Wanpela Bikpela Bung—Bai Yu Kam?

LONG wanpela bikpela de inap 3,500 yia bipo, God Jehova i tokim ol wan wan famili bilong ol Israel i kalabus long Isip long kilim yangpela sipsip na penim blut bilong en long tupela pos bilong dua bilong haus. Long dispela nait yet, ensel bilong God i abrusim olgeta haus i gat dispela blut long en, tasol em i kilim i dai olgeta namba wan pikinini bilong ol Isip. Bihain ol Israel i lusim Isip. Ol i makim dispela de bilong tingim long olgeta yia; ol i kolim Pasova.

Krais Jisas i mekim laspela Pasova wantaim ol aposel, na bihain tasol long dispela em i kirapim wanpela kaikai bilong tingim i dai bilong em olsem ofa. Em i givim bret long ol aposel na em i tok: “Yupela kisim na kaikai. Dispela em i bodi bilong mi.” Na em i givim kap wain na em i tok: “Yupela olgeta dring long dispela. Dispela em i blut bilong mi bilong mekim kontrak. Mi kapsaitim bilong tekewe sin bilong planti manmeri.” Na Jisas i tok tu: “Yupela i mas mekim olsem bilong tingim mi.” (Matyu 26:​26-28; Luk 22:​19, 20) Olsem na Jisas i bin tokim ol man i bihainim em long ol i mas mekim dispela bung bilong tingim i dai bilong em.

Long dispela yia, de bilong tingim indai bilong Jisas bai kamap long Trinde, Epril 19, bihain long taim san i go daun. Ol Witnes Bilong Jehova long olgeta hap bilong graun bai bung long dispela bikpela nait bilong mekim Memorial long pasin Jisas i laik ol disaipel i bihainim. Mipela i laik singautim yupela long kam bung wantaim mipela na tingim dispela samting. Plis askim ol Witnes Bilong Jehova long hap bilong yu long wanem taim na wanem ples ol bai mekim dispela bung.