Wanpela Gutpela Man Samaria Bilong Nau
WANPELA MAN LONG MEKSIKO I RAITIM DISPELA STORI BILONG KIRAP!
Planti bilong yumi i save long stori bilong Baibel long wanpela man Samaria em i bin mekim gutpela pasin long man Juda. (Luk 10:29-37) Long dispela tok piksa Jisas Krais i stori long gutpela pasin tru dispela man Samaria i bin mekim bilong soim pasin laikim long wantok em i mas kisim helpim. Yu ting ol kain gutpela man olsem i stap long nau? Ritim dispela stori i kam long Meksiko.
Betuel na famili bilong em i pinis long wanpela raun bilong ol na ol i draiv i go bek long haus. Ol i stap sampela kilomita longwe long haus taim ol i lukim wanpela bikpela eksiden i kamap long haiwe. Ol i stopim ka bilong givim helpim. Wanpela bilong ol draiva i insait long dispela eksiden, em wanpela dokta, em i askim ol long kisim meri bilong em i gat bel na tupela liklik pikinini i go long haus sik. Ol i mekim olsem, na bihain Betuel i go bek long ples eksiden i kamap long en bilong lukim em inap givim sampela helpim moa o nogat.
Betuel i tok: “Ol haiwe patrol i kam pinis, na ol i holim dispela dokta bilong painimaut moa long dispela eksiden, long wanem, i bin i gat wanpela i dai. Taim dokta i askim mi bilong wanem mi wok long helpim em, mi tokim em olsem mipela ol Witnes Bilong Jehova na mipela i bin lain long Baibel olsem mipela i mas laikim ol wantok bilong mipela. Mi tokim em olsem em i no ken tingting planti long meri pikinini bilong em, long wanem, mipela bai lukautim ol. Em i pilim tru dispela pasin na aiwara i kamap long ai bilong em, na em i givim mani na ring samting bilong em long mi bilong lukautim gut.”
Betuel na famili bilong em i kisim famili bilong dispela dokta i go long haus na lukautim ol inap sampela de. Betuel i mekim wok long dispela rot bilong kirapim Baibel stadi wantaim ol. Taim dokta i lusim kalabus, em i tok tenkyu na em i kamapim olsem em i laikim ol Witnes Bilong Jehova. Em i tok promis long ol bai stadi yet long hap ol i stap long en, na em i tok sapos meri bilong em i karim pikinini man, em bai kolim nem bilong em Betuel. Betuel i tok moa: “Nau, tupela yia bihain, rot i op na mipela i go lukim ol. Mi kirap nogut olsem ol i wok long stadi long Baibel, na ol i bin givim nem Betuel long liklik boi bilong ol!”
[Piksa long pes 15]
Betuel