Mi Kisim Skul Long Ol Gutpela Eksampel na Mi Kisim Planti Blesing

Mi bon long Quebec City, long provins Quebec we ol man Kanada i save mekim tok Frans. Papamama bilong mi, Louis na Zélia, i laikim mi tru na ol i lukautim mi gut. Papa em man bilong sem na em i save amamas tru long rit. Mi save laik tru long raitim ol stori na mi laik kamap man bilong raitim nius.

Taim mi gat 12 krismas, Rodolphe Soucy, wanwok bilong Papa, em i kam wantaim wanpela pren bilong em long visitim mipela long haus. Ol i Witnes Bilong Jehova. Mi no klia tumas long ol Witnes ol i husat na mi no gat intres long lotu. Tasol mi laikim tru gutpela pasin bilong ol long yusim gut Baibel long bekim stret ol askim. Papamama tu i amamas long dispela pasin bilong ol, olsem na mipela i orait long ol i ken stadi wantaim mipela long Baibel.

Mi bin stap long wanpela Katolik skul. Wan wan taim mi save stori wantaim ol wanskul long ol samting mi lainim long Baibel stadi bilong mi. Bihain liklik, ol tisa—ol i stap tu olsem ol pris—ol i painimaut olsem mi save tokim ol wanskul long ol samting mi lainim. Wanpela tisa i sutim tok long mi long ai bilong ol wanklas olsem mi agensim lotu Katolik; tisa i no yusim ol Skripsa long pruvim olsem tok bilong mi i no stret. Dispela i putim bikpela presa long mi, tasol dispela i opim rot tu long mi inap luksave olsem skul i lainim mipela long ol tok i no stret wantaim tok bilong Baibel. Mi luksave olsem mi mas lusim dispela skul. Papamama i tok orait na mi go long narapela skul.

LAIN LONG LAIKIM WOK AUTIM TOK

Mi stadi yet long Baibel, tasol mi no winim ol mak bikos mi pret long autim tok long ol man long haus bilong ol. Misin Katolik i gat pawa long stiaim tingting bilong ol man na ol i agensim tru wok autim tok. Maurice Duplessis em primia bilong Quebec, na em i strongpela sapota bilong Misin Katolik. Em i kirapim ol manmeri long bung na pait long ol Witnes. Mipela i mas strongim bel tru na autim tok.

Wanpela brata husat i helpim mi long daunim pasin bilong pret em Brata John Rae, em i bin grediuet long namba 9 klas bilong Skul Gileat. John i gat planti ekspiriens, em man i gat pasin isi na pasin daun, na isi long toktok wantaim em. Em i no save kaunselim mi tumas, tasol mi kisim planti skul long gutpela eksampel bilong em. John i no save tumas long tok Frans, olsem na planti taim mi save poromanim em long autim tok na helpim em long lainim gut tok Frans. Mi lusim bikpela haptaim long raun wantaim John na dispela i strongim tingting bilong mi long kamap wanpela Witnes Bilong Jehova. Tenpela yia bihain long fes taim mi bungim ol Witnes, mi kisim baptais long Me 26, 1951.

Liklik kongrigesen bilong mipela long Quebec City i pulap long ol painia. Mi bihainim eksampel bilong ol na kamap painia. Mipela i save yusim tasol Baibel taim mipela i autim tok. Mipela i no gat ol litresa, olsem na mipela i mas yusim gut ol Skripsa. Mi traim bes long lainim gut ol skripsa na bai mi inap sambai long tok i tru. Maski i olsem, planti man i no inap ritim Baibel sapos Misin Katolik i no prinim tok orait bilong ol insait long Baibel.

Long 1952, mi maritim Simone Patry, em wanpela sista long kongrigesen bilong mi. Mitupela i go stap long Montreal. Insait long seim yia mipela i muv i go long hap, mipela i gat wanpela pikinini meri, Lise. Maski mi lusim wok painia paslain liklik long mitupela i marit, mitupela Simone i laik stap simpol na bai famili bilong mipela inap sapotim gut wok insait long kongrigesen.

Bihain long 10-pela yia, mi tingting strong long kirap gen long mekim wok painia. Long 1962, mipela ol elda i go long Skul Bilong Wok Kingdom long Kanada Betel inap wanpela mun, na mi stap rum-meit bilong wanpela brata, em Camille Ouellette. Camille i save givim bel tru long autim tok na dispela i kirapim tru tingting bilong mi, bikos em i gat wok long lukautim meri na ol pikinini bilong em. Long dispela taim bipo, wan wan bratasista long Quebec i mekim wok painia na lukautim pikinini long seim taim; tasol dispela em samting we Camille i mekim. Insait long haptaim mipela i stap rum-meit, em i kirapim mi long skelim gen sindaun bilong mi. Bihain long sampela mun, mi luksave olsem mi inap kirap gen long mekim wok painia oltaim. Sampela i laik bai mi skelim gen disisen bilong mi. Tasol mi no gat 2-pela tingting bikos mi bilip olsem Jehova bai blesim disisen bilong mi long mekim bikpela wok moa long autim tok.

GO BEK LONG QUEBEC CITY OLSEM SPESEL PAINIA

Long 1964, mitupela Simone i kisim nupela asainmen long mekim wok olsem spesel painia long Quebec City, em asples bilong mipela. Mipela i mekim wok long dispela hap inap sampela yia. Ol man i no birua tumas olsem long bipo, tasol mipela i bungim yet sampela hevi.

Long wanpela Sarere apinun, ol i arestim mi long Sainte-Marie, em liklik taun i stap klostu long Quebec City. Wanpela ofisa i kisim mi go long polis stesin na putim mi long kalabus bikos mi no kisim tok orait long autim tok. Bihain, ol i bringim mi go long wanpela jas, nem bilong em Baillargeon—ol man i save pret long em. Em i askim long loya bilong mi. Taim mi kolim Glen How,a em loya bilong ol Witnes na planti man i save long em, jas i pret na tok: “O no! Wai na em?” Glen How i gat nem long difendim ol Witnes. Kot i tokim mi olsem ol i no inap sasim mi.

Pasin birua i mekim na i hatwok long mipela inap painim ol gutpela ples bilong mekim miting. Liklik kongrigesen bilong mipela i painim wanpela olpela rum we ol i save putim kar long en. Long taim bilong winta, ol brata i save yusim hita-masin long hatim rum—masin i save wok long oil. Inap sampela aua paslain long miting i kirap, mipela i save bung na raunim dispela hita-masin na stori long ol gutpela ekspiriens bilong mipela.

Mi amamas tru long lukim ol gutpela samting i kamap long wok autim tok insait long ol yia i go pinis. Long ol yia namel long 1960 na 1970, i no gat planti kongrigesen long Quebec City, Côte-Nord, na Gaspé Peninsula. Long nau, i gat planti moa kongrigesen long ol dispela ples, na ol bratasista i save bung long ol naispela Haus Kingdom.

INVATESEN LONG MEKIM WOK SEKIT

Long 1970, mitupela Simone i kisim invatesen long mekim wok sekit. Long 1973, mipela i kisim asainmen long mekim wok distrik. Long ol dispela yia, mi kisim planti skul long ol brata i save wok hat, olsem Laurier Saumurb na David Splane,c tupela i bin mekim wok wasman raun. Bihain long olgeta kibung, mitupela David i save stori long olsem wanem mipela inap kamap gutpela moa long mekim wok tisa. Wanpela taim David i tokim mi: “Léonce, mi enjoim laspela tok bilong yu. Yu mekim gut, tasol mi inap yusim ol dispela referens long mekim 3-pela tok!” Taim mi mekim tok, mi save stori long planti samting tumas. Mi mas lain long stori long ol bikpela poin tasol.

Ol wasman distrik i gat wok long strongim ol wasman sekit. Tasol planti pablisa long Quebec i save gut long mi. Ol i save laik tru long autim tok wantaim mi taim mi visitim ol sekit. Mi amamas long autim tok wantaim ol, tasol mi no lusim bikpela haptaim tumas long raun wantaim wasman sekit. Wanpela taim, wanpela wasman sekit i rimaindim mi olsem: “Em nais olsem yu save yusim haptaim bilong yu long bung na toktok wantaim ol bratasista, tasol no ken lusim tingting olsem nau em wik bilong mi. Mi tu nidim tok bilong strongim mi!” Dispela gutpela tok kaunsel i helpim mi long bihainim stretpela tingting.

Sori tru olsem long 1976, wanpela hevi i painim mi. Gutpela meri bilong mi, Simone, i kisim bikpela sik na em i dai. Em i stap gutpela poroman bikos em i save tingim ol narapela na em i laikim tru Jehova. Mi bisi long mekim wok autim tok na dispela i helpim mi long karim hevi bilong krai sori, na mi pilim tru pasin laikim bilong Jehova long dispela taim bilong hevi. Bihain, mi maritim Carolyn Elliott, em strongpela painia sista na em i save mekim tok Inglis; em i kam long Quebec long sapotim wok autim tok. Carolyn i save amamas tru long helpim ol narapela, moa yet ol lain i save sem o ol i stap wanpis, na tu, em isi long ol narapela i toktok wantaim em. Em i stap olsem gutpela helpim bilong mi taim mipela i mekim wok distrik.

WANPELA SPESEL YIA

Long Janueri 1978, mi kisim asainmen long kamap tisa long fes Skul Bilong Wok Painia long Quebec. Mi tingting planti bikos mi no bin stap sumatin long dispela skul, so olgeta samting i nupela long mi. Long fes klas mi skulim, mi amamas olsem planti sumatin i bin mekim wok painia inap planti yia. Maski mi stap olsem tisa, mi kisim planti skul long ol sumatin!

Long 1978, Kibung Intenesenel, tim bilong en “Victorious Faith,” i kamap long Olimpik Stediam long Montreal. Winim 80 tausen manmeri i kam bung. Long Quebec, i no gat wanpela kibung long ol yia paslain i bikpela olsem dispela kibung. Mi kisim asainmen long wok wantaim Nius Sevis Dipatmen bilong kibung. Mi toktok wantaim planti niuslain na mi amamas tru long ritim ol nius ol i raitim; ol i mekim ol gutpela tok long ol Witnes. Ol i intaviuim mipela long TV na redio—taim mipela i bungim olgeta dispela minit na aua, em i winim 20 aua. Na tu, ol i pablisim planti handret atikol. Dispela i opim rot long mipela inap autim tok long planti manmeri moa!

ASAINMEN LONG NARAPELA TERITORI

Long 1996, bikpela senis i kamap. Stat long taim mi baptais, mi mekim wok long hap bilong Quebec we ol manmeri i save mekim tok Frans. Tasol nau asainmen i senis na mi bai mekim wok olsem wasman distrik long Toronto, em hap we ol manmeri i save mekim tok Inglis. Mi pilim olsem mi no fit na mi surik long mekim tok bikos mi no save tumas long tok Inglis. Olsem na mi beten planti taim na mi trastim tru Jehova.

Pastaim mi surik, tasol mi ken tokaut olsem mi enjoim stret dispela 2-pela yia mi mekim wok wasman long Toronto. Carolyn i no les kwik long helpim mi long lainim gut tok Inglis, na ol bratasista i sambai na strongim mi. Wantu mipela i kisim planti nupela pren.

Mi gat ol ekstra wok na mi mas redim ol samting bilong kibung bai kamap long wiken, tasol mi save lusim inap olsem 1-pela aua long olgeta Fraide apinun long visitim ol haus na autim tok. Ating sampela i tingting olsem, ‘Wai na em i go autim tok paslain tasol long kibung i kamap long wiken?’ Mi luksave olsem mi save kisim nupela strong taim mi autim tok. Long nau tu, mi save kisim bikpela amamas taim mi autim tok.

Long 1998, mitupela Carolyn i kisim nupela asainmen olsem ol spesel painia long Montreal. Inap planti yia, mi mekim tu wok bilong oganaisim ol spesel kempein bilong autim tok long ol pablik ples, na mi wok wantaim ol niuslain long stretim tingting kranki bilong ol man taim ol i sutim tok long ol Witnes Bilong Jehova. Long nau, mitupela Carolyn i amamas long autim tok long ol man bilong ol narapela ples em ol i kam stap long Kanada na ol i laik tru long kisim sampela save moa long Baibel.

Mi bin kisim baptais na mekim wok bilong Jehova winim 68 yia, na taim mi tingim ol wok mi bin mekim, mi pilim olsem mi kisim planti blesing. Mi amamas tru olsem mi lain long laikim wok autim tok na mi helpim planti manmeri long kisim save long tok i tru. Bihain long pikinini meri bilong mi, Lise, na man bilong em i mekim bikpela long ol pikinini bilong ol, tupela i kamap painia oltaim. Mi amamas long lukim olsem em i givim bel yet long autim tok. Mi tenkyu tru long ol wanbilip em gutpela eksampel na edvais bilong ol i helpim mi long kamap strong long bilip na mi inap mekim planti narapela narapela asainmen. Mi luksave olsem sapos yumi larim holi spirit bilong Jehova i helpim yumi, yumi inap stap gut long ol asainmen bilong yumi. (Sng. 51:11) Oltaim mi tok tenkyu long Jehova long em i givim mi spesel wok long preisim nem bilong em!—Sng. 54:6.