Bilong Wanem Ol Gutpela Man i Karim Pen?
LONG YIA 1914 Namba Wan Pait i kamap. Wantu bikpela sik nogut ol i kolim taifas i kamap insait long wanpela bikpela banis ol i bin kalabusim sampela ami bilong ol birua long en long hap bilong Serbia. Dispela sik i kalap i go long ol manmeri bilong Serbia na 150,000 i dai insait long 6-pela mun tasol. Long Rasia long dispela taim bilong pait, inap 3 milion ol i dai long dispela sik. I stret yumi ken ting olsem planti gutpela man wantaim sampela famili bilong ol i bin i dai long dispela sik nogut.
Tasol i gat planti bagarap olsem i bin painim ol man. Ating wanpela long famili bilong yu yet i bin i dai long wanpela bikpela sik o long wanpela bagarap i bin painim em. Na ating yu save bel hevi taim sik nogut i painim wanpela stretpela man na em i karim bikpela pen long dispela. Na taim wanpela bagarap i kamap na wanpela gutpela man i dai—ating em i papa bilong wanpela famili—yu save pilim tru bel hevi bilong famili bilong em, a?
Planti man i ting, sapos wanpela man i save mekim gutpela pasin long ol man, i no stret em i mas karim pen. Na sampela i save ting, taim sik o bagarap i painim man, dispela i olsem mak na yumi ken save, em i man bilong mekim rong. Dispela em i tingting bilong 3-pela man i bin i stap olsem 3,600 yia i go pinis. Wanpela gutpela man nem bilong em Jop, em tu i bin i stap long dispela taim. Orait nau yumi ken stori long ol samting i bin kamap long dispela taim bipo na dispela bai helpim yumi long save long bekim bilong dispela askim, olsem: Bilong wanem ol gutpela man i save karim pen?
Jop i Karim Bikpela Pen
Dispela 3-pela man i tok ol i pren bilong Jop na ol i kam lukim em. Long dispela taim wanpela sik nogut i bin painim Jop na em i karim bikpela pen tru. Na 10-pela pikinini bilong em ol i dai long wanpela bagarap, na tu, olgeta samting bilong em i lus. Ol man bipo ol i save litimapim nem bilong em, tasol nau ol i nolaik tru long em. Na meri bilong em tu i no helpim em moa—em i tokim Jop long toknogutim God na em i ken i dai.—Jop 1:1–2:13; 19:13-19.
Inap 7-pela san na nait, dispela 3-pela man i lukim Jop i karim pen na ol i no toktok. Orait, bihain wanpela i kirap sutim tok long em na i tok, em i bin mekim pasin nogut na nau em i kisim strafe long dispela. Elifas i tokim Jop: “Yu inap tingim wanpela man i bin bihainim stretpela pasin na i no gat rong, em i bin bagarap na i dai? Ating nogat. Tasol mi bin lukim ol man i save mekim planti pasin nogut, na bihain planti hevi . . . i kamap long ol. I olsem man i planim gutpela kaikai long gaden, i kisim gutpela kaikai. Na man i planim kaikai nogut, i kisim kaikai nogut. God i save belhat long ol man i save mekim pasin nogut, na em i save bagarapim ol.”—Jop 4:7-9.
Em nau, Elifas i tok, Jop i bin mekim rong na God i mekim save long em. Long nau tu, sampela man i tok, taim ol bagarap i kamap, dispela em i rot bilong God long givim strafe long ol man i bin mekim rong. Tasol ol dispela hevi i painim Jop i no olsem strafe Jehova i givim long em, nogat; long wanem, bihain God i tokim Elifas: “Mi kros long yu na tupela pren bilong yu wantaim. Long wanem, yupela i no bin autim tok tru long pasin bilong mi olsem wokman bilong mi, Jop, i bin autim.”—Jop 42:7.
I No Asua Bilong God
Long nau planti milion manmeri i stap rabis nogut tru na ol i no gat kaikai, na yumi save, planti gutpela manmeri i insait long ol dispela lain. Sampela man i tok, em asua bilong God na ol i no gat kaikai. Tasol God i no gat asua long ol bikpela hangre i kamap. Em yet i Man bilong givim kaikai long ol man.—Song 65:9.
Sampela taim ol man i salim kaikai long ol ples i gat hangre, tasol sampela taim em asua bilong ol man na ol dispela kaikai i no kamap long dispela ples. Na ol bikpela pait i save mekim na hangre i kamap. Wanpela buk (The World Book Encyclopedia) i tok, ‘Long taim bilong pait bikpela hangre inap kamap sapos ol fama i lusim wok gaden bilong ol na ol i go insait long ami. Na sampela taim wanpela ami i save bagarapim kaikai em ol birua i bin putim i stap na ol kaikai i stap long gaden bilong ol na bai ol birua i no gat kaikai. Na long taim bilong bikpela pait long Naijiria (1967-1970) ol i laik salim kaikai i go long hap bilong Biafra, tasol ol birua i bin pasim rot na kaikai i no kamap. Olsem na bikpela hangre i kamap na ol i ting olsem wan milion Biafra i dai.’
Na long taim bilong Namba 2 Pait sampela man i kranki na ol i tok, em asua bilong God na planti gutpela man ol i karim pen na ol i dai. Tasol ol man yet i brukim lo bilong God na ol i birua birua na pait. Wanpela man i askim Jisas, wanem lo i namba wan. Jisas i tokim em: “Namba wan lo em i dispela, . . . ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na . . . long tingting bilong yupela na long strong bilong yupela.’ Na namba 2 lo em i dispela, ‘Yu mas laikim ol [narapela man] olsem yu laikim yu yet.’ ”—Mak 12:28-31.
Taim ol man i brukim lo bilong God na ol i kamapim pait na bagarapim planti man, yu ting i stret wanpela man i ken tok, em asua bilong God na ol dispela man i karim bikpela pen na ol i dai? Sapos wanpela papa i tokim ol pikinini bilong em long ol i no ken pait, tasol ol i sakim tok bilong em, orait yu ting em asua bilong em sapos ol dispela pikinini i kisim sampela bagarap? Nogat, a? Na i olsem tasol long God—em i no gat asua long bikpela pen na hevi em planti man i kisim taim ol man i brukim lo bilong em.
Tru, sampela taim pen na hevi i save painim ol man taim ol i sakim ol lo bilong Jehova na mekim ol samting i no stret. Tasol ol bagarap i save kamap olsem ol guria samting, Baibel i no tok God yet i kamapim bilong givim strafe long ol man nogut. Taim namba wan man na meri i brukim lo bilong God, em i no mekim gut moa long ol na lukautim ol, nogat. Tru, wan wan taim God i mekim sampela samting long ol man bilong kamapim laik bilong em, tasol ol samting i save painim ol man long olgeta de, God i no kamapim ol dispela samting. I olsem Baibel i tok: “Ol man i save ran strong tumas i no save winim resis. Ol strongpela soldia i no save winim pait. . . . Na ol hapman bilong kain kain wok, ol i no save kisim ol bikpela wok. Taim nogut i save painim yumi olgeta.”—Saveman 9:11.
Gutpela Man na Man Nogut i Save Karim Pen
Pen na hevi i save painim ol gutpela man na man nogut wantaim, long wanem, ol i kisim sin long namba wan tumbuna bilong ol. (Rom 5:12) I olsem: Ol sik na pen i save painim ol stretpela man na man nogut wantaim. Timoti em i gutpela Kristen, tasol planti taim em i save sik. (1 Timoti 5:23) Wanpela taim Pol i tok, ‘wanpela samting olsem nil i save sutim skin bilong mi.’ Ating em i toktok long wanpela kain sik bilong em. (2 Korin 12:7-9) Long nau God i no save tekewe sik na pen bilong ol gutpela wokman bilong em.
Na pen o hevi inap painim ol gutpela man taim ol i no skelim gut ol samting o ol i no bihainim wanpela tok bilong Baibel. Olsem: Sapos man i sakim tok bilong God na em i maritim meri i no bilip, planti hevi bilong marit inap painim em. (Lo 7:3, 4; 1 Korin 7:39) Sapos Kristen i no kaikai gut na em i no kisim gutpela malolo, dispela inap bagarapim skin bilong em na em bai kisim pen na hevi long dispela.
Na sapos yumi larim skin i pulim yumi na yumi mekim pasin nogut, yumi inap kisim bikpela bel hevi long dispela. King Devit i bin mekim pasin pamuk wantaim Batseba, na em i kisim bikpela hevi tru long en. (Song 51) Em i laik haitim dispela rong, na bel bilong em i bagarap stret. Em i tok: “Taim mi no autim sin bilong mi yet, mi krai nogut long san na long nait. Olsem na . . . strong bilong mi i lus olgeta.” (Song 32:3, 4) Devit i bel hevi tru long dispela rong em i mekim, na ating dispela i bagarapim tingting na skin bilong em tu. Tasol Buk Song i kamapim klia olsem sapos man i tanim bel tru na em i kamapim rong bilong em long God, orait God inap lusim dispela rong, na nau bel bilong man inap orait gen.—Sindaun 28:13.
Planti man nogut i save kisim pen na hevi taim ol i mekim ol pasin nogut, tasol dispela i no olsem strafe bilong God i painim ol, nogat. King Herot i bin mekim planti pasin nogut, olsem na em i gat ol sik nogut nogut. Wanpela buk i tok, klostu long taim em i dai, em i kisim bikpela pen na hevi tru. Oltaim em i laik skrapim skin bilong em, na ol sua i pulap insait long bel, na i gat ol sua na liklik snek long sem bilong em, na em i hatwok tru long pulim win. Dispela bikpela pen i mekim na em i traim long kilim i dai skin bilong em, tasol brata bilong em i pasim em.—Ol rait bilong Josifas (Josephus: The Essential Writings, em Paul L. Maier i tanim).
Sapos man i bihainim gut ol lo bilong God, dispela bai lukautim em na em i no ken kisim ol sik nogut bilong pamuk. Tasol olsem wanem na i olsem planti pen na hevi i save painim ol gutpela man i laik bihainim lo bilong God?
Bilong Wanem Ol Man Bilong God i Save Karim Pen?
Wanpela bikpela as em olsem: Ol man bilong God i save karim pen, long wanem ol i stretpela man. Dispela samting i kamap ples klia long ol samting i bin painim pikinini bilong Jekop, em Josep. Oltaim meri bilong Potifar i laik pulim Josep long slip wantaim em, tasol Josep i tokim em: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” (Stat 39:9) Long dispela as ol i kalabusim Josep. Em i karim pen na hevi, long wanem, em i stretpela man.
Tasol bilong wanem God i save larim pen na hevi i painim ol gutpela wokman bilong em? Bilong save long dispela, yumi mas tingim wanpela bikpela tok em Satan i bin sutim long God. Em i bin tok, i no gat wanpela man inap i stap gut long God sapos traim i painim em. Dispela samting i kamap ples klia long ol samting i bin painim stretpela man Jop, em yumi stori pinis long em.
Wanpela taim ol ensel bilong God i bung long ai bilong em na Jehova i askim Satan: “Yu lukim tu wokboi bilong mi, Jop, o nogat? Jop em i gutpela man tru na i no gat asua long ai bilong mi. Em i save lotu na aninit long mi, na i save bihainim olgeta tok bilong mi.” Tasol Satan i tok, Jop i no laikim tru God—em i mekim wok bilong God, long wanem, God i bin givim planti samting long em. Na Satan i tok: “Sapos yu bagarapim na rausim dispela olgeta samting bilong en, orait bai yu lukim em i tok nogut tru long yu.” Orait Jehova i tokim Satan: “Mi putim olgeta samting bilong en long han bilong yu. Maski yu laik mekim wanem long ol dispela samting, yu mekim tasol. Tasol yu no ken mekim nogut long Jop yet.”—Jop 1:6-12.
Satan i mekim olgeta samting bilong pundaunim Jop, tasol Jop i bihainim yet stretpela pasin na em i kamapim klia olsem em i laikim tumas God na long dispela as em i mekim wok bilong God. Jop i bin tokim 3-pela pren giaman bilong em: “Bai mi holimpas lo bilong God i go inap long taim mi dai!” (Jop 27:5, NW) Tru tumas, ol man i laik holimpas lo bilong God ol i orait long karim pen na hevi long stretpela pasin ol i mekim. (1 Pita 4:14-16) Baibel i stori long planti man em ol i bin givim bel tru long God na ol i bihainim stretpela pasin bambai ol i ken litimapim nem bilong em na kalapim long ples klia olsem Satan i giaman taim em i tok, em inap pulim olgeta man na bai ol i lusim Jehova. Olgeta man i stap gut long God na i karim pen long dispela, ol i ken amamas, long wanem, ol i kamapim long ples klia olsem Satan i man bilong giaman, na ol i mekim bel bilong Jehova i amamas.—Sindaun 27:11.
God i save tingim pen ol gutpela wokman bilong em i save karim. Devit i bin tok: “Em i save helpim olgeta manmeri i gat hevi na em i save litimapim olgeta manmeri ol arapela man i daunim ol.” (Song 145:14) Ol man i givim bel pinis long Jehova, olsem dediket long em, ating sampela i no gat bikpela strong inap long karim ol hevi na samting ol i kisim long han bilong ol birua taim ol i mekim wok bilong God. Tasol God yet i save strongim na helpim ol na em i givim gutpela tingting long ol bambai ol i ken sanap strong long taim bilong hevi. (Song 121:1-3; Jems 1:5, 6) Sapos ol birua i kilim i dai sampela gutpela wokman bilong Jehova, ol inap wetim em i kirapim bek ol, olsem em i tok promis pinis long mekim. (Jon 5:28, 29; Aposel 24:15) God inap tekewe hevi bilong ol dispela man tu na mekim gut tru long ol, olsem em i bin mekim long Jop—em i pinisim pen bilong Jop na em i mekim gut tru long Jop na givim planti samting moa yet long dispela stretpela man. Na yumi ken bilip strong olsem Jehova i no inap lusim lain bilong em long nau tu.—Jop 42:12-16; Song 94:14.
Klostu Nau Bai i No Gat Pen Moa!
Olsem na nau yumi save, pen na hevi i save painim olgeta man, long wanem, ol i kisim sin long namba wan man na meri, na tu, ol i stap namel long pasin nogut bilong dispela graun. Na pen na hevi bai painim ol manmeri bilong God tu, long wanem, ol i holimpas ol lo bilong Jehova. (2 Timoti 3:12) Tasol ol i ken amamas tu, long wanem, klostu nau bai God i pinisim krai na dai na hevi na pen, olsem aposel Jon i tok:
“Nau mi lukim nupela skai na nupela graun i stap. . . . Na long sia king mi harim maus bilong wanpela man i singaut strong olsem, ‘Harim. Nau haus bilong God i stap wantaim ol manmeri. . . . Em bai i mekim drai wara i stap long ai bilong olgeta . . . Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.’ Na dispela Man i sindaun long sia king, em i tok olsem, ‘Harim. Mi mekim olgeta samting i kamap nupela.’ Na em i tok moa olsem, ‘Yu raitim dispela tok. Dispela tok em i tru olgeta, inap olgeta man i ken bilip tru long en.’ ”—KTH 21:1-5.
Aposel Pol tu i tok: “God [Jehova] i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Klostu nau bai gutpela samting tru i kamap! Yu inap i stap long gutpela paradais long graun, na bai yu stap amamas tru. Olsem na yu no ken larim ol pen na hevi bilong nau i mekim nogut bel bilong yu. Tingim gutpela taim bai kamap bihain. Bilip na wetim nupela taim, klostu nau bai God i kamapim. Bihainim pasin i stret long ai bilong Jehova na bai yu ken i stap oltaim long nupela graun, na i no gat pen o hevi moa.
[Piksa long pes 4]
Jop i karim pen, tasol em i bihainim pasin i stret long ai bilong God
[Piksa long pes 7]
Yu inap i stap oltaim long graun na i no gat pen o hevi moa
[Piksa Kredit Lain long pes 3]
Collier’s Photographic History of the European War