Nem Bilong God i Kirapim Wanpela Tok Pait

WANPELA MAN LONG NETELAN I RAITIM DISPELA STORI BILONG KIRAP!

SAMTING em lain bilong wokim nupela Baibel long tok ples Dats ol i mekim, dispela i bin kirapim bikpela tok pait namel long ol saveman bilong Baibel na ol man nating. Wanem dispela samting? Dispela lain i bin pasim tok long raitim nem bilong God olsem Heer, olsem Bikpela.

Long Disemba 1998, em sampela wik tasol bihain long ol i kamapim sampela hap bilong dispela Baibel, sampela meri bilong lain Kerk en Wereld (Sios na Wol), em wanpela oganaisesen bilong Talatala, ol i raitim pas na kamapim kros bilong ol. Bilong wanem ol i mekim olsem? Ol i ting dispela nem “Bikpela” i no stret long God. Bihain liklik, sampela grup moa⁠​—⁠em ol Katolik na Talatala⁠​—⁠⁠ol tu i kam insait long dispela tok pait. Long Februeri 1999, tripela saveman i tok ol i laik bai dispela lain i mas tanim 4-pela leta Hibru i makim nem bilong God na raitim olsem YHWH. I no longtaim na ol saveman bilong Baibel, na ol man bilong tanim tok, na ol tisa bilong lotu, ol i bung wantaim long Amsterdam bambai ol i ken toktok long dispela samting. Long pinis bilong dispela bung, olgeta i bin vot na kamapim tingting bilong ol, olsem ol i laik bai ol i mas tanim nem bilong God olsem wanem.

Aninit long het-tok “Tingim Gut God, No Ken Tok Pait Long Nem Bilong Em,” nius Nieuwsblad van het Noorden i tok: “Sevenpela tasol i vot long nem BIKPELA. Tasol ol narapela nem tu i no kisim planti vot. Olsem: Nem (1), Man (3), Man Bilong Marimari (6), Man i No Inap Long Yumi Givim Nem Long Em (7), Man i Stap Laip (10), na Man i Stap Oltaim Oltaim (15). Nem i win tru em . . . YHWH!” Long Mas 15, 2001, lain Supervision Committee bilong dispela nupela Baibel, ol i pasim tok long raitim HEER (BIKPELA) long bikpela rait bilong makim nem bilong God.

Dispela tok pait i kamapim klia olsem maski ol man i gat narapela narapela tingting long ol i mas raitim nem bilong God olsem wanem long tok Dats, ol saveman i wanbel long tok olsem God i gat wanpela nem tru bilong em. Long tok Hibru, dispela nem i gat 4-pela leta Hibru, olsem יהוה, o YHWH. Orait ol narapela Baibel long tok Dats long bipo na long nau ol i bin tanim YHWH olsem wanem?

Long 1762, wanpela man bilong Dats, nem bilong em Nicolaas Goetzee, em i prinim Baibel Staten. Long pes i kamapim nem bilong dispela Baibel, i gat dispela tok: ‘I gat as tru na mipela i no tanim nem bilong God, em JEHOVA​—⁠mipela i larim i stap olsem tasol.’ Sampela bikpela saveman moa long Dats​​—⁠olsem Profesa Nicolaas Beets na Petrus Augustus de Genestet​—⁠​ol tu i bin mekim wok long nem Jehova.

Baibel New World Translation of the Holy Scripturesa i save mekim wok long nem Jehova. Ol tok long pinis bilong Baibel New World Translation long tok Dats i kamapim olsem dispela Baibel “i save mekim yet wok long nem ‘Jehova,’ long wanem, inap planti handet yia nau ol man i save long en. Na tu, dispela tok Jehova i kamapim 4-pela leta bilong nem bilong God, em YHWH.” Long dispela rot Baibel New World Translation i bin helpim planti milion manmeri long kisim stretpela save long nem bilong God.

[Futnot]