Bilip Long Jehova, Em “God Bilong Mekim Isi Bel Bilong Ol Man”
“Yumi litimapim nem bilong God na Papa bilong Bikpela bilong yumi Jisas Krais. Em Papa bilong marimari na God bilong mekim isi bel bilong ol man long olgeta kain taim.”—2 KOR. 1:3.
1. Yumi olgeta i mas i gat wanem samting?
KIRAP long taim mama i karim yumi, yumi mas i gat man bilong mekim isi bel bilong yumi. Bebi i save krai bilong toksave olsem wanpela i mas mekim isi bel bilong em. Ating em i laik bai wanpela i mas holim em o ating em i hangre. Na taim yumi go bikpela, yumi mas i gat man bilong mekim isi bel bilong yumi. Na moa yet taim ol hevi i bungim yumi.
2. Jehova i givim wanem promis long ol man i bilip long em?
2 Ol pren na famili inap mekim isi bel bilong yumi. Tasol ol i no inap helpim yumi long olgeta pen na hevi yumi karim. Sampela taim, God tasol inap mekim isi bel bilong yumi. Baibel i tok promis olsem: “Ol manmeri i save bel tru na i singaut long em, em i save stap klostu long ol. . . . Na em i save harim krai bilong ol na kisim bek ol.” (Sng. 145:18, 19) Na Baibel i tok tu olsem: “Bikpela i save lukautim ol stretpela manmeri, na em i save harim beten bilong ol.” (Sng. 34:15) Tasol sapos yumi laik bai God i mekim isi bel bilong yumi, orait yumi mas bilip long em. Devit i tok: “Bikpela i stap olsem wanpela strongpela haus. Ol man i kisim hevi long ol birua, ol i ken i go i stap long en. Long taim bilong hevi ol i ken i go long em na hait. Bikpela, yu no save givim baksait long ol manmeri i kam long yu. Olsem na ol man i save long yu bai ol i bilip tru long yu.”—Sng. 9:9, 10.
3. Jisas i mekim wanem tok bilong helpim yumi long kliagut long pasin laikim Jehova i gat long yumi?
3 Jehova i tingim ol man i lotuim em i olsem samting i dia tumas. Jisas i tok: “Ol man i save salim 5-pela liklik pisin long 2-pela koin i gat liklik pe tru. Tasol God i no save lusim tingting long wanpela bilong ol dispela pisin. Tasol long yupela, em i kaunim pinis olgeta gras long het bilong yupela. Yupela i no ken pret. Yupela i winim tru ol dispela liklik pisin.” (Luk 12:6, 7) Jehova i tokim ol Israel: “Yupela Israel, oltaim mi save laikim yupela tumas na mi save mekim gutpela pasin long yupela, bilong mekim yupela i kam klostu long mi.”—Jer. 31:3.
4. Bilong wanem yumi ken bilipim ol tok promis bilong Jehova?
4 Sapos yumi bilip long Jehova na ol tok promis bilong em, orait dispela inap mekim isi bel bilong yumi taim yumi karim pen na hevi. Yumi mas trastim God olsem Josua i bin mekim. Em i tok: “God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.” (Jos. 23:14) Na yumi ken bilip tru olsem, sapos yumi karim pen na hevi long nau, “God i save bihainim ol tok bilong em” na em i no inap lusim ol gutpela wokboi bilong em.—Ritim 1 Korin 10:13.
5. Bilong wanem yumi inap mekim isi bel bilong ol arapela?
5 Aposel Pol i kolim Jehova olsem “God bilong mekim isi bel bilong ol man long olgeta kain taim.” Mining bilong dispela tok “mekim isi bel” i olsem givim bel isi long man i karim pen na hevi o helpim em, o mekim samting bilong daunim bel hevi bilong em. Jehova i save mekim olsem. (Ritim 2 Korin 1:3, 4.) I no gat wanpela man o wanpela samting inap pasim Papa bilong yumi long heven. Olsem na em inap mekim olgeta samting em i mas mekim bilong mekim isi bel bilong ol man husat i laikim em tumas. God i bin mekim isi bel bilong yumi, olsem na yumi inap mekim isi bel bilong ol brata bilong yumi “em ol i gat kain kain hevi.” Jehova inap tru long mekim isi bel bilong yumi, winim ol arapela man!
As Bilong Ol Pen na Hevi
6. Wanem ol samting i save givim pen na hevi long yumi?
6 I gat planti samting i save kamap long laip bilong yumi we yumi nidim man bilong mekim isi bel bilong yumi. Wanpela bikpela samting tru i givim pen long yumi em taim wanpela yumi laikim tumas i dai, olsem poroman marit, o pikinini bilong yumi. Na sampela i karim hevi long ol man i birua long ol bikos ol i bilong narapela lain, ol tu i mas i gat man i mekim isi bel bilong ol. Na ol arapela samting tu inap givim pen na hevi long yumi, olsem helt i bagarap, go lapun, stap rabis, hevi namel long man na meri marit, na ol pasin nogut bilong dispela graun.
7. (a) Long taim bilong hevi, yumi nidim wanem samting? (b) Jehova inap mekim wanem bilong helpim man i “pilim hevi long sin”?
7 Taim hevi i painim yumi, yumi pilim kain kain pen. Yumi nidim man bilong mekim isi bel bilong yumi bikos bel, tingting, filings, helt, na bilip bilong yumi inap bagarap. Tingim ol samting yumi pilim long bel bilong yumi. Baibel i tok man inap “pilim hevi long sin.” (Sng. 51:17) Jehova inap helpim yumi long kain taim olsem. “Em i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.” (Sng. 147:3) Na taim bikpela hevi tru i bungim yumi, God inap mekim isi bel bilong yumi sapos yumi beten long em, bilip long em, na bihainim ol lo bilong em.—Ritim 1 Jon 3:19-22; 5:14, 15.
8. Olsem wanem Jehova inap helpim yumi taim tingting bilong yumi i no stap isi?
8 Kain kain hevi i save painim yumi, olsem na yumi mas kisim sampela tok bilong mekim tingting bilong yumi i stap isi. Long kain taim olsem yumi nidim helpim. Man i raitim Song 94:19 i tok: “Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.” Na Pol i tok: “Yupela i no ken tingting planti long wanpela samting, nogat. Long olgeta samting, kamapim ol askim bilong yupela long God, mekim long rot bilong ol beten, na long ol prea we yu beten strong, na long ol beten bilong tok tenkyu long God. Na dispela bel isi bilong God i winim tru tingting bilong man, em bai lukautim bel bilong yupela na tingting bilong yupela long rot bilong Krais Jisas.” (Fili. 4:6, 7) Taim yumi nidim sampela tok bilong mekim tingting bilong yumi i stap isi, yumi mas ritim Baibel na tingim tingim ol tok yumi bin ritim. Dispela bai mekim isi tru bel bilong yumi.—2 Tim. 3:15-17.
9. Wanem samting inap helpim yumi taim yumi pilim olsem olgeta samting i nogut tasol?
9 Sampela taim yumi bel hevi tru na filings bilong yumi i bagarap na yumi pilim olsem olgeta samting i nogut tasol. Ating yumi pilim olsem yumi no inap mekim samting em Baibel i tok yumi gat wok long mekim o yumi no inap lukautim wok bilong yumi insait long kongrigesen. Long dispela kain taim tu, Jehova inap mekim isi bel bilong yumi na helpim yumi. Olsem: Taim Jehova i tokim Josua long kisim ol Israel i go pait wantaim ol strongpela birua, Moses i tokim ol: “Yupela i mas sanap strong na i no ken guria na pret long ol. God, Bikpela bilong yumi, bai i stap wantaim yupela. Na em bai i no inap lusim tingting long yupela o larim yupela i stap nating.” (Lo 31:6) Josua i kisim helpim long Jehova na long dispela rot Josua i kisim lain bilong God i go insait long Graun Bilong Promis na daunim ol birua bilong ol. Moses tu i bin kisim helpim long Jehova taim lain Israel i brukim solwara Retsi.—Kis. 14:13, 14, 29-31.
10. Yumi ken mekim wanem sapos ol hevi yumi karim i wok long bagarapim helt bilong yumi?
10 Ol hevi yumi karim inap bagarapim helt bilong yumi. Pasin bilong kisim gutpela kaikai, malolo, eksasais, waswas gut, na klinim haus, ol dispela samting inap helpim yumi. Na tu, sapos yumi tingim ol tok Baibel i mekim long ol samting bai kamap bihain, dispela inap helpim helt bilong yumi. So taim wanpela traim o hevi i mekim na yumi karim hevi, i gutpela long tingim olsem Pol tu i bin karim pen na hevi. Tingim gutpela tok em i mekim: “Kain kain hevi i banisim mipela, tasol ol i no pasim mipela olgeta. Mipela i no kliagut long mipela bai mekim wanem, tasol i no olsem mipela i no gat rot mipela i ken bihainim. Ol man i save mekim nogut long mipela, tasol God i no save lusim mipela. Bel hevi i daunim tru mipela, tasol mipela i no bagarap olgeta.”—2 Kor. 4:8, 9.
11. Yumi ken mekim wanem sapos yumi pilim olsem bilip bilong yumi i wok long go slek?
11 Sampela hevi inap mekim na bilip bilong yumi i go slek. Jehova inap helpim yumi long winim dispela hevi tu. Baibel i tok promis long yumi olsem: “[God] i save helpim olgeta manmeri i gat hevi na em i save litimapim olgeta manmeri ol arapela man i daunim ol.” (Sng. 145:14) Sapos yumi pilim olsem bilip bilong yumi i wok long go slek, orait yumi mas askim ol elda long helpim yumi. (Jems 5:14, 15) Na sapos oltaim yumi tingim laip oltaim yumi bai kisim, dispela inap strongim yumi taim ol samting i traim bilip bilong yumi.—Jon 17:3.
God i Mekim Isi Bel Bilong Ol
12. Olsem wanem Jehova i bin mekim isi bel bilong Abraham?
12 Man i raitim Song 119 i tokim Jehova olsem: “Yu mas tingim gen dispela promis bipo yu givim long mi, wokman bilong yu. . . . Taim mi gat hevi mi bin kisim bel isi, long wanem, promis bilong yu i givim laip long mi.” (Sng. 119:49, 50) Long nau yumi gat Baibel, em tok bilong Jehova, na i gat planti stori long en we God i bin mekim isi bel bilong ol wokboi bilong em. Olsem: Abraham i bin tingting planti taim em i harim olsem Jehova bai bagarapim Sodom na Gomora. Em i askim God: “Ating yu laik bagarapim ol gutpela man wantaim ol man nogut?” Jehova i mekim isi bel bilong Abraham taim em i tokim em olsem sapos i gat 50 gutpela man i stap, orait em i no ken bagarapim taun Sodom. Tasol Abraham i askim Jehova 5-pela taim moa: Olsem wanem sapos i gat 45 gutpela man? O sapos i gat 40? 30? 20? o 10? Jehova i mekim pasin isi long Abraham na tok promis long em olsem, sapos i gat 10-pela gutpela man i stap, orait em i no inap bagarapim dispela taun. Maski i no bin i gat 10-pela gutpela man long dispela hap, Jehova i kisim bek Lot na tupela pikinini meri bilong em.—Stt. 18:22-32; 19:15, 16, 26.
13. Olsem wanem Hana i soim olsem em i bilip long Jehova?
13 Meri bilong Elkana, em Hana, i gat bikpela laik tru long i gat pikinini. Tasol em i no inap karim pikinini, na dispela i bagarapim tru bel bilong em. Em i beten long Jehova long dispela samting, na Het Pris Eli i tokim em: “God bilong yumi Israel i ken givim yu dispela samting yu bin askim em.” Dispela i mekim isi bel bilong Hana na “em i no moa bel hevi.” (1 Sml. 1:8, 17, 18) Hana i bilip olsem Jehova bai helpim em. Hana i no save wanem samting bai kamap, tasol em i stap bel isi. Bihain, Jehova i harim beten bilong Hana. Hana i kisim bel na karim wanpela pikinini na kolim em, Samuel.—1 Sml. 1:20.
14. Bilong wanem wanpela i mas mekim isi bel bilong Devit? Devit i askim husat long mekim isi bel bilong em?
14 Narapela man em God i bin mekim isi bel bilong em, em King Devit. Jehova i save “lukim tingting na laik bilong man.” So taim em i makim Devit long kamap king bilong Israel, em i save olsem Devit i laik bihainim stretpela pasin na em i laikim tumas lotu i tru. (1 Sml. 16:7; 2 Sml. 5:10) Tasol bihain, Devit i mekim pasin adaltri wantaim Batseba na em i haitim sin bilong em long rot bilong kilim i dai man bilong Batseba. Taim Devit i luksave long bikpela sin em i bin mekim, em i beten long Jehova olsem: “Yu gat bikpela marimari tru, olsem na mi laik bai yu rausim olgeta pasin nogut bilong mi. Yu mas wasim mi olgeta, na bai pasin nogut i no i stap moa long mi. Rausim sin bilong mi na mi ken kamap klin. Mi save mi mekim rong pinis. Mi no inap lusim tingting long sin bilong mi.” (Sng. 51:1-3) Devit i tanim bel tru long sin em i bin mekim, na Jehova i fogivim em. Tasol Devit i mas karim yet hevi long pasin nogut em i bin mekim. (2 Sml. 12:9-12) Tasol marimari bilong Jehova i bin mekim isi bel bilong Devit.
15. Paslain liklik long Jisas i dai, Jehova i givim wanem helpim long em?
15 Planti hevi i bin bungim Jisas taim em i stap long graun. God i bin larim ol dispela traim i kamap, tasol oltaim Jisas i stap gut long God. Jisas i gutpela olgeta na oltaim em i bilip long Jehova na bihainim tok bilong em. Paslain liklik long ol i putim Jisas long han bilong ol birua na ol i kilim em i dai, em i beten long Jehova olsem: “Laik bilong mi i no ken kamap, nogat, laik bilong yu i mas kamap.” Na wanpela ensel i kamap long Jisas na i strongim em. (Luk 22:42, 43) Long dispela taim stret, God i mekim isi bel bilong Jisas na i strongim em na givim helpim long em.
16. Olsem wanem Jehova inap helpim yumi sapos bilip bilong yumi i as na ol man i laik kilim yumi i dai?
16 Maski dai inap painim yumi, long wanem, yumi laik holimpas bilip, Jehova bai helpim yumi long stap gut long em na em bai mekim olsem. Na tu, bilip bilong kirap bek i save mekim isi bel bilong yumi. Na yumi wetim taim we Jisas bai pinisim “dai, dispela laspela birua”! (1 Kor. 15:26) Ol gutpela wokboi bilong Jehova wantaim ol arapela man husat i dai pinis, ol i stap long tingting bilong Jehova. Em i no inap lusim tingting long ol, em bai kirapim bek ol. (Jon 5:28, 29; Apo. 24:15) Bilip bilong yumi long kirap bek i save mekim isi bel bilong yumi na i strongim yumi taim ol birua i mekim nogut long yumi.
17. Olsem wanem Jehova inap mekim isi bel bilong yumi taim wanpela yumi laikim tumas i dai?
17 Yumi save olsem ol manmeri yumi laikim tumas bai kirap bek na i stap long nupela taim i gutpela tumas, dispela i mekim isi tru bel bilong yumi. Bai i no gat moa ol samting i givim pen na hevi long ol man. Na “bikpela lain manmeri,” em ol wokboi bilong Jehova husat i abrusim bagarap long pinis bilong dispela taim nogut, ol bai kisim nambawan gutpela wok long welkamim na skulim ol manmeri i kirap bek!—Rev. 7:9, 10.
Oltaim God i Holim Yumi Long Han Bilong Em
18, 19. Olsem wanem God i bin mekim isi bel bilong ol wokboi bilong em taim ol man i mekim nogut long ol?
18 Moses i bin raitim wanpela song bilong strongim na mekim isi bel bilong lain Israel. Long dispela song em i tok: “God Bilong I Stap Oltaim Oltaim, em i ples hait bilong yumi. Oltaim em i holim yumi long han bilong en na i no save lusim yumi.” (Lo 33:27) Bihain, profet Samuel i tokim lain Israel long ol i no ken ‘givim baksait olgeta long Bikpela. Nogat. Ol i mas bihainim em tru na ol i mas strong long mekim wok bilong en. . . . Em i tingting long biknem na promis bilong en na em i no inap givim baksait long ol.’ (1 Sml. 12:20-22) Sapos oltaim yumi holimpas wok bilong Jehova, em i no inap lusim yumi. Oltaim em bai helpim yumi.
19 God i wok long helpim na mekim isi bel bilong ol manmeri bilong em nau long dispela taim bilong las de we i gat planti hevi nogut tru. Long taim bilong yumi, ol man i bin mekim nogut long planti brata bilong yumi na kalabusim ol, long wanem, ol i lotuim Jehova. Ol samting i kamap long ol i soim olsem Jehova i save mekim isi bel bilong ol wokboi bilong em taim ol traim i painim ol. Olsem, wanpela brata long Soviet Yunion i bin kalabus inap 23 yia bikos em i holimpas bilip bilong em. Tasol maski em i stap long kalabus, em i kisim yet ol buk na nius bilong Baibel we i strongim em na mekim isi bel bilong em. Em i tok: “Long ol dispela yia mi lain long trastim Jehova na em i bin strongim mi.”—Ritim 1 Pita 5:6, 7.
20. Olsem wanem yumi ken save tru olsem Jehova i no inap lusim yumi?
20 Maski wanem samting bai painim yumi long bihain, yumi mas tingim dispela gutpela tok: “Bikpela i no inap lusim ol manmeri bilong en.” (Sng. 94:14) Tru, yumi laik bai wanpela i mekim isi bel bilong yumi, tasol yumi tu inap mekim isi bel bilong ol arapela. Long neks stadi, bai yumi lain long olsem wanem yumi ken mekim isi bel bilong ol manmeri i karim pen na hevi.
Bai Yu Bekim Olsem Wanem?
• Wanem ol samting inap givim pen na hevi long yumi?
• Olsem wanem Jehova i save mekim isi bel bilong ol wokboi bilong em?
• Sapos dai i laik painim yumi, wanem samting inap mekim isi bel bilong yumi?
[Blok/Ol Piksa long pes 25]
ROT BILONG KARIM HEVI LONG OL SAMTING WE INAP BAGARAPIM
▪ bel Sng. 147:3; 1 Jon 3:19-22; 5:14, 15
▪ tingting Sng. 94:19; Fili. 4:6, 7
▪ filings Kis. 14:13, 14; Lo 31:6
▪ helt 2 Kor. 4:8, 9
▪ bilip Sng. 145:14; Jems 5:14, 15