Baibel i Tok Wanem?
Taim Ol Wanblut i No Wanbilip Bilong Yu
SAMPELA i tok i gat winim 10,000 bikpela na liklik lain lotu i stap long graun. Long wanpela kantri, inap 16 pesen bilong ol manmeri i bikpela pinis ol i bin senisim lotu bilong ol. Olsem na yumi no kirap nogut olsem i gat sampela bilip bilong lotu em ol wanblut na pren i no wanbel long en. Sampela taim dispela i mekim na ol i no pas gut wantaim. Olsem na bikpela askim em olsem: Ol Kristen i mas ting olsem wanem long ol wanblut i no wanbilip bilong ol?
Pas Gut Wantaim
Tingim tok Baibel i mekim long pasin bilong papamama na ol pikinini bilong ol long pas gut wantaim. Lo i stap long Kisim Bek 20:12 i tok long yumi “mas aninit long papamama” bilong yumi, em i no kolim wanem taim yumi mas pinis long mekim olsem. Long tok Jisas i bin mekim long Matyu 15:4-6 long dispela lo, em i klia olsem em i toktok long pasin bilong ol manmeri i bikpela pinis long aninit long papamama bilong ol.
Buk Sindaun i tok yumi mas soim rispek long papamama bilong yumi. Sindaun 23:22 i tok olsem “taim mama bilong yu i lapun pinis, yu no ken rabisim em.” Sindaun 19:26 i tok olsem man i “mekim nogut long papa bilong en, na i rausim mama long haus, orait em i mekim famili bilong en i sem nogut tru.”
Tok bilong Baibel i kamapim klia olsem yumi no ken givim baksait long papamama bilong yumi. Sapos papamama bilong yumi i no orait long lotu bilong yumi, dispela i no ken mekim na yumi lusim pasin bilong pas gut wantaim ol. Ol dispela stiatok bilong Baibel i makim tu pasin yumi mas mekim long ol narapela wanblut na poroman marit. Tru tumas, ol Kristen i gat wok long mekim stretpela pasin na bihainim tok bilong Baibel long laikim ol wanblut bilong ol.
Stretpela Tingting Em Bikpela Samting
Tru, Baibel i tok yumi no ken bung wantaim ol poroman nogut, na ol wanblut inap i stap olsem ol poroman nogut. (1 Korin 15:33) Planti gutpela wokboi bilong God long bipo, ol i bihainim pasin i stret, maski papamama bilong ol i no wanbel. Ol pikinini man bilong Kora i bin mekim olsem. (Namba 16:32, 33; 26:10, 11) Ol trupela Kristen i no ken lusim bilip bilong ol bilong amamasim ol narapela, maski em wanblut bilong ol.—Aposel 5:29.
Sampela papamama o wanblut i no laik tru long ol bilip bilong wanpela Kristen. Sampela inap kamap birua bilong lotu Kristen tru. Long kain taim olsem, ol Kristen i mas mekim sampela samting bilong lukautim bilip bilong ol. Olsem Jisas i tok: “Ol famili bilong man yet bai i kamap birua bilong en. Man i laikim tumas papa o mama bilong en, na i no laikim mi moa yet, em i no inap i stap pren bilong mi. Na man i laikim tumas pikinini man o pikinini meri bilong en, na em i no laikim mi moa yet, em i no inap i stap pren bilong mi.”—Matyu 10:36, 37.
Tasol planti Kristen i no kisim bikpela hevi tru long ol wanblut. Ol wanblut bilong ol i no gat wankain tingting olsem ol long ol tok bilong Baibel. Baibel i tokim ol disaipel bilong Krais long “isi” long ol man i no bilip na mekim “gutpela pasin” long ol. (2 Timoti 2:25; 1 Pita 3:15, 16) Baibel i tok olsem: “Wokman bilong Bikpela i no ken tok pait na tok kros. Nogat. Em i mas mekim gutpela pasin long olgeta man.” (2 Timoti 2:24) Na tu, aposel Pol i tokim ol Kristen long ol i “no ken tok nogut long wanpela man, na ol i no ken tok pait. Oltaim ol i mas stap isi tasol na mekim gutpela pasin long olgeta manmeri.”—Taitus 3:2.
Toktok Wantaim na Kamapim Olsem Yu Laikim Ol
Wan Pita 2:12 i tokim ol Kristen long mekim olsem: “Yupela i mas wokabaut stret namel long ol haiden. . . . Ol bai i lukim gutpela pasin bilong yupela, na ol bai i litimapim nem bilong God.” Planti taim ol wanblut husat i no wanbilip bilong yumi ol i lukim olsem ol tok bilong Baibel i bin senisim tru laip bilong yumi. Tingim olsem planti manmeri em ol i no bin laikim o ol i bin birua long tok i tru bilong Baibel, ol i senisim tingting bilong ol. Ating sampela i bin lukim gutpela pasin bilong poroman marit o pikinini inap planti yia, na dispela i kirapim ol long kisim save long as bilong gutpela pasin bilong ol. I no gutpela sapos ol man i no laik bilip long tok i tru bilong Baibel, long wanem, wanblut bilong ol i Kristen i bin givim baksait long ol.
Tru, sindaun i narapela narapela, na sampela Witnes Kristen i stap longwe long papamama bilong ol. Ating ol i no inap long go lukim ol planti taim olsem ol i gat laik long mekim. Tasol long rot bilong raitim pas, toktok long telefon, o toktok wantaim ol long narapela rot long olgeta taim bai helpim ol long save yu laikim ol. Planti manmeri em ol i no Kristen ol i laikim papamama bilong ol na ol narapela wanblut na ol i toktok wantaim ol long olgeta taim, maski ol i bilong wanem lotu. Ol Kristen i mas mekim wankain pasin tu, a?
[Piksa long pes 18]
Pasin bilong go lukim ol wanblut bai helpim ol long save yu laikim ol