Mi Mekim Wok Bilong Jehova na Mi Kisim Planti Blesing

FAMILI BILONG MI

Mi bon long 1934, na papamama bilong mi ol i bilong Swiselan na ol i muv i go sindaun long Timmins, em wanpela maining taun long Ontario, Kanada. Long 1939 samting, mama bilong mi i kirap long ritim nius Wastaua na em i wok long go long ol miting bilong ol Witnes Bilong Jehova. Em i kisim mi na 3-pela brata na 3-pela susa bilong mi i go wantaim em. I no longtaim bihain em i kamap wanpela Witnes Bilong Jehova.

Papa i no amamas long disisen bilong em, tasol Mama i laikim tumas tok i tru na em i tingting strong long holimpas tok i tru. Maski gavman i tambuim wok bilong ol Witnes Bilong Jehova long Kanada long ol yia bihain long 1940, Mama i holimpas yet tok i tru long dispela taim. Na oltaim em i save mekim gutpela pasin na pasin rispek long Papa, maski em i save mekim ol tok bilong rabisim Mama. Gutpela eksampel bilong Mama i helpim mi na ol bratasusa bilong mi long kisim tok i tru. Gutpela samting i kamap em olsem, isi isi pasin bilong Papa i senis na em i kirap long mekim gutpela pasin moa long Mama na mipela ol pikinini.

KIRAPIM FULTAIM SEVIS

Long Ogas 1950, mi go long Theocracy’s Increase Kibung long New York City. Mi bungim ol bratasista em ol i kam long narapela narapela hap bilong graun na mi harim ol naispela intaviu bilong ol lain i go long Skul Gileat em ol i grediuet pinis, na dispela i kirapim mi long mekim bikpela wok moa bilong Jehova! Long dispela taim, mi tingting strong long mekim wok autim tok fultaim. Taim mi go bek long haus, mi putim aplikesen long kamap painia oltaim. Kanada brens ofis i bekim pas bilong mi na ol i tok i gutpela mi kisim baptais pastaim. Mi kisim baptais long Oktoba 1, 1950. Wanpela mun bihain, mi kamap painia oltaim na mi kisim fes asainmen bilong mi long wanpela taun nem bilong en Kapuskasing. Dispela taun i stap planti kilomita longwe long ples mi stap long en long dispela taim.

Long 1951, brens ofis i invaitim ol Witnes em ol i save mekim tokples Frans long muv i go sindaun long Quebec, em provins we ol man i save mekim tokples Frans. Ol i nidim tru ol pablisa long helpim wok autim tok long dispela hap. Taim mi liklik yet, mi save mekim tokples Frans na tok Inglis, so mi bihainim dispela singaut na ol i salim mi i go long Rouyn. Mi no save long wanpela man long dispela hap. Ol brata i givim mi tasol wanpela atres, olsem mi bin stori pinis. Tasol ol samting i go orait. Mitupela Marcel i kamap gutpela pren, na mi amamas long mekim wok long Quebec inap 4-pela yia, na bihain ol i makim mi long mekim wok olsem spesel painia.

SKUL GILEAT NA SAMTING MI TING LONG EN I NO KAMAP

Taim mi stap yet long Quebec, mi amamas tru long kisim invatesen long go long namba 26 klas bilong Skul Gileat long South Lansing, New York. Mipela i grediuet long Februeri 12, 1956, na ol i asainim mi long kantri em nau ol i kolim Gana,b Wes Afrika. Tasol paslain long mi go, mi mas go bek long Kanada na wet inap long ol i stretim ol pepa bilong mi long travel. Mi ting mi bai stap long Kanada inap 2-pela o 3-pela wik samting, tasol nogat.

Mi stap long Toronto inap 7-pela mun inap long ol pepa bilong mi long travel i redi. Insait long dispela haptaim, mi stap wantaim famili bilong Brata Cripps na nau mi save gut long Sheila, em pikinini meri bilong ol. Na mitupela i laikim tru narapela narapela. Klostu long taim mi laik askim em long maritim mi, mi kisim visa bilong mi. Mitupela Sheila i beten wantaim na mipela i wokim disisen olsem mi mas go long asainmen bilong mi. Tasol mipela i pasim tok long raitim pas long narapela narapela na lukim sapos rot i op long mitupela i ken marit long bihain. I hatwok long mekim dispela disisen, tasol bihain mipela i luksave olsem mipela i mekim gutpela disisen.

Bihain long wanpela mun we mi travel long tren, kago sip, na long balus, mi go kamap long Accra, Gana. Long dispela hap, ol i makim mi long mekim wok olsem wasman distrik. Long dispela asainmen, mi mas raun long ol hap bilong Gana, na tu, long ol kantri i stap klostu em Aivori Kos (nau ol i kolim Kot-Diwa) na Togolen (nau ol i kolim Togo). Planti taim mi save ron long trak em brens i givim mi long yusim. Mi save amamas tru long raun i go long ol dispela ples long lukim ol bratasista!

Long ol wiken, mi gat ol asainmen long ol kibung sekit. Mipela i no gat ol Haus Kibung. So ol brata i save yusim ol mambu long wokim wanpela rup na ol i karamapim wantaim ol lip bilong pam bilong haitim mipela long hat bilong san. I no gat ol frisa long ples bilong redim kaikai, olsem na ol brata i lukautim ol animal klostu long ples kibung. Ol i save kilim ol dispela animal, kukim mit bilong ol, na givim long ol lain i go long kibung bilong ol i ken kaikai.

Long ol dispela kibung, sampela taim sampela pani samting i save kamap. Wanpela taim Herb Jennings,c em wanpela misineri tu, em i givim wanpela tok long pletfom na wanpela bulmakau i eskeip long ples bilong redim kaikai. Dispela bulmakau i ran i go namel long pletfom na odiens. Herb i stop long toktok na dispela bulmakau i luk olsem em i paul olgeta. Tasol 4-pela strongpela brata i go holimpasim dispela bulmakau na ol i karim em i go bek long ples bilong redim kaikai, na olgeta long odiens i paitim han na ol i amamas tru.

Long ol de we mipela i no mekim kibung, mi soim dispela muvi The New World Society in Action long ol manmeri long ol viles i stap klostu. Mi save taitim wanpela waitpela kenves namel long tupela pos o tupela diwai i stap long sait sait, na mi yusim projekta long pilaim muvi long waitpela kenves na ol manmeri i ken watsim. Ol i laikim tru dispela muvi! Long planti bilong ol, em fes muvi ol i lukim. Ol i paitim han strong tru taim ol i lukim ol hap bilong muvi i soim ol manmeri i kisim baptais. Dispela muvi i helpim ol long luksave olsem ol Witnes Bilong Jehova i stap wanbel na ol i stap long olgeta hap bilong graun.

Bihain long mi stap long Afrika inap 2-pela yia samting, mi amamas tru long go long intenesenel kibung long New York City long 1958. Mi amamas long bungim Sheila, em i mekim wok olsem spesel painia long Quebec na em tu i kam long dispela kibung. Mitupela i wok long raitim pas i go i kam, tasol nau mipela i bung gen, so mi askim em long maritim mi na em i tok yes. Mi raitim pas i go long Brata Knorrd na mi askim em sapos em orait long Sheila i ken go long skul Gileat na bihain kam wok wantaim mi long Afrika. Brata Knorr i tok orait long dispela. I no longtaim na Sheila i kam kamap long Gana. Mitupela i marit long Accra, long Oktoba 3, 1959. Mipela i pilim olsem Jehova i givim mipela planti blesing bikos mipela i putim em i stap nambawan long laip bilong mipela.

MEKIM WOK WANTAIM LONG KAMARUN

Long 1961, ol i asainim mipela i go long Kamarun, em wanpela kantri. Ol i askim mi long helpim wok bilong kamapim nupela brens ofis, olsem na mi bisi tru. Ol i makim mi olsem nupela brens sevan, so mi mas lainim planti samting. Bihain, long 1965 mipela i painimaut olsem Sheila i kisim bel. Mi mas tokaut stret olsem mitupela Sheila i pilim hatwok long tingim olsem mipela bai kamap papamama. Mipela i luk fowed long dispela nupela asainmen na mipela i stretim ol samting bilong go bek long Kanada, tasol sori tru bikpela hevi i painim mipela.

Bebi i lus insait long bel bilong Sheila. Dokta i tokim mipela olsem bebi bilong mipela em i wanpela boi. Dispela samting i kamap winim 50 yia i go pinis, tasol mipela i no lusim tingting long en. Tru, mipela i bin bel hevi tru long dispela taim, tasol mipela i mekim yet asainmen bilong mipela long Kamarun, em asainmen mipela i laikim tru.

Long Kamarun, planti taim ol brata i karim hevi long ol man i mekim nogut long ol bikos ol i no insait long wok politik. Dispela hevi i go bikpela tru taim ol i wokim eleksen bilong makim nupela presiden. Samting mipela i pret long em bai kamap i kamap long Me 13, 1970 taim gavman i tambuim wok bilong ol Witnes Bilong Jehova. Dispela nupela brens ofis i luk nais tru em mipela i bin muv i go stap long en inap 5-pela mun tasol, nau gavman i kisim. Insait long wanpela wik tasol, gavman i rausim olgeta misineri—mi na Sheila tu—long Kamarun. I hatwok long lusim ol bratasista bikos mipela i laikim ol tru na mipela i wari long ol bai karim hevi olsem wanem long ol de bihain.

Mipela i stap long brens ofis long Frans inap 6-pela mun. Long dispela hap, mi mekim olgeta samting bilong lukautim ol bratasista long Kamarun long ol samting ol i nidim. Long Disemba 1970, ol i asainim mipela long Naijiria brens—dispela brens i kirap long lukautim wok long Kamarun. Ol bratasista long Naijiria i welkamim mipela na mipela i amamas long mekim wok long hap inap sampela yia.

WANPELA BIKPELA DISISEN

Long 1973, mipela i mas mekim wanpela bikpela disisen. Sheila i wok long karim hevi long sait bilong helt. Taim mipela i go long wanpela kibung long New York, Sheila i krai na em i tokim mi: “Mi no inap mekim moa! Mi taiet tru na planti taim mi save sik.” Em i mekim wok wantaim mi long Wes Afrika winim 14 yia. Mi amamas long em i stap gut long mekim wok bilong Jehova, tasol i gat sampela senis mipela i mas mekim. Mipela i stori long sindaun bilong mipela na mipela i beten strong long dispela samting, na bihain mipela i wokim disisen long go bek long Kanada na bai Sheila i ken kisim gutpela helpim long sait bilong helt. Disisen mipela i mekim long lusim misineri asainmen na fultaim sevis bilong mipela em wanpela disisen i hatwok tru long mekim winim olgeta narapela disisen mipela i bin mekim long laip bilong mipela.

Taim mipela i go bek long Kanada, mi wok wantaim wanpela gutpela pren bilong mi husat i save salim ol kar long wanpela taun long hap not bilong Toronto. Mipela i rentim wanpela apatmen, baim ol olpela tebol na sia samting, na statim nupela laip bilong mipela na i no gat wok long mipela i kisim dinau. Mipela i laik holim liklik samting bilong skin na bai dispela i opim rot long mipela i ken kirap gen long insait long fultaim sevis long bihain. Tasol mipela i kirap nogut olsem i no longtaim na rot i op long mipela i ken mekim olsem.

Long ol Sarere, mi save volantia long helpim wok konstraksen bilong sanapim nupela Haus Kibung long Norval, Ontario. I no longtaim, ol i asainim mi long mekim wok olsem ovasia bilong Haus Kibung. Helt bilong Sheila i wok long kamap orait, so mipela i pilim olsem em inap long mekim dispela asainmen. Olsem na mipela i muv i go stap long apatmen bilong Haus Kibung long Jun 1974. Mipela i amamas tru long insait gen long fultaim sevis.

Samting i gutpela em olsem helt bilong Sheila i wok long kamap orait moa. Tupela yia bihain, mipela i tok orait long mekim wanpela asainmen long wok sekit. Dispela sekit i stap long Manitoba, em wanpela provins long Kanada we ples i save kol nogut tru long taim bilong winta. Tasol mipela i amamas tru long gutpela pasin laikim bilong ol bratasista long dispela hap. Mipela i kisim skul olsem maski yumi mekim wok bilong Jehova long wanem wanem hap, bikpela samting em long mekim yet wok bilong em long hap yumi stap long en.

LAINIM WANPELA BIKPELA LESEN

Bihain long mipela i mekim wok sekit inap sampela yia, long 1978 ol i invaitim mipela long go mekim wok long Kanada Betel. Bihain liklik, mi lainim wanpela bikpela lesen we i no sindaun gut wantaim mi. Ol i asainim mi long mekim wanpela tok long wanpela spesel miting long Montreal, na longpela bilong dispela tok em 1 na hap aua na mi mas mekim long tokples Frans. Sori tru olsem em hatwok long odiens i stap isi na putim yau long tok bilong mi, olsem na wanpela brata long Sevis Dipatmen i givim mi tok kaunsel long dispela. Long dispela taim, i gutpela sapos mi bin luksave olsem mi no gat gutpela pasin bilong mekim ol tok, em samting nau mi luksave long en. Tasol mi no amamas long kisim dispela tok kaunsel. Pasin na tingting bilong mi na dispela brata i no wankain. Mi pilim olsem em i sutim tok long mi na em i no tok amamas long mi. Popaia mi mekim em olsem mi tingim moa pasin dispela brata i bihainim long givim mi tok kaunsel na tingting mi gat long em, olsem na mi no kisim gut tok.

Sampela de bihain, wanpela brata long Brens Komiti i toktok wantaim mi long dispela samting. Mi tokaut olsem mi no mekim pasin i stret taim mi kisim tok kaunsel na mi tok sori long dispela. Bihain mi toktok wantaim brata husat i bin givim tok kaunsel long mi. Na long gutpela pasin em i fogivim mi. Dispela ekspiriens i skulim mi olsem em i bikpela samting long mekim pasin daun na mi no inap tru long lusim tingting long dispela. (Prov. 16:18) Mi bin beten long Jehova planti taim long dispela, na mi tingting strong olsem nau taim wanpela i givim tok kaunsel long mi, mi mas amamas long kisim.

Mi mekim wok long Kanada Betel winim 40 yia pinis, na kirap long 1985 na i kam, mi mekim wok long Brens Komiti. Long Februeri 2021, gutpela meri bilong mi Sheila i dai. Mi misim em tru, na tu, mi karim hevi long sait bilong helt bilong mi. Tasol mi bisi long mekim wok bilong Jehova na mi amamas tru, olsem na mi “no tingim tumas ol de . . . i wok long i kam na i go.” (Ekl. 5:20) Em tru olsem mi bungim sampela bikpela hevi long laip bilong mi, tasol amamas mi kisim i winim tru ol dispela hevi. Mi putim Jehova i stap nambawan long laip bilong mi na mi amamas long insait long fultaim sevis inap 70 yia na mi kisim planti gutpela blesing. Mi beten olsem ol yangpela brata na sista i mas wok yet long putim Jehova i stap nambawan long laip bilong ol tu, bikos mi bilip tru olsem ol tu bai amamas tru long kisim planti gutpela blesing taim ol i givim laip bilong ol long mekim wok bilong Jehova.