Baibel i Tok Wanem?
I Stret Ol Kristen i Ting God Bai Wokim Mirakel Bilong Lukautim Ol?
Planti taim Baibel i stori long God inap lukautim ol manmeri i lotuim em na bagarap i no painim ol. King Devit i tok: “Bikpela, yu ken helpim mi bai ol man nogut i no inap bagarapim mi. Yu ken lukautim mi gut bai ol man bilong pait i no inap birua long mi.” ( Song 140:1) Long nau, planti manmeri i lotuim God i bin bungim ol hevi olsem ol man i paitim ol, pasin raskol, bagarap bilong bikpela win ren o guria samting, tasol ol i no bin dai o kisim bagarap. Sampela i laik save God i wokim mirakel na lukautim ol long dispela taim o nogat, long wanem, long ol narapela kain taim olsem i bin i gat ol man i stap gut long God na ol i no bin abrusim bagarap, bikpela hevi moa i painim ol, na sampela ol i dai.
OLSEM WANEM? God Jehova i save lukautim sampela man na ol i no kisim bagarap, tasol em i no mekim olsem long sampela narapela? I stret long ting God bai wokim mirakel bilong lukautim yumi long ol man nogut na long ol bikpela bagarap samting long nau?
Baibel i Stori Long God i Wokim Mirakel Bilong Lukautim Man
Baibel i gat planti stori long God i bin wokim mirakel bilong helpim ol man i lotuim em. (Aisaia 38:1-8; Aposel 12:1-11; 16:25, 26) Baibel i stori tu long ol narapela taim ol wokboi bilong Jehova i bungim hevi na ol i kisim bagarap. (1 King 21:1-16; Aposel 12:1, 2; Hibru 11:35-38) Em nau, Jehova i ken wokim mirakel na helpim man long abrusim bagarap long taim i gat wanpela as i kirapim em long mekim olsem. Olsem na taim ol wan wan Kristen i painim ol hevi na hevi i no lusim ol, ol i no ken ting olsem God i lusim ol pinis. Yumi mas save olsem ol samting nogut inap kamap long ol gutpela wokboi bilong Jehova tu. Bilong wanem na i olsem?
As na Ol Samting Nogut i Painim Ol Gutpela Wokboi Bilong God
Wanpela as em yumi olgeta i kisim sin long Adam na Iv na yumi no gutpela olgeta. Olsem na yumi kisim pen, karim hevi, na dai. (Rom 5:12; 6:23) Narapela as em yumi stap long taim bilong las de. Baibel i tok ol manmeri long taim bilong yumi “ol bai i no save long pasin bilong i stap pren bilong ol arapela, na taim ol i kros, bai i no gat rot bilong pinisim kros bilong ol. Ol bai i tok nogut long ol arapela. Ol bai i no bosim laik bilong bodi bilong ol, na ol bai i pait na bagarapim ol man nabaut. Ol bai i birua long olgeta gutpela pasin.” (2 Timoti 3:1-5) Ol samting i kamap long planti hap bilong graun long nau olsem pasin bilong reip, stilim man na karim i go haitim, kilim man, na ol narapela pasin nogut i soim olsem dispela tok i tru.
Planti gutpela wokboi bilong God i save sindaun na mekim ol wok bilong ol long olgeta de namel long ol man bilong pait, na sampela taim ol i kisim hevi long ol. Ating sampela taim bagarap inap painim yumi, long wanem, yumi stap long wanpela hap long taim hevi i kamap na yumi no inap abrusim. Na olsem Solomon i tok, yumi save olsem “taim nogut i save painim yumi olgeta.”—Saveman 9:11.
Na tu, aposel Paul i bin tok ol man bai mekim nogut long ol Kristen, long wanem, ol i lotuim God. Em i tok: “Tru tumas, olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Long sampela yia i go pinis long sampela kantri, dispela samting i bin kamap tru.
Olsem na ol samting nogut bilong pasin pait, raskol, bagarap bilong win ren o guria samting, na ol bagarap i painim man na em i dai, ol dispela samting i save painim ol man i pret long God tu. Satan i bin tok olsem Jehova i save banisim ol lain bilong Em bilong lukautim ol bambai hevi i no ken painim ol. (Jop 1:9, 10) Dispela tok i no stret. Tasol yumi ken bilip tru olsem Jehova i save lukautim lain bilong em, maski em i no wokim mirakel samting bilong kisim bek ol long wanpela hevi.
Rot Bilong Jehova Long Lukautim Lain Bilong Em Long Nau
Long rot bilong Baibel, Jehova i save soim rot long lain bilong em bilong lukautim ol. Pasin bilong givim bel long ol samting bilong spirit na save bilong Baibel inap givim gutpela tingting long yumi na helpim yumi long skelim gut ol samting. Dispela inap helpim yumi long abrusim sampela popaia na bihainim savepasin. (Song 38:4; Sindaun 3:21; 22:3) Olsem: Pasin bilong bihainim tok bilong Baibel long sakim pasin pamuk, mangal, belhat, na kros pait i bin helpim ol Kristen long abrusim planti hevi. Na tu, taim yumi no poromanim ol man nogut, bai yumi no stap long wanpela hap we em i isi moa long bagarap i painim yumi—long wanpela hap long taim hevi i kamap na yumi no inap abrusim. (Song 26:4, 5; Sindaun 4:14) Ol man i bihainim ol stiatok bilong Baibel i save stap amamas, planti taim dispela i mekim ol i stap gut long tingting na bodi.
Maski sapos God i larim ol samting nogut i kamap, yumi save em bai strongim ol man i lotuim em na bai ol inap karim dispela hevi, na dispela i mekim gut bel bilong yumi. Aposel Pol i strongim yumi olsem: “God i save bihainim tok bilong en, na em bai i no inap larim wanpela bilong ol traim i kamap long yupela, em i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. Dispela rot i olsem. Em bai i mekim yupela i sanap strong, na dispela traim bai i no inap daunim yupela.” (1 Korin 10:13) Na tu Baibel i tok promis olsem God bai givim “bikpela strong” bilong em bilong helpim yumi long karim ol hevi.—2 Korin 4:7.
God i Save Bihainim Laik Bilong Em
Olsem wanem? I stret long ol Kristen i ken ting God bai wokim mirakel na lukautim ol long olgeta taim wanpela bagarap i laik kamap? Tok bilong Baibel i no helpim dispela tingting.
Tru, God Jehova inap wokim mirakel na helpim ol wokboi bilong em. Na sapos wanpela i ting God i bin helpim em long abrusim wanpela bagarap, ol narapela i no ken tok bilas long em. Tasol taim Jehova i no mekim sampela samting bilong helpim man long abrusim sampela bagarap, man hia i no ken ting dispela i makim olsem God i no amamas long em, nogat.
Yumi mas bilip olsem maski yumi bungim wanem wanem traim o hevi, Jehova bai lukautim ol gutpela wokboi bilong em, em bai mekim olsem long rot bilong rausim dispela hevi, o long rot bilong givim strong long yumi long karim dispela hevi o, sapos dai i painim yumi, em bai kirapim bek yumi bilong i stap laip oltaim long nupela taim em bai kamapim.—Song 37:10, 11, 29; Jon 5:28, 29.