Helpim Ol Pigmi Long Tok i Tru Bilong Baibel

Wanpela Man Long Kamarun I Raitim Dispela Stori Bilong Kirap!

Long olgeta hap bilong graun long winim 230 kantri, ol Witnes Bilong Jehova i traim long autim tok bilong Kingdom Bilong God long “olgeta manmeri.” (1 Timoti 2:4; Matyu 24:14) Na ol i laik autim tok tu long ol lain Pigmi bilong Afrika, em wanpela lain man ol i sotpela na liklik, longpela bilong ol inap olsem 1.2 o 1.4 mita. Ol i stap long ol bikbus bilong Ripablik Bilong Sentral Afrika, na long hap bilong Kongo, na long hap saut-is bilong Kamarun.

Namba wan lain i bin bungim ol lain Pigmi long taim Fero Neferirkare bilong Isip i bin salim sampela man i go painim het bilong wara Nail. Ol dispela man i tok olsem long bikbus insait tru long Afrika, ol i bungim wanpela lain manmeri ol i sotpela. Tupela man Grik i bin kamap bihain, Homa, man bilong raitim stori long ol samting, na saveman Aristotal, tupela i bin stori long ol lain Pigmi. Ol lain bilong Yurop i bin bungim ol dispela manmeri long yia 1500 na 1600.

Long taim bilong yumi ol Witnes Bilong Jehova i bin wok long autim tok long ol bikbus bilong Afrika. Maski ol lain Pigmi i amamas long harim tok bilong Kingdom, wok bilong go bek lukim ol gen i no bin kamap gutpela. Long wanem, ol lain Pigmi i no save stap longpela taim long wanpela hap​—⁠ol i save go long narapela narapela hap long olgeta tupela mun samting.

Namba bilong ol lain Pigmi long Afrika em namel long 150,000 na 300,000 samting, na ol i gat nem olsem ol manmeri bilong i stap bel isi na ol i lain bilong sem. Ol gavman, na ol intenesenel oganaisesen, na ol misin i bin wokim ol skul bilong ol lain Pigmi i ken mekim wok long en, na ol liklik haus bilong ol. Ol i mekim planti samting bilong grisim ol Pigmi long i stap olgeta long wanpela hap, tasol ol i no inap.

Wanpela Pigmi long Kamarun i narapela kain em Janvier Mbaki, em i namba wan Pigmi i bin kamap wanpela Witnes long Kamarun. Em i wanbel long ol tok bilong Baibel bihain long em i ritim buk Yu Inap i Stap Oltaim Long Paradais Long Graun, wantaim ol narapela buk na nius.a Long 2002, Janvier i kisim baptais, na nau em i mekim wok painia, em nem ol Witnes Bilong Jehova i kolim long ol man bilong autim tok fultaim. Na tu em i wanpela kongrigesen sevan long kongrigesen bilong em long Mbang, wanpela liklik taun long saut-is bilong Kamarun. Bai yumi lukim long bihain sapos sampela moa lain Pigmi i stap long Kamarun i laik lotuim Jehova, em wanpela tasol i God tru, na em i laikim “olgeta manmeri.”

[Futnot]

[Piksa long pes 25]

Janvier Mbaki​—⁠namba wan Pigmi long Kamarun long kamap wanpela Witnes​—⁠em i autim tok