Holimpas Pasin Bilong Amamas Long Taim Bilong Hevi
“Olgeta manmeri i save larim [God] i lukautim ol, ol i ken amamas. Ol i ken belgut tru na singim song bilong amamas.”—SNG. 5:11.
1, 2. (a) Wanem sampela samting i save kamapim bikpela bel hevi long nau? (b) Ol Kristen tru i karim ol hevi i save painim ol man, na ol i mas karim wanem narapela hevi tu?
OL HEVI i save painim ol lain man, ol i painim tu long ol Witnes Bilong Jehova. Planti wokboi bilong God i bin karim hevi bilong pasin raskol, woa, na ol narapela pasin i no stret. Hevi bilong bikpela win na ren, stap rabis, sik, na indai i save kamapim bikpela bel hevi. Aposel Pol i tok: “Yumi save, olgeta samting God i bin wokim, olgeta i pilim pen olsem meri i laik karim pikinini. Na olgeta i krai nogut i stap, i kam inap long nau.” (Ro. 8:22) Yumi no gutpela olgeta na dispela tu i kamapim hevi long yumi. Olsem King Devit bilong bipo i bin tok, yumi tu inap tok olsem: “Ol rong bilong mi i karamapim mi pinis, na ol dispela rong i olsem kago mi karim na i hevi tumas.”—Sng. 38:4.
2 Ol Kristen tru i karim ol hevi i save painim olgeta man, na tu, ol i save karim hevi i olsem diwai pos. (Lu. 14:27) Yes, olsem ol i bin mekim long Jisas, ol man i birua na mekim nogut long ol disaipel bilong em. (Mt. 10:22, 23; Jo. 15:20; 16:2) Olsem na bilong bihainim Krais, yumi mas wok strong tru na sanap strong na karim hevi taim yumi wet long kisim ol blesing bilong nupela taim.—Mt. 7:13, 14; Lu. 13:24.
3. I no olsem ol Kristen i mas karim pen na hevi bambai God i ken amamas long ol, nogat. Olsem wanem yumi save long dispela?
3 Olsem wanem? Dispela i makim olsem i no gat amamas insait long laip bilong ol Kristen tru? Yumi mas bel hevi na krai sori i stap i go inap long las de? Nogat, Jehova i laik bai yumi stap amamas taim yumi wetim dispela taim we ol tok promis bilong em bai kamap tru. Planti taim Baibel i tok ol man i lotu tru long God ol i stap amamas. (Ritim Aisaia 65:13, 14.) Buk Song 5:11 i tok: “Olgeta manmeri i save larim [God] i lukautim ol, ol i ken amamas. Ol i ken belgut tru na singim song bilong amamas.” Yes, yumi inap stap amamas, bel isi, na belgut long taim bilong hevi tu. Orait nau yumi ken skelim olsem wanem Baibel inap helpim yumi long karim hevi bilong ol traim i painim yumi na stap amamas yet.
Jehova—‘God Bilong Amamas’
4. God i pilim olsem wanem taim ol man i sakim laik bilong em?
4 Tingim Jehova. Em i God i Gat Olgeta Strong, na em i bosim heven na graun. Em i no sot long wanpela samting na em i no nidim wanpela man bilong helpim em. Tasol maski Jehova i gat bikpela strong tru, em i bin bel hevi taim wanpela pikinini spirit bilong em i bikhet na kamap Satan. Bihain taim sampela narapela ensel i insait long dispela pasin bikhet, dispela i bagarapim bel bilong God. Tingim tu pen God i bin pilim taim Adam tupela Iv—gutpela samting tru em i bin wokim—i givim baksait long em. Kirap long dispela taim na i kam, planti bilion pikinini bilong tupela i bin sakim wok bos bilong Jehova.—Ro. 3:23.
5. Wanem samting i mekim Jehova i bel hevi tru?
5 Pasin bikhet Satan i bin kamapim i stap yet. Inap 6,000 yia, Jehova i bin lukim ol man i lotuim ol god giaman, pait na bagarapim man, kilim man i dai, na mekim olkain pasin pamuk. (Stt. 6:5, 6, 11, 12) Na tu, em i bin harim ol tok giaman na ol tok i bagarapim nem bilong em. Sampela taim ol wokboi bilong God yet i bin bagarapim bel bilong em. Baibel i stori long wanpela taim olsem na i tok: “Planti taim ol i bikhet na ol i sakim tok bilong em long ples drai. Na planti taim ol i mekim em i bel hevi. Ol i no lusim pasin bilong traim God bilong Israel, em God bilong mekim gutpela na stretpela pasin olgeta. Ol i traim em na mekim em i kros tru long ol.” (Sng. 78:40, 41) Taim sampela wokboi bilong Jehova i sakim em, pen em i pilim i bikpela tru. (Jer. 3:1-10) Tru tumas, ol samting nogut i save kamap, na Jehova i bel hevi tru taim ol i kamap.—Ritim Aisaia 63:9, 10.
6. Taim ol hevi i kamap, Jehova i save mekim wanem?
6 Tasol bel hevi i no stopim Jehova long mekim ol samting. Taim hevi i kamap, hariap Jehova i kirap mekim ol samting bambai ol samting nogut em hevi i save kamapim, em i no ken i go bikpela. Em i bin mekim tu ol bikpela samting na bai samting em i tingting pinis long mekim, em bai kamap. Ol dispela gutpela samting i mekim na Jehova i amamas na i wet long taim we em bai soim olsem i stret em i stap i nambawan bos, na dispela bai kamapim ol blesing long ol wokboi bilong em i stap gut long em. (Sng. 104:31) Yes, maski ol man i bin bagarapim tru nem bilong em, Jehova i stap yet olsem ‘God bilong amamas.’—1 Ti. 1:11; Sng. 16:11.
7, 8. Taim ol samting i no kamap gutpela, olsem wanem yumi inap bihainim pasin bilong Jehova?
7 Tru, save bilong Jehova long stretim ol hevi i winim tru save bilong yumi. Tasol yumi ken bihainim pasin bilong Jehova taim ol hevi i painim yumi. Taim ol samting i no kamap gutpela, yumi save bel hevi, tasol i no olsem yumi mas bel hevi i stap. Nogat. Jehova i wokim yumi i kamap olsem em yet, olsem na yumi inap wokim gut tingting na bihainim savepasin, na dispela i mekim na yumi ken skelim hevi bilong yumi na mekim ol samting bilong stretim hevi, taim yumi inap long mekim olsem.
8 Wanpela bikpela samting inap helpim yumi long karim ol hevi bilong laip, em yumi mas save olsem i gat sampela hevi em yumi no inap tru long stretim. Pasin bilong tingting planti long ol dispela samting inap mekim na yumi bai bel hevi moa, na yumi no kisim amamas long planti gutpela samting bilong lotu i tru. Taim yumi mekim pinis ol samting yumi inap mekim bilong stretim hevi, orait yumi no ken tingting moa long dispela hevi, mobeta yumi putim tingting bilong yumi i go long ol gutpela samting. Ol stori bilong Baibel i kamap long ol paragraf bihain long dispela i kamapim klia dispela samting.
Gutpela Tingting i Bikpela Samting
9. Olsem wanem Hana i soim olsem em i bihainim gutpela tingting?
9 Tingim stori bilong Hana, bihain em i bin kamap mama bilong profet Samuel. Em i bel hevi tru, long wanem, em i no inap karim pikinini. Long dispela as Penina i tok bilas long em. Sampela taim Hana i bel hevi tru na em i krai na i no laik kaikai. (1 Sml. 1:2-7) Wanpela taim Hana i go gen long tempel bilong Jehova, na em i “pilim nogut tru na i krai moa yet na i prea long Bikpela.” (1 Sml. 1:10) Hana i kamapim bel bilong em long Jehova, na bihain hetpris Eli i kam long em na i tok: “Yu ken bel isi na yu go. Na God bilong yumi Israel i ken givim yu dispela samting yu bin askim em.” (1 Sml. 1:17) Long dispela taim, Hana i save olsem em i bin mekim olgeta samting em inap mekim. Em i no inap stretim dispela hevi bilong em long em i no inap karim pikinini. Hana i kamapim pasin bilong bihainim gutpela tingting. Em ‘i go na em i kaikai na bihain em i no moa bel hevi.’—1 Sml. 1:18.
10. Pol i kamapim wanem gutpela tingting taim em i gat wanpela hevi em i no inap stretim?
10 Aposel Pol i bin mekim wankain samting taim hevi i painim em. Em i gat wanpela sik i givim bikpela pen long em. Em i tok dispela sik i ‘olsem nil i sutim skin.’ (2 Ko. 12:7) Maski dispela sik i wanem kain, Pol i mekim ol samting em inap mekim bilong pinisim dispela sik, em i beten askim Jehova long helpim em. Hamas taim Pol i askim Jehova long dispela samting? Tripela taim. Bihain long namba tri taim, God i tokim Pol olsem em bai no wokim mirakel na rausim dispela ‘nil i sutim skin.’ Pol i orait long dispela na em i putim tingting bilong em long mekim tru wok bilong Jehova.—Ritim 2 Korin 12:8-10.
11. Olsem wanem pasin bilong beten i helpim yumi long karim ol hevi?
11 Ol dispela stori i no makim olsem yumi mas lusim pasin bilong beten na kamapim ol hevi bilong yumi long Jehova, nogat. (Sng. 86:7) Baibel i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela.” Olsem wanem Jehova bai bekim ol kain prea olsem? Baibel i tok moa: “Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Fl. 4:6, 7) Yes, ating Jehova bai i no pinisim hevi bilong yumi, tasol em i harim beten bilong yumi na i mekim tingting bilong yumi i stap gut. Taim yumi beten pinis long hevi bilong yumi, ating bai yumi luksave long ol samting nogut em pasin bilong tingting planti tumas inap kamapim.
Kisim Amamas Long Mekim Laik Bilong God
12. Sapos yumi bel hevi i stap inap longpela taim, bilong wanem dispela inap bagarapim yumi?
12 Sindaun 24:10 i tok: “Sapos taim nogut i painim yu na bun bilong yu i slek, orait yu no gat strong tru.” Narapela savetok i tok olsem: “Sapos bel bilong man i hevi, bai tingting bilong en i bagarap.” (Snd. 15:13) Sampela Kristen i bel hevi tru na nau ol i lusim pasin bilong ritim Baibel na tingim tingim long bel Tok Bilong God. Taim ol i beten ol i mekim nating, na ol i laik stap longwe long ol wanbilip bilong ol. Tru tumas, sapos yumi bel hevi i stap inap longpela taim, dispela inap bagarapim yumi.
13. Wanem ol wok inap helpim yumi long daunim bel hevi na i givim amamas long yumi?
13 Tasol sapos yumi gat pasin bilong tingim ol gutpela samting, dispela bai helpim yumi long putim tingting long ol samting yumi kisim amamas long en long laip bilong yumi. Devit i tok: “God bilong mi, mi laikim tumas long bihainim laik bilong yu.” (Sng. 40:8) Taim ol samting i no kamap gutpela long laip bilong yumi, yumi no ken tru lusim pasin bilong yumi long mekim ol wok bilong lotu. Gutpela rot bilong daunim bel hevi, em pasin bilong insait long ol wok i givim amamas long yumi. Jehova i tok yumi inap kisim amamas taim yumi ritim Tok bilong em long olgeta taim. (Sng. 1:1, 2) Long rot bilong Baibel na ol miting Kristen, yumi kisim ol “gutpela tok” i strongim bel bilong yumi na i mekim yumi stap amamas.—Snd. 12:25; 16:24.
14. Wanem tok promis bilong Jehova i givim amamas long yumi long nau?
14 God i givim yumi planti samting em yumi ken amamas long en. Em i bin tok promis long kisim bek yumi na dispela em i wanpela bikpela samting tru bilong mekim yumi stap amamas. (Sng. 13:5, NW) Yumi save olsem maski wanem samting i wok long painim yumi long nau, bihain God bai praisim ol man i painim em. (Ritim Saveman 8:12.) Profet Habakuk i mekim gutpela tok bilong soim olsem em i bilip long dispela, em i tok: “Sapos ol diwai fik i no karim pikinini fik na ol diwai wain i no karim pikinini wain, na sapos ol diwai oliv i no karim pikinini na i no gat kaikai long gaden, na sapos olgeta sipsip i dai na haus bilong ol bulmakau tu i stap nating, orait maski dispela olgeta hevi i kamap, bai mi amamas na belgut. Long wanem, Bikpela em i God na em i save kisim bek mi.”—Hab. 3:17, 18.
‘Ol Manmeri i Putim Bikpela i Stap God Bilong Ol, Ol i Ken Amamas’
15, 16. Kolim sampela presen God i givim em yumi ken amamas long en taim yumi wetim gutpela samting bai kamap bihain.
15 Taim yumi wetim yet ol gutpela samting bai kamap bihain, Jehova i laik bai yumi amamas long ol gutpela samting em i save givim yumi. Baibel i tok: “Mi tingting long dispela samting na mi save i gat wanpela pasin i win tru. Dispela pasin i olsem. Yumi mas amamas na mekim gutpela pasin long taim yumi stap long graun. Na tu yumi mas kaikai na dring na amamas long olgeta samting yumi mekim. Dispela i olsem presen God i givim yumi.” (Sav. 3:12, 13) “Mekim gutpela pasin” i makim tu ol samting yumi mekim bilong helpim ol narapela. Jisas i tok olsem amamas bilong givim samting i winim amamas bilong kisim ol samting. Taim yumi mekim gutpela pasin long poroman marit bilong yumi, ol pikinini, papamama, na ol narapela wanblut, dispela i mekim yumi stap belgut tru. (Snd. 3:27) Taim yumi mekim pasin isi na mekim gut long ol brata na sista Kristen bilong yumi, na fogivim rong bilong ol, dispela i kamapim bikpela amamas, na Jehova i amamas long dispela pasin. (Ga. 6:10; Kl. 3:12-14; 1 Pi. 4:8, 9) Na taim yumi daunim sampela laik bilong yumi yet bilong mekim wok autim tok, dispela i givim bikpela amamas tru long yumi.
16 Ol ves bilong Buk Saveman long paragraf 15 i stori long sampela amamas bilong laip, olsem kaikai na dring. Yes, maski ol traim i painim yumi, yumi ken amamas long ol samting bilong skin em Jehova i givim long yumi. Na tu, ol naispela kala long skai taim san i go daun, ol bikpela maunten na wara samting, pilai bilong ol pikinini animal, na ol narapela gutpela samting i stap long graun, ol dispela samting i no gat pe bilong en, tasol yumi pilim tru long bel na ol i givim amamas long yumi. Taim yumi tingting long ol dispela kain samting, bai yumi laikim Jehova moa yet, long wanem, em i Man Bilong Givim olgeta gutpela samting.
17. Wanem ol samting bai mekim na bihain olgeta hevi bai pinis? Taim yumi wet long dispela, wanem samting i mekim gut bel bilong yumi?
17 Taim yumi laikim tru God, bihainim ol tok bilong em, na bilip long ofa bilong Jisas long baim bek ol man, dispela bai mekim na bihain olgeta hevi em sin i save kamapim ol bai pinis na bai yumi stap amamas oltaim. (1 Jo. 5:3) Taim yumi wet long dispela taim, bel bilong yumi i ken stap gut, long wanem, yumi save olsem Jehova i save long ol hevi i painim yumi. Devit i tok: “Yu sori long mi oltaim, olsem na mi amamas long yu. Yu lukim dispela hevi bilong mi, na yu save long olgeta trabel i kamap long mi.” (Sng. 31:7) Pasin laikim bilong Jehova i kirapim em long helpim yumi long winim ol hevi.—Sng. 34:19.
18. Bilong wanem pasin bilong i stap amamas i mas bikpela namel long lain bilong God?
18 Taim yumi wet yet long truim bilong ol tok promis bilong Jehova, i gutpela sapos yumi bihainim pasin bilong em, em God bilong amamas. Yumi no ken larim ol tingting bilong bagarapim bel i pasim yumi long mekim wok bilong God. Taim ol hevi i kamap, i gutpela sapos savetingting na pasin bilong wokim gut tingting i stiaim yumi. Jehova bai helpim yumi long bosim bel bilong yumi na long mekim ol samting yumi inap mekim na bai ol samting nogut ol hevi i save kamapim, ol i no go bikpela tumas. Yumi mas amamas long ol gutpela samting i kam long em, em ol samting bilong skin na bilong spirit. Taim yumi stap klostu long God, yumi inap amamas, long wanem, ‘ol manmeri i putim Bikpela i stap God bilong ol, ol i ken amamas.’—Sng. 144:15.
Yu Lainim Wanem Samting?
• Taim yumi karim ol hevi, olsem wanem yumi inap bihainim pasin bilong Jehova?
• Olsem wanem gutpela tingting inap helpim yumi long karim ol hevi?
• Long taim bilong hevi, olsem wanem yumi inap kisim amamas long mekim laik bilong God?
[Ol Piksa long pes 16]
Jehova i bel hevi long ol samting nogut i wok long kamap
[Kredit Lain]
© G.M.B. Akash/Panos Pictures
[Ol Piksa long pes 18]
Jehova i givim yumi ol samting bambai yumi ken stap amamas