom long 10-pela taun i stap long nambis, na ol man i wok long toktok long ol sip bilong ami bilong Amerika bai sua klostu long Tokyo. Ol i lainim ol meri na ol manki long mekim wok long spia ol i wokim long mambu na mekim pait bilong lukautim kantri. Wanpela tok mipela i save kolim em “Ichioku Sougyokusai,” insait bilong en i olsem, “Wan handet milion i ken dai na maski long putim yumi yet long han bilong ol birua.”

Long Ogas 7, 1945, i gat wanpela het-tok long niuspepa olsem: “Ol i Tromoi Wanpela Nupela Kain Bom Long Hirosima.” Tupela de bihain, ol i tromoi narapela long Nagasaki. Ol dispela bom em bom atom, na ol i tokim mipela olsem dispela tupela bom i kilim 300,000 manmeri i dai. Na long Ogas 15, long pinis bilong trening bilong mipela long karim ol gan plang na mats, mipela i harim king i mekim wanpela bikpela toksave olsem Japan i putim ol yet pinis long han bilong Amerika. Mipela i bilip tru olsem mipela bai win, tasol nau dispela i bagarapim tru bel bilong mipela!

Nupela Bilip

Ol ami bilong Amerika i kirap bosim Japan, na mi save olsem ol Amerika i winim pait. Ol i kamapim gavman demokratik long Japan, na ol i kamapim tu nupela mama lo i orait long ol man i ken mekim lotu long laik bilong ol yet. I stap bilong ol man i nogut tru, na kaikai i sot, na long 1946 papa bilong mi i dai, long wanem, em i sot long kaikai.

Na ol i kirap skulim mipela long tok Inglis long skul mi go long en, na NHK redio-stesin i kirapim wanpela program bilong toktok long tok Inglis. Inap 5-pela yia mi bin putim yau long dispela program long olgeta wan wan de na mi save bihainim long wanpela buk mi holim. Dispela i mekim na mi gat laik long i go long Amerika long wanpela taim. Mi no amamas long lotu Sinto na Budis, olsem na mi kirap ting olsem ating mi inap painim tok i tru long God long ol lotu long hap bilong Wes.

Long kirap bilong Epril 1951, mi bungim Grace Gregory, em wanpela misineri bilong Sosaiti Was Taua. Em i sanap long ples bilong kisim tren long Nagoya na em i tilim wanpela Wastaua long tok Inglis na wanpela buklet long tok Japan i stori long tok bilong Baibel. Mi pilim tru pasin daun bilong em long mekim dispela wok. Mi kisim tupela samting wantaim na mi orait long em i ken stadi wantaim mi long Baibel. Mi tok promis long kam long haus bilong em sampela de bihain na stadi.

Taim mi sindaun long sia bilong mi long tren na kirap kaunim Wastaua, namba wan tok, “Jehova,” long karamap bilong nius i pulim ai bilong mi. Mi no bin lukim dispela nem long bipo. Mi no bin ting mi inap lukim dispela nem long liklik dikseneri long tok Inglis na tok Japan mi kisim raun, tasol dispela nem i stap! “Jehova . . . , em God Baibel i stori long en.” Nau mi kirap long painim dispela God bilong ol Kristen!

Long namba wan taim bilong mi long go long haus misineri, mi harim olsem bai i gat wanpela tok bilong Baibel i kamap long sampela wik bihain na Nathan H. Knorr, em presiden bilong Sosaiti Was Taua long dispela taim, em bai mekim. Em bai i kam raun long Japan wantaim kuskus bilong em, Milton Henschel, na ol bai kam long Nagoya. Maski mi gat liklik save tasol long Baibel, mi laikim tru dispela tok, na mi amamas tu long bung wantaim ol misineri na ol narapela i kam bung.

Insait long tupela mun samting, long stadi bilong mi wantaim Grace, mi lainim ol bikpela as tok i tru long Jehova, Krais Jisas, ofa bilong em, Satan, Armagedon, na Paradais long graun. Dispela gutnius bilong Kingdom em dispela tok mi bin wok long painim. Taim mi kirap stadi, mi kirap i go tu long ol miting. Mi laikim pasin pren i stap long ol dispela bung, em ol misineri i amamas long i stap wantaim ol Japan na ol i sindaun wantaim mipela long tatami (em mat ol i bin lumim).

Ol i wokim namba wan kibung sekit long Haus Bung Nakanosima long taun Osaka long Japan long Oktoba 1951. I no gat 300 Witnes long Japan; tasol i gat 300 manmeri i kam long dispela kibung, em 50 bilong ol em ol misineri. Mi tu mi gat liklik hap tok long program. Mi pilim tru ol samting mi bin lukim na harim, na mi pasim tok long bel long mekim wok bilong Jehova long olgeta taim mi stap laip. Long de bihain mi kisim baptais long wara i hat liklik long ples waswas i stap klostu.

Amamas Bilong Mekim Wok Painia

Mi gat laik long kamap painia, em nem bilong ol Witnes Bilong Jehova i save autim tok long olgeta de, tasol mi gat wok tu mi mas mekim bilong lukautim famili bilong mi. Mi strongim bel na mi tokim bos long laik bilong mi, na mi kirap nogut long harim em i tok: “Mi bai amamas long helpim yu sapos dispela inap mekim na yu amamas.” Mi wok 2-pela de long wanpela wik na mi inap helpim mama bilong mi long baim ol samting bilong haus. Mi pilim olsem wanpela pisin ol i bin kalabusim long wanpela liklik haus na nau ol i opim dua na lusim em i go.

Taim sindaun bilong famili i wok long kamap gutpela liklik, mi kirap mekim wok painia long Ogas 1, 1954, long wanpela teritori i stap baksait long Nagoya long ples bilong kisim tren, na em i no longwe tumas long hap mi bin bungim Grace long en. Bihain long sampela mun, ol i makim mi bilong mekim wok painia salim long Bepu, em wanpela taun long hap wes long ailan Kiusu. Ol i makim Tsutomu Miura long kamap poroman bilong mi long mekim wok painia.a Long dispela taim i no gat kongrigesen bilong ol Witnes Bilong Jehova long dispela ailan, tasol long nau i gat planti handet kongrigesen, na ol i skelim i go long 22 sekit!

I Olsem Mi Stap Long Nupela Taim

Taim Brata Knorr i kam raun gen long Japan long Epril 1956, em i askim mi long kaunim long strongpela nek sampela paragraf bilong Wastaua long tok Inglis. Em i no tokim mi long as bilong dispela, tasol sampela mun bihain, mi kisim wanpela pas i singautim mi long i go long klas namba 29 bilong Skul Gileat bilong kamap misineri. Olsem na long Novemba long dispela yia yet, mi amamas tru long i go long Amerika na dispela i truim laik bilong mi long go raun long Amerika. Mi stap na wok wantaim bikpela lain famili Betel long Bruklin inap sampela mun na dispela i bin strongim tru bilip bilong mi long oganaisesen bilong Jehova.

Long Februeri 1957, Brata Knorr i kisim mipela 3-pela sumatin long ka i go long ples bilong Skul Gileat long Saut Lansing, long distrik Nu Yok. Taim mi stap long Skul Gileat long 5-pela mun na mi skul long Tok bilong Jehova na mi sindaun long hap i naispela tru wantaim ol wanskul, mi pilim olsem mi stap long Paradais em bai kamap long graun. Mipela 103 sumatin, na ol i makim mi wantaim 9-pela narapela sumatin long mekim wok long Japan.

Amamas Long Ol Ples Wok Bilong Mi

I gat olsem 860 Witnes long Japan taim mi kam bek long Oktoba 1957. Ol i makim mi bilong mekim wok bilong raun olsem wasman sekit, tasol pastaim Adrian Thompson long Nagoya i skulim mi inap sampela de long mekim dispela wok. Ol hap bilong mi long mekim wok sekit long en i kirap long Simisu, klostu long maunten Fuji, na i go olgeta long ailan Sikoku na ol bikpela taun olsem Kioto, Osaka, Kobe, na Hirosima.

Long 1961, ol i makim mi bilong kamap wasman distrik. Na mi mekim dispela wok tu long ples i gat ais long hap not long ailan Hokaido i go inap long ples i hat liklik long ailan Okinawa na i go moa long hap bilong ailan Isigaki klostu long Taiwan, em i longwe inap olsem 3,000 kilomita.

Orait, long 1963, ol i singautim mi i go kisim kos bilong Skul Gileat inap 10-pela mun long Betel long Bruklin. Long taim bilong kos, Brata Knorr i tok olsem em i bikpela samting long yumi gat stretpela tingting long ol wok yumi mekim. Em i tok, wok bilong klinim toilet em tu i bikpela samting, wankain olsem wok long ofis. Em i tok, sapos i no gat man i klinim toilet, dispela bai nogutim olgeta famili long Betel wantaim wok bilong ol. Bihain, taim mi stap long Betel long Japan, wanpela wok bilong mi em wok bilong klinim ol toilet, na mi tingim dispela tok.

Taim mi go bek long Japan, ol i makim mi gen bilong mekim wok bilong raun. Sampela yia bihain, long 1966, mi maritim Junko Iwasaki, em wanpela sista i mekim wok painia salim long taun Matsu. Lloyd Barry, em wasman bilong brens long Japan long dispela taim, em i mekim wanpela gutpela tok bilong marit. Orait nau Junko i wok wantaim mi long mekim wok bilong raun.

Long 1968 wok bilong mipela i senis taim ol i singautim mi i go mekim wok bilong tanim tok long brens-ofis long Tokyo. I no gat planti rum slip, olsem na mi slip long Sumida, Tokyo, na mi kam wok, na Junko i mekim wok painia salim wantaim kongrigesen long dispela hap. Long dispela taim, ol i mas wokim bikpela haus brens. Olsem na long 1970 ol i baim hap graun long Numasu, i no longwe long maunten Fuji. Long dispela hap ol i wokim wanpela haus faktori i gat 3-pela plua na wanpela haus slip. Taim ol i no kirap yet long wokim haus, i gat sampela haus i stap long dispela hap graun na ol i mekim wok long ol dispela haus bilong wokim Skul Bilong Wok Kingdom, em dispela skul bilong lainim ol wasman bilong kongrigesen. Mi bin skulim ol sumatin long dispela skul, na Junko i save redim kaikai bilong ol sumatin. Em i gutpela samting tru long lukim planti handet yangpela man Kristen i kisim kain skul olsem bilong mekim wok autim tok.

Wanpela taim long apinun mi kisim wanpela pas. Mama i stap long haus sik na i olsem em i no inap i stap laip. Mi kisim wanpela tren i save spit moa na mi go long Nagoya na mi hariap i go long haus sik. Em i hap i dai, tasol mi stap nait olgeta arere long bet bilong em. Mama i dai long moningtaim. Taim mi go bek long Numasu, mi krai taim mi tingim bikpela hevi em i karim taim em i stap laip, na gutpela pasin bilong em long laikim mi. Sapos em i laik bilong Jehova, bai mi lukim em gen long taim bilong kirapim bek ol man i dai pinis.

I no longtaim na famili Betel i kamap bikpela tru na ol haus long Numasu i no inap. Olsem na mipela i baim graun inap 7 hekta long Biktaun Ebina, na long 1978, ol i kirap wokim nupela haus brens. Long nau dispela graun olgeta i gat ol haus faktori na haus slip long en, na i gat wanpela Haus Kibung em 2,800 manmeri i ken sindaun long en. Long dispela yia ol i wokim gen 2-pela haus slip i gat 13 plua na wanpela haus i gat ples bilong putim ol ka long 5-pela plua na sampela ofis. Mipela i gat 530 long famili Betel, tasol nau i gat ol dispela nupela haus slip, olsem na inap 900 i ken sindaun long ol dispela haus.

I Gat Planti As na Mipela Inap Amamas

Mi amamas tru long lukim tok profet bilong Baibel i kamap tru; yes, mi amamas long lukim ‘ol lain i liklik tru ol i kamap planti moa.’ (Aisaia 60:22) Mi tingim yet askim bilong wanpela brata bilong mi long bipo long 1951, olsem: “Long Japan i gat hamas Witnes i stap?”

Mi tok: “I gat 260 samting.”

Em i mekim tok i olsem bilong daunim mi na em i tok: “Em tasol?”

Mi bin tok long mi yet olsem, ‘Ol yia bai lus na bai yumi skelim hamas manmeri tru Jehova bai bringim i kam bilong lotuim em long dispela kantri i gat planti man bilong lotu Sinto na Buda long en.’ Na Jehova i bin bekim dispela askim! Long nau, i no gat moa ol longwe teritori bilong autim tok long en long Japan, na namba bilong ol man i lotu tru long Jehova i go bikpela inap olsem 222,000, ol i stap long 3,800 kongrigesen!

Inap 44 yia mi mekim wok bilong Jehova long olgeta de​—⁠32 bilong ol dispela yia mi mekim wantaim gutpela meri bilong mi​—⁠na mi bin kisim bikpela amamas long ol dispela yia. Inap 25 yia mi mekim wok long Dipatmen Bilong Tanim Tok long Betel. Long Septemba 1979, ol i singautim mi long go insait long komiti bilong brens bilong ol Witnes Bilong Jehova long Japan.

Em i gutpela samting tru na em i wanpela blesing long mi inap insait long wok bilong helpim ol man i gat gutpela bel na i laikim tumas bel isi long kam na lotuim Jehova. Planti man i bin mekim olsem mi bin mekim. Ol i senis na ol i lotu long wanpela God tru tasol, em Jehova, na ol i no moa lotuim king. Mi gat laik long helpim planti man moa long kam long lain bilong Jehova na kisim laip i no gat pinis bilong en long nupela taim i gat bel isi i stap long en.​—⁠KTH 22:⁠17.

[Futnot]

[Piksa long pes 29]

Long skul mipela i lain long lotuim king

[Kredit Lain]

Nius Mainichi

[Piksa long pes 29]

Long Nu Yok wantaim Brata Franz

[Piksa long pes 29]

Mi na meri bilong mi, Junko

[Piksa long pes 31]

Mi wok long Dipatmen Bilong Tanim Tok