I Gat Planti Wok Long Mekim Gut Bel Bilong Man!

“Ol man nogut i save daunim planti manmeri, na ol dispela manmeri i krai nogut tru. Tasol i no gat man bilong helpim ol.”​—⁠SAVEMAN 4:⁠1.

OLSEM WANEM? Yu wok long painim samting bilong mekim gut bel bilong yu? Bel hevi bilong yu i kain olsem wanpela blakpela klaut i karamapim skai na yu laik painim wanpela liklik hap san i brukim dispela tudak bilong mekim gut bel bilong yu? Ol samting i painim yu i samting nogut olsem kaikai i pait na yu laik painim liklik samting i swit bilong givim amamas long yu?

Long sampela taim yumi olgeta i mas i gat man bilong mekim gut na strongim bel bilong yumi, long wanem, i gat planti samting long i stap bilong yumi em inap mekim yumi bel hevi. Yumi olgeta mas i gat ples hait na man bilong holim yumi. Yumi sampela i kamap lapun na yumi no amamas long dispela samting. Sampela i bel hevi, long wanem, i stap bilong ol i no kamap gutpela olsem pastaim ol i ting em bai kamap. Na sampela i go lukim dokta na taim em i glasim ol em i tokaut olsem ol i gat bikpela sik, ol i kirap nogut long dispela.

Na tu, ol samting i bin kamap long taim bilong yumi i mekim na yumi mas i gat samting bilong mekim gut bel na bilong wetim gutpela samting i kamap bihain. Insait long dispela wan handet yia i go pinis, winim wan handet milion manmeri i dai long ol pait.a Klostu olgeta bilong ol dispela manmeri i gat papa na mama, brata na susa, man o meri bilong ol o pikinini bilong ol i krai i stap na ol i mas i gat samting bilong mekim gut bel bilong ol. Long nau winim wan bilion manmeri i stap rabis nogut tru. Planti manmeri bilong graun i no gat rot bilong kisim ol marasin samting. Long ol bikpela bikpela taun i gat planti milion pikinini ol papamama i lusim ol na ol i raun nating na ol i kisim drak na mekim pasin pamuk bilong kisim mani. Na i gat planti milion refyuji i stap long ol kem nogut.

Namba bilong ol man i dai long ol dispela pait samting inap kirapim tingting bilong yumi, tasol ol namba i no inap makim tru ol pen na hevi ol man i karim. Tingim Svetlana, em i wanpela meri bilong Bolkan, taim mama i karim em ol i stap rabis nogut tru.b Em i tok, “Bilong kisim mani papamama i salim mi i go long rot bilong singaut long mani na stil. Pasin insait long famili i go nogut olgeta na wanblut i mekim pasin sem long mi. Mi kisim wok long wanpela haus kaikai na mi save givim mani long mama bilong mi. Mama i tok sapos mi lusim wok mani bai em i kilim i dai em yet. Dispela ol samting i mekim na mi kamap wanpela pamukmeri taim mi gat 13 krismas tasol. Bihain liklik mi kisim bel na rausim bel. Taim mi gat 15 krismas, skin bilong mi i olsem meri i gat 30 krismas.”

Wanpela yangpela man bilong Latvia, nem bilong em Laimonis, em i tok em i save tingim ol samting nogut i bin painim em long bipo na dispela i mekim em i bel hevi, olsem na em i laik bai i gat samting bilong mekim gut bel bilong em. Taim em i gat 29 krismas em i kisim bagarap long ka na tupela lek bilong em i dai. Em i pilim olsem i no gat wanpela gutpela samting inap painim em, olsem na em i kirap dring planti. Faipela yia bihain em i stap nogut olgeta​​—⁠tupela lek i dai yet na em i kamap man bilong dring oltaim na em i ting i no gat wanpela gutpela samting bai painim em long bihain. Em inap kisim we sampela tok bilong mekim gut bel bilong em?

Na yumi ken tingim Angie. Ol dokta i mas katim kru bilong man bilong em tripela taim na dispela i mekim na pastaim hap skin bilong em i dai. Na faipela yia bihain long taim ol i bin katim em, em i kisim bikpela bagarap na klostu em i dai. Taim meri bilong em i lukim man bilong em i slip long haus sik na tingting bilong em i dai, long wanem em i kisim bikpela bagarap long het bilong em, meri i save bikpela hevi tru i laik painim famili. I stap bilong em wantaim famili bai i gat hatwok tru long en. Em bai kisim strong na helpim olsem wanem?

Long sampela yia i go pinis, wanpela taim Pat i kirap long moningtaim na em i mekim ol samting olsem em i save mekim long ol narapela de. Tasol ol samting i bin kamap long ol tripela de bihain em i no inap tingim. Bihain man bilong em i tokim em olsem pastaim bros bilong em i bin pen nogut tru na bihain klok bilong em i no wok liklik. Orait nau klok bilong em i kirap meknais hariap tru na bihain em i no meknais liklik. Em i no pulim win moa. Pat i tok, “I olsem mi dai pinis.” Tasol em i no dai olgeta. Em i mas i stap longpela taim long haus sik na em i tok, “Mi save pret taim ol i wok long skelim sik bilong mi, na mi pret moa yet taim ol i laik kirapim klok bilong mi long mekim wankain samting em i bin mekim taim em i bin bagarap pastaim.” Wanem samting inap mekim gut bel bilong em na strongim em long dispela taim nogut?

Pikinini man bilong Joe na Rebecca, em i gat 19 krismas, em i dai taim ka em i stap insait long en i bamim narapela ka. Tupela i tok: “I no gat narapela samting i bin bagarapim bel bilong mipela olsem dispela. Tru, mipela i bin krai wantaim sampela narapela taim ol i gat pren o famili i bin i dai, tasol bel bilong mipela i bagarap nogut tru long i dai bilong pikinini man bilong mipela yet.” Wanem samting inap mekim gut bel bilong man, em bel bilong em i bagarap nogut tru taim man o meri em i bin laikim tru em i dai?

Ol dispela manmeri yumi bin stori long ol wantaim sampela milion moa ol i bin painim samting i gutpela moa bilong mekim gut bel bilong ol. Yu tu inap painim helpim long dispela rot. Bilong mekim olsem, plis kaunim stori i kamap bihain long dispela.

[Ol Futnot]

[Ol Piksa Kredit Lain long pes 3]

UNITED NATIONS/PHOTO BY J. K. ISAAC

UN PHOTO 146150 BY O. MONSEN