Mekim Gut Bel Bilong Man i Bel Hevi

“Bikpela yet i . . . makim mi bilong . . . strongim bel bilong ol manmeri i sori na i krai.”​​—⁠AISAIA 61:​1, 2.

1, 2. Yumi mas mekim gut bel bilong husat? Na bilong wanem yumi mas mekim olsem?

JEHOVA, God bilong mekim gut bel bilong olgeta man, em i lainim yumi long tingim ol man taim hevi i painim ol. Em i lainim yumi long “strongim bel bilong ol man i save pret” na mekim gut bel bilong ol man i krai sori. (1 Tesalonaika 5:​14) Yumi save mekim olsem long ol wanlotu i gat hevi. Na yumi mekim tu long ol man i stap ausait long kongrigesen, maski ol i no bin kamapim olsem ol i laikim yumi.​​—⁠Matyu 5:​43-​48; Galesia 6:​10.

² Jisas Krais i ritim wanpela tok profet na em i tok dispela i makim em yet: “Spirit bilong God, Bikpela i kam i stap long mi, long wanem, Bikpela yet i . . . makim mi bilong i go bringim gutpela tok bilong en long ol rabisman. Na em i salim mi i kam long pinisim bel hevi bilong ol man i stap wantaim bikpela wari, na long . . . strongim bel bilong ol manmeri i sori na i krai.” (Aisaia 61:​1, 2; Luk 4:​16-​19) Longtaim pinis ol Kristen long nau God i bin makim ol long holi spirit ol i save dispela em wanpela wok ol tu i mas mekim, na “ol arapela sipsip” i amamas long helpim ol long mekim dispela wok.​​—⁠Jon 10:⁠16.

3. Taim ol man i askim, “Bilong wanem God i larim ol bikpela bagarap i kamap?,” yumi ken mekim wanem bilong helpim ol?

³ Taim ol bikpela bagarap i kamap na ol man i kisim bel hevi, planti ol i askim, ‘Bilong wanem God i larim ol bikpela bagarap i kamap?’ Baibel i bekim klia dispela askim. Tasol sapos man i no bin stadi tumas long Baibel, ating sampela hap taim i mas lus pastaim bambai em i ken kisim gut ol tok i bekim dispela askim. Ol buk bilong ol Witnes Bilong Jehova inap helpim em.a Tasol samting yumi ken mekim pastaim, na sampela i bin kisim helpim long dispela rot, em yumi ken opim Baibel na kamapim wanpela skripsa olsem Aisaia 61:​1, 2​—⁠dispela skripsa i tokaut olsem God i gat laik long ol man i mas kisim samting bilong mekim gut bel bilong ol.

4. Olsem wanem wanpela Witnes long Polan i bin helpim wanpela skulmeri i bel hevi? Olsem wanem dispela ekspiriens inap helpim yu yet long helpim ol narapela?

⁴ Ol yangpela, na ol lapun tu, i mas i gat samting bilong mekim gut bel bilong ol. Long Polan, wanpela skulmeri i bel hevi em i askim wanpela pren long givim sampela gutpela tok long em. Long gutpela pasin isi, dispela pren, em wanpela Witnes Bilong Jehova, i givim sampela askim long em na em i kisim save olsem dispela meri em i gat planti askim na i gat planti samting em i gat tupela tingting long en, olsem: “Bilong wanem i gat planti pasin nogut? Bilong wanem ol man i kisim pen na hevi? I gat wanem as na susa bilong mi, em hap skin bilong em i dai pinis, em i kisim pen na hevi? Bilong wanem klok bilong mi i gat sik? Sios i tok em laik bilong God. Tasol sapos olsem, orait mi no ken bilip moa long em!” Long tingting Witnes i beten long Jehova, na nau em i tok: “Mi amamas yu bin kamapim ol dispela askim long mi. Bai mi traim long helpim yu.” Orait nau Witnes i kamapim olsem taim em i pikinini em tu i gat tupela tingting long sampela samting na ol Witnes Bilong Jehova i bin helpim em. Em i tok: “Mi kisim save olsem God i no mekim na ol man i kisim pen na hevi. Em i laikim tru ol man, na em i laik bai ol gutpela samting tasol i ken painim ol, na klostu em bai kamapim planti bikpela senis hia long graun. Sik, ol hevi bilong lapun, na dai, ol dispela samting bai pinis olgeta, na ol man i bihainim tok bilong God bai stap oltaim​​—⁠hia long dispela graun yet.” Witnes i soim em ol tok bilong Kamapim Tok Hait 21:​3, 4; Jop 33:25; Aisaia 35:​5-7 na 65:​21-​25. Tupela i stori i go i go na bihain, meri i amamas na i tok: “Nau mi save i gat wanem as na mi stap. Inap mi kam lukim yu gen?” Witnes i kirap mekim Baibel-stadi wantaim em tupela taim long olgeta wik.

Mekim Wok Long Baibel

5. Taim yumi kamapim sampela tok bilong mekim isi bel bilong man, wanem samting bai mekim gut bel bilong em?

⁵ Taim yumi wok long mekim gut bel bilong narapela, i stret yumi kamapim sampela tok bilong mekim isi bel bilong em. Ol tok yumi mekim na krai bilong nek i mas kamapim klia olsem yumi sori tru long dispela man i bel hevi. Yumi no inap mekim olsem long rot bilong mekim ol tok nating. Baibel i tok: “[Ol tok] ol i bin raitim long buk bilong God, em . . . i bilong strongim bel bilong yumi na mekim yumi sanap strong na wetim God i kisim yumi.” (Rom 15:⁠4) Olsem na long wanpela taim i stret, yumi ken helpim em long save Kingdom bilong God em i wanem samting, na yumi ken opim Baibel na soim em ol samting Kingdom bai mekim bilong stretim ol hevi bilong nau. Bihain yumi ken helpim em long save i gat wanem as na yumi inap bilip tru long dispela samting. Long dispela rot, bai yumi mekim gut bel bilong em.

6. Yumi mas helpim ol man long save long wanem ol samting bambai ol tok bilong Baibel bilong mekim gut bel bilong ol i ken helpim tru ol?

⁶ Taim yumi kamapim ol tok bilong mekim gut bel bilong man, bilong dispela i ken helpim tru em, em i mas save long trupela God​—⁠olsem em i wanem kain Man, na ol tok promis bilong em i save kamap tru. Taim yumi wok long helpim wanpela man i no lotu long Jehova, i gutpela sapos yumi helpim em long save long ol dispela samting. (1) Ol tok long Baibel bilong mekim gut bel bilong man, dispela i kam long Jehova, em trupela God. (2) Jehova em Man i Gat Olgeta Strong na em Man bilong wokim heven na graun. Em i God bilong laikim tru yumi na gutpela pasin sori na tok i tru i pulap long em. (3) Yumi inap kisim strong long karim ol hevi sapos yumi kam klostu long God long rot bilong kisim stretpela save i stap long Baibel, em Tok bilong em. (4) I gat ol skripsa long Baibel i stret long ol hevi i painim ol man.

7. (a) Taim yu kolim dispela tok, “God bilong mekim isi bel bilong olgeta man i gat hevi,” dispela inap helpim man olsem wanem? (b) Yu ken mekim wanem bilong mekim gut bel bilong man em i luksave olsem em i bin mekim rong?

⁷ Sampela i bin strongim bel bilong ol man i save pinis long Baibel, long rot bilong ritim 2 Korin 1:​3-7. Taim ol i ritim, ol i bin kolim strong dispela hap tok, “God bilong mekim isi bel bilong olgeta man i gat hevi.” Dispela skripsa inap helpim man long save olsem em i mas stadi moa long Baibel, long wanem, long rot bilong Baibel em inap kisim ol tok bilong mekim gut bel bilong em. Na dispela skripsa i ken stap olsem as bilong sampela tok moa yumi ken mekim long narapela taim bihain. Sapos man i bin mekim sampela rong na em i pilim olsem dispela em i as bilong ol hevi bilong em, yu ken tokim em olsem 1 Jon 2:​1, 2 na Song 103:​11-​14 inap strongim bel bilong em, tasol taim yu mekim olsem, no ken mekim long pasin bilong skelim em olsem jas. Long ol dispela rot yumi save mekim gut bel bilong man olsem God i save mekim.

Hevi Bilong Pait na Mani

8, 9. Olsem wanem yumi ken mekim gut bel bilong man em pasin pait i bin givim pen na hevi long em?

⁸ Pait na pasin raskol i bin givim hevi long planti milion manmeri na bagarapim i stap bilong ol. Olsem wanem yumi ken mekim gut bel bilong ol?

⁹ Taim ol lain i pait, ol trupela Kristen i save was gut na bai ol toktok na pasin bilong ol i no ken sapotim liklik wanpela lain. (Jon 17:16) Tasol ol i mekim wok long Baibel bilong soim olsem ol pasin nogut bilong nau i no ken i stap oltaim. Ating ol i ritim Sindaun 6:​16, 17 na bai man i ken save Jehova i gat wanem tingting long ol man i laikim pasin pait, o Song 37:​1-4 bilong soim olsem yumi no ken bekim pe nogut​—⁠yumi mas bilip long God tasol. Tok bilong Song 72:​12-​14 i soim olsem Man i Winim Solomon, Jisas Krais, nau em i mekim wok king long heven, em i gat wanem tingting long ol man i no gat asua em pasin pait i bin givim pen na hevi long ol.

10. Sapos inap planti yia yu bin kisim hevi bilong ol pait, olsem wanem ol dispela skripsa long paragraf i ken mekim gut bel bilong yu?

¹⁰ Sampela manmeri i bin karim hevi bilong planti pait taim ol narapela narapela lain i laik kamap bos ol i pait wantaim. Ol dispela manmeri i ting olsem pait na ol hevi bilong en em samting ol i no inap abrusim. Ol i ting i gat wanpela rot tasol bilong helpim ol, em ol i mas ranawe i go long narapela kantri. Planti ol i trai long ranawe, tasol ol i no inap, na planti i bin lusim laip bilong ol taim ol i traim long mekim olsem. Planti man husat i kamap pinis long narapela kantri ol i luksave olsem ol i bin lusim ol hevi bilong ol, tasol nau ol i gat ol nupela hevi. Ating yumi ken mekim wok long Song 146:​3-6 bilong helpim kain man olsem long bilip long samting i winim pasin bilong lusim kantri na i go stap long narapela kantri. Tok profet long Matyu 24:​3, 7, 14 o 2 Timoti 3:​1-5 inap helpim ol long save gut tru long mining bilong ol samting i painim ol, olsem yumi stap long pinis bilong dispela pasin bilong nau. Ol skripsa olsem Song 46:​1-3, 8, 9 na Aisaia 2:​2-4 inap helpim ol long save olsem ol inap wetim wanpela gutaim tru i kamap long bihain.

11. Wanem sampela skripsa i bin mekim gut bel bilong wanpela meri long Wes Afrika? Bilong wanem ol dispela skripsa i bin helpim em?

¹¹ Long taim pait i stap long Wes Afrika, ol bulet i flai nabaut na wanpela meri i ranawe lusim haus bilong em. Bihain em i save pret pret na bel hevi olgeta taim. Bihain, taim em wantaim famili bilong em i stap long narapela kantri, man bilong em i kukim setifiket bilong marit bilong ol long paia, na salim meri bilong em i gat bel na pikinini man bilong ol i gat 10-pela krismas i go, na em i kamap wanpela pris. Taim ol Witnes i soim em Filipai 4:​6, 7 na Song 55:​22, wantaim sampela stori bilong Wastaua na Kirap! i kamapim ol tok bilong Baibel, nau bel bilong em i stap isi na i stap bilong em i gat as bilong en.

12. (a) Olsem wanem ol skripsa inap helpim ol man i gat hevi long mani? (b) Olsem wanem wanpela Witnes long Esia i bin helpim wanpela meri?

¹² Hevi bilong mani tu i bin bagarapim i stap bilong planti milion manmeri. Sampela taim as bilong dispela samting em pait na ol hevi i kamap bihain long pait. Na sampela taim ol lo gavman i putim i no gat gutpela tingting long en na pasin mangal na giaman bilong ol bikman, dispela i mekim na ol man i bin lusim olgeta mani bilong ol i stap long beng na haus tu bilong ol. Tasol sampela i no bin holim planti samting bilong dispela graun. Taim ol dispela kain man i save olsem God bai helpim ol man i bilip tru long em na em bai kamapim stretpela pasin long graun we ol man i ken amamas long wok bilong ol yet, dispela i save mekim gut bel bilong ol. (Song 146:​6, 7; Aisaia 65:​17, 21-​23; 2 Pita 3:​13) Taim wanpela Witnes long wanpela kantri long Esia i harim wanpela meri i tok em i tingting planti long hevi bilong mani i kamap long kantri, Witnes i tokim em dispela kain hevi i save kamap long olgeta hap bilong graun. Witnes i stori long Matyu 24:​3-​14 na Song 37:​9-​11 na dispela i kirapim meri long stadi long Baibel.

13. (a) Taim ol tok promis ol man i wet long en i no bin kamap tru, yumi ken mekim wanem wok long Baibel bilong helpim ol? (b) Sapos ol man i pilim olsem ol pasin nogut i makim olsem i no gat God i stap, yumi ken mekim wanem bilong helpim ol?

¹³ Taim ol man i bin karim pen na hevi inap planti yia o ol i bel hevi, long wanem, ol tok promis ol i wet long en i no bin kamap tru, ating ol i wankain olsem ol Israel long Isip em ‘hatwok bilong ol i mekim tingting bilong ol i nogut tru’ na ol i no harim tok. (Kisim Bek 6:⁠9) Ating yu ken soim ol olsem wanem Baibel inap helpim ol long karim ol hevi bilong nau na long abrusim ol hevi i save bagarapim nating i stap bilong planti man. (1 Timoti 4:8b) Ating sampela i tingim sindaun nogut bilong ol yet em i makim olsem i no gat God i stap o God i no tingim ol. Ating yu ken soim sampela skripsa long ol bilong helpim ol long save olsem God i bin givim helpim long ol man, tasol planti i no laik kisim.​​—⁠Aisaia 48:​17, 18.

Guria na Bikpela Win na Ren

14, 15. Taim wanpela bikpela bagarap i kamap na bel bilong planti man i bagarap stret, ol Witnes Bilong Jehova i bin mekim wanem bilong soim olsem ol i tingim ol?

¹⁴ Bikpela win na ren, guria, paia, bom i pairap, ol dispela samting inap kamapim bikpela bagarap. Ating planti manmeri i krai sori. Yumi ken mekim wanem bilong helpim ol?

¹⁵ Ol man i mas save olsem i gat ol narapela i tingim tru ol. Bihain long pasin teroris i kamap long wanpela kantri, bel bilong planti man i bagarap stret. Planti i gat sampela famili o pren bilong ol i dai, o man i bin lukautim ol long kaikai samting. Wok mani bilong ol o samting i bin helpim ol long i stap bel isi, dispela tu i lus. Ol Witnes Bilong Jehova i bin wok long helpim ol​—⁠ol i kamapim sampela tok bilong mekim isi bel bilong ol na sampela gutpela tok bilong Baibel tu. Planti i pilim tru dispela gutpela pasin bilong tingim ol.

16. Taim bagarap i kamap long wanpela hap long El Salvado, i gat wanem as na wok autim tok bilong ol Witnes bilong dispela hap i helpim gut ol man?

¹⁶ Long El Salvado wanpela bikpela guria i bin kamap long yia 2001 na bihain long en graun malumalum i bin kam daun na kilim i dai planti manmeri. Insait long dispela lain i dai, wanpela em pikinini man bilong wanpela Witnes, em i gat 25 krismas, wantaim tupela susa bilong meri em i laik marit long em. Mama bilong dispela man, wantaim dispela meri, ol i kirap kwik na mekim wok autim tok. Planti i tokim ol olsem, em God tasol i bin kisim ol dispela lain i dai o em laik bilong God na dispela samting i kamap. Dispela tupela Witnes i kamapim tok bilong Sindaun 10:22 bilong soim olsem God i no laik bai yumi kisim pen. Ol i ritim Rom 5:​12 bilong soim olsem dai i bin kamap long rot bilong sin bilong wanpela man, na i no long laik bilong God. Na tu, ol i kamapim tok bilong Song 34:​18, Song 37:​29, Aisaia 25:​8, na KTH 21:​3, 4 bilong mekim gut bel bilong ol. Ol man i putim gut yau, na planti i redi long harim tok, long wanem, dispela tupela meri yet i gat sampela famili bilong ol i bin i dai long dispela bagarap, na tupela i kirapim planti nupela Baibel-stadi.

17. Long taim bilong bikpela bagarap, yumi ken givim wanem kain helpim?

¹⁷ Taim bikpela bagarap i kamap, ating bai yu lukim wanpela em skin bilong em i bagarap na em i mas kisim kwik helpim. Ating yu ken ring long dokta, o helpim em long go long haus sik, o mekim sampela wok bilong helpim em long kisim kaikai na ples slip. Long 1998, taim wanpela bikpela bagarap i kamap long Itali, wanpela niusman i luksave olsem ol Witnes Bilong Jehova “i save mekim gutpela wok bilong helpim gut ol man i karim pen na hevi, maski ol i bilong wanem lotu.” Long sampela hap, ol samting Baibel i bin tok profet bai kamap long taim bilong las de, ol dispela samting i bin kamapim bikpela hevi. Long kain hap olsem, ol Witnes Bilong Jehova i save kamapim ol dispela tok profet, na ol i mekim gut bel bilong ol man long rot bilong kamapim ol tok bilong Baibel i tok Kingdom bilong God bai kamapim gutaim tru.​​—⁠Sindaun 1:​33; Maika 4:⁠4.

Taim Wanpela Long Famili i Dai

18-20. Taim wanpela long famili i dai, yu ken tok wanem o mekim wanem bilong mekim gut bel bilong man?

¹⁸ Long olgeta de, planti milion manmeri i krai sori long i dai bilong wanpela man ol i laikim tumas. Taim yu autim tok o mekim ol wok yu save mekim long olgeta de, ating bai yu bungim sampela man i krai sori. Yu ken mekim wanem tok o mekim wanem bilong mekim gut bel bilong ol?

¹⁹ Olsem wanem? Pes bilong dispela man i soim olsem bel bilong em i bagarap stret? Ol wanblut i krai sori ol i pulap long haus? Ating i gat planti tok yu inap kamapim, tasol yu mas tingting gut na bihainim gutpela tingting. (Saveman 3:​1, 7) Ating i gutpela sapos yu tok sori, na givim wanpela buk bilong Baibel (buklet o magasin o liklik nius) long ol i stret long dispela hevi bilong ol, na sampela de bihain go bek na bai yu ken save yu inap givim sampela helpim moa long ol o nogat. Long wanpela taim i stret long ol, tokim ol yu laik kamapim sampela gutpela tok bilong Baibel bilong strongim bel bilong ol. Dispela inap mekim isi bel bilong ol na strongim ol. (Sindaun 16:24; 25:11) Yu no inap kirapim bek man i dai pinis, olsem Jisas i bin mekim, nogat. Tasol yu ken kamapim ol tok bilong Baibel i stori long man i dai pinis i stap olsem wanem. Tasol was gut, ating dispela i no gutpela taim long yu ken daunim ol tingting kranki bilong em. (Song 146:4; Saveman 9:​5, 10; Esekiel 18:⁠4) Yu ken ritim ol tok promis bilong Baibel long kirap bek. (Jon 5:​28, 29; Aposel 24:15) Yu ken stori long mining bilong ol, na ating yu ken opim Baibel na kamapim stori bilong wanpela kirap bek. (Luk 8:​49-​56; Jon 11:​39-​44) Na tu, kamapim ol gutpela pasin bilong dispela gutpela God em i bin givim yumi dispela gutpela samting yumi ken wet long en. (Jop 14:​14, 15; Jon 3:​16) Stori long olsem wanem ol dispela tok i bin helpim yu yet na i gat wanem as na yu bilip strong long en.

²⁰ Sapos yu singautim man i krai sori long kam long Haus Kingdom, ating dispela inap helpim em long save long ol man ol i laikim tru ol neiba bilong ol na i save long rot bilong strongim bel bilong narapela. Wanpela meri long Swiden i bin luksave olsem dispela em samting em i bin wok longtaim tru long painim.​​—⁠Jon 13:35; 1 Tesalonaika 5:​11.

21, 22. (a) Bilong mekim gut bel bilong man, yumi mas mekim wanem? (b) Olsem wanem yumi ken mekim gut bel bilong man em i save pinis long ol tok bilong Baibel?

²¹ Olsem wanem? Taim yu save olsem narapela i krai sori, maski em i stap insait o ausait long kongrigesen Kristen, sampela taim yu no save long wanem samting yu ken mekim o toktok long en? Tok Grik em planti taim long Baibel ol i tanim olsem “mekim gut bel,” i olsem “singautim man i kam sanap klostu long yu.” Olsem na bilong mekim gut bel bilong narapela i krai sori, yu mas redi long sanap klostu long em.​​—⁠Sindaun 17:⁠17.

²² Olsem wanem sapos man yu laik mekim gut bel bilong em i save pinis long tok bilong Baibel long indai, na pe bilong baim bek ol man, na kirap bek? Taim wanpela pren i gat wankain bilip olsem dispela man i krai sori em i stap wantaim em, dispela samting yet inap helpim gut em. Sapos man i laik toktok, orait putim gut yau. No ken pilim olsem yu mas kamapim planti toktok. Sapos yu ritim sampela skripsa, ritim olsem ol tok bilong en i ken strongim bel bilong yutupela wantaim. Kamapim olsem yutupela wantaim i bilip strong olsem ol dispela promis bai kamap tru. Sapos yu kamapim sori bilong God na ol gutpela tok i tru i stap long Baibel, bai yu inap helpim ol man i krai sori long kisim strong long ol tok i kam long dispela “God bilong mekim isi bel bilong olgeta man,” em Jehova.​​—⁠2 Korin 1:⁠3.

[Futnot]

Yu Laik Bekim Wanem Tok?

• Planti man i tok husat i as bilong ol hevi? Olsem wanem yumi ken helpim ol?

• Ating yumi ken mekim wanem bilong helpim ol man na bai ol tok bilong Baibel i ken mekim gut bel bilong ol?

• Wanem ol samting long hap bilong yu i mekim na ol man i bel hevi? Yu ken mekim wanem bilong mekim gut bel bilong ol?

[Ol Piksa long pes 23]

Kamapim ol gutpela tok bilong mekim gut bel bilong man long taim bilong hevi

[Kredit Lain]

Refugee camp: UN PHOTO 186811/J. Isaac

[Piksa long pes 24]

Taim wanpela pren i stap, dispela samting yet inap mekim gut bel bilong narapela