“Wanpela Pasin Nogut Tru”
MARIAa i kirap mekim wok olsem wanpela pamukmeri taim em i gat 14 krismas. Mama bilong em yet i bin strong tru long em i mas mekim olsem. Mama i tokim em olsem em i gat naispela skin tru na ol man bai laikim em tumas. Na tu, em bai kisim planti mani. Long nait mama bilong Maria i save kisim em i go long wanpela hotel bilong bungim ol man. Mama i bin stap klostu bilong kisim pe ol man i givim. Long ol wan wan nait, Maria i bin slip wantaim 3-pela o 4-pela man.
Klostu long haus bilong Maria i gat wanpela pikinini i gat 13 krismas, nem bilong em Carina. Famili bilong em tu i fosim em long mekim wok pamuk. Wankain olsem planti famili long dispela komiuniti we ol man i save wok suga, famili bilong Carina i bin salim em long pamuk wantaim ol man bilong helpim famili long kisim mani. Long narapela hap, Estela i bin lusim skul taim em i liklik yet, em i no save yet long rit na rait, na em i kamap wanpela 2 kina meri. Na Daisy i gat 6-pela krismas taim wanpela brata bilong em i bin mekim pasin sem long em—bihain dispela samting i kamap planti taim long em. Em i kamap wanpela pamukmeri taim em i gat 14 krismas.
Long planti hap dispela pasin bilong pikinini i mekim wok pamuk em i wanpela bikpela hevi tru. Ol samting nogut tru i kamap long dispela pasin. Planti taim ol pikinini husat i wok pamuk, maski ol i mekim dispela wok haptaim o fultaim, ol i save insait long ol pasin raskol na kisim drak. Planti bilong ol i no amamas long i stap bilong ol na ol i pilim olsem ol i samting nating. Ol i ting olsem i no gat rot long lusim dispela sindaun nogut bilong ol.
Sampela man i gat namba i luksave long ol samting nogut pasin bilong pikinini i wok pamuk i kamapim. Presiden bilong Brasil bilong bipo, em Fernando Henrique Cardoso i tok: “Pikinini i mekim wok pamuk em i wanpela pasin nogut tru.” Wanpela niuspepa bilong Brasil i tok long pasin bilong pikinini i wok pamuk olsem: “Long ol kantri we dispela pasin i save kamap long olgeta taim, na ol man i larim, na ol i orait long en, na ol i laikim dispela pasin bilong kisim mani, long olgeta de long ol dispela kantri dispela pasin i as na planti samting nogut i kamap. Ol hevi i painim pikinini, famili, na komiuniti long rot bilong dispela pasin em i nogut tru na i mekim na mani ol i kisim i olsem samting nating.”
Tasol maski i gat ol man i laik stopim pasin bilong pikinini i mekim wok pamuk, dispela hevi i wok long go bikpela. Wanem samting i mekim na dispela pasin nogut i save kamap? Wanem as na planti man i larim dispela pasin i stap o ol i sapotim dispela pasin nogut?
[Futnot]
a Mipela i senisim ol nem.
[Rait long pes 3]
“Pikinini i mekim wok pamuk em i wanpela pasin nogut tru.”—PRESIDEN BILONG BRASIL BILONG BIPO FERNANDO HENRIQUE CARDOSO
[Rait long pes 4]
“Olgeta kain pasin bilong subim narapela long mekim pasin sem i no stret, na i kalapim ol human raits bilong ol man, maski ol i gat hamas krismas, ol i man o meri, ol i bilong wanem skin, lain, o holim wanem namba.”—UNESCO SOURCES