Yumi Inap Painim We Samting Bilong Mekim Gut Bel?
“God, em i God na Papa bilong Bikpela bilong yumi Jisas Krais. . . . Long olgeta hevi i kamap long mipela, em i save mekim isi bel bilong mipela.”—2 KORIN 1:3, 4.
1. Wanem sampela samting inap mekim na ol man i pilim olsem ol i mas i gat samting bilong mekim gut bel bilong ol?
BIKPELA sik inap kirapim man long pilim olsem laip bilong em i bagarap pinis. Guria, bikpela win na ren, na bikpela hangre i save mekim na ol man i stap rabis olgeta. Woa inap mekim na sampela long famili i dai, o haus i bagarap, o ol man i mas ranawe lusim haus bilong ol. Pasin i no stret inap kirapim ol man long pilim olsem i no gat rot long helpim ol. Ol kain man olsem i mas i gat samting bilong mekim gut bel bilong ol. Ol inap painim we samting bilong mekim gut bel bilong ol?
2. Olsem wanem na samting Jehova i mekim bilong mekim gut bel bilong man em i narapela kain?
2 Sampela man na sampela lain i save wok strong long helpim ol man i gat hevi. Ol man i gat hevi i save pilim tru gutpela tok em narapela i mekim long ol. Ol samting bilong skin ol i kisim—kaikai, ples slip, klos—i save helpim gut ol long dispela hap taim ol i sot. Tasol God tru, Jehova, em tasol inap pinisim tru ol hevi na wokim rot na bai ol dispela hevi i no ken kamap gen. Baibel i tok long em olsem: “Yumi litimapim nem bilong God, em i God na Papa bilong Bikpela bilong yumi Jisas Krais. Em i Papa bilong yumi, na em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi. Long olgeta hevi i kamap long mipela, em i save mekim isi bel bilong mipela. Olsem na mipela inap long mekim isi bel bilong ol man i gat kain kain hevi, olsem God i save mekim isi bel bilong mipela.” (2 Korin 1:3, 4) Jehova i save mekim isi bel bilong yumi olsem wanem?
As Tru Bilong Ol Hevi na Rot Bilong Stretim
3. Samting God i bin mekim bilong mekim gut bel bilong yumi, olsem wanem dispela bai pinisim tru ol hevi bilong ol man?
3 Olgeta manmeri i bin kisim sin long rong bilong Adam, na dispela i save kamapim planti hevi na ol man i save dai. (Rom 5:12) Satan em “hetman i save bosim dispela graun” na dispela tu i mekim na planti hevi i kamap. (Jon 12:31; 1 Jon 5:19) Tasol Jehova i no sori long ol man i kisim hevi na em tasol, nogat. Em i bin salim Pikinini bilong em i kam olsem ofa bilong kisim bek ol man, na Em i tokim yumi olsem yumi inap lusim ol hevi em sin bilong Adam i bin kamapim sapos yumi bilip long Pikinini bilong Em. (Jon 3:16; 1 Jon 4:10) Na God i bin tokaut olsem Jisas Krais—em i bin kisim bikpela namba na strong bilong bosim olgeta samting bilong heven na graun—em bai pinisim Satan na olgeta wok nogut bilong em long graun.—Matyu 28:18; 1 Jon 3:8; KTH 6:2; 20:10.
4. (a) Jehova i bin mekim wanem bilong strongim bilip bilong yumi long ol tok promis bilong em? (b) Jehova i helpim yumi olsem wanem na bai yumi ken save long wanem taim ol hevi bai pinis?
4 Bilong strongim bilip bilong yumi long ol tok promis bilong em, God i bin kirapim ol man long raitim planti stori long Baibel bilong soim olsem olgeta samting em i tok profet long en i save kamap tru. (Josua 23:14) I gat ol stori tu i kamapim ol wok God i bin mekim bilong kisim bek ol wokboi bilong em, em ol samting i no inap kamap long strong bilong ol man. (Kisim Bek 14:4-31; 2 King 18:13–19:37) Na long rot bilong Jisas Krais, Jehova i bin kamapim klia olsem em bai oraitim “olgeta kain sik i stap long bodi bilong ol [man],” na kirapim bek ol man i dai pinis. (Matyu 9:35; 11:3-6) Wanem taim ol dispela samting bai kamap? Bilong bekim dispela askim, Baibel i stori long ol samting bilong taim bilong las de bilong dispela olpela pasin bilong nau, em bai kamap paslain long nupela skai na nupela graun God bai kamapim. Stori bilong Jisas long ol samting i kamap long taim bilong las de em i wankain long ol samting i kamap long dispela taim nau yumi stap long en.—Matyu 24:3-14; 2 Timoti 3:1-5.
Ol Man i Gat Hevi i Kisim Helpim
5. Taim Jehova i mekim gut bel bilong lain Israel bilong bipo, em i kirapim ol long tingim wanem samting?
5 Long ol samting Jehova i bin mekim long lain Israel long bipo, yumi kisim save long olsem wanem em i bin mekim gut bel bilong ol long taim bilong hevi. Em i kirapim ol long tingim em i wanem kain God. Dispela i bin strongim bilip bilong ol long ol tok promis bilong em. Jehova i bin kirapim ol profet long kamapim klia em i narapela kain long ol god giaman—em i God tru na i stap laip, tasol ol god giaman i no inap helpim ol yet o ol man i lotu long ol. (Aisaia 41:10; 46:1; Jeremaia 10:2-15) Taim em i tokim Aisaia, “Strongim bel bilong ol manmeri bilong mi, na mekim bel bilong ol i stap isi,” Jehova i kirapim dispela profet long kamapim sampela tok na tok piksa i stori long ol samting Em i bin wokim, bilong kamapim klia olsem Jehova i gat bikpela strong na em tasol em i God tru.—Aisaia 40:1-31.
6. Wanem sampela samting Jehova i bin mekim bilong makim wanem taim em bai kisim bek lain bilong em?
6 Sampela taim, Jehova i bin mekim gut bel bilong lain bilong em long rot bilong kolim wanem taim—klostu o longwe—em bai kisim bek ol. Taim wok bilong kisim bek ol Israel long Isip i kam klostu, em i tokim dispela lain ol Isip i daunim ol, olsem: “Wanpela taim moa bai mi mekim save long king bilong Isip na long ol manmeri bilong en. Na bihain long dispela em bai i larim yupela i go.” (Kisim Bek 11:1) Taim 3-pela lain i bung wantaim bilong pait na kam insait long kantri Juda long taim bilong King Jehosafat, Jehova i tokim ol em bai kirap na helpim ol long “tumora.” (2 Stori 20:1-4, 14-17) Tasol wok bilong kisim bek ol long Babilon, em samting Aisaia i bin tokaut long en klostu 200 yia paslain long ol i lusim Babilon, na 100 yia paslain, Jeremaia i bin tokaut long sampela samting moa bilong dispela wok bilong kisim bek ol. Ol dispela tok profet i bin strongim bel bilong ol wokboi bilong God klostu long taim ol i mas lusim Babilon!—Aisaia 44:26–45:3; Jeremaia 25:11-14.
7. Planti taim, wanem samting i insait long ol promis bilong kisim bek lain bilong God? Dispela i mekim wanem long ol bilipman long Israel?
7 Insait long planti tok promis i bin mekim gut bel bilong lain bilong God, i gat sampela tok long Mesaia. (Aisaia 53:1-12) Inap planti handet yia, dispela i bin mekim gut bel bilong ol bilipman taim kain kain hevi na traim i painim ol. Luk 2:25 i tok: “Long dispela taim i gat wanpela man i stap long Jerusalem, nem bilong en Simeon. Em i man bilong mekim stretpela pasin na em i man bilong lotu long God. Em i wetim dispela man God i bin makim [Mesaia] bilong mekim gut bel bilong ol Israel. Na Holi Spirit i stap long Simeon.” Simeon i save long ol wok bilong Mesaia em Baibel i stori long en, na dispela samting em i wetim i stiaim wokabaut bilong em. Em i no save long olsem wanem ol dispela tok promis bai kamap tru, na em i bin dai na i no lukim samting Mesaia i mekim bilong kisim bek ol man, tasol em i amamas taim em i lukim dispela Man God i bin tok promis long salim i kam “bilong kisim bek [ol man].”—Luk 2:30.
Helpim Long Rot Bilong Krais
8. Helpim Jisas i givim long ol manmeri, olsem wanem dispela i narapela kain long helpim planti man i ting em i mas givim long ol?
8 Taim Jisas Krais i mekim wok bilong em hia long graun, sampela taim em i no helpim ol man long rot ol i ting em i mas helpim ol long en. Sampela i wetim wanpela Mesaia i kam bilong helpim ol Juda na bai ol i no ken i stap moa aninit long strong bilong ol Rom. Tasol Jisas i no tokim ol long bikhet long gavman Rom, nogat; em i tokim ol, “samting bilong Sisar, em yupela i mas givim long Sisar.” (Matyu 22:21) Samting God i tingting pinis long mekim em i winim dispela wok bilong helpim wanpela lain long kamap fri long strong bilong wanpela gavman. Tru, ol man i laik bai Jisas i ken kamap king bilong ol, tasol Jisas i tok em bai “givim laip bilong em bilong baim bek planti manmeri.” (Matyu 20:28; Jon 6:15) Em i no taim bilong em long kamap King, na Man bilong givim namba na strong long em bilong mekim dispela wok, em Jehova—i no ol manmeri i no stap isi.
9. (a) Jisas i autim wanem tok bilong mekim gut bel bilong ol man? (b) Jisas i mekim wanem bilong soim olsem dispela gutnius em i autim inap helpim gut ol man? (c) Wok bilong Jisas i strongim ol man long wetim wanem samting?
9 Bilong mekim gut bel bilong ol man, Jisas i autim “gutnius bilong kingdom bilong God.” Jisas i autim dispela gutnius long olgeta hap em i go long en. (Luk 4:43) Em i kamapim klia olsem dispela gutnius inap helpim gut ol man taim em i mekim ol wok i makim ol samting em yet, olsem King Mesaia, bai mekim bilong helpim ol man. Em i helpim ol man i karim bikpela pen na hevi long save olsem i gat as bilong ol i ken i stap laip—em i oraitim ol aipas na mauspas, (Matyu 12:22; Mak 10:51, 52), ol lek nogut (Mak 2:3-12), ol wanlain Israel i gat sik lepra (Luk 5:12, 13) na ol narapela bikpela sik tu. (Mak 5:25-29) Em i pinisim hevi bilong ol manmeri i krai sori taim em i kirapim bek ol pikinini bilong ol i dai pinis. (Luk 7:11-15; 8:49-56) Em i soim olsem em i gat strong long bosim bikpela win na ren na long givim kaikai long ol bikpela lain manmeri i hangre. (Mak 4:37-41; 8:2-9) Na tu, Jisas i lainim ol long ol stiatok em inap helpim ol long karim ol hevi na strongim ol long wetim stretpela wok king bilong Mesaia. Olsem na taim Jisas i mekim wok bilong em, em i mekim gut bel bilong ol man i bilip na harim tok bilong em, na wok bilong em i strongim bel bilong ol man i kam inap 2 tausen yia bihain.
10. Ofa bilong Jisas inap helpim yumi olsem wanem?
10 Inap 60 yia samting bihain long Jisas i lusim laip bilong em olsem man na em i kirap bek na kisim laip long heven, holi spirit i kirapim aposel Jon long raitim tok olsem: “Ol liklik pikinini bilong mi, mi raitim dispela tok long yupela, bai yupela i no ken mekim sin. Na sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta.” (1 Jon 2:1, 2) Ol gutpela samting ofa bilong Jisas inap helpim yumi long en—em i givim laip bilong em olsem man i gutpela olgeta—dispela i mekim gut bel bilong yumi. Yumi save God inap lusim ol rong bilong yumi, na bel bilong yumi i no gat tok, na yumi inap pas gut wantaim God, na tingting long kisim laip oltaim.—Jon 14:6; Rom 6:23; Hibru 9:24-28; 1 Pita 3:21.
Holi Spirit i Mekim Wok Olsem Helpim
11. Paslain long Jisas i dai, em i tokim ol aposel long wanem narapela samting bilong mekim gut bel bilong ol?
11 Taim Jisas i stap wantaim ol aposel long laspela apinun paslain long em i dai olsem ofa, em i toktok long narapela samting Papa bilong em long heven i bin mekim bilong helpim ol. Jisas i tok: “Bai mi askim Papa, na em bai i givim yupela narapela Helpim [samting bilong mekim gut bel; tok Grik, pa·raʹkle·tos] bilong strongim yupela. Na em bai i stap wantaim yupela oltaim oltaim. Dispela Helpim em i Spirit bilong tok tru.” Jisas i tokim ol: “Helpim tru bilong strongim yupela em i Holi Spirit. . . . Em bai i skulim yupela long olgeta samting. Na bai em i kirapim tingting bilong yupela na bai yupela i tingim gen olgeta tok mi bin givim long yupela.” (Jon 14:16, 17, 26) Olsem wanem holi spirit i bin mekim gut bel bilong ol?
12. Olsem wanem wok bilong holi spirit long helpim ol disaipel long tingim bek ol tok bilong Jisas i bin mekim gut bel bilong planti man?
12 Jisas i bin lainim ol aposel long planti planti samting. Tru, ol i no inap lusim tingting olsem Jisas i bin lainim ol, tasol yu ting ol inap tingim bek olgeta wan wan tok Jisas i bin mekim? Ol i no inap holim olgeta tok bilong em long tingting, olsem na yu ting sampela bikpela tok bilong Jisas bai lus? Jisas i tokim ol holi spirit bai ‘kirapim tingting bilong ol na bai ol i ken tingim gen olgeta tok em i bin givim long ol.’ Olsem na 8-pela yia bihain long Jisas i dai, Matyu inap raitim namba wan Gutnius i kamapim ol gutpela tok Jisas i bin mekim antap long maunten, na planti tok piksa bilong Kingdom, na ol liklik liklik samting insait long mak bilong taim bilong em i kam i stap olsem king. Inap olsem 50 yia bihain long dispela, aposel Jon inap raitim stori bilong ol liklik liklik samting i bin kamap long ol laspela de Jisas i bin stap laip long graun. Ol dispela tok i bin strongim tru bel bilong ol man i kam inap long taim bilong yumi!
13. Olsem wanem holi spirit i mekim wok olsem tisa na skulim ol Kristen bilong pastaim?
13 Holi spirit i bin helpim ol disaipel long tingim bek ol tok, na tu, em i bin skulim ol na stiaim tingting bilong ol na bai ol i ken save gut moa long ol samting God bai mekim. Taim Jisas i stap yet wantaim ol disaipel, em i tokim ol long sampela samting em long dispela taim ol i no klia gut long en. Tasol bihain, holi spirit i kirapim Jon, Pita, Jems, Jut, na Pol, na ol i raitim tok na kamapim klia sampela samting moa God i tingting pinis long mekim. Long dispela rot holi spirit i mekim wok olsem tisa na ol disaipel i save olsem God i stiaim ol.
14. Long wanem ol rot holi spirit i bin helpim ol manmeri bilong Jehova?
14 Ol presen bilong holi spirit ol tu i bin helpim ol disaipel long save olsem nau God i no orait moa long lain Israel bilong skin—nau em i orait long kongrigesen Kristen. (Hibru 2:4) Ol pasin dispela spirit i kamapim long laip bilong ol man em tu i bikpela samting long helpim ol long luksave husat ol i disaipel tru bilong Jisas. (Jon 13:35; Galesia 5:22-24) Na tu, holi spirit i strongim ol wan wan bilong dispela kongrigesen na bai ol i ken strong tru long autim tok na no ken pret.—Aposel 4:31.
Helpim Long Taim Bilong Bikpela Hevi
15. (a) Wanem sampela hevi i bin painim ol Kristen long bipo na long nau? (b) I gat wanem as na sampela taim ol man i strongim bel bilong narapela ol tu i mas i gat man bilong strongim bel bilong ol?
15 Ol man i save mekim nogut long ol man i givim bel long Jehova na i stap gut long em. (2 Timoti 3:12) Tasol planti Kristen i bin kisim bikpela hevi tru. Long taim bilong yumi, ol man i bin bung bung na mekim nogut long sampela, na sampela i bin kisim taim long kalabus, ol banis nogut, ol kalabus bilong mekim wok, na ol i stap nogut tru. Sampela gavman i bin kirap na mekim nogut tru long ol Kristen, o ol i bin larim sampela lain i paitim ol Kristen na ol i no kotim ol. Na ol Kristen i bin kisim bikpela sik o bikpela hevi i bin kamap insait long famili bilong ol. Na tu, taim wanpela strongpela Kristen i helpim planti wanbilip i gat bikpela hevi, dispela inap putim hevi long em yet. Long kain taim olsem, man i strongim bel bilong narapela ating em tu i mas i gat man bilong strongim bel bilong em.
16. Taim bikpela hevi i painim Devit, olsem wanem em i kisim helpim?
16 Taim King Sol i wok long ranim Devit bilong kilim em i dai, Devit i beten askim God long helpim em: “God, mi laik yu harim prea bilong mi. . . . Mi stap wantaim yu na mi stap gut, olsem ol pikinini kakaruk i save hait na stap gut aninit long wing bilong mama kakaruk.” (Song 54:2, 4; 57:1) Olsem wanem? Devit i kisim sampela helpim? Yes, em i kisim. Long dispela taim em i mas kisim helpim, Jehova i mekim wok long profet Gat na pris Abiatar bilong givim tok long Devit bilong stiaim em, na Em i mekim wok long Jonatan, pikinini bilong Sol, bilong strongim dispela yangpela man Devit. (1 Samuel 22:1, 5; 23:9-13, 16-18) Na tu, Jehova i larim ol Filistia i kam long kantri na mekim pait, na dispela i mekim na Sol i lusim Devit na i go pait long ol Filistia.—1 Samuel 23:27, 28.
17. Taim bikpela hevi i painim Jisas, em i mekim wanem bilong kisim helpim?
17 Klostu long pinis bilong laip bilong Jisas hia long graun, bikpela hevi i painim em. Em i save gut long samting pasin bilong em inap mekim long nem bilong Papa bilong em long heven na long olgeta manmeri long bihain. Em i beten strong—em i “pilim hevi nogut tru.” God i wokim rot bilong strongim Jisas long dispela taim bilong hevi.—Luk 22:41-44.
18. Ol Kristen bilong pastaim ol man i mekim nogut tru long ol, ol i kisim wanem helpim long God bilong mekim gut bel bilong ol?
18 Taim kongrigesen long taim bilong ol aposel i kamap nupela pinis, ol man i mekim nogut tru long ol Kristen, olsem na olgeta manmeri bilong kongrigesen ol i ranawe lusim Jerusalem na i go nabaut. Ol aposel tasol i stap yet long Jerusalem. Ol birua i go insait long haus bilong ol manmeri na pulim ol i go. God i givim wanem tok long ol bilong mekim gut bel bilong ol? Tok bilong em long Baibel i strongim ol olsem “samting tru bilong [ol] i stap yet”—em laip long heven wantaim Krais—“na dispela bai i stap oltaim.” (Hibru 10:34; Efesus 1:18-20) Taim ol i wok yet long autim tok, ol i luksave olsem spirit bilong God i stap wantaim ol, na ol gutpela samting i painim ol, dispela tu i mekim ol i amamas.—Matyu 5:11, 12; Aposel 8:1-40.
19. Ol i mekim nogut tru long Pol, tasol em i gat wanem tingting long helpim em i kisim long God bilong mekim gut bel?
19 Bihain, Sol (Pol), em yet i bin mekim nogut tru long ol Kristen, em i kamap man em ol narapela i mekim nogut tru long em, long wanem, em i kamap Kristen. Long ailan Saiprus, wanpela marilaman i mekim sampela wok giaman bilong daunim wok autim tok bilong Pol. Long Galesia, ol birua i tromoi ston long Pol na ol i ting em i dai pinis. (Aposel 13:8-10; 14:19) Long Masedonia ol i paitim em long kanda. (Aposel 16:22, 23) Bihain long ol man i mekim nogut tru long em long Efesus, em i tok: “Bikpela hevi moa i bin daunim mipela, na i winim tru strong bilong mipela. Olsem na mipela i bin ting mipela bai i dai. Tru yet, mipela i bin pilim wankain hevi olsem man i harim jas i tok long em i mas i dai.” (2 Korin 1:8, 9) Tasol long dispela pas em i raitim long ol Korin, Pol i raitim gutpela tok i mekim gut bel bilong ol, em yumi lukim long paragraf 2 bilong dispela stori.—2 Korin 1:3, 4.
20. Long stori i kamap bihainim long dispela, bai yumi stori long wanem samting?
20 Olsem wanem yu ken insait long wok bilong mekim gut bel bilong ol narapela? Long nau i gat planti man i mas i gat narapela bilong mekim gut bel bilong ol—ating wanpela bikpela bagarap i bin kamap wantu na nogutim planti tausen manmeri, o wanpela hevi i bin kamap na i nogutim ol yet tasol. Long stori i kamap bihain long dispela, bai yumi stori long olsem wanem yumi ken mekim gut bel bilong ol narapela long kain taim olsem.
Yu Inap Tingim?
• I gat wanem as na samting God i mekim bilong mekim gut bel bilong yumi i winim tru ol samting ol narapela i mekim?
• Wanem samting bilong mekim gut bel bilong yumi i bin kamap long rot bilong Krais?
• Holi spirit i bin mekim gut bel bilong man olsem wanem?
• Stori long sampela samting i bin kamap bilong mekim gut bel bilong ol wokboi bilong God taim bikpela hevi i painim ol.
[Ol Piksa long pes 15]
Baibel i soim yumi olsem Jehova i bin mekim gut bel bilong ol manmeri bilong em long rot bilong kisim bek ol
[Ol Piksa long pes 16]
Jisas i bin mekim gut bel bilong ol man long rot bilong skulim ol, na oraitim sik bilong ol, na kirapim bek ol man i dai pinis
[Piksa long pes 18]
Jisas i bin kisim helpim long God