Jehova i Save Helpim Ol Man i Bel Hevi

“Planti hevi i save kamap long stretpela man, tasol Bikpela i save helpim em na ol dispela hevi i no daunim em.”​—SONG 34:19.

1, 2. Wanem hevi i bin painim wanpela gutpela Kristen? Bilong wanem yumi tu inap pilim olsem?

WANPELA yangpela meri, nem bilong em Keiko,a i bin stap wanpela Witnes Bilong Jehova winim 20 yia. Inap sampela haptaim em i bin mekim wok painia oltaim, olsem meri bilong autim tok bilong Kingdom fultaim. Em i bin amamas tru long dispela gutpela wok. Tasol i no longtaim i go pinis, na Keiko i pilim olsem em i stap wanpis na i no gat wanpela gutpela samting bai painim em. Em i tok: “Mi krai tasol i stap.” Bilong daunim bel hevi bilong em, Keiko i lusim bikpela haptaim moa bilong stadi long Baibel. Em i tok: “Tasol maski mi mekim olsem, mi pilim wankain yet. Mi bel hevi tru na mi laik dai tasol.”

² Olsem wanem? Sampela taim yu pilim olsem? Yu wanpela Witnes Bilong Jehova na i gat as tru na yu ken amamas, long wanem, pasin bilong givim bel tru long God i ‘helpim yu long dispela laip nau yu stap long en, na long laip yu bai kisim bihain tu.’ (1 Timoti 4:8) Long nau yu stap long wanpela paradais bilong spirit! Tasol yu ting dispela i mekim na ol hevi i no inap painim yu? Nogat tru! Baibel i tok: “Planti hevi i save kamap long stretpela man.” (Song 34:19) Yumi no kirap nogut long dispela, long wanem, “dispela graun olgeta em i stap aninit long strong bilong Satan.” (1 Jon 5:19) Dispela samting i mekim na sampela hevi i save painim yumi olgeta.​—Efesus 6:12.

Ol Samting Bel Hevi i Save Kamapim

3. Kamapim sampela stori bilong Baibel long ol wokman bilong God i bin bel hevi tru.

³ Sapos yumi bel hevi inap longpela taim, dispela inap bagarapim tru bel na tingting bilong yumi. (Sindaun 15:15) Tingim gutpela man Jop. Taim em i karim ol bikpela hevi tru, Jop i tok: “Mipela ol manmeri i save stap sotpela taim tasol long graun, na stat long taim mama i karim mipela, ol kain kain trabel i save kamap long mipela.” (Jop 14:1) Amamas bilong Jop i pinis. Inap liklik haptaim, em i ting Jehova i bin givim baksait long em. (Jop 29:​1-5) I gat ol narapela wokman bilong God i bin karim ol bikpela hevi tru, i no Jop tasol. Baibel i tok Hana “i pilim nogut tru na i krai moa yet,” long wanem, em i no gat pikinini. (1 Samuel 1:​9-11) Rebeka i bel hevi tru long samting i kamap insait long famili bilong em na em i tok: “Mi les pinis.” (Stat 27:46) Taim Devit i tingting long ol rong em i bin mekim, em i tok: “Long olgeta de mi sori na krai tasol.” (Song 38:6) Ol dispela stori i kamapim klia olsem ol man na meri husat i bin daun long God paslain long taim bilong Jisas, ol tu i bin bel hevi tru long sampela taim.

4. Bilong wanem yumi no kirap nogut long sampela Kristen long nau ol i “bel hevi”?

⁴ Olsem wanem long ol Kristen? Aposel Pol i luksave olsem em i mas tokim ol Kristen long Tesalonaika long “strongim bel bilong ol man i save pret [“bel hevi,” NW].” (1 Tesalonaika 5:14) Wanpela buk i tok, dispela tok Grik ol i tanim olsem “ol man i save bel hevi” inap makim ol man “em ol hevi bilong laip i daunim ol olgeta inap liklik taim.” Ol tok bilong Pol i soim olsem sampela man long kongrigesen Tesalonaika em God i bin makim ol long holi spirit, ol i bel hevi. Long nau tu i gat ol Kristen i save bel hevi. Tasol bilong wanem ol i bel hevi? Nau yumi ken skelim tripela as bilong dispela.

Bel Hevi Long Sin i Stap Long Skin

5, 6. Olsem wanem tok bilong Rom 7:​22-25 inap mekim gut bel bilong yumi?

⁵ Ol man nogut “i no save sem moa long pasin ol i save mekim,” tasol ol Kristen tru i save bel hevi long ol i gat sin. (Efesus 4:19) Ol inap pilim wankain olsem Pol husat i tok: “Long tingting bilong mi, mi laikim tumas lo bilong God. Tasol mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi.” Na Pol i tok moa: “O sori, dispela hevi i bagarapim tru tingting bilong mi!”​—Rom 7:​22-24.

⁶ Sampela taim yu pilim olsem Pol i bin pilim? I no gat rong long yu pilim tru ol pasin kranki bilong yu, long wanem, dispela inap helpim yu long tingim olsem sin em i wanpela samting nogut tru, na tu, em inap strongim yu long sakim ol pasin nogut. Tasol i no olsem yu mas bel hevi oltaim long ol popaia yu save mekim. Bihain long Pol i toktok long bel hevi, em i tok: “Mi tenkyu long God! Long han bilong Jisas Krais, Bikpela bilong yumi, em bai i helpim mi.” (Rom 7:25) Yes, Pol i bilip olsem blut bilong Jisas bai baim em bek long sin em i kisim long Adam.​—Rom 5:18.

7. Wanem samting inap helpim man na sin i stap long skin bilong em i no ken mekim em i bel hevi?

⁷ Sapos sin i stap long skin bilong yu i daunim yu olgeta, tok bilong aposel Jon i ken mekim gut bel bilong yu. Em i tok: “Sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta. Em yet i bin mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Em i mekim bilong helpim olgeta manmeri i stap long graun.” (1 Jon 2:​1, 2) Sapos sin i stap long skin bilong yu i mekim yu bel hevi, yu mas tingting oltaim olsem Jisas i dai bilong helpim ol man i gat sin, em i no dai bilong helpim ol man i gutpela olgeta. Tru tumas, “olgeta man i bin mekim sin, na olgeta i no inap i stap olsem piksa i soim biknem na strong bilong God.”​—Rom 3:​23, NW.

8, 9. Bilong wanem yumi mas sakim ol tingting i save kotim yumi yet?

⁸ Tasol olsem wanem sapos yu bin mekim bikpela rong long bipo? Ating yu bin toktok wantaim Jehova long dispela long rot bilong beten, na ating yu bin mekim olsem inap planti taim. Ol elda Kristen i bin helpim yu. (Jems 5:​14, 15) Yu bin tanim bel tru, olsem na yu stap yet insait long kongrigesen. O ating yu bin lusim oganaisesen bilong God, tasol bihain yu tanim bel na kamap klin gen. Sapos ol samting olsem i bin painim yu, ating yu tingim rong yu bin mekim long bipo na yu bel hevi long dispela. Sapos olsem, tingim olsem Jehova i save ‘lusim sin bilong olgeta lain.’ (Aisaia 55:7) Na tu, em i no laik bai yu ting olsem em i no inap orait long yu. Satan i laik bai yu ting olsem. (2 Korin 2:​7, 10, 11) God bai bagarapim Satan, long wanem, i stret long em i mas bagarap, tasol Satan i laik bai yu ting yu tu i mas kisim wankain strafe. (KTH 20:10) No ken larim Satan i win na bagarapim bilip bilong yu. (Efesus 6:11) Nogat. Yu mas “sakim em” long dispela samting, olsem yu save sakim em long ol narapela samting tu.​—1 Pita 5:9.

⁹ Long Kamapim Tok Hait 12:​10, Baibel i tok Satan em “dispela man bilong kotim ol brata bilong yumi”​—em ol Kristen God i bin makim ol long holi spirit. Em i save “kotim ol long ai bilong God bilong yumi long san na long nait.” Taim yu tingting long dispela ves, dispela inap helpim yu long luksave olsem Satan​—dispela man bilong kotim nating narapela​—em bai amamas sapos yu kotim na sutim tok long yu yet, maski Jehova i no save mekim olsem. (1 Jon 3:​19-22) I no gat as na yu mas tingting planti long ol rong yu bin mekim na nau yu laik givap tasol. No ken larim Satan i bagarapim pasin bilong yu long pas gut wantaim God. No ken larim Satan i mekim na yu no tingim pasin bilong Jehova olsem “em i no save belhat kwik na gutpela pasin sori bilong em i bikpela tru.”​—Kisim Bek 34:​6, NW.

Bel Hevi Long Ol Samting Yumi No Inap Mekim

10. Olsem wanem ol samting yumi no inap mekim ol inap mekim na yumi bel hevi?

¹⁰ Sampela Kristen i bel hevi, long wanem, ol hevi samting i mekim na ol i no inap mekim bikpela wok bilong God. Olsem wanem? Dispela em hevi bilong yu? Ating yu gat bikpela sik, o yu lapun, o sampela narapela samting i mekim na yu no inap lusim bikpela haptaim long wok autim tok olsem bipo yu bin mekim. Tru, Baibel i tok yumi no ken larim taim bilong yumi i lus nating, yumi mas makim haptaim bilong mekim wok bilong God. (Efesus 5:​15, 16) Tasol olsem wanem sapos sik samting i mekim na yu no inap autim tok planti na yu bel hevi long dispela?

11. Olsem wanem tok bilong Pol long Galesia 6:4 inap helpim yumi?

¹¹ Baibel i tok yumi no ken les long wok, nogat, yumi mas “bihainim pasin bilong ol man i bilip tru na i no les kwik, na ol i kisim olgeta samting bipo God i tok long givim long ol pikinini bilong em.” (Hibru 6:12) Yumi ken mekim olsem sapos yumi skelim gutpela pasin bilong ol na traim long bihainim bilip bilong ol. Tasol sapos yumi skelim yumi yet wantaim ol narapela na ting olsem yumi no inap mekim gut wanpela samting, dispela i no inap helpim yumi. Olsem na em i gutpela long yumi bihainim tok bilong Pol, olsem: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no mas skelim pasin bilong en wantaim pasin bilong narapela man.”​—Galesia 6:4.

12. Bilong wanem yumi ken amamas long wok bilong Jehova yumi mekim?

¹² I gat as tru na ol Kristen i ken amamas, maski bikpela sik i mekim na ol i no inap mekim bikpela wok. Baibel i tok: “God em i no man nogut, na bai em i lusim tingting long ol gutpela wok yupela i bin mekim.” (Hibru 6:10) Ating ol samting long i stap bilong yu em yu no inap senisim i mekim na yu hatwok long mekim bikpela wok bilong God olsem bipo yu bin mekim. Tasol Jehova i helpim yu na long dispela rot yu inap mekim moa yet sampela wok Kristen, olsem autim tok long telefon o raitim ol pas. Yu ken bilip tru olsem God Jehova bai mekim gut long yu taim yu givim bel long mekim wok bilong em na yu laikim em tru na ol narapela man.​—Matyu 22:​36-40.

‘Taim Bilong Planti Hevi’ Inap Daunim Yumi

13, 14. (a) Long wanem ol rot ‘taim bilong planti hevi nogut tru’ inap mekim na yumi bel hevi? (b) Olsem wanem yumi ken luksave olsem long nau planti man i no save long pasin bilong i stap pren bilong ol arapela?

¹³ Yumi wet long kisim laip long nupela taim God bai kamapim, tasol nau yumi stap long ‘taim bilong planti hevi nogut tru.’ (2 Timoti 3:1) Yumi amamas long save olsem ol dispela hevi i makim olsem yumi stap klostu pinis long taim bilong God long kisim bek yumi. Tasol ol hevi i stap long graun i mekim sampela samting long yumi. Olsem: Olsem wanem sapos yu no gat wok mani? Ating i no gat planti wok, na taim ol mun i kam na i go, yu inap tingting olsem Jehova i save lukim hevi bilong yu o em i save harim ol beten bilong yu o nogat. O ating sampela man i daunim yu o i mekim sampela narapela pasin i no stret. Taim yu ritim het tok bilong ol niuspepa, dispela tu inap mekim na yu pilim wankain olsem stretpela man Lot, em pasin nogut bilong ol man i mekim na em i “bel hevi tru” (“i daunim em tru,” Young’s Literal Translation of the Holy Bible).​—2 Pita 2:7.

¹⁴ I gat wanpela samting bilong taim bilong las de em yumi mas tingim. Baibel i tok profet olsem planti man “bai i no save long pasin bilong i stap pren bilong ol arapela.” (2 Timoti 3:3) Insait long planti famili i no gat pasin bilong laikim narapela. Buk Family Violence i tok: “Ol samting i kamapim klia olsem pasin bilong kilim man i dai, paitim narapela, bagarapim bel, o mekim pasin sem i save kamap moa yet insait long famili. Famili em ples we ol man i mas pilim olsem narapela i laikim ol na i no gat wanpela samting nogut inap painim ol, tasol long sampela manmeri i bikpela pinis na long ol pikinini, famili em ples we ol inap kisim bagarap long en.” Ol man em narapela insait long famili i bin mekim nogut long ol, bihain long sampela yia ol inap tingting planti na bel bilong ol i bagarap stret. Olsem wanem sapos yu gat dispela hevi?

15. Olsem wanem pasin laikim bilong Jehova i winim tru pasin laikim bilong ol man?

¹⁵ Man bilong raitim song, Devit, i tok: “Maski papa na mama i givim baksait long mi, Bikpela bai i lukautim mi.” (Song 27:10) Pasin laikim bilong Jehova i winim pasin laikim bilong olgeta papamama, yumi save long dispela na em i mekim gut bel bilong yumi! Sapos papa o mama i no laikim yu moa, o i mekim nogut long yu, o i lusim yu, dispela inap bagarapim tru bel bilong yu, tasol dispela i no makim olsem Jehova i no laikim yu, nogat, em i laikim yu tru. (Rom 8:​38, 39) Tingim, God i save kirapim ol man em i laikim long i kam long em. (Jon 3:16; 6:44) Maski ol man i bin mekim wanem kain pasin long yu, Papa bilong yu long heven i laikim yu tru!

Ol Samting Yu Ken Mekim Bilong Daunim Bel Hevi

16, 17. Taim man i bel hevi tru, em i ken mekim wanem bilong stap strong long ol samting bilong spirit?

¹⁶ Yu ken mekim sampela samting bilong karim bel hevi. Olsem: Givim bel long mekim ol wok Kristen. Tingim tingim long bel ol tok bilong Baibel, na moa yet taim bel hevi i laik daunim yu olgeta. Man bilong raitim song i tok: “Mi tingting olsem, ‘Lek bilong mi i wel. Bai mi pundaun nau.’ Tasol nogat. Bikpela, yu sori tumas long mi na yu holim mi na mi no pundaun long sin. Na taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.” (Song 94:​18, 19) Pasin bilong ritim Baibel oltaim bai helpim yu long tingim gut ol tok i mekim gut bel bilong yu na i strongim yu.

¹⁷ Beten tu em i bikpela samting. Maski yu no inap kamapim gut ol tingting i stap long bel bilong yu, Jehova i save long ol tok yu laik mekim. (Rom 8:​26, 27) Man bilong raitim song i mekim dispela gutpela tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.”​—Song 55:22.

18. Man i gat sik bilong bel hevi inap mekim wanem?

¹⁸ Sampela i gat sik bilong bel hevi.b Sapos yu gat dispela hevi, traim long tingting long nupela taim God bai kamapim na taim we ‘i no gat man bai i tok olsem, “Mi gat sik.” ’ (Aisaia 33:24) Tasol sapos yu bel hevi inap longpela taim tru, ating mobeta yu go lukim dokta. (Matyu 9:12) Em i bikpela samting tu long yu lukautim gut skin bilong yu. Pasin bilong kisim kaikai i save strongim bodi na mekim sampela eksasais inap helpim yu. Yu mas malolo tu. No ken lukim televisen i go inap long biknait, na abrusim ol amamas em ol inap pinisim strong bilong skin na tingting bilong yu. Na bikpela samting tru, wok yet long mekim ol wok God i laikim! Maski em i no taim yet long Jehova i “mekim drai wara i stap long ai” bilong ol man, em bai helpim yu long karim hevi.​—KTH 21:4; 1 Korin 10:13.

Stap “Aninit Long Strongpela Han Bilong God”

19. Jehova i promis long mekim wanem long ol man i bel hevi?

¹⁹ Baibel i tok olsem maski planti hevi i save painim stretpela man, “Bikpela i save helpim em na ol dispela hevi i no daunim em.” (Song 34:19) God i save mekim dispela olsem wanem? Taim aposel Pol i beten planti taim long God i ken rausim ‘nil i save sutim skin’ bilong em, Jehova i tok: “Strong bilong mi em i save kamap strong tru long man i no gat strong.” (2 Korin 12:​7-9) Jehova i bin promis long mekim wanem long Pol, na em i promis long mekim wanem long yu? Em i no promis long stretim hevi, nogat, em i promis long givim strong long karim hevi.

20. Maski yumi karim ol hevi, 1 Pita 5:​6, 7 i tok wanem?

²⁰ Aposel Pita i tok: “Yupela i mas daunim laik bilong yupela yet na stap aninit long strongpela han bilong God. Na long taim em yet i makim, em bai i litimapim yupela. God i save wari long yupela. Olsem na olgeta hevi yupela i karim, yupela i mas putim long han bilong en.” (1 Pita 5:​6, 7) Jehova i save laikim yu tru, olsem na em bai no lusim yu. Em bai helpim yu maski ol hevi i painim yu. Tingim, ol Kristen i stap gut long em ol i “stap aninit long strongpela han bilong God.” Taim yumi mekim wok bilong Jehova, em i save strongim yumi long karim hevi na sanap strong. Sapos yumi stap gut long em, i no gat wanpela samting inap bagarapim yumi long ol samting bilong spirit. Olsem na yumi no ken lusim Jehova na bai yu ken kisim laip oltaim long nupela taim em i bin tok promis long kamapim, na lukim taim we Jehova i helpim tru ol man i bel hevi!

[Ol Futnot]

Yu Inap Tingim?

• Bilong wanem ol wokboi bilong Jehova tu i save bel hevi?

• Wanem ol samting inap mekim na sampela long lain bilong God i bel hevi?

• Jehova i save mekim wanem bilong helpim yumi long karim bel hevi?

• Olsem wanem yumi “stap aninit long strongpela han bilong God”?

[Ol Piksa long pes 25]

Maski lain bilong Jehova i gat ol hevi, i gat as na ol i ken amamas

[Piksa long pes 28]

Autim tok long telefon i wanpela rot we yu ken givim bel long wok bilong Jehova