“Bikpela i No Inap Lusim Ol Manmeri Bilong En”
“Planti hevi i save kamap long stretpela man, tasol Bikpela i save helpim em na ol dispela hevi i no daunim em.”—SONG 34:19.
1, 2. (a) Olsem wanem Jehova i mekim gut long lain bilong em long nau? (b) Planti Kristen i stap olsem wanem? Na wanem ol askim i kamap?
OLSEM Baibel i tok profet, ol manmeri i lotuim Jehova i stap long wanpela paradais bilong spirit. (2 Korin 12:1-4) Ol Witnes Bilong Jehova i insait long wanpela lain brata i stap long olgeta hap na pasin sori na wanbel i olsem mak bilong ol. (Jon 13:35) Ol i amamas long save gut long olgeta tok i tru bilong Baibel. (Aisaia 54:13) Ol i amamas tru olsem Jehova i larim ol i stap long haus spirit bilong em!—Song 15:1.
2 Olgeta manmeri insait long oganaisesen bilong Jehova i stap gutpela tru long ol samting bilong spirit; sampela i stap bel isi liklik, tasol sampela i karim ol kain kain hevi. Planti Kristen i stap nogut tru na ol i stap olsem inap longpela taim, na i olsem hevi bilong ol i no inap pinis. Long kain taim olsem Kristen bai bel hevi. (Sindaun 13:12) Olsem wanem? Ol hevi Kristen i karim i makim olsem God i no laikim em? Jehova i save lukautim sampela Kristen na sampela nogat?
3. (a) Yu ting i asua bilong Jehova na lain bilong em i mas karim ol pen na hevi? (b) Bilong wanem ol gutpela wokboi bilong Jehova i mas karim ol pen na hevi?
3 Baibel i tok: “Sapos samting i kirapim bel bilong wanpela man na i pulim em long mekim sin, em i no ken tok, ‘God i pulim mi long mekim dispela pasin.’ Nogat. Sin i no inap pulim God, na God i no save pulim man long mekim sin.” (Jems 1:13) Jehova i Man bilong lukautim na helpim ol manmeri bilong em. (Song 91:2-6) “Bikpela i no inap lusim ol manmeri bilong en.” (Song 94:14) Dispela i no makim olsem ol gutpela wokboi bilong em i no inap karim pen na hevi. Ol man i gat sin i bosim dispela graun. Planti i save mekim pasin giaman, na sampela i nogut tru. I no gat wanpela bilong ol i askim Jehova long givim gutpela save na tingting long em. Olsem na planti man i kisim pen na hevi. Baibel i kamapim long ples klia olsem ol manmeri bilong Jehova ol tu bai karim sampela hevi i kamap long sin bilong ol man na long pasin nogut.—Aposel 14:22.
Ol Gutpela Kristen i Save Ol Bai Karim Pen na Hevi
4. Wanem ol samting inap painim olgeta Kristen taim ol i stap namel long ol manmeri nogut bilong dispela graun? Na bilong wanem ol dispela samting i painim ol?
4 Ol disaipel bilong Jisas i no bilong dispela graun, tasol ol i stap namel long ol manmeri bilong dispela graun. (Jon 17:15, 16) Baibel i kamapim long ples klia olsem Satan i bosim dispela graun. (1 Jon 5:19) Olsem na olgeta Kristen inap ting olsem ol bikpela hevi inap kamap long ol. Aposel Pita i tingim dispela samting na em i tok: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai. Tasol yupela i mas i stap strong long bilip na sakim em. Yupela i save, ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela.” (1 Pita 5:8, 9) Yes, olgeta manmeri bilong God i save pen na hevi inap painim ol.
5. Olsem wanem Jisas i kamapim klia olsem sampela hevi bilong bagarapim bel bai painim ol gutpela Kristen?
5 Maski yumi laikim tru Jehova na stap gut long ol lo bilong em, sampela hevi bilong bagarapim bel bai painim yumi. Jisas i kamapim klia dispela samting long tok piksa bilong em long Matyu 7:24-27. Long dispela tok piksa em i soim olsem ol man i bihainim ol tok bilong em i narapela kain long ol man i no bihainim. Em i tok ol disaipel i bihainim ol tok bilong em i olsem wanpela man i gat gutpela tingting na i wokim haus bilong em antap long ples ston. Ol man i no bihainim ol tok bilong em i olsem wanpela longlong man i sanapim haus bilong em antap long wesan. Taim wanpela bikpela win i kamap, haus ol i wokim antap long ples ston em tasol i sanap strong. Tasol long haus bilong man i gat gutpela tingting “ren i kam daun, na tait bilong wara i kamap, na win i kirap strong, na ol dispela samting i sakim dispela haus. Tasol em i no pundaun.” Jisas i no tok promis olsem dispela man i gat gutpela tingting em bai stap bel isi oltaim, nogat. Tasol gutpela tingting bilong em bai helpim em long stap gut na em i no bagarap long dispela bikpela win. Jisas i kamapim wankain tingting long tok piksa bilong man i tromoi pikinini wit long gaden. Jisas i tok, maski ol wokman bilong God i bihainim tok na “bel bilong ol em i stretpela na i gutpela,” ol bai hatwok long “karim kaikai.”—Luk 8:4-15.
6. Long tok piksa bilong Pol long ol samting i no save paia, ol hevi na traim i olsem paia i painim husat?
6 Taim aposel Pol i raitim pas long ol Korin, em i tok piksa bilong soim olsem ol Kristen i mas i gat ol gutpela pasin bilong helpim ol taim ol bikpela hevi i painim ol. Ol samting i no save paia olsem gol, silva, na ston i dia tumas i olsem ol pasin God i laikim. (Skelim wantaim Sindaun 3:13-15; 1 Pita 1:6, 7.) Tasol ol pasin nogut bilong skin i olsem ol samting i save paia. Nau Pol i tok: “Orait bihain wok bilong olgeta man bai i kamap ples klia long de God i makim bilong kotim ol manmeri. Dispela de bai i kamap olsem paia, na dispela paia bai i traim wok bilong olgeta man wan wan, bilong painimaut wok bilong ol i gutpela o nogat. Sapos wanpela man i wokim haus antap long dispela ston, na haus bilong en i no paia, orait dispela wokman bai i kisim pe.” (1 Korin 3:10-14) Long hia tu, Baibel i stori olsem hevi na traim i olsem paia em bai painim yumi olgeta.
7. Olsem Rom 15:4 i tok, olsem wanem ol stori bilong Baibel inap helpim yumi long sanap strong na karim hevi?
7 I gat planti stori long Baibel long ol gutpela wokboi bilong God em ol i bin sanap strong na karim hevi, sampela inap longpela taim. Tasol Jehova i no bin lusim ol. Ating aposel Pol i tingim sampela wokboi olsem taim em i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Orait yumi ken tingim 3-pela man, em ol i bin pas gut wantaim God, tasol ol i karim planti bikpela pen na hevi.
Ol Samting Ol Stori Bilong Baibel i Skulim Yumi Long En
8. Jehova i larim wanem ol hevi i painim Josep? Na ol hevi i painim em inap hamas yia?
8 Kirap long taim em i yangpela yet Jehova i bin laikim tru Josep, em pikinini man bilong Jekop. Tasol maski i no asua bilong em yet, em i bin karim planti pen na hevi. Ol brata bilong em i bin holimpas em na mekim nogut tru long em. Ol i bin salim em olsem wanpela wokboi nating long narapela kantri, na long dispela kantri ol i sutim tok giaman long em na putim em long “kalabus.” (Stat 40:15) Na long kalabus “ol i pasim strong ol sen long lek bilong en na lek i pen. Na ol i pasim bikpela ring ain long nek bilong en.” (Song 105:17, 18) Long taim Josep i wokboi nating na i stap kalabus, ating planti taim em i askim Jehova long helpim em long kamap fri. Inap 13 yia, Jehova i bin strongim em long kain kain rot, tasol long olgeta moningtaim em i bin kirap yet olsem wanpela wokboi nating o kalabus.—Stat 37:2; 41:46.
9. Inap planti yia Devit i mas karim wanem ol hevi?
9 Kain samting olsem i painim Devit tu. Taim Jehova i bin wok long kisim wanpela man em inap tru long bosim Israel, em i tok: “Mi lukim pinis Devit, pikinini bilong Jesi, na bel bilong mi i laikim dispela man. Em bai i bihainim olgeta laik bilong mi.” (Aposel 13:22) Maski Jehova i laikim tru Devit, planti hevi i painim em. Em inap lusim laip bilong em, olsem na inap planti yia em i hait long ples drai nating, na long ol hul na baret insait long maunten ston, na long ol ples bilong ol narapela kantri. Ol i raunim em olsem wanpela wel abus, na em i bel hevi na pret. Tasol Jehova i givim strong long em na em i sanap strong na karim hevi. Olsem na i stret Devit i toktok long ol samting i painim em: “Planti hevi i save kamap long stretpela man, tasol Bikpela i save helpim em na ol dispela hevi i no daunim em.”—Song 34:19.
10. Wanem bikpela hevi nogut tru i painim Nabot na famili bilong em?
10 Long taim bilong profet Elaija, inap 7,000 Israel tasol ol i no bin brukim skru long god giaman Bal. (1 King 19:18; Rom 11:4) Ating Nabot em wanpela bilong ol, tasol bihain ol man i mekim bikpela pasin nogut tru long em. Ol i sutim tok long em olsem em i tok bilas long God na dispela i semim em tru. Ol i tok em i gat asua, na king i tok ol i mas tromoi ston long em bilong kilim em i dai, na ol dok i dringim blut bilong em. Na ol i kilim i dai ol pikinini man bilong em tu! Tasol em i no gat asua long ol samting ol i kotim em long en. Ol witnes i sutim tok giaman long em. Kwin Jesebel em i as bilong ol dispela samting nogut bambai king i ken kisim gaden wain bilong Nabot.—1 King 21:1-19; 2 King 9:26.
11. Aposel Pol i stori olsem wanem long ol man na meri i bin stap gut long God long bipo?
11 Josep, Devit, na Nabot, ol i 3-pela tasol bilong ol planti man na meri i bin stap gut long God na Baibel i stori long ol olsem ol bikpela hevi i bin painim ol. Aposel Pol i raitim stori bilong ol wokboi bilong Jehova bilong bipo. Em i tok ol man “i kisim hevi long ol birua i tok bilas long ol na wipim ol na pasim ol long sen na putim ol long kalabus. Ol birua i tromoi ston long ol. Ol i kisim so na katim bodi bilong ol long tupela hap. Ol i kilim ol i dai long bainat. Sampela bilong ol dispela man i bilip, ol i pasim skin bilong sipsip na meme olsem laplap, na ol i wokabaut i go. Ol i sot long olgeta samting bilong bodi, na ol man ol i givim hevi long ol na mekim pasin nogut tru long ol. Olsem na ol i go nabaut na hait long graun i no gat man na long ples maunten na long ol hul bilong ston na long ol hul insait long graun. Pasin bilong ol arapela manmeri bilong graun i no inap tru long pasin bilong ol dispela manmeri i stap namel long ol na ol i bilip tru long God.” (Hibru 11:36-38) Tasol Jehova i no bin lusim ol.
Jehova i Lukautim Ol Man i Karim Pen na Hevi
12. Wanem sampela hevi i painim ol Witnes Bilong Jehova long nau?
12 Olsem wanem long lain bilong Jehova long nau? Olsem wanpela oganaisesen, yumi ken save olsem God bai lukautim yumi na helpim yumi long nau long las de na long taim bilong bikpela hevi. (Aisaia 54:17; KTH 7:9-17) Tasol yumi olgeta wan wan i save, “taim nogut i save painim yumi olgeta.” (Saveman 9:11) Long nau ol bikpela hevi i save painim planti gutpela Kristen. Sampela i rabis nogut tru. Baibel i stori long ol Kristen “pikinini, papamama bilong ol i dai pinis, na long ol meri, man bilong ol i dai pinis,” ol i gat bikpela hevi. (Jems 1:27) Sampela i karim pen na hevi, long wanem, ol bikpela bagarap i painim ol, na i gat ol pait, na pasin raskol, na ol man i bosim nogut ol, na sik, na indai.
13. Sampela brens-ofis i stori long wanem ol bikpela hevi?
13 Olsem: Long ripot bilong ol bilong 1996, sampela brens-ofis bilong Sosaiti Was Taua i toksave long Lain Bilong Bosim Ol Witnes olsem sampela brata sista bilong yumi ol i stap long ol kalabus nogut tru, long wanem, ol i bihainim ol lo bilong Baibel. Long wanpela kantri bilong Saut Amerika 3-pela kongrigesen i pinis taim ol lain paitman i subim planti handet Witnes long lusim dispela hap. Long wanpela kantri long Wes Afrika, sampela Witnes i bagarap, long wanem, ol i no gat rot bilong ranawe long taim ol lain bilong kantri yet i pait. Long wanpela kantri bilong Sentral Amerika, sampela brata i stap nogut pinis long ol samting bilong mani, tasol wanpela traipela win i mekim na nau ol i sot tru. Long sampela narapela ples ol brata i no gat bikpela hevi long kaikai na mani, kain kain samting nogut inap bagarapim amamas bilong sampela. Na ol hevi bilong dispela taim nau i daunim sampela brata. Ol man i no laik harim tok, na dispela i mekim na sampela moa i bel hevi taim ol i autim gutnius bilong Kingdom.
14. (a) Stori bilong Jop i lainim yumi long wanem samting? (b) Taim hevi i painim yumi, yumi no ken kisim wanem tingting? Gutpela yumi mekim wanem?
14 Tasol yumi no ken ting ol dispela hevi i makim olsem God i no laikim yumi, nogat. Tingim Jop na ol planti hevi i painim em. Em i wanpela “gutpela man tru na i no gat asua.” (Jop 1:8) Ating bel bilong Jop i bagarap stret taim Elifas i tokim em olsem em i bin mekim pasin i no stret! (Jop, sapta 4, 5, 22) Yumi no ken kirap kwik long ting ol hevi i painim yumi, long wanem, Jehova i bel hevi long sampela samting yumi bin mekim o Jehova i no blesim moa yumi. Kain tingting olsem inap bagarapim bel bilong yumi long taim yumi karim hevi. (1 Tesalonaika 3:1-3, 5) Taim yumi gat hevi, i gutpela yumi tingim long bel olsem Jehova na Jisas i stap klostu long ol stretpela man, maski wanem ol samting i painim ol.
15. Olsem wanem yumi save, Jehova i tingim tru ol hevi bilong lain bilong em?
15 Aposel Pol i strongim yumi taim em i tok: “Krais i save laikim yumi moa yet, na i no gat wanpela samting inap pasim dispela laik bilong en i kamap long yumi wan wan. Sapos hevi i kamap long yumi, o sapos yumi karim pen, o sapos ol man i mekim nogut long yumi, o sapos yumi hangre, o sot long klos, o sapos samting nogut i laik bagarapim yumi, o sapos pait i kamap long yumi, ating dispela olkain samting bai i inap pasim laik bilong Krais? Nogat tru. Yes, God i save laikim yumi tru, na mi bilip tru olsem, i no gat wanpela samting inap pasim laik bilong God i kamap long yumi. Dai o laip, o ol ensel o ol strongpela spirit, o samting nau i stap o samting bai i kamap bihain, o kain kain samting i gat strong, o samting bilong antap o samting bilong daunbilo, o ol arapela samting i stap nabaut, dispela olgeta i no inap pasim laik bilong God, em dispela laik em i givim yumi long Krais Jisas, Bikpela bilong yumi.” (Rom 8:35, 38, 39) Jehova i tingim tru yumi na em i save yumi karim ol pen na hevi. Taim Devit i stap yet olsem wanpela ranaweman, em i tok: “Bikpela i save lukautim ol stretpela manmeri, na em i save harim beten bilong ol. God i save stap klostu long ol manmeri i gat hevi.” (Song 34:15, 18; Matyu 18:6, 14) Papa bilong yumi i stap long heven i tingim yumi na em i sori long ol man i karim pen na hevi. (1 Pita 5:6, 7) Em i givim ol samting yumi mas kisim bilong sanap strong na karim hevi, maski wanem kain hevi i painim yumi.
Ol Presen Bilong Jehova i Helpim Yumi
16. Jehova i givim wanem gutpela samting long yumi bilong helpim yumi long sanap strong na karim hevi? Na em i helpim yumi olsem wanem?
16 Yumi no ken ting long dispela taim nogut bilong nau bai yumi no ken kisim hevi, tasol “God i no save lusim” yumi. (2 Korin 4:8, 9) Jisas i tok promis long givim wanpela helpim long ol disaipel bilong em. Em i tok: “Bai mi askim Papa, na em bai i givim yupela narapela Helpim bilong strongim yupela. Na em bai i stap wantaim yupela oltaim oltaim. Dispela Helpim em i Spirit bilong tok tru.” (Jon 14:16, 17) Long de Pentikos bilong yia 33 C.E., aposel Pita i tokim ol man i bin harim tok bilong em olsem “God i givim Holi Spirit” long ol. (Aposel 2:38) Olsem wanem? Spirit holi i save helpim yumi long nau? Yes, em i helpim yumi! Strong bilong Jehova i save kamapim ol gutpela pasin long yumi, olsem: “Pasin bilong laikim tru ol arapela na pasin bilong amamas na pasin bilong i stap bel isi na pasin bilong i no belhat kwik na pasin bilong helpim ol man na mekim gutpela pasin long ol na pasin bilong wokabaut stret oltaim na pasin bilong i stap isi na pasin bilong daunim laik bilong olpela bel.” (Galesia 5:22, 23) Ol dispela pasin i gutpela tru bilong helpim yumi long sanap strong na karim hevi.
17. Wanem sampela tok i tru bilong Baibel i strongim bilip bilong yumi na yumi tingting strong long wet long God na no ken les?
17 Na spirit holi i helpim yumi long save olsem ‘ol dispela hevi na pen yumi save karim, ol i no bikpela tumas, na ol bai i stap sotpela taim tasol’ sapos yumi skelim ol wantaim gutpela pe yumi bai kisim, em laip i stap oltaim oltaim. (2 Korin 4:16-18) Yumi bilip tru olsem God i no inap lusim tingting long ol gutpela wok bilong yumi na pasin bilong yumi long givim bel long em. (Hibru 6:9-12) Taim yumi kaunim ol tok bilong Baibel, ol stori bilong ol gutpela wokboi bilong God bilong bipo, em ol i bin sanap strong na karim hevi tasol ol i bin stap gut na amamas, ol dispela stori i strongim yumi. Jems i tok: “Ol brata, yupela i mas tingim ol profet bipo ol i bin autim tok long nem bilong Bikpela. Ol birua i bin mekim nogut long ol, tasol ol i bin strongim bel na karim dispela hevi. Yupela i mas kisim dispela pasin bilong ol, na bihainim. Harim. Yumi save tok olsem, ‘Ol man i bin strongim bel na karim hevi, ol i save stap gut na amamas i stap.’ ” (Jems 5:10, 11) Baibel i tok promis olsem God bai givim “bikpela strong” long yumi bambai yumi ken sanap strong na karim ol hevi. Na tu, Jehova i givim gutpela tok promis long yumi olsem ol man i dai pinis ol bai kirap bek. (2 Korin 1:8-10; 4:7) Taim yumi kaunim Baibel long olgeta de na yumi tingim gut long bel ol dispela tok promis, bai yumi strongim bilip bilong yumi na tingting strong long wet long God na no ken les.—Song 42:5.
18. (a) Namba 2 Korin 1:3, 4 i kirapim yumi long mekim wanem? (b) Olsem wanem ol wasman Kristen inap i stap olsem man bilong mekim gut bel bilong yumi na strongim bel bilong yumi?
18 Na Jehova i bin givim paradais bilong spirit long yumi na long dispela paradais ol brata sista Kristen i laikim tru yumi. Yumi olgeta i gat wok long strongim bel bilong ol narapela. (2 Korin 1:3, 4) Na ol wasman Kristen i gat bikpela wok moa long mekim gut bel bilong yumi na strongim yumi. (Aisaia 32:2) Ol i olsem “presen,” na Jisas i givim wok long ol long strongim ol man i karim pen na hevi, na long “strongim bel bilong ol man i save pret na long helpim ol man i no strong.” (Efesus 4:8, 11, 12; 1 Tesalonaika 5:14) Sosaiti i kirapim ol elda long mekim gutpela wok long ol nius Wastaua na Kirap!, na long ol narapela buk yumi save kisim long rot bilong “wokboi i gat gutpela tingting.” (Matyu 24:45-47) Ol dispela nius na buk i gat planti gutpela tok bilong Baibel bilong helpim yumi long stretim sampela hevi i mekim yumi bel hevi, o ol i helpim yumi na sampela hevi i no inap painim yumi. Yumi mas bihainim pasin bilong Jehova na mekim gut bel bilong ol narapela na strongim ol long taim bilong hevi!
19. (a) Wanem samting i helpim yumi long abrusim sampela hevi? (b) Yumi mas bilip strong long husat? Wanem samting bai helpim yumi long karim ol hevi na traim i painim yumi?
19 Yumi wok long i kam klostu long pinis bilong taim bilong las de na ol hevi bilong dispela graun i go bikpela moa, olsem na ol Kristen i wok strong long abrusim ol hevi. (Sindaun 22:3) Sapos yumi skelim gut ol samting, na yumi tingting gut, na yumi save long ol lo bilong Baibel, dispela inap helpim yumi long mekim gut ol samting. (Sindaun 3:21, 22) Yumi harim Tok bilong Jehova na bihainim bambai yumi no ken mekim sampela popaia yumi inap abrusim. (Song 38:4) Tasol yumi save, maski yumi wok strong tru long mekim gutpela pasin, yumi no inap abrusim olgeta pen na hevi. Long dispela taim nau, planti man i mekim stretpela pasin ol i karim ol bikpela hevi. Tasol yumi inap karim ol hevi na traim i painim yumi taim yumi bilip tru olsem “Bikpela i no inap lusim ol manmeri bilong en.” (Song 94:14) Na yumi save, klostu nau pasin bilong dispela graun na ol hevi bilong en bai pinis. Olsem na yumi mas pasim tok long bel olsem yumi “no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.”—Galesia 6:9.
Yumi Lainim Wanem Samting?
◻ Wanem ol hevi i painim olgeta manmeri bilong God?
◻ Baibel i stori long husat na yumi ken save olsem ol hevi i no makim olsem God i no laikim ol?
◻ Jehova i pilim olsem wanem long ol hevi i painim lain bilong em?
◻ Jehova i givim wanem ol presen bilong helpim yumi long karim ol hevi na traim?
[Ol Piksa long pes 10]
Devit, Nabot, na Josep ol i tripela man i bin kisim ol bikpela hevi