Mi Stap Bisi Insait Long Oganaisesen Bilong Jehova

Stori bilong Vernon Zubko

MI KAMAP bikpela long wanpela fam klostu long Stenen, em wanpela ples long provins Saskatchewan, long Kanada. Papamama bilong mi, Fred na Adella, i wok strong long lukautim mipela ol pikinini long ol samting bilong skin na spirit. Ol pikinini bilong ol em mi na bikpela susa bilong mi, Aurellia, wantaim tupela liklik brata na susa bilong mi, em Alvin, Allegra, na Daryl. I kam inap long nau, mipela i tenkyu tru long papamama i bin lainim mipela long tok i tru.

Papa em wanpela Kristen God i bin makim; em i man bilong autim tok na i no pret. Em i wok strong long lukautim mipela long kaikai samting, na em i kamapim klia long olgeta man olsem em i wanpela Witnes. Oltaim em i save toktok long tok i tru. Mi pilim tru pasin bilong em long wok strong na i no pret. Planti taim em i tokim mi, “Yu mas stap bisi insait long oganaisesen bilong Jehova na bai yu abrusim planti hevi.”

Planti taim mipela i autim tok long ol strit bilong Stenen na ol hap i stap klostu. Sampela taim dispela i hatwok long mi. Olgeta taun i gat ol bikhet mangi, em ol i save kam long mipela ol yangpela na tok bilas long mipela. Taim mi gat 8-pela krismas, wanpela taim mi sanap long wanpela kona na holim nius Wastaua na Kirap! na nau sampela yangpela i kam raunim mi. Ol i rausim nupela hat bilong mi long het na putim long wanpela sain pos i stap klostu long mi. Gutpela tru na wanpela brata i gat bikpela krismas i putim ai long mi na em i lukim samting i kamap. Em i kam na askim mi, “Vern, ol samting i orait?” Wantu ol mangi i ranawe. Maski dispela i bagarapim bel bilong mi liklik, dispela i lainim mi olsem taim yumi tilim nius long rot, yumi mas wokabaut i go na no ken sanap olsem wanpela pos. Kain skul olsem mi kisim taim mi wok long kamap bikpela, i strongim bel bilong mi long autim tok long ol haus tu.

Long Me 1951, mi na Alvin i kisim baptais. Mi gat 13 krismas long dispela taim. Mi tingim yet tok bilong Brata Jack Nathan, husat i bin mekim tok bilong baptais, em i tokim mipela long no ken tru larim wanpela mun i go nating na mipela i no tokim ol narapela long Jehova.a Long famili bilong mipela, olgeta taim mipela i tingim wok painia i olsem nambawan gutpela wok. Olsem na long 1958, bihain long mi pinisim skul, mi go stap long Winnipeg, Manitoba, bilong mekim wok painia. Maski papa i amamas long mi mekim wok wantaim em long famili bisnis olsem man bilong stretim timba, em na Mama i save strongim tru mi long mekim wok painia na ol i orait long mi go stap long Winnipeg.

Nupela Ples na Nupela Poroman

Long 1959, brens ofis i singautim ol bratasista long i go mekim wok long Quebec; dispela hap i sot tru long ol man bilong autim tok. Mi go mekim wok painia long Montreal. Em bikpela senis tru! Em nupela kain sindaun long laip bilong mi, mi mas lainim tokples Frans na lain long nupela pasin na sindaun. Wasman sekit bilong mipela i tokim mi olsem, “Yu no ken tru tok olsem, ‘Dispela em wei mipela i save mekim long ples.’” Dispela em gutpela skultok.​—1 Ko. 9:​22, 23.

Mi no gat painia poroman taim mi go sindaun long Quebec. Tasol wanpela yangpela sista, nem bilong em Shirley Turcotte, em mi bin bungim bipo long Winnipeg, em i kamap poroman bilong mi oltaim taim mipela i marit long Februeri 1961. Em tu i kamap bikpela insait long wanpela famili i laikim tru Jehova. Em i kamap gutpela poroman tru bilong strongim na helpim mi long ol yia i kam bihain, maski long dispela taim mi no bin tingim tumas dispela samting.

Raun Long Ol Hap Bilong Gaspé

Tupela yia bihain long mipela i marit, ol i makim mipela long mekim wok painia salim long Rimouski, Quebec. Long yia bihain, brens ofis i askim mipela long autim tok long hap bilong Gaspé, long nambis bilong hap is bilong Kanada. Brens i tokim mipela long planim planti pikinini kaikai bilong tok i tru. (Sav. 11:6) Mipela i putim long ka bilong mipela winim 1,000 magasin na klostu 400 buk, na sampela kaikai na klos, na kirapim raun bilong mipela long autim tok inap wanpela mun. Mipela i autim tok long olgeta liklik ples long Gaspé. Redio stesin bilong dispela hap i toksave long ol man olsem ol Witnes bai kam na ol man i no ken kisim ol buk na nius bilong mipela. Tasol planti manmeri i no kisim gut dispela toksave na ol i ting redio i edvetaisim ol buk bilong mipela, olsem na ol i kisim ol buk na nius.

Long dispela taim bipo long sampela hap bilong Quebec, pasin bilong stap fri long autim tok i nupela samting, na planti taim ol polis i stopim ol Witnes. Dispela samting i kamap long wanpela taun we mipela i tilim ol buk na nius long klostu olgeta haus. Wanpela polis i tokim mipela long i go wantaim em long polis stesin, na mipela i mekim olsem. Mi kisim save olsem loya bilong dispela taun i bin tokim ol polis long stopim mipela long autim tok. Bikman bilong ol polis i no bin stap long dispela de, olsem na mi soim loya wanpela pas i kam long brens ofis long Toronto, em dispela pas i stori long rait bilong mipela long autim tok. Taim loya i ritim pas pinis, kwiktaim em i tok: “Mi les long hevi. Pris i tokim mi long stopim yupela.” Mipela i laik bai ol man long teritori i save olsem wok bilong mipela i no brukim lo, olsem na wantu mipela i go bek long ples we polis i bin stopim mipela, na mipela i kirap gen long autim tok.

Neks moning taim mipela i go bek long lukim bikman bilong ol polis, em i kros taim em i harim olsem ol polis i bin stopim mipela. Em i ringim loya na i krosim em nogut tru! Ofisa i tokim mipela olsem sapos sampela i laik stopim mipela, orait mipela mas ringim em na em yet bai stretim hevi. Maski mipela i no bilong dispela hap na mipela i no save gut long tokples Frans, ol man i mekim gutpela pasin long mipela. Tasol mipela i tingting, ‘Ol bai kisim save long tok i tru?’ Sampela yia bihain, mipela i kisim bekim bilong dispela askim, taim mipela i go sanapim ol Haus Kingdom long hap bilong Gaspé. Mipela i kisim save olsem planti bilong ol man mipela i bin autim tok long ol, nau ol i brata bilong mipela. Tru tumas, Jehova i save mekim kaikai i kamap.​—1 Ko. 3:​6, 7.

Mipela i Kisim Gutpela Presen

Pikinini meri bilong mipela, Lisa, i bon long 1970. Dispela gutpela presen i kam long Jehova i mekim amamas bilong mipela i go bikpela. Shirley na Lisa i wok wantaim mi long konstraksen bilong planti Haus Kingdom. Taim Lisa i pinisim skul bilong em, em i tok: “Papa na Mama, mi mekim na yupela i bin lusim fultaim sevis inap sampela yia, olsem na mi laik inapim dispela haptaim long rot bilong kamap wanpela painia.” Winim 20 yia bihain, Lisa i mekim yet wok olsem wanpela painia, na nau em i wok painia wantaim man bilong em, Sylvain. Tupela i bin wok wantaim long planti konstraksen projek long ol narapela kantri. Famili bilong mipela i putim mak long mipela i no ken holim planti samting bilong skin na mipela i redi long mekim olgeta kain wok bilong Jehova. Mi no inap lusim tingting long tok Lisa i bin mekim taim em i kirap mekim wok painia. Lisa i kirapim mi long mekim gen wok fultaim sevis long 2001, na kirap long dispela taim na i kam, mi bin mekim wok painia. Wok painia i wok yet long skulim mi long bilip long Jehova long olgeta samting mi mekim, na long mi no ken bungim planti samting bilong skin na long stap amamas na belgut.

Ol Konstraksen Lain i Mas i Gat Pasin Laikim na Pasin Bilong Stap Gut Long God

Jehova i bin skulim mi olsem sapos yumi stap redi long mekim olgeta kain wok em i givim long yumi, bai yumi kisim planti blesing. Wok mi mekim long Komiti Bilong Wokim Ol Haus Kingdom na long ol konstraksen projek wantaim ol brata na sista long ol hap bilong Quebec na long ol narapela hap, i wanpela gutpela wok tru.

Maski sampela volantia i no mekim gut tumas ol tok long pletfom, ol i mekim gutpela wok tru long wok bilong sanapim ol Haus Kingdom. Ol dispela gutpela volantia i givim bel tru long mekim wok, na ol i gat gutpela save long mekim wok konstraksen. Oltaim wok ol i mekim i save kamapim naispela haus bilong lotuim Jehova long en.

Sampela i bin askim mi, “Ol volantia bilong sanapim ol Haus Kingdom i mas i gat wanem ol pasin?” Mi yet i lukim olsem, namba wan samting em ol i mas laikim tru Jehova na Pikinini bilong em, na ol bratasista tu. (1 Ko. 16:14) Namba tu, ol i mas i gat pasin bilong stap gut long God. Taim ol samting i no kamap olsem yumi laikim​—na dispela bai kamap​—man i stap gut long God bai bihainim yet tok bilong oganaisesen, na em bai volantia yet long insait long ol narapela projek i kamap bihain.

Tenkyu Tru Long Jehova

Maski papa bilong mi i dai long 1985, gutpela tok bilong em long mi mas stap bisi insait long oganaisesen bilong Jehova i stap yet long tingting bilong mi. Olsem ol narapela husat i kisim pinis wok bilong ol long oganaisesen bilong Jehova long heven, mi save papa bilong mi tu i stap bisi na mekim wok long heven. (KTH 14:13) Mama i gat 97 krismas. Em i bin kisim sik strok, olsem na em i no inap toktok gut olsem bipo, tasol em i save yet long Baibel. Em i save raitim tok bilong ol skripsa long ol pas bilong em na strongim mipela long stap gut long wok bilong Jehova. Mipela ol pikinini i tenkyu tru long mipela i gat gutpela papamama olsem!

Mi tenkyu tu long Jehova long Shirley, em gutpela meri na poroman bilong mi. Em i save tingim gutpela tok mama bilong em i bin mekim long em, olsem: “Vern bai stap bisi insait long tok i tru, olsem na yu mas lain long larim em i wok wantaim ol narapela long mekim ol wok tiokratik.” Taim mipela i marit long 49 yia i go pinis, mipela i bin pasim tok olsem mipela bai kamap lapun wantaim, mekim wok bilong Jehova wantaim, na sapos mipela i abrusim bagarap long taim pasin bilong dispela graun i pinis, orait mipela bai kamap yangpela gen wantaim na wok yet long mekim wok bilong Jehova inap oltaim oltaim. Yes, mipela i gat “planti wok bilong Bikpela” bilong mekim. (1 Ko. 15:​58, NW) Jehova i bin lukautim gut mipela, olsem na mipela i no bin sot long wanpela gutpela samting.

[Futnot]

[Piksa long pes 31]

“Famili bilong mipela i putim mak long mipela i no ken holim planti samting bilong skin na mipela i redi long mekim olgeta kain wok bilong Jehova”