Baibel i Tok Wanem?
Abrusim Toktok i Nogutim Narapela
“Tok bilong litimapim nem bilong God na tok nogut tu, tupela kain tok i save kamap long wanpela maus tasol. Ol brata bilong mi, dispela kain pasin em i no gutpela pasin.”—JEMS 3:10.
PASIN bilong toktok em wanpela pasin i mekim na yumi stap narapela kain long ol animal. Sori tru, sampela manmeri i no mekim gut wok long dispela gutpela presen. Tok nogut, tok doti, na tok bilas inap bagarapim tru bel bilong man—sampela taim, kain bel hevi inap winim bagarap bilong skin. Baibel i tok: “Sapos man i no tingting gut na i tok, orait tok bilong en inap bagarapim bel bilong narapela man olsem bainat i sutim em.”—Sindaun 12:18.
Planti manmeri i save tok nogut long olgeta de. Ol skul i putim ripot olsem planti pikinini i save tok nogut. Tasol sampela manmeri i tok, sapos man i tok nogut bilong daunim belhat bilong em yet, orait dispela em i gutpela. Wanpela sumatin bilong politikol saiens i tok: ‘Pasin bilong mekim tok nogut i gat bikpela strong bilong kamapim stret samting yumi pilim.’ Yu ting i stret ol Kristen i kisim kain tingting olsem tok i bagarapim narapela, em i liklik samting tasol? God i ting olsem wanem long en?
Nolaik Long Tok Pilai Nogut
Tok doti em i no wanpela pasin i kamap long taim bilong yumi tasol. Ating bai yu kirap nogut long save olsem ol manmeri i bin mekim tok doti long taim bilong ol aposel inap 2,000 yia i go pinis. Olsem: I luk olsem sampela insait long kongrigesen Kolosi i bin mekim tok doti taim ol i kros. Ating ol i bin mekim olsem bilong bagarapim o nogutim narapela, bilong bekim rong bilong em. Na i wankain tu long nau, planti manmeri i mekim tok nogut taim ol i belhat. Olsem na pas bilong Pol long ol Kolosi i stret long taim bilong yumi tu. Pol i tok: “Yupela i mas rausim olgeta kain pasin nogut, em pasin bilong kros na belhat na bel nogut, na pasin bilong tok nogut long ol arapela na pasin bilong mekim toktok i doti.” (Kolosi 3:8) Em nau, ol Kristen i mas abrusim pasin bilong kros na tok doti em planti taim ol man i save mekim taim ol i belhat.
Tru, planti manmeri i mekim tok doti ol i no gat tingting long bagarapim o nogutim narapela. Planti taim, ating ol man i mekim tok doti, ol i ting em i liklik samting. Ol man i save mekim olkain tok nogut long olgeta de. Sampela i hatwok long toktok gut sapos ol i no inap mekim wok long olkain tok doti o tok pilai nogut. Planti taim, ol man i mekim wok long tok doti bilong kirapim ol narapela long lap. Tasol yu ting i stret long ting olsem tok pilai nogut em i liklik samting, na i no bikpela rong tumas? Tingim dispela samting.
Planti man i save mekim tok pilai nogut bilong mekim ol narapela i lap. Long nau, planti tok pilai nogut i bilong maritpasin. Na planti manmeri husat i tingim ol yet olsem gutpela manmeri, ol i ting kain toktok olsem i gutpela. (Rom 1:28-32) Olsem na yumi ken save planti tok bilong ol hapman bilong wokim pani em olkain tok bilong pasin sem. Long ol planti piksa wokabaut na long TV na redio samting, ol man i save mekim tok pilai nogut.
I no olsem Baibel i no gat tok long pasin bilong tok pilai nogut. Aposel Pol i tokim ol Kristen long Efesus olsem: “Yupela i no ken mekim pasin pamuk na olgeta kain pasin doti, na yupela i no ken mangalim ol samting bilong ol arapela. Tok bilong ol dispela pasin tu i no ken kamap liklik namel long yupela. I no inap yumi manmeri bilong God i toktok long ol dispela kain pasin. Yupela i no ken mekim tok doti na tok kranki na tok pilai nogut. Dispela kain pasin em i no inap long yumi mekim. Nogat.” (Efesus 5:3, 4) Em nau, man i mekim tok doti maski em i bilong nogutim narapela o nogat, God i no laikim tok doti. Em i nogut. Em tok i nogutim man.
Ol Hatpela Tok Em God i No Laikim
I gat planti samting i insait long pasin bilong tok nogut winim tok doti. Sutim tok, tok bilas, hatpela tok long pasin o wok bilong man, i ken bagarapim tru bel bilong man. Em tru olsem yumi olgeta i save mekim sin long toktok bilong yumi, moa yet taim yumi stap namel long ol manmeri i save mekim tok i daunim narapela na tok baksait. (Jems 3:2) Tasol ol trupela Kristen i no ken tru kisim tingting olsem tok nogut em i liklik samting. Baibel i kamapim klia olsem God Jehova i no laikim olgeta kain toktok i save nogutim narapela.
Olsem: Long Buk Tu King, yumi kisim save long ol mangi i mekim tok bilong bagarapim profet Elisa. Stori i tok olsem “ol i tok bilas long Elisa” na ol i tok olsem “E, yu hetkela, yu raus. Yu klia long dispela hap.” Jehova i lukim bel bilong ol dispela yangpela mangi na em i lukim ol i bel nogut, olsem na em i tingim dispela tok bilas bilong ol i bikpela samting. Stori i tok olsem God i kilim 42 mangi long pasin bilong ol long tok nogut.—2 King 2:23, 24.
Ol manmeri bilong Israel “i wok long tok bilas long ol man God i salim i kam long ol, na ol i ting tok bilong ol i samting nating, na ol i wok long rabisim ol dispela profet. Olsem na Bikpela i les tru long ol manmeri bilong en na i belhat moa yet long ol, na ol i no inap abrusim bagarap em i laik salim i kam long ol.” (2 Stori 36:16) Tru, namba wan as na Jehova i belhat long ol manmeri bilong em, em pasin bilong ol long lotuim god giaman na sakim tok, tasol yumi lukim Baibel i kolim stret tok nogut ol i mekim long ol profet bilong God. Dispela i kamapim olsem God i no laikim tru kain pasin na toktok.
Olsem na i stret Baibel i tokim ol Kristen: “Yu no ken krosim ol lapun man.” (1 Timoti 5:1) Dispela stiatok i stret tu long ol pasin yumi mekim long ol narapela. Baibel i strongim yumi long ‘no ken tok nogut long wanpela man, na no ken tok pait. Oltaim yumi mas stap isi tasol na mekim gutpela pasin long olgeta manmeri.’—Taitus 3:2.
Bosim Gut Maus
Sampela taim, i hatwok long sakim laik bilong mekim toktok bilong bagarapim narapela. Taim man i rongim yumi, ating yumi pilim olsem i stret yumi kros na mekim strongpela tok long em o tokim ol narapela long em. Maski i olsem, Kristen i mas sakim dispela kain pasin. Sindaun 10:19 i tok: “Sapos man i mekim planti toktok, em inap mekim sin long tok bilong en. Tasol man i no mekim planti toktok, em i gat gutpela tingting.”
Ol ensel bilong God i stap gutpela piksa. Ol i save long olgeta rong ol manmeri i mekim. Maski strong bilong ol ensel i winim bilong ol man, “ol i no save tok nogut long ol man na kotim ol long ai bilong Bikpela.” (2 Pita 2:11) Ol ensel i save olsem God i save gut long ol rong wan wan man i mekim na em i save long rot bilong stretim ol hevi, olsem na ol i bosim maus na ol i no mekim planti toktok. Maikel em nambawan bilong olgeta ensel, em i bosim maus na i no mekim tok nogut, na em i no tok nogut long Satan tu.—Jut 9.
Ol Kristen i mas wok strong long bihainim pasin bilong ol ensel. Ol i bihainim tok bilong Baibel i tok: “Sapos ol i mekim pasin nogut long yupela, orait yupela i no ken bekim pasin nogut long ol. Nogat. Oltaim yupela i mas tingting long mekim pasin i gutpela long ai bilong olgeta man. . . . Oltaim yupela i mas painim rot bilong i stap wanbel wantaim olgeta man. Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol na mekim save long ol.’ ”—Rom 12:17-19.
Na taim yumi toktok, krai na strong bilong nek bilong yumi i ken bagarapim tu bel bilong man. Planti man na meri marit i bagarapim bel bilong narapela long rot bilong singaut bikmaus long narapela narapela. Planti taim ol papamama i bikmaus long ol pikinini bilong ol. Tasol i no gat as long bikmaus bilong kamapim samting yumi pilim. Baibel i tok: “Yupela i mas rausim olgeta pasin bilong bel nogut na kros na belhat na bikmaus na tok bilas.” (Efesus 4:31) Baibel i tok tu olsem, “wokman bilong Bikpela i no ken tok pait na tok kros. Nogat. Em i mas mekim gutpela pasin long olgeta man.”—2 Timoti 2:24.
Tok i Strongim Man
Long nau, pasin bilong tok nogut na tok doti i pulap, olsem na Kristen i mas i gat samting bilong sakim dispela pasin i nogutim man. Baibel i kamapim dispela gutpela samting, em pasin bilong laikim ol narapela. (Matyu 7:12; Luk 10:27) Sapos yumi tingim na laikim tru ol narapela, dispela bai kirapim yumi oltaim long mekim ol gutpela tok i strongim man. Baibel i tok: “Yupela i no ken larim ol kain kain tok nogut i kamap long maus bilong yupela. Nogat. Gutpela tok tasol i mas kamap, inap long strongim ol man i slek. Dispela kain tok i save bringim marimari bilong God i kam long ol man i harim.”—Efesus 4:29.
Na tu, pasin bilong putim Tok Bilong God long bel bilong yumi i helpim yumi long abrusim ol toktok i nogutim man. Pasin bilong ritim na tingim tingim ol tok bilong ol Skripsa Holi i ken helpim yumi long ‘rausim olgeta kain pasin doti.’ (Jems 1:21) Tru tumas, Tok Bilong God i ken helpim tingting bilong yumi.