Strong Bilong Jehova Inap Mekim Gut Bel Bilong Man
“Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi amamas.”—SONG 94:19.
OLGETA man i bel hevi i stap, tok bilong Baibel inap mekim gut bel bilong ol. Olsem na wanpela buk (The World Book Encyclopedia) i tok, “Planti manmeri i lukluk long Baibel bilong mekim gut bel bilong ol na bilong helpim ol long wetim gutpela samting bai kamap long bihain na stiaim ol long taim bilong hevi.” Bilong wanem?
Long wanem, spirit bilong Man bilong wokim yumi i as bilong olgeta tok bilong Baibel, na em i “God bilong mekim isi bel bilong olgeta man i gat hevi,” na “long olgeta hevi i kamap long mipela, em i save mekim isi bel bilong mipela.” (2 Korin 1:3, 4) Em i God bilong mekim gut bel bilong ol man. (Rom 15:5) Jehova i stap olsem gutpela piksa taim em i stretim rot bambai yumi olgeta inap i stap gut. Jehova i bin salim dispela wanpela Pikinini bilong em, Jisas Krais, i kam long graun bambai yumi ken wetim gutpela samting bai kamap bihain na kisim bel isi. Jisas i lainim ol man: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Baibel i stori long Jehova olsem: “Olgeta de em i save karim ol hevi bilong yumi. God wanpela tasol i save kisim bek yumi.” (Song 68:19) Ol man i bilip long God ol inap tok olsem: “Oltaim mi save pilim Bikpela i stap klostu long mi. Em i stap klostu na i givim strong long mi, olsem na i no gat wanpela samting i ken mekim mi pret na guria.”—Song 16:8.
Ol dispela tok bilong Baibel i kamapim klia olsem Jehova i laikim tru yumi ol man bilong graun. I klia tru olsem em i gat bikpela laik long mekim gut bel bilong yumi taim yumi stap bel hevi, na tu em i gat strong inap long mekim. “Bikpela i save strongim ol man i no gat strong, na taim bun bilong ol i slek pinis, em i save mekim ol i stap strong.” (Aisaia 40:29) Strong bilong Jehova inap mekim gut bel bilong yumi olsem wanem?
Lukaut Bilong Jehova i Save Mekim Gut Bel
Man bilong raitim Song i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu. Bai em i no larim wanpela samting i bagarapim ol stretpela man.” (Song 55:22) Yes, God Jehova i save tingim ol manmeri bilong graun. Aposel Pita i strongim ol Kristen long taim bilong em olsem: “God i save wari long yupela.” (1 Pita 5:7) Jisas Krais i makim gut tingting bilong God long laip bilong ol manmeri bilong graun taim em i tok: “Yupela i save, ol man i save baim 5-pela liklik pisin long 2 toea tasol. Na God i no save lusim tingting long wanpela bilong ol dispela liklik pisin. Na tu, God i kaunim pinis olgeta gras long het bilong yupela, na em i save gut tru long yupela. Olsem na yupela i no ken pret. Yupela i winim planti lain liklik pisin.” (Luk 12:6, 7) Jehova i save tingim tru yumi, olsem na em i save long olgeta liklik liklik samting bilong yumi. Em i save long sampela samting bilong yumi em yumi yet i no save long en.
Taim ol Witnes Bilong Jehova i painim dispela yangpela pamukmeri Svetlana, em yumi bin stori long em pastaim, em i gat tingting long kilim i dai skin bilong em yet, tasol em i pilim pasin bilong Jehova bilong tingim ol man na dispela i bin mekim gut bel bilong em. Em i kirap stadi long Baibel na dispela i helpim em long save olsem Jehova em i wanpela man tru i save tingim i stap bilong em, em i stap gutpela o nogat. Dispela save i mekim bel bilong em i amamas na em i senisim pasin bilong em na dediket long God. Nau em i amamas long em yet na em i ting em i no samting nating tasol, na dispela i helpim em long sanap strong maski em i gat sampela hevi long nau. Em i tok, “Mi save Jehova i no inap lusim mi. Na tok bilong 1 Pita 5:7 i tru. Em i tok: ‘God i save wari long yupela. Olsem na olgeta hevi yupela i karim, yupela i mas putim long han bilong en.’ ”
Bilip Baibel i As Bilong En Inap Mekim Gut Bel
God i save mekim gut bel bilong man long rot bilong ol tok i stap insait long Baibel. Em ol tok i helpim yumi long wetim ol gutpela samting bai kamap bihain. Aposel Pol i tok: “Olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Pol i helpim yumi long save, pasin bilong wetim ol gutpela samting long bihain na pasin bilong mekim gut bel, tupela pasin i poroman wantaim. Em i tok: “Bikpela bilong yumi Jisas Krais, wantaim God Papa bilong yumi, i laikim yumi tru. Na em i marimari long yumi na i mekim bel bilong yumi i stap gut oltaim oltaim. Na em i helpim yumi long bilip na wetim God i mekim gut tru long yumi. Na em i ken strongim bel bilong yupela, na helpim yupela long bihainim tru olgeta gutpela pasin na long mekim ol gutpela tok.” (2 Tesalonaika 2:16, 17) Laip i stap gut oltaim long paradais long graun i insait long dispela gutpela samting yumi wetim.—2 Pita 3:13.
Pasin bilong bilip long dispela gutpela samting bai kamap bihain i bin strongim bel bilong dispela man Laimonis, em tupela lek i dai na em i save dring long olgeta taim. Em i kaunim ol buk na nius bilong ol Witnes Bilong Jehova, em Baibel i as bilong ol tok bilong en, na em i amamas long kisim save olsem Kingdom bilong God bai bosim dispela graun na olgeta sik bilong em bai pinis. Long Baibel em i kaunim dispela gutpela tok promis: “Orait na ol aipas bai ol i lukluk, na ol yaupas bai ol i harim toktok. Na ol lek nogut bai ol i kalap olsem ol dia, na ol mauspas bai ol i singaut na amamas.” (Aisaia 35:5, 6) Bilong winim mak bilong i stap long Paradais, Laimonis i bin senisim planti pasin bilong em. Em i lusim pasin bilong dring na ol man i sindaun klostu na ol man i save long em ol i lukim pasin bilong em i senis. Nau em i save mekim planti Baibel-stadi wantaim ol man na em i save mekim gut bel bilong ol long rot bilong ol gutpela tok i stap long Baibel.
Wok Bilong Beten
Taim yumi bel hevi na pilim nogut, pasin bilong beten long Jehova inap mekim gut bel bilong yumi. Nau bai yumi no bel hevi moa. Taim yumi beten i stap ating bai yumi inap tingim sampela gutpela tok i stap long Baibel. Wanpela longpela Song tru long Baibel i kain olsem wanpela naispela beten. Man i bin raitim dispela Song em i singsing olsem: “Bikpela, mi save ting long tok bipo yu bin givim mi, na dispela tok i givim strong long mi.” (Song 119:52) Taim wanpela hevi nogut tru i painim yumi, olsem bikpela sik samting, ating bai i no gat wanpela samting inap stretim dispela hevi. Long strong bilong yumi yet yumi no save bai yumi mekim wanem. Planti ol i mekim olgeta samting ol inap long mekim na nau ol i beten long God na dispela i mekim gut bel bilong ol, na sampela taim samting bilong stretim dispela hevi em i kamap, em pastaim ol i no bin ting em bai kamap.—1 Korin 10:13.
Beten i bin mekim gut bel bilong Pat taim ol i bin hariap karim em i go long haus sik. Taim em i kamap orait gen em i tok: “Mi bin beten long Jehova na mi kisim save olsem mi mas larim laip bilong mi i stap long han bilong em na bilip olsem em bai mekim samting i stret long laik bilong em. Long dispela taim bel bilong mi i stap isi na mi kisim dispela bel isi God i save givim, olsem Filipai 4:6, 7 i stori long en.” Dispela ol ves inap mekim gut bel bilong yumi olgeta! Long dispela ves Pol i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.”
Spirit Holi i Save Mekim Gut Bel Bilong Yumi
Long nait paslain long i dai bilong em, Jisas i tok klia long ol aposel bilong em olsem klostu em bai lusim ol. Dispela tok i mekim ol i bel hevi na tingting planti. (Jon 13:33, 36; 14:27-31) Jisas i save ol i mas i gat samting bilong mekim gut bel bilong ol, olsem na em i tok promis long ol olsem: “Bai mi askim Papa, na em bai i givim yupela narapela Helpim bilong strongim yupela. Na em bai i stap wantaim yupela oltaim oltaim.” (Jon 14:16) Jisas i stori long spirit holi bilong God. Spirit bilong God i bin mekim gut bel bilong ol long taim ol traim i painim ol na em i strongim ol long mekim yet laik bilong God.—Aposel 4:31.
Klostu man bilong Angie i bin i dai taim wanpela bikpela bagarap i painim em, tasol Angie inap karim dispela pen na ol bikpela hevi i bin painim em long dispela taim. Wanem samting i bin helpim em? Em i tok: “Sapos spirit holi bilong Jehova i no bin strongim mipela bai mipela i no inap stap strong na winim ol dispela hevi. Strong bilong Jehova i bin kamap ples klia taim em i strongim mipela long karim ol dispela hevi, maski mipela yet i no gat strong. Em i stap olsem ples hait bilong mipela long taim bilong hevi.”
Ol Brata Sista Inap Mekim Gut Bel Bilong Yumi
Insait long kongrigesen bilong Jehova i gat ol brata sista bilong mekim gut bel bilong yumi, maski wanem kain pen na hevi i painim yumi. Dispela lain brata i save strongim na helpim ol narapela long kongrigesen long ol samting bilong spirit. Insait long dispela lain yu inap painim ol pren i laikim na tingim yu tru na ol i laik mekim gut bel bilong yu taim ol hevi i painim yu.—2 Korin 7:5-7.
Ol i lainim ol manmeri insait long kongrigesen Kristen olsem: “Wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:10) Save ol i kisim long Baibel i kirapim ol long givim bel long ol arapela na laikim ol tru olsem ol brata bilong ol stret. (Rom 12:10; 1 Pita 3:8) Ol brata sista spirit long kongrigesen ol i gat gutpela pasin, na pasin bilong mekim gut bel bilong man, na pasin sori.—Efesus 4:32.
Ol brata sista long kongrigesen Kristen i bin strongim na mekim gut bel bilong Joe na Rebecca, em pikinini man bilong ol i bin i dai. Ol i tok: “Jehova wantaim kongrigesen bilong em i gat pasin sori ol i bin helpim mipela long karim dispela hevi. Planti i bin salim kat o pas long mipela o ring long telefon. Mipela pilim tru dispela pasin bilong laikim ol narapela tru olsem ol i brata bilong mipela stret na em i samting i gutpela tumas. Taim dispela hevi i kamap, mipela stap olsem hap longlong, tasol ol brata sista bilong ol kongrigesen i stap klostu long mipela ol i bin helpim mipela na redim kaikai bilong mipela na klinim haus bilong mipela.”
Bel Bilong Yu i Ken Stap Isi!
God i redi long stap olsem ples bilong hait long en long taim ol hevi bilong yumi i kain olsem bikpela win, na bel hevi bilong yumi i bagarapim yumi olsem bikpela ren na ren ais. Wanpela man bilong raitim Song i stori long pasin bilong Jehova long mekim gut bel bilong man, olsem: “Bai em i karamapim yu gut, olsem [pisin] i karamapim ol pikinini long wing bilong en. Yu ken hait gutpela tumas aninit long wing bilong Bikpela, na bai em i was long yu.” (Song 91:4) Ating em i mekim tok piksa long wanpela tarangau i save olsem birua i stap na em i karamapim ol pikinini bilong em long wing bilong em bilong haitim na lukautim ol. Tasol Jehova em i Man bilong lukautim tru olgeta man i kam long em bilong painim ples bilong hait long en.—Song 7:1.
Sapos yu gat laik long kisim sampela save moa long pasin na laik bilong God na pasin bilong em long mekim gut bel bilong man, mipela i laik kirapim yu long stadi long Baibel. Ol Witnes Bilong Jehova bai amamas long helpim yu long mekim olsem. Yes, strong bilong Jehova inap mekim gut bel bilong yu!
[Ol Piksa long pes 7]
Ol gutpela samting yumi wetim em Baibel i as bilong en, em inap mekim gut bel bilong yumi