Ol Bikpela Bagarap, Gutpela Samting Inap Kamap
“OL HAUS KLOSTU LONG MI I SEKSEK NA OL PAIA I SUT I KAMAUT. TAIM MI RAN, LONG OLGETA HAP OL MANMERI I WOK LONG KRAI, BETEN NA SINGAUT LONG NARAPELA I HELPIM OL. MI TING PINIS BILONG DISPELA GRAUN I KAMAP.”—G. R., WANPELA MAN I ABRUSIM BAGARAP TAIM GRAUN I GURIA.
LONG olgeta yia inap planti milion taim guria i seksekim graun bilong yumi—graun bilong yumi i save surik surik long olgeta taim. Ol man i no inap pilim planti bilong ol dispela guria.a Tasol klostu 140 guria long wan wan yia i bikpela tru inap long ol i tok guria i “bikpela,” “bikpela tru,” o “traipela.” Long bipo yet na i kam inap long nau, ol bikpela guria i mekim na planti milion manmeri i bin dai na planti haus samting i bagarap.
Ol guria i save bagarapim tu bel na tingting bilong ol man. Olsem: Bihain long tupela guria i seksekim strong El Salvado long kirap bilong 2001, wanpela bikman bilong dipatmen bilong helt long dispela kantri i tok: “Ol manmeri i kisim ol sik bilong tingting, ol i bel hevi, ol i ting gutpela samting i no inap kamap, na ol i kros.” Ol dokta na nes samting long El Salvado i tok, namba bilong ol sikman i bel hevi na i tingting planti i go bikpela inap 73 pesen. Ol ripot i kamapim olsem ol man i stap long ol kem bilong ol man em haus bilong ol i bagarap, namba wan samting ol i mas kisim em wara, na namba tu samting ol i mas kisim em helpim long ol sik bilong tingting.
Ol guria i save kamapim indai, bagarap, na bel hevi, tasol ol i save kamapim sampela samting moa. Planti taim ol dispela bagarap i bin kirapim ol man long mekim gutpela pasin tru na daunim laik bilong ol yet. Tru tumas, sampela ol i bin mekim bikpela wok bilong stretim ol haus i bagarap na helpim ol man em sindaun bilong ol i bagarap tru. Kain gutpela samting inap kamap, maski ol samting i bagarap tru, olsem yumi bai lukim.
[Futnot]
a Dispela em ol guria i liklik tru, planti tausen olsem i save kamap long olgeta wan wan de.
[Ol Piksa long pes 2, 3]
Pes 2 na 3: Long Athens, Grik, wanpela yangpela meri i wari tru taim em i luksave olsem mama bilong em i stap insait long wanpela haus i bin pundaun. Wanpela papa i amamas tru taim em i kisim save olsem pikinini meri bilong em i bin abrusim bagarap
[Kredit Lain]
AP Photos/Dimitri Messinis